හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ ශ්රී ලංකා නාවික හමුදාවට බඳවා ගැනීම සම්බන්ධයෙන් සිදු කෙරෙන විමර්ශනයකට අදාළව හිටපු නාවික හමුදාපති වසන්ත කරන්නාගොඩ මහතාව අල්ලස් හෝ දූෂණ චෝදනා විමර්ශන කොමිෂන් සභාව (CIABOC) විසින් අත්අඩංගුවට ගෙන ඇත.
මෙම අත්අඩංගුවට ගැනීම සිදු කර ඇත්තේ නාවික හමුදාවේ විධායක නිලධාරීන් බඳවා ගැනීම සඳහා පවතින සුදුසුකම් යෝෂිත රාජපක්ෂ මහතා බඳවා ගැනීමට පහසු වන පරිදි වෙනස් කළ බවට එල්ල වී ඇති චෝදනා සහ යෝෂිත රාජපක්ෂ මහතා එවක එක්සත් රාජධානියේ Britannia Royal Naval College හි පුහුණුව සඳහා සහභාගී කරවීම වෙනුවෙන් රාජ්ය මුදල් අවභාවිත කළ බවටද විමර්ශනවලදී කරන්නාගොඩ මහතාට චෝදනා එල්ල වී ඇත.
අදාළ විමර්ශනය සම්බන්ධයෙන් ප්රකාශයක් සටහන් කර ගැනීම සඳහා වසන්ත කරන්නාගොඩ මහතාට පසුගිය ජුනි 16 වැනිදා අල්ලස් කොමිසම හමුවේ පෙනී සිටින ලෙස දැනුම් දී තිබුණද විධිමත් කැඳවීමක් තමන්ට ලැබී නොමැති බව පවසමින් ඔහු එදින පෙනී නොසිට ඇත.
එම විමර්ශනයට අදාළව යෝෂිත රාජපක්ෂ මහතා පසුගිය ජුනි 17 වැනිදා අත්අඩංගුවට ගෙන අධිකරණයට ඉදිරිපත් කර තිබුණු අතර රුපියල් මිලියන 5 බැගින් වූ පුද්ගලික ශරීර ඇප තුනක් මත පසුව යෝෂිත රාජපක්ෂ මහතාව මුදා හැරීමට අධිකරණය නියෝග කර තිබුණි.
