No menu items!
21.5 C
Sri Lanka
17 June,2024

කම්කරු අමාත්‍යාංශයට අයත් WP KY 1649 ජීප් රථය රංගේ බණ්ඩාර ගේද?

Must read

බම්බලපිටියේ හැප්පුණා කියා වන්දි ගන්න රක්ෂණයට දාලා
අනතුරේ හානි පරණයි කියා වන්දි ප්‍රතික්ෂේප කරලා

ඩයනා ගමගේ හිටපු රාජ්‍ය ඇමතිවරිය සම්බන්ධයෙන් මැයි 15 වැනිදා වන විට පළවුන අලුත්ම ප්‍රවෘත්තිය වූයේ ඇය විසින් පරිහරණය කළ වාහන තුනක් යළි රජයට ලබාදුන් බවයි. ඇය පරිහරණය කළ රජයට අයත් වාහන තවත් තිබෙනවාද නැද්ද යන්න පැහැදිලි නැතත්, ඇය වාහන තුනක් රජයට බාර දුන්නා යන්නෙන් තවත් දෙයක්ද ගම්‍ය වේ. ඒ ඇය සතුව තවත් රජයේ වාහන ඇතිය යන්නයි. ඇය සතුව තවත් රජයේ වාහන ඇත්ද නැද්ද යන්න පසෙකට තබා ඇය විසින් රජයට බාරදුන් වාහන තුන ගැන අවධානය යොමු කළහොත් පෙනෙන දෙය වන්නේ ඇමති හෝ රාජ්‍ය ඇමති පට්ටම් හොබවන එක් දේශපාලකයෙකුගේ පරිහරණය සඳහා රජයෙන් වාහන එකක් නොව කිහිපයක් ලබාදෙන බවය. එසේ එක් පුද්ගලයෙකුගේ පරිහරණය සඳහා රජයෙන් වාහන කිහිපයක් ලබාදෙන ලෝකයේ එකම රට සමහරවිට ශ්‍රී ලංකා නම් ණය ගෙවා ගැනීමට පවා බැරිව ආර්ථික වශයෙන් බංකොලොත් වී ඇති මේ පුණ්‍ය භූමිය විය හැකිය.

මේ කියන්නට යන්නේත් එවැනි වාහන අවභාවිතයක් ගැනය. කම්කරු හා විදේශ රැකියා අමාත්‍යාංශයට අයත් උඡ ණශ 1649 දරන වාහනය මැයි 07 වැනිදා කොළඹ බම්බලපිටිය ප්‍රදේශයේදී අනතුරකට ලක්වුණා යැයි කියමින් එම වාහනය රක්ෂණය කර ඇති එම්බීඑස්එල් ඉන්ෂුවරන්ස් කොම්පැණි ලිමිටඩ් වෙත වන්දි ලබා ගැනීම සඳහා යොමු කර තිබේ. එම වාහනයට සිදුවූ අලාභානි අලුත්වැඩියා කිරීම සඳහා ආසන්න පිරිවැය වශයෙන් රුපියල් ලක්ෂ 2ක මුදලක් ඉල්ලුම්කර ඇති අතර එම රක්ෂණ සමාගමේ පරීක්ෂකයින් එම මුදල් ගෙවීම අනුමත කර නැත. ඒ සිදුවූවා යැයි කියන අනතුරෙන් වාහනයට සිදුවී ඇති හානිය පරණ එකක් වීම නිසාය. වාහනයේ අනතුර සිදුවූ ස්ථාන මලකඩ බැඳී තිබීම එයට හේතුවය.

රක්ෂණ ආයතනය වෙත මෙම වාහනයේ රියැදුරු ලෙස කෝට්ටේගංගොඩ තලපිටිගොඩ වසන්ත ප්‍රේමකුමාර යන අය ඉදිරිපත් කර ඇති අතර රියැදුරු බලපත්‍රයේ තොරතුරු අනුව ඔහුගේ ලිපිනය වන්නේ සිදුරුපිටිය පාර නිවිතිගලය. 1974.10.27 දින උපන් දිනය ලෙස සඳහන් වන ඔහුගේ ජාතික හැඳුනුම්පත් අංකය 743010094 v වේ.

