මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත නීතියක් ලෙස සම්මත කිරීමේ දී කථානායකවරයාගේ ක්‍රියා කලාපය අභියෝගයට ලක් කරමින් ශ්‍රේෂ්ඨාධිකරණය හමුවේ ප්‍රතික්ෂේප වූ මූලික අයිතිවාසිකම් පෙත්සම නව විනිසුරු මඬුල්ලක් හමුවේ සලකා බලන ලෙස පාර්ලිමේන්තු මන්ත්‍රී එම් ඒ සුමන්දිරන් මහතා ශ්‍රේෂ්ඨාධිකරණයෙන් ඉල්ලා ඇත.
පෙබරවාරි 29 වන දින ඉදිරිපත් කළ එම පෙත්සම විභාගයට ගනීමට අවසර ලබා දීමකින් තොරව ශ්‍රේෂ්ඨාධිකරණය ප්‍රතික්ෂේප කළේය.
ඒ නීතිපතිවරයා අධිකරණය හමුවේ දැක්වූ මූලික විරෝධතා පිළිගනිමිනි. සුමන්දිරන් මහතා එම පෙත්සම නැවත ඉදිරිපත් කරමින් පෙන්වා දුන්නේ එම පෙත්සම ප්‍රතික්ෂේප වී ඇත්තේ නිසි ලෙස කරුණු සලකා බැලීමකින් තොරව බවයි. එම නිසා පෙත්සම යළි පිළිගෙන වෙනත් විනිසුරු මඬුල්ලක් හමුවේ අදාළ පෙත්සම සලකා බැලීමට අවසර ලබා දෙන ලෙස පාර්ලිමේන්තු මන්ත්‍රී සුමන්දිරන් මහතා අධිකරණයෙන් ඉල්ලා ඇත.
