No menu items!
22.6 C
Sri Lanka
19 May,2024

මහින්දානන්දගේ අක්කාගේ පුතා පොලීසියට බැණ තර්ජනය කරයි

Must read

‘සර් ළමයි දෙන්නා චෙක් කරන්න කියපු නිසා තමයි අපි ළමයි චෙක් කළේ. සර් දැන් ඇඟ බේරගෙන අපිට වරද පටවනවා. ඒ නිසා සර් ගැන කිසිම විශ්වාසයක් නෑ. සර් වගකීමක් බාර නොගන්න නිසා. සර් කියන ඒවාට මම එන්නේ නෑ. අද මට තියෙන රාජකාරිය රාත්‍රී උප සේවය. අද රෑ එහෙම ආවොත් මම උන්ට වෙඩි තියලා සර්ටත් වෙඩි තියලා මමත් වෙඩි තියා ගන්නවා.’ මේ බව කියා ඇත්තේ ගම්පොළ නව කුරුඳුවත්ත පොලිස් ස්ථානයේ පොලිස් කොස්තාපල්වරයකු විසිනි. ඒ එම පොලිස් ස්ථානයේ ස්ථානාධිපති ප්‍රධාන පොලිස් පරීක්ෂක සරත් විජේසිංහ විසින් කරන ලද යෝජනාවකට ප්‍රතිචාර වශයෙනි. පොලිස් ස්ථානාධිපතිවරයා එම පොලිස් කොස්තාපල්වරයාට කර ඇති යෝජනාව වන්නේ, හිටපු ඇමති හා වත්මන් පාර්ලිමේන්තු මන්ත්‍රී මහින්දානන්ද අලුත්ගමගේ අක්කාගේ දුව ඇතුළු පවුලෙන් සමාව ගන්නට යමු කියාය.

පසුගිය වසරේ දෙසැම්බර් 29 වැනිදා ගම්පොළ, නව කුරුඳුවත්ත පොලිස් ස්ථානයේ ස්ථානාධිපතිවරයා ඇතුළු නිලධාරීන් කණ්ඩායමක් වැඩ බලන පොලිස්පති දේශබන්දු තෙන්නකෝන්ගේ යුක්තිය යැයි කියා ගන්නා මෙහෙයුම යටතේ දැනට රට පුරා සිදුකරන සෝදිසි කිරීම් අනුව ළමුන් දෙදෙනෙකු පරීක්ෂා කර තිබේ. එම සිදුවීමෙන් පසුව ඒ වසරේ දෙසැම්බර් 31 දින පොලිස් ස්ථානාධිපතිවරයා විසින් එම පරීක්ෂා කිරීම් කළ පොලිස් කොස්තාපල්වරයා සිය නිල කාමරයට කැඳවා, පෙර දින පරීක්ෂා කරන ලද ළමුන්ගේ දෙමාපියන්ගෙන් සමාව ගැනීමට යෑම සඳහා එන ලෙස දැනුම් දී ඇත.

එසේ මහින්දානන්ද අලුත්ගමගේගේ අක්කාගේ දුවගේ පවුලෙන් සමාව ගැනීම සඳහා නව කුරුඳුවත්ත පොලිස් ස්ථානාධිපතිවරයා පොලිස් කොස්තාපල්වරයාට යෑමට අඬගසා ඇත්තේ, එම පරීක්ෂා කිරීමේ සිදුවීමෙන් පසු එම ළමුන්ගේ පියා හා මහින්දානන්ද අලුත්ගමගේගේ අක්කාගේ පුතා වන ඉන්දික අමරසිංහ ඇතුළු පිරිසක් පොලිස් ස්ථානයට පැමිණ බැණ තර්ජනය කිරීමේ සිදුවීමක් සඳහා ප්‍රතිචාර දැක්වීමක් ලෙසින්ය.

පොලිස් කොස්තාපල්වරයාගේ ඉහතින් සඳහන් කරන ලද ප්‍රකාශය සම්බන්ධයෙන් පොලිස් ස්ථානාධිපතිවරයා කිසිදු සටහනක් යොදා නොමැති අතර, මහින්දානන්ද අලුත්ගමගේගේ අක්කාගේ දුවගේ සැමියා හා අක්කාගේ පුතා ඇතුළු පිරිස පොලීසියට පැමිණ බැණ තර්ජනය කිරීම සම්බන්ධයෙන් කිසිදු සටහනක් යෙදීම හෝ පියවරක් ගැනීමද සිදුකර නැත. සමාව ගැනීමට යෑම සඳහා එන ලෙස කළ ඉල්ලීමේදී පොලිස් කොස්තාපල්වරයා දැක්වූ ප්‍රතිචාරය සහ එම සිදුවීම පිළිබඳව අනාවරණය වී ඇත්තේ මධ්‍ය පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායකගේ නියෝග අනුව සිදුකරන ලද පරීක්ෂණයකදීය.

