ශ්රේෂ්ඨාධිකරණය සහ අභියාචනාධිකරණයේ විනිසුරුවරුන්ගේ විශ්රාම වයස දීර්ඝ කිරීම සඳහා ව්යවස්ථා සංශෝධනයක් සිදු නොකරන ලෙස කොළඹ නීති සංගමය (Colombo Law Society – CLS) ජනාධිපති අනුර කුමාර දිසානායක මහතාගෙන් ඉල්ලා ඇත.
ජූලි 2 වෙනිදා ජනාධිපතිවරයාට ලිපියක් යොමු කරමින් සිය ස්ථාවරය දැනුම් දී ඇති අතර එම ලිපිය මඟින් කොළඹ නීති සංගමය පවසා ඇත්තේ උසස් අධිකරණ විනිසුරුවරුන්ගේ විශ්රාම වයස ඉහළ දැමීම පිළිබඳ වාර්තා වන යෝජනාව සම්බන්ධයෙන් තමන් දැඩි කනස්සල්ලෙන් පසුවන බවය.
තවද මෙම කාරණය සම්බන්ධයෙන් මීට පෙර ශ්රී ලංකා නීතිඥ සංගමය (BASL) ප්රකාශ කළ ස්ථාවරයටද තම සම්පූර්ණ සහාය පළ කරන බව කොළඹ නීති සංගමය ලිපියේ සඳහන් කර ඇත.
ඉහළ අධිකරණ විනිසුරුවරුන් විසින් මෙරට යුක්තිය පසිඳලීමේ ක්ෂේත්රයට සිදුකර ඇති සේවය ඉතා වටිනා බව පිළිගන්නා නමුත් ව්යවස්ථාවෙන් නියම කර ඇති විශ්රාම වයස වෙනස් කිරීම වැනි තීරණ ගනු ලැබිය යුත්තේ අදාළ සියලු පාර්ශ්ව සමඟ පුළුල් සාකච්ඡාවකින් පසුව සහ ඉතා සැලකිල්ලෙන් බව එම සංගමය ලිපියේ අවධාරණය කර ඇත.
1978 ආණ්ඩුක්රම ව්යවස්ථාව ක්රියාත්මක වූ දා සිට ශ්රේෂ්ඨාධිකරණය සහ අභියාචනාධිකරණයේ විනිසුරුවරුන්ගේ විශ්රාම වයස වෙනස් කර නොමැති බවත් එවැනි දිගුකාලීන ව්යවස්ථාමය රාමුවක් දැනට සේවයේ නියුතු විනිසුරුවරුන්ට බලපාන අයුරින් වෙනස් කිරීම මඟින් අධිකරණයේ ස්වාධීනත්වය සහ අපක්ෂපාතීත්වය පිළිබඳ මහජන විශ්වාසය පළුදු කළ හැකි බවට ජනතාව තුළ සංවේදී මතයක් ඇති කළ හැකි බවද කොළඹ නීති සංගමය ලිපිය මඟින් පෙන්වා දී ඇත.
ඒ අනුව නීති වෘත්තියේ පාර්ශ්ව විසින් ඉදිරිපත් කර ඇති කරුණු පිළිබඳව පූර්ණ අවධානය යොමු කරමින් ශ්රේෂ්ඨාධිකරණය සහ අභියාචනාධිකරණයේ විනිසුරුවරුන්ගේ විශ්රාම වයස දීර්ඝ කිරීම සඳහා ව්යවස්ථා සංශෝධනයක් ඉදිරිපත් කිරීමෙන් වළකින ලෙස එම සංගමය ජනාධිපතිවරයාගෙන් ඉල්ලා ඇත.
