යෝජිත වන 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතේ ව්යවස්ථානුකූලභාවය අභියෝග කරමින් අගෝස්තු 19 දින වන විට ශ්රේෂ්ඨාධිකරණයට පෙත්සම් හයක් ඉදිරිපත් කර තිබේ.
ශ්රී ලංකා නීතිඥ සංගමය, සමගි ජන බලවේගය, සර්වජන බලය, මහාචාර්ය ජී.එල්. පීරිස් සහ ෆ්රී ලෝයර්ස් සංවිධානය ඇතුළු පාර්ශ්ව විසින් මෙම පෙත්සම් ඉදිරිපත් කර තිබේ.
එම පෙත්සම් අතරින් පළමු පෙත්සම ශ්රී ලංකා නීතිඥ සංගමය විසින් ගොනු කරනු ලැබීය. ශ්රී ලංකා නීතිඥ සංගමයේ භාණ්ඩාගාරික ටී.එම්.එස්. පසිඳු සිල්වා සහ එහි අතිරේක ලේකම් එල්.අයි. වාකිෂ්ඨආරච්චි යන මහත්වරුන් විසින් එම පෙත්සම ඉදිරිපත් කර ඇති අතර එහි වගඋත්තරකරු ලෙස නීතිපතිවරයා නම් කර තිබේ.
22 වැනි ආණ්ඩුක්රම ව්යවස්ථා සංශෝධන පනත් කෙටුම්පත මගින් ආණ්ඩුක්රම ව්යවස්ථාවේ තුන්වැනි ව්යවස්ථාවෙන් තහවුරු කර ඇති ජනතා පරමාධිපත්යයට සෘජුවම බලපෑම් එල්ල වන බව පෙත්සම්කරුවන් පෙන්වා දී ඇත.එමෙන්ම යෝජිත සංශෝධනයේ දෙවැනි වගන්තිය මගින් ආණ්ඩුක්රම ව්යවස්ථාවේ 107(5) ව්යවස්ථාව සංශෝධනය කිරීමෙන් අධිකරණ ස්වාධීනත්වයට බලපෑම් එල්ල වන බවද පෙත්සමේ සඳහන් කර තිබේ.
ශ්රී ලංකා අධිකරණ සේවා සංගමය, මහානායක හිමිවරුන්, පොදුරාජ්ය මණ්ඩලීය නීතිඥ සංගමය, LAWASIA, ජාත්යන්තර විනිසුරු සංගමය, විනිසුරුවරුන්ගේ සහ නීතිඥයින්ගේ ස්වාධීනත්වය පිළිබඳ එක්සත් ජාතීන්ගේ විශේෂ වාර්තාකරු මාග්රට් සැටර්ත්වේට් සහ ප්රංශ ජාතික නීතිඥ මණ්ඩලය ඇතුළු දේශීය හා ජාත්යන්තර සංවිධාන ගණනාවක් යෝජිත සංශෝධනය සම්බන්ධයෙන් විරෝධතා පළ කර ඇති බවද පෙත්සම්කරුවන් පෙන්වා දී තිබේ.
ඒ අනුව ශ්රේෂ්ඨාධිකරණයේ සියලු විනිසුරුවරුන් අසුන්ගෙන පනත් කෙටුම්පතේ ව්යවස්ථානුකූලභාවය සම්බන්ධයෙන් තීන්දුවක් ලබාදෙන ලෙසත් පනත් කෙටුම්පතේ දෙවැනි සහ තුන්වැනි වගන්ති සම්මත කිරීමට නම් ඒවා ජනමත විචාරණයකින් අනුමත කළ යුතු බවට තීන්දුවක් ලබාදෙන ලෙසත් ශ්රී ලංකා නීතිඥ සංගමය තම පෙත්සම මඟින් ඉල්ලා ඇත.
මේ අතර සමගි ජන බලවේගයද අද 22 වැනි ආණ්ඩුක්රම ව්යවස්ථා සංශෝධනයට එරෙහිව ශ්රේෂ්ඨාධිකරණය හමුවේ පෙත්සමක් ගොනු කර තිබිණි. ආණ්ඩුක්රම ව්යවස්ථාවට සිදුකරන ඕනෑම සංශෝධනයකදී රටේ ප්රජාතන්ත්රවාදී ව්යුහය, බලතල බෙදීම සහ ජනතා අයිතිවාසිකම් කෙරෙහි ඇති විය හැකි බලපෑම් පිළිබඳව ගැඹුරින් සලකා බැලිය යුතු බව එම පෙත්සම මගින් පෙන්වා දී ඇත.
සර්වජන බලයද අගෝස්තු 19 දින 22 වැනි සංශෝධනයට එරෙහිව ශ්රේෂ්ඨාධිකරණයට පෙත්සමක් ගොනු කර තිබිණු අතර අධිකරණ හා ව්යවස්ථා කටයුතු පිළිබඳ හිටපු අමාත්යවරයකු වන මහාචාර්ය ජී.එල්. පීරිස් මහතාද පෙත්සමක් ගොනු කරමින් ඉල්ලා ඇත්තේ යෝජිත ව්යවස්ථා සංශෝධනය තුනෙන් දෙකක පාර්ලිමේන්තු බහුතරයකින් පමණක් නොව ජනමත විචාරණයකින්ද අනුමත කළ යුතු බවට තීන්දුවක් ලබාදෙන ලෙසය.
ෆ්රී ලෝයර්ස් සංවිධානයද අගෝස්තු 18 දින යෝජිත 22 වැනි ආණ්ඩුක්රම ව්යවස්ථා සංශෝධනයට එරෙහිව ශ්රේෂ්ඨාධිකරණයට පෙත්සමක් ගොනු කර තිබේ.
22 වැනි ආණ්ඩුක්රම ව්යවස්ථා සංශෝධන පනත් කෙටුම්පත අධිකරණ හා ජාතික ඒකාබද්ධතා අමාත්ය හර්ෂණ නානායක්කාර මහතා විසින් අගෝස්තු 18 දින පාර්ලිමේන්තුවට ඉදිරිපත් කරනු ලැබීය. අගෝස්තු 7 වැනිදා ගැසට් මගින් ප්රකාශයට පත් කළ මෙම පනත් කෙටුම්පත මගින් ශ්රේෂ්ඨාධිකරණ විනිසුරුවරුන්ගේ විශ්රාම වයස අවුරුදු 67 දක්වා සහ අභියාචනාධිකරණ විනිසුරුවරුන්ගේ විශ්රාම වයස අවුරුදු 65 දක්වා ඉහළ නැංවීමට යෝජනා කර තිබේ.