ජ්‍යෙෂ්ඨ නියෝජ්‍ය පොලිස්පතිවරයා මෙම පරීක්ෂණය සිදුකර තිබුණේ දූරකථනය මගින් ඔහුට ලැබී තිබුණු තොරතුරක් මතය. එම ඇමතුමෙන් දැනුම් දී තිබුණේ ගම්පොල නව කුරුඳුවත්ත පොලිස් ස්ථානයේ නිලධාරීන් පසුගිය වසරේ දෙසැම්බර් 29 දින වැටලීම් රාජකාරි සඳහා පිටත්ව ගිය බවත්, එහිදී පුද්ගලයන්ගේ ශරීර පරීක්ෂාවන් සිදුකර ඇති බවත් හා මහින්දානන්ද අලුත්ගමගේගේ අක්කාගේ දුවගේ පුතුන් දෙදෙනාගේ ශරීර පරීක්ෂාවක්ද සිදුකර තිබූ බවත්ය.

එම පරීක්ෂා කිරීමේ සිදුවීමෙන් පසු මහින්දානන්ද අලුත්ගමගේගේ අක්කාගේ දුවගේ සැමියා හා අක්කාගේ පුතා ඇතුළු පිරිසක් දෙසැම්බර් 30 දින නව කුරුඳුවත්ත පොලිස් ස්ථානයට වාහනවලින් බීමත්ව පැමිණ පොලිස් ස්ථානාධිපතිවරයාට හා එම පරීක්ෂා කිරීම්වලට ගිය නිලධාරීන්ට බැණ තර්ජනය කොට කළහකාරී ලෙස හැසිරී ඇති බව හා ඒ නිසා පොලිස් නිලධාරීන් රාජකාරී කිරීමට බියකින් පසුවන බවයි.

ඒ අනුව එම සිදුවීම සම්බන්ධයෙන් ජ්‍යෙෂ්ඨ නියෝජ්‍ය පොලිස්පතිවරයා ගම්පොල කොට්ඨාසය භාර ජ්‍යෙෂ්ඨ පොලිස් අධිකාරිවරයාගෙන් විමසා ඇත. එවැනි සිදුවීමක් වූ බවට පොලිස් ස්ථානාධිපතිවරයා වාර්තා කර නැති බවත්, එහෙත් සමාජ මාධ්‍ය ජාලා ඔස්සේ එම සිදුවීම සම්බන්ධයෙන් වාර්තා වීම නිසා ඒ ගැන පොලිස් ස්ථානාධිපතිවරයාගෙන් විමසීමේදී එවැනි සිදුවීමක් ඇති නොවූ බව හා සුහදව තමා සමග මහින්දානන්ද අලුත්ගමගේගේ අක්කාගේ දුවගේ සැමියා කතා කළ බව පොලිස් ස්ථානාධිපතිවරයා දැනුම් දුන් බවත් ජ්‍යෙෂ්ඨ පොලිස් අධිකාරිවරයා ජ්‍යෙෂ්ඨ නියෝජ්‍ය පොලිස්පතිවරයාට දැනුම් දී ඇත.

මීට අමතරව මේ සම්බන්ධයෙන් මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායක වැඩ බලන පොලිස්පති දේශබන්දු තෙන්නකෝන්ට හා පොලීසිය භාර ඇමති ටිරාන් අලස්ට දැනුම් දී ඇත. එම දැනුම් දීමෙන් පසු වැඩ බලන පොලිස්පති දේශබන්දු තෙන්නකෝන් මෙන්ම පොලිස් විෂය භාර ඇමති ටිරාන් අලස්ද ජ්‍යෙෂ්ඨ නියෝජ්‍ය පොලිස්පතිවරයාට දැනුම් දී ඇත්තේ ඔවුන් දෙදෙනා නව කුරුඳුවත්ත පොලිස් ස්ථානාධිපතිවරයාගෙන් ඒ සම්බන්ධයෙන් විමසීමේදී එවැනි සිදුවීමක් සිදු නොවූ බවට පැවසූ බවයි.