එහෙත් අපට ලැබී ඇති තොරතුරු අනුව කම්කරු හා විදේශ රැකියා අමාත්‍යාංශයට අයත් මෙම වාහනය අවසන් වරට අනතුරට ලක්වී ඇත්තේ නුවරඑළිය ලබුකැලේ ප්‍රදේශයේදීය. ඒ මැයි 05 වැනි ඉරිදාය. ලැබී ඇති තොරතුරු අනුව මෙම වාහනය පෞද්ගලික බස් රථයක් සමග ගැටී අනතුරට ලක්වී ඇති අතර ඒ පිළිබඳ පැමිණිල්ලක් යොමු කිරීමට කටයුතු කර නැත. ඒ එම වාහනය ඒ සඳහා හිමිකමක් නැති දේශපාලනඥයෙකු භාවිත කරමින් සිටීමත්, අනතුර සිදුවන අවස්ථාවේ එම වාහනයේ නිල රියැදුරා එහි නොසිටීමත් නිසාය. එහෙත් පොලිස් නිලධාරින් එම අවස්ථාවේ සම්බන්ධ වී ඇති බවට අපට ලැබී ඇති ඡායාරූප සාක්ෂි දරයි. අපට වාර්තා වී ඇති පරිදි අවසන එහි සිදුවී ඇත්තේ පෞද්ගලික බස් රථයෙන් හානි පූර්ණය සඳහා යම් මුදලක් බලය පෙන්වා ලබා ගැනීම පමණී.

අපට ලැබී ඇති ඡායාරූප අනුව එම වාහනය නුවරඑළිය ප්‍රදේශයේ අනතුරට ලක්වීමෙන් පසු සිදුකරන පරීක්ෂා කිරීමේදී ඒ අසල එක්සත් ජාතික පක්ෂයේ මහ ලේකම් පාලිත රංගේ බණ්ඩාර සිටියි. මෙය අහම්බයක් විය නොහැකිය. එක්සත් ජාතික පක්ෂයේ මහ ලේකම් පාලිත රංගේ බණ්ඩාර හා මෙම වාහනයට සම්බන්ධයක් තිබිය යුතුය. අපට ලැබී ඇති තොරතුරු අනුව මෙම වාහනය කම්කරු හා විදේශ රැකියා ඇමති මනූෂ නානායක්කාර විසින් එක්සත් ජාතික පක්ෂ මූලස්ථානය වන සිරිකොතේ පරිහරණය සඳහා ලබාදී ඇති අතර එය පරිහරණය කරනු ලබන්නේ එහි මහ ලේකම් පාලිත රංගේ බණ්ඩාර විසින්ය. නුවරඑළිය ප්‍රදේශයේ අනතුර සිදුවන අවස්ථාවේදී රක්ෂණ හිමිකම් ලබාගැනීම සඳහා ඉදිරිපත් කර ඇති එහි නිල රියැදුරු එහි සිට නැති අතර ඔහු එදින සිට ඇත්තේ නිවාඩු පිටය.

පසුව කොළඹට විත් රක්ෂණ හිමිකම් සඳහා එම රියැදුරු සමග ඉදිරිපත් කර තිබේ. දැන ගන්නට ඇති පරිදි මීට මාසයකට පමණ පෙරද එම වාහනය අනතුරකට ලක්වී තිබේ. එදිනද වාහනයේ රියැදුරු සිට නැත. රක්ෂණ වන්දි සඳහා ඉදිරිපත් කිරීමේදී අනතුරට ලක්වූ ස්ථාන මලකඩ කා ඇති බවට පරීක්ෂකයින්ට අනාවරණය වී ඇත්තේ සමහරවිට එම පරණ අනතුරු ස්ථානද නිසා විය හැකිය.කෙසේ වෙතත් මේ සම්බන්ධයෙන් අප රංගේ බණ්ඩාර මහතාගෙන් විමසීමක් කළ අතර ඔහු ගමන්ගත් වාහනයක අනතුරක් සිදු නොවූ බව ඔහුගේ මුල්ම පිළිතුර විය. වැඩිදුරටත් ප්‍රශ්න කිරීමේදී ඔහු පිළිගත්තේ රියැදුරු වාහනය නතර කර තිබූ අවස්ථාවකදී බම්බලපිටිය ප්‍රදේශයේදී අනතුරක් සිදුවී ඇති බවත්, ඒ පිළිබඳව රාජකාරි කටයුතු සිදුකර ඇති බවත්ය. එමෙන්ම එම අවස්ථාවේදී එම වාහනයේ ඔහු නොසිටි බවත්ය.

