ශ්රේෂ්ඨාධිකරණය සහ අභියාචනාධිකරණයේ පවතින පුරප්පාඩු පිරවීම ප්රමාද කිරීම සහ එම අධිකරණවල විනිසුරුවරුන්ගේ විශ්රාම වයස වසර දෙකකින් දීර්ඝ කිරීමට රජය සූදානම් වන බවට පළවන වාර්තා සම්බන්ධයෙන් දැඩි කනස්සල්ල පළ කරන බව ෆ්රී ලෝයර්ස් ශ්රී ලංකා සංවිධානය නිවේදනයක් නිකුත් කරමින් පවසා ඇත.
ෆ්රී ලෝයර්ස් ශ්රී ලංකා සංවිධානය ජුලි 02 වන දින නිකුත් කළ අදාල නිවේදනයේ දක්වා ඇත්තේ ශ්රේෂ්ඨාධිකරණයේ සහ අභියාචනාධිකරණයේ පුරප්පාඩු හතරක් මාස හයකට වැඩි කාලයක් පුරා පවතින බවත්, එම තත්ත්වය හේතුවෙන් නඩු විභාග ප්රමාද වීම, දැනට සේවයේ නිරත විනිසුරුවරුන්ගේ කාර්යභාරය ඉහළ යෑම සහ ව්යවස්ථාමය මෙන්ම අභියාචනා නඩු කඩිනමින් විභාග කිරීම අඩාල වී ඇති බවය.
පහළ අධිකරණවල පුරප්පාඩු පිරවීම වැදගත් වුවද ඒ හේතුව පෙන්වමින් ඉහළ අධිකරණවල පුරප්පාඩු පිරවීම ප්රමාද කිරීම සාධාරණීකරණය කළ නොහැකි බවත් නිවේදනයේ සඳහන් කර ඇත.
වත්මන් රජය පවසන පරිදි ශ්රේෂ්ඨාධිකරණයේ සියලු ධුර එකවර පිරවීම අත්යවශ්ය නොවන බවට සහ වත්මන් නඩු බර හේතුවෙන් හදිසි අවශ්යතාවක් නොමැති බවට වන මතය තම සවිධානය ප්රතික්ෂේප කරන බවත් ඉහළ අධිකරණවල ඇති පුරප්පාඩු කිහිපයකින් වුවද අධිකරණ පද්ධතියේම ප්රමාදයන් සහ තීරණාත්මක නඩු විභාගවල ප්රමාදයන් ඇති කරන බවය.
විනිසුරුවරුන්ගේ විශ්රාම වයස ශ්රේෂ්ඨාධිකරණය සඳහා අවුරුදු 65 සිට 67 දක්වාත්, අභියාචනාධිකරණය සඳහා අවුරුදු 63 සිට 65 දක්වාත් දීර්ඝ කිරීමේ යෝජනාව පිළිබඳවද එම සංවිධානය නිවේදනය හරහා විරෝධය පළ කර තිබේ.
එම යෝජනාව මගින් උසස්වීම් සම්බන්ධ ගැටලු විසඳෙන්නේ නැති බවත් දැනට උසස්වීම් අපේක්ෂාවෙන් සිටින විනිසුරුවරුන්ටද එම ගැටලුවම තවදුරටත් පවතිනු ඇති බව එහි සඳහන් කර ඇත. එසේම ව්යවස්ථා සංශෝධනයක් මගින් විශ්රාම වයස දීර්ඝ කිරීම සේවයේ නිරත විනිසුරුවරුන්ට ලබාදෙන ප්රතිලාභයක් ලෙස ජනතාවට හැඟී යා හැකි බැවින් අධිකරණයේ ස්වාධීනත්වය සහ මහජන විශ්වාසය කෙරෙහි බලපෑමක් ඇති විය හැකි බවද නිවේදනයේ දක්වා ඇත.
අධිකරණයේ ස්වාධීනත්වය සම්මුතියට ලක් කළ නොහැකි මූලධර්මයක් බවත්, විනිසුරුවරුන්ගේ පත්වීම් ප්රමාද කිරීම සහ දේශපාලනිකව සංවේදී අවස්ථාවක සේවා කාලය දීර්ඝ කිරීම නීතියේ ආධිපත්යයට සහ ජනතාවගේ යුක්තියට ඇති මූලික අයිතියට හානියක් වන බවත් එම සංවිධානය වැඩිදුරටත් නිවේදනයේ සඳහන් කර ඇත.