එහෙත් තමාට ලැබුණ තොරතුර අනුව ඉන් සෑහීමට පත්වී නැති මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පතිවරයා නියෝග කර ඇත්තේ එම පොලිස් ස්ථානය අයත් කොට්ඨාසය භාර නිලධාරියාට, එම පොලිස් ස්ථානය අධීක්ෂණය කරනු ලබන දිස්ත්‍රික් භාර නිලධාරියා සමග ගොස් විමර්ශනයක් සිදුකරන ලෙසයි. එමෙන්ම පොලිස් නිලධාරීන්ගේ රාජකාරියට බාධා කිරීම හෝ බැණ තර්ජනය කිරීමක් කර ඇත්නම් ඊට අදාළ අයට එරෙහිව නීත්‍යනුකූලව පියවර ගන්නා ලෙසයි.

ඒ අනුව ගම්පොළ ජ්‍යෙෂ්ඨ පොලිස් අධිකාරි විසින් ගම්පොළ දිස්ත්‍රික් 2 භාර පොලිස් අධිකාරි කමල් ආරියවංශ මගින් විමර්ශනයක් සිදුකර වාර්තාවක් ඉදිරිපත් කර ඇත. ඉහතින් සඳහන් කරන ලද පරීක්ෂා කිරීම්වලට සම්බන්ධ වූ පොලිස් කොස්තාපල්වරයාගේ ප්‍රකාශය සඳහන් වන්නේ එම වාර්තාවේය. එම පරීක්ෂණයේදී එම පොලිස් නිලධාරියාට අමතරව නව කුරුඳුවත්ත පොලිස් ස්ථානාධිපතිවරයාගෙන් මෙන්ම සිදුවීම සිදුවූ දින රාත්‍රී කාර්යභාර නිලධාරියා වශයෙන් කටයුතු කළ පොලිස් සැරයන්වරයාගෙන් හා තවත් පොලිස් සැරයන්වරයෙකුගෙන් ප්‍රකාශ සටහන් කරගෙන තිබේ.

එහිදී පසුගිය වසරේ දෙසැම්බර් 30 දින රාත්‍රී කාර්යභාර නිලධාරි ලෙස කටයුතු කළ පොලිස් සැරයන්වරයා කියා ඇත්තේ එදින මහින්දානන්ද අලුත්ගමගේගේ අක්කාගේ පුතා වන ඉන්දික අමරසිංහ යන අය නිල් පැහැති කාරයකින් පැමිණ පොලිස් ස්ථානය ඉදිරිපිට භූමියේ නතරකර තවත් පුද්ගලයන් කිහිප දෙනෙකු සමග පැමිණ එම බැණ තර්ජනය කිරීම් සිදුකළ බවයි. දරුවා ඉස්කෝලේ යවන්නත් බැහැ ලැජ්ජයි, හොරු වගේ හිතලා ගේ ඉස්සරහම චෙක් කරලා තියෙනවා. සාක්කුවේ තිබුණ චොකලට් කෙල්ලන්ට දෙන්නද ගෙනියන්නේ කියලා අහලා තියෙනවා. අනවශ්‍ය ලෙස ඇඟ අත ගාලා තියෙනවා. හොරුන් මංකොල්ලකාරයන් වගේ ගේ ඉස්සරහදී චෙක් කරලා තියෙන්නේ යනුවෙන් ඔහු පැවසූ බවත්, ළමයින්ගේ අධ්‍යාපනය කඩාකප්පල් වුවහොත් පොලීසිය වග කිවයුතු බව හා චෙක් කරපු දෙන්නාව දන්නා බැවින් කොහේදී හරි හම්බවුණොත් බලා ගන්නම් යනුවෙන් බැණ තර්ජනය කළ බවත් එම සිදුවීම සම්බන්ධයෙන් වැඩිදුරටත් ප්‍රකාශ කර ඇත.

මෙම සිද්ධියෙන් ප්‍රධාන කරුණු දෙකක් අපට ඉස්මතු කර පෙන්වයි. ඉන් එකක් වන්නේ වැඩ බලන පොලිස්පති දේශබන්දු තෙන්නකෝන්ගේ යුක්තිය යනුවෙන් හඳුන්වන පුද්ගලයන් හා ස්ථාන පරීක්ෂා කිරීමේ මෙහෙයුම මිනිසුන් අපහසුතාවට පත්කරන පීඩාකාරී එකක් ලෙස සිදුවන බවයි. එසේ අපහසුතාවට හා පීඩාවට පත්වූවන්ට මහින්දානන්ද අලුත්ගමගේගේ අක්කාගේ දුවගේ සැමියා හා අක්කාගේ පුතා ලෙස ප්‍රතිචාර දක්වන්නට හැකිද යන්න අනෙක් ප්‍රධාන කරුණයි.

වැඩ බලන පොලිස්පති දේශබන්දු තෙන්නකෝන්ගේ යුක්තිය මෙහෙයුම යනු ඇත්ත වශයෙන්ම ඔහුගේ වැඩ බලන පත්වීම සාධාරණය කිරීම සඳහාත්, පොලිස්පතිධුරයේ ඔහු ස්ථිර කිරීමට අවශ්‍ය සුදුසුකම් පෙන්නීම සඳහාත් කරන එකක් බව සාමාන්‍ය මහජනතාව පවා තේරුම් ගෙන ඇති දෙයකි. මන්ද ඔවුන් දන්නා ඔවුන්ගේ ප්‍රදේශවලට අදාළවන එක් සත්‍යයක් නිසාය. එනම් එම ප්‍රදේශවල ප්‍රාදේශීය වශයෙන් කුඩු හෙවත් හෙරොයින්, ගංජා, අයිස් වැනි මත්ද්‍රව්‍ය විකුණන්නේ කවුද හා එම ජාවාරම්වලට සම්බන්ධ වී සිටින පුද්ගලයන් කවුද යන්න එම ප්‍රදේශවල ජනතාව මෙන්ම පොලීසියද දන්නා නිසාය.

මෙම මෙහෙයුම්වලදී සිදුකරන්නේ එසේ දන්නා සැකකාර ඉලක්කගත පුද්ගලයන් හා ඔවුන්ට සම්බන්ධ ස්ථාන පරීක්ෂා කිරීම නොව හෝල්සේල් හෙවත් සියල්ලන් පරික්ෂා කරන මෙහෙයුමකි. ඒ මගින් මිනිසුන් අපහසුතාවට හා පීඩාවට ලක්වන බව අමුතුවෙන් කිවයුතු නැත. මෙම මෙහෙයුම්ද අවශ්‍ය පුද්ගලයන් ඉලක්ක කර නොගත් හෝල්සේල් මෙහෙයුම් බව පොලිස් මාධ්‍ය ප්‍රකාශකවරයා ඒ සම්බන්ධයෙන් කරන පැහැදිලි කිරීම්වලින්ද පෙන්නුම් කරයි. යුක්තිය මෙහෙයුම යනුවෙන් ප්‍රධාන ධාරාවේ මාධ්‍ය විශේෂ වැදගත්කමක් දී වාර්තා කරන දිනකට අත්අඩංගුවට ගන්නා දාහක් හෝ ඊට වැඩි පිරිසෙන් අති බහුතරයක් පොලිස් ස්ථානවලින්ම ඇප ලැබී පිටව යති. ඒ ඔවුන්ට එරෙහිව එල්ල කිරීමට කිසිදු චෝදනාවක් නැති නිසාය. ඔවුන් අත්අඩංගුවට ගැනීමේ එකම හේතුව හුදු සැකය වන නිසාය.

වලංගු හැඳුනුම්පතක් නොතිබීම, අත්අඩංගුවට පත් ප්‍රදේශයේ සිටින්නේ ඇයිද යන්න නිශ්චිතවම කිව නොහැකි වීම ආදි හේතු ඒ අතර තිබිය හැකිය. තවත් පිරිසක් අධිකරණයට ඉදිරිපත් කිරීමෙන් පසුව ඇප ලැබී පිටව යයි. ඒද හුදු සැකයෙන් ඔබ්බට හේතුවක් අධිකරණයට ඉදිරිපත් කිරීමට පොලීසිය අසමත් වන නිසාය. අත්අඩංගුවට ගන්නා අයගෙන් වැරදි සම්බන්ධයෙන් චෝදනා ඉදිරිපත් වන්නේ කිහිප දෙනෙකුට පමණය. එමෙන්ම චෝදනා ඉදිරිපත් කිරීමට නොහැකි තවත් පිරිසක් පුනරුත්ථාපනයට යොමු කරනවා යැයි කියන්නේ එම පුද්ගලයන් යම් මත්ද්‍රව්‍යයකට ඇබ්බැහි වූ පුද්ගලයන් මිස ඔවුන් මත්ද්‍රව්‍ය ජාවාරම්කාරයන් නොවන නිසාය.
මෙම මෙහෙයුම්වලදී හෝ වෙනත් අවස්ථාවකදී පොලීසිය අනිසි සෝදිසි කිරීමක් සිදු කළහොත් ඒ සම්බන්ධයෙන් විරෝධය පාන්නට හෝ පසුව පැමිණිලි කිරීමට පුද්ගලයින්ට අයිතියක් තිබේ. එහි විවාදයක් නැත.

එහෙත් එවැනි සිදුවීමක් සම්බන්ධයෙන් පොලීසියට ගොස් බැන තර්ජනය කිරීමට අයිතියක් කෙසේ වෙතත් අවස්ථාවක්වත් සාමාන්‍ය පුද්ගලයකුට තිබේද? පිළිතුර පැහැදිලිවම නැත යන්නයි. පොලීසියේ අයුතු ක්‍රියාවට එරෙහිව තමන්ට සාධාරණය පතන සාමාන්‍ය පුද්ගලයකු පොලීසියට ගොස් එසේ හැසිරෙන්නේ නැත. ඒ ඉන්පසු සිදුවන දෙය ඔවුන් දන්නා නිසාය. එම අවස්ථාවේම පොලිස් නිලධාරීන්ගෙන් ගුටි කන්නට ඔවුන්ට සිදුවේ. ඊටත් අමතරව පොලීසියේ රාජකාරියට බාධා කිරීම ඇතුළු චෝදනා රාශියක් සම්බන්ධයෙන් අධිකරණයට ඉදිරිපත් කර බන්ධනාගාරගත වන්නට සිදුවේ.

එහෙත් මහින්දානන්ද අලුත්ගමගේගේ අක්කාගේ දුවගේ සැමියාට හා අක්කාගේ පුතාට සාමාන්‍ය පුද්ගලයන්ට පොලීසියක් සම්බන්ධයෙන් ඇති එම දැනුවත්භාවය දැනී නැත. එසේ දැනී නැත්තේ ඔවුන් සාමාන්‍ය පුද්ගලයින් නොවන නිසාය. පොලීසියටත් උඩින් සිටින විශේෂ පුද්ගලයින් පිරිසක් නිසාය. ඔවුන් පොලීසියට ගොස් පාට් දමන්නේ ඒ නිසාය. පොලීසියත් වෙන අයට නැති ලෙස බියගුළු වී කටයුතු කරන්නේ මේ විශේෂ තත්වය නිසාය. මෙම සිදුවීම ජ්‍යෙෂ්ඨ නියෝජ්‍ය පොලිස්පතිවරයා විසින් දැනුම් දීමේදී ඒ ගැන අදාළ පොලිස් ස්ථානාධිපතිවරයාගෙන්ම සෘජුවම අසා එවැනි සිදුවීමක් සිදුවී නැති බව වැඩ බලන පොලිස්පති දේශබන්දු තෙන්නකෝන් මෙන්ම පොලීසිය භාර ඇමති ටිරාන් අලස් දැනුම් දෙන්නේද විශේෂ අයට එරෙහිව පොලීසිය කටයුතු නොකරයි යන්න සනාථ කරමින් හා එවැනි සිදුවීම් යට ගසන බව මොනවට ඔප්පු කරමින්ය.

මෙහිදී මහින්දානන්ද අලුත්ගමගේගේ අක්කාගේ දුවගේ සැමියා හා අක්කාගේ පුතාගේ සිදුවීම අපට පෙන්නුම් කරන්නේ, සැකයට වූවත් විශේෂ පුද්ගලයන් පරීක්ෂා නොකළ යුතු බව, වැරදීමකින් වූවත් එසේ පරීක්ෂාවට ලක්කිරීමෙන් අනතුරුව පොලීසියට පාට් දැමීමට එම විශේෂ පුද්ගලයන්ට අවසර ඇති බව හා එවැනි පාට් දැමීම් සම්බන්ධයෙන් පොලීසිය නීතිය ක්‍රියාත්මක නොකරන බවයි.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි