ශ්‍රී ලංකා නිදහස් පක්ෂයේ මූලිකත්වයෙන් ගොඩනැගීමට උත්සාහ කරන දේශපාලන සන්ධානය මහින්ද අමරවීර මහතාගේ හා තිලංග සුමතිපාල මහතාගේ කඹඇදීමක් නිසා කල් යමින් පවතින බව සිය නම සඳහන් නොකරන්නැයි ඉල්ලා සිටි ශ්‍රීලනිප ජ්‍යෙෂ්ඨ නිලධාරියෙක් අනිද්දාට පැවසීය.
ඔහු ප්‍රකාශ කළේ ගොඩනැගීමට නියමිත දේශපාලන සන්ධානය එම පක්ෂයට සභාපති ධුරය හා ලේකම් ධුරය හිමි එක්සත් ජනතා නිදහස් සන්ධානය ලෙසින් සිදුකිරීමට තීරණයක් ගෙන ඇතත් එම සන්ධානයේ ලේකම් ධුරය සම්බන්ධයෙන් මහින්ද අමරවීර හා තිලංග සුමතිපාල අතර පවතින අධිකරණ ක්‍රියාමාර්ගය විසඳා ගැනීමට පොරොන්දු වී ඇතත් එම පොරොන්දුව ඉටුකිරීමට දෙදෙනාම උත්සාහ නොගන්නා බවයි.
පක්ෂයේ මධ්‍යම කාරක සභා රැස්වීමේදී හා විධායක සභා රැස්වීමේදී අධිකරණයට ගොස් දෙපාර්ශවයම ඒ සම්බන්ධයෙන් ඇති නඩුව අවසන් කිරීමට හා ඒ සඳහා දෙදෙනාම එම සන්ධානයේ ලේකම් ධුරයෙන් අස්වීමට පොරොන්දු වී තිබේ. එම ශ්‍රීලනිප ජ්‍යෙෂ්ධ නිලධාරියා පවසන්නේ වෙනත් දේශපාලන අරමුණක් සඳහා මෙසේ ඔවුන් දෙදෙනා සන්ධානයේ ලේකම් තනතුරෙන් ඉවත්වීම මගහරිමින් සිටින බවට සැකයක් ඇතිවී ඇති බවයි.