එසේ අනතුර පිළිගත් ඔහුගේ කතාව වෙනස් වූයේ එම වාහනය ඔහුගේ වාහනයක්ද රජයේ වාහනයක්ද යන්න විමසූ විටය. ඔහු පිළිතුර මාරු කරන්නට පටන් ගත්තේය. ඔහුට වාහනයක් පවා නැති බව කීවේය. වාහන අනතුර රියැදුරුගේ මෝටර් බයිසිකල් අනතුරක් බවට පත්විය. (ඔහුගෙන් ප්‍රශ්න කිරීමට අදාළ දළ විස්තරයක් මෙහි වෙනම දැක්වේ.) හිටපු පොලිස් නිලධාරියෙකු නිසාත් මේ වනවිට දේශපාලනයෙන් තෙම්පරාදු වී සිටින නිසාත් මුලින් දුන් පිළිතුරු නිසා ඔහු යම් අමාරුවක වැටී ඇති බව පසුව ඔහුට තේරුම් යන්නට ඇත. පිළිතුරු මාරු වූයේ ඒ නිසාය. ඔහු සමග කළ සංවාදය ඒ ආකාරයට අවසන් කරන්නට සිදු වූයේ ඡායාරූප සාක්ෂි පිළිබඳ විමසීම් කිරීමට පෙරය.

ඇත්ත සැඟවිය නොහැකි අතර එය කවදා හෝ එළියට ඒම සිදුවේ. මැයි 05 වැනිදා නුවරඑළිය අනතුර සිදුවූ ස්ථානයේ සිටි පොලිස් නිලධාරීන් මෙන්ම මෙම වාහනයේ සැබෑ රියැදුරාද ඒ පිළිබඳව සිදුකරන සැබෑ පරීක්ෂණයක සාක්ෂිකරුවන්ය. මෙම සිද්ධියේ ඇත්තේ රාජ්‍ය දේපළ අවභාවිත කිරීමකි. එය සිදුකර ඇත්තේ ජනාධිපතිවරයාගේ පක්ෂයේ මහ ලේකම්වරයාය. ඔහුට ඒ සඳහා ආධාර අනුබල දී ඇත්තේ කම්කරු හා විදේශ රැකියා ඇමති මනූෂ නානායක්කාරය. එසේ නොවේ නම් කම්කරු හා විදේශ රැකියා අමාත්‍යාංශයේ වාහනයක් එක්සත් ජාතික පක්ෂ මහ ලේකම්ගේ පරිහරණයට ලැබිය නොහැකිය. මේ ආකාරයට තවත් රජයේ වාහන ඒවාට හිමිකම් නැති දේශපාලන පක්ෂවල තනතුරුලාභීන්ගේ පරිහරණය සඳහා යොදවා තිබෙනවා විය හැකිය. දූෂණයෙන් තොර අලුත් රටක් හැදීම සඳහා රටේ ජනතාවට ගිරිය පුප්පාගෙන පොරොන්දු දෙන්නේ මෙවැනි උදවියය.

මම ඉන්න වේලාවක එකක් නෙමේ නතර කරලා තියෙනකොට හප්පන් ගිහිල්ලා තියෙන්නේ – රංගේ බණ්ඩාර

ප්‍රශ්නය: ඔබගේ වාහනයක් ඇක්සිඩන්ට් වුණා කියලා අපිට ආරංචියක් ආවා
පිළිතුර: වාහනයක්?
ප්‍රශ්නය: ඔබ පාවිච්චි කරන වාහනයක් ගෝල් රෝඩ් එක පැත්තේ ඇක්සිඩන්ට් වුණාද දවස් කිහිපයකට ඉස්සරින්
පිළිතුර: නැහැ
ප්‍රශ්නය: ඔබ පාවිච්චි කරන 1649 ජීප් එක
පිළිතුර: තේරුණේ නැහැ මට
ප්‍රශ්නය: ඔබ පාවිච්චි කරන 1649 ජීප් එක ඇක්සිඩන්ට් එකක් වුණාද
පිළිතුර: ආ ඔය කියන්නේ ඩ්‍රයිවර් නතර කරලා තියෙද්දී බම්බලපිටිය පැත්තේ වෙච්ච ඇක්සිඩන්ට් එකද
ප්‍රශ්නය: විශේෂ එකක් නෙමේද
පිළිතුර: මම ඉන්න වේලාවක එකක් නෙමේ නතර කරලා තියෙනකොට හප්පන් ගිහිල්ලා තියෙන්නේ ඇයි මොකක්ද තියෙන ප්‍රශ්නය
ප්‍රශ්නය: නැහැ ඔබ තුමා පක්ෂයක එක්කෙනෙක්නේ
පිළිතුර: ඕක පරණ සිද්ධියක්නේ
ප්‍රශ්නය: පරණ නෙමේ ගිය සුමානේ ගිය සුමානේ 7 වෙනිදා විතර සතියක විතර ඉස්සර තමයි වෙලා තියෙන්නේ බම්බලපිටිය පොලිසිය පැත්තෙන් අපිට
පිළිතුර: මට ඒකේ දින වකවානු මතක නැහැ ඩ්‍රයිවර් තමයි කිව්වේ මොකක්ද ඇක්සිඩන්ට් එකක් වුණා ඒකේ රාජකාරි කළා කියලා
ප්‍රශ්නය: ඒ වාහනය ඔබගේ වාහනයක්ද රජයට අයිති වාහනයක්ද
පිළිතුර: මොන වාහනයද මගේ වාහනය මම දුවනවා මගේ දුවන වාහනය මුකුත් ප්‍රශ්නයක් නැහැ මම දුවනවා මොකක්ද ලසන්ත වහෙන් ඔරෝ නැතිව
ප්‍රශ්නය: මම ඇහැව්වේ බම්බලපිටියේ ඇක්සිඩන්ට් එකක් වෙලා තියෙනවා ඔබ දුවන වාහනය
පිළිතුර: මගේ වාහනය ඇක්සිඩන්ට් වෙලා නැහැ මම දැනුත් දුවනවා
ප්‍රශ්නය: ඔබ ඉස්සරින් කිව්වේ මම හිටියේ නැහැ ඩ්‍රයිවර් හිටියේ කියලා ඇක්සිඩන්ට් එකක් වෙලා තියෙනවා කියලා
පිළිතුර: මගේ එකක් නෙමේ මගේ වාහනයක් ඇක්සිඩන්ට් වෙලා නැහැ
ප්‍රශ්නය: එහෙනම් මම හිටියේ නෑ ඩ්‍රයිවර් තමයි හිටියේ කියලා කිව්වේ
පිළිතුර: මගේ එකක් ඇක්සිඩන්ට් වෙලා නැහැ
ප්‍රශ්නය: ඔබගේ පෞද්ගලික ඩ්‍රයිවර් වෙන වාහනයක ගිහිල්ලද
පිළිතුර: මට මේ මේ මේ ඔයාගේ ප්‍රශ්නය තේරුම් ගන්න .. මොන ඇක්සිඩන්ට් එකක්ද කියලා මම නම් හිටියේ නැහැ ඩ්‍රයිවර් තමයි හිටියේ මම හිටියේ ඒ අපේ ඩ්‍රයිවර්ගේ මෝටර් සයිකලය ඒකද අහන්නේ
ප්‍රශ්නය: නැහැ මම අහන්නේ ජීප් එක ගැන
පිළිතුර: මගේ ජීප් එක විකුණලා ගොඩක් කල්
ප්‍රශ්නය: පාවිච්චි කරනවනේ 1649 ජීප් එකක්
පිළිතුර: නැහැ නැහැ ඔයාට වැරදිලා

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි