ඉමියුනොග්ලොබියුලීන් වංචාවේ මහමොළේ රෝහලේ?

හියුමන් ඉමියුනොග්ලොබියුලීන් ප්‍රතිදේහජනක ඖෂධ වංචාව පිළිබඳව අප පසුගිය දා ‘ඉමියුනොග්ලොබියුලීන්, සෞඛ්‍ය හොර ගුහාවට යතුරක්‘ යන සිරසින් කරුණු වාර්තා කළ අතර එම කරුණු සියල්ල සත්‍ය බව පසුගිය නොවැම්බර් 29 දා මාලිගාකන්ද මහේස්ත්‍රාත් අධිකරණයේදී සනාථ විය. එම ලිපියේදී අප හෙළිකළ පිළිකා ඖෂධය පිළිබඳවද සියලු තොරතුරු නීතිපති දෙපාර්තමේන්තුව අධිකරණය වෙත වාර්තා කර ඇත. ඒ අනුව හියුමන් ඉමියුනොග්ලොබියුලීන් ප්‍රතිදේහජනක ඖෂධ වංචාවට අමතරව පිළිකා රෝගීන් සඳහා ලබාදෙන රිටොක්සිමැප් නම් ඖෂධය ගෙන්වීම හරහා ද විශාල වංචාවක් සිදුවී ඇත.

මේ අනුව පසුගිය නොවැම්බර් 29 දා මාළිගාකන්ද මහේස්ත්‍රාත් අධිකරණයේදී අනාවරණය වුණේ මේ වනවිට සෞඛ්‍ය අමාත්‍යාංශයේ හිටපු ලේකම් සීමාහේවගේ ජනක ශ්‍රී චන්ද්‍රගුප්ත මහතා රෝහල්ගත වී සිටින බවයි. ඒ පිළිබඳව නඩු විභාගය අතරතුර කරුණු ප්‍රකාශ කරඇති විත්තියේ නීතිඥ ජනාධිපති නීතිඥ කාලිංග ඉන්ද්‍රතිස්ස මහතා, අද වනවිට අසනීප තත්ත්වයකට රෝහල් ගතකර සිටින සෞඛ්‍ය ප්‍රධානියා කවුරුන්දැයි විමසා ඇත. එම විමසීමට නීතිපති දෙපාර්තමේන්තුවේ අතිරේක සොලිසිටර් ජනරාල් ලක්මිණී ගිරිහාගම මහත්මිය පිළිතුරු දෙමින් හිටපු සෞඛ්‍ය ලේකම්වරයාගේ රෝහල්ගත වීමේ කතාවේ සත්‍යතාව තහවුරු කර ඇත.

ඇත්තටම රෝගී තත්ත්වයක් නිසා හිටපු සෞඛ්‍ය ලේකම් ජනක ශ්‍රී චන්ද්‍රගුප්ත මහතා රෝහල්ගත වුණා ද? එසේ නොමැතිනම් තමන් අත්අඩංගුවට පත්වේවි යැයි යන බිය නිසා රෝහල් ගතවී කාලය සියල්ල විසඳාවියැයි සිතමින් සිටින්නට, ඔහු තීරණය කළාදැයි කියන්නට අප දන්නේ නැත. එහෙත් අපට වාර්තා වෙන කරුණු අනුව ඔහු ජාතික රුධිර පාරවිලයන මධ්‍යස්ථානයට දූරකථනයෙන් පස් වතාවක් ඇමතුම් ලබාගනිමින් අදාළ ඖෂධ සමාගම වෙත රුධිර ප්ලස්මාව සාම්පල ලබාදෙන්න යැයි බලපෑම් කර ඇත. එමෙන්ම මෙම ඖෂධය ගෙන්වන්නේ ඉන්දීය ණය යෝජනා ක්‍රමය යටතේ යැයි ප්‍රකාශ කරමින් කැබිනට් මණ්ඩලය නොමඟ යවා ඇත. ටෙන්ඩර් මණ්ඩලයේ ප්‍රධානියා සේ කටයුතු කරමින් මේ සියලු දේ මෙහෙයවා ඇත.

මෙම ඖෂධ සමාගම විසින්ම සපයනු ලැබූ ප්‍රශ්නගත අනෙකුත් ඖෂධය වන රිටොක්සිමැප් නම් ඖෂධය සඳහා මුදල් ගෙවීමේදී සුළු ප්‍රමාදයක් සිදුවූ විට අවස්ථා තුනකදී ලිපි තුනක් සෞඛ්‍ය අමාත්‍යාංශයේ වෛද්‍ය සැපයුම් අංශයට යවමින් ඉක්මනින් මුදල් ගෙවන්න යැයි බලකර ඇත. ඇත්තටම ඔහු මහ මොළකරු නොවන්නේ නම් ඔහුට මේ සඳහා බලපෑම් කළ තවත් පිටස්තර මහ මොළයක් සිටිත් නම් ඒ කවුරුන්ද යන්න, ඔහු අපරාධ පරීක්ෂණ දෙපාර්තමේන්තුවට ප්‍රකාශ කළ යුතුය. එය එසේ නොවෙන තාක් අපට, ඔහු මෙම ජාවාරම මෙහෙයවූ ප්‍රධාන පුද්ගලයා බවට සැකකරන්නට සිදු වෙනවා ඇත.

වතුර එන්නත් කිරීම

පසුගිය නොවැම්බර් 29 දා මාලිගාකන්ද මහේස්ත්‍රාත් අධිකරණයේදී නීතිපති දෙපාර්තමේන්තුවේ අතිරේක සොලිසිටර් ජනරාල් ලක්මිණි ගිරිහාගම මහත්මිය ප්‍රකාශ කළේ ප්‍රශ්නගත මෙම හියුමන් ඉමියුනොග්ලොබියුලීන් ඖෂධය රෝගීන්ට ලබාදෙන්නට තබා රසායනාගාර තත්ත්ව පරීක්ෂාවට යොමුකරන්න තරම්වත් සුදුසු නැති බවය. රෝහල් වෙත බෙදාහැර තිබුණ මෙම ඖෂධය පරීක්ෂා කළ වෛද්‍ය රසායනාගාර ප්‍රකාශ කරන්නේ මෙම ඖෂධය තුළ හියුමන් ඉමියුනොග්ලොබියුලීන් නොමැති බවය. මේ පිළිබඳව සෞඛ්‍ය අමාත්‍යාංශයට සම්බන්ධ වෛද්‍යවරයෙකුගෙන් කරුණු විමසීමේදී ඔහු ප්‍රකාශ කළේ මෙහි ජලය අන්තර්ගතව තිබී ඇති බවය. ඒ අනුව හියුමන් ඉමියුනොග්ලොබියුලීන් කියා අසරණ රෝගීන්ට වතුර විද ඇත.

මෙම ඖෂධය රෝහල් සඳහා මාත්‍රා 7500ක ප්‍රමාණයක් අවශ්‍ය වුණත් මාත්‍රා 22500ක් සඳහා ටෙන්ඩර් අනුමැතිය ලබාදී ඇත. ඒ වැඩි මාත්‍රාවන් ප්‍රමාණය ජලය සේ රෝගීන්ට බොන්නට දෙන්නට දැයි අප නම් දන්නේ නැත. මේ සියල්ල දන්නා සෞඛ්‍ය අමාත්‍යාංශයේ හිටපු ලේකම්වරයා රෝගීව රෝහල්ගතව සිටින බැවින් සත්‍යය හෙළිවීම තවදුරටත් ප්‍රමාද වන්නට පුළුවන් ය. පිළිකා රෝගීන්ගේ ප්‍රතිදේහ වර්ධනය සඳහා ලබාදෙන ඉතාමත් වටිනා ඖෂධයක් වන රිටොක්සිමැප් ඖෂධයේ අවශ්‍යතාව මාත්‍රා 750ක් වනවිට 2250 සැපයීම සඳහා අවසර හිමිව ඇත. එම සැපයුම වෙනුවෙන් (මුළු මුදලම නොවේ) රුපියල් මිලියන 36ක මුදලක් සෞඛ්‍ය අමාත්‍යාංශයේ වෛද්‍ය සැපයුම් අංශය විසින් ගෙවා ඇති අතර එම ගෙවීමේ ප්‍රමාදයක් පැමිණි විට හිටපු සෞඛ්‍ය ලේකම්වරයා ලිපි තුනක් අවස්ථා තුනකදී යවමින් පුදුම හදිස්සියකින් කටයුතු කර ඇත.

ඒ අනුව පසුගිය දා පැවති නඩු විභාගයේදී හිටපු සෞඛ්‍ය ලේකම් ජනක ශ්‍රී චන්ද්‍රගුප්ත මහතාගේ අත්අකුරු පරීක්ෂා කිරීමට සහ ප්‍රකාශයක් ලබාගැනීමට අපරාධ පරීක්ෂණ දෙපාර්තමේන්තුව අධිකරණයෙන් අවසර ඉල්ලා ඇත. අපරාධ පරීක්ෂණ දෙපාර්තමේන්තුව නීතිපති හරහා මෙසේ අධිකරණයේ අවසරය සහ නියෝග ලබාගනිමින් සිටිනවා විනා ඔහු අත්අඩංගුවට ගෙන ඉතිරි පරීක්ෂණ කටයුතු සිදුකරන්නට කල්පනා කරන්නේ නැත. එයට හේතුව කුමක්ද? අපට දැනගන්නට ලැබෙන්නේ ජනාධිපති ලේකම් කාර්යාලයට සම්බන්ධ ආණ්ඩුවේ ප්‍රබලයෙකු මෙම අත්අඩංගුවට ගැනීම වළක්වමින් සිටින බවය. එයට හේතුව ඊයේ පෙරේදා විශ්‍රාමික වුණ මෙම රාජ්‍ය නිලධාරියා සියලු තොරතුරු සීඅයිඩීය ඉදිරියේ ප්‍රකාශ කරාවිය යන බියයි. ජනාධිපති ලේකම් කාර්යාලයට සම්බන්ධ මෙම ප්‍රබලයා කවුරුන්ද? අපරාධ පරීක්ෂණ දෙපාර්තමේන්තුව සොයා බැලිය යුතුය.

තෝරු මෝරු මඟහැර හාල් මැස්සෝ ඇල්ලීම

පසුගිය නොවැම්බර් 24 දා මෙම ඖෂධ ජාවාරම පිළිබඳ නඩුව මාලිගාකන්ද මහේස්ත්‍රාත් ලෝචනා අබේවික්‍රම මහත්මිය ඉදිරියේ කැඳවනු ලැබූ අවස්ථාවේ අපරාධ පරීක්ෂණ දෙපාර්තමේන්තුව අධිකරණයට කරුණු දක්වමින් සීමාහේවගේ ජනක ශ්‍රී චන්ද්‍රගුප්ත, අත්තනායක මුදියන්සේලාගේ සමන් කුසුම්සිරි රත්නායක, හේරත් මුදියන්සේලාගේ ධර්මසිරි රත්නකුමාර හේරත්, බුත්පිටිය ලේකම්ලාගේ දොන් ජයනාත්, යූ. එස්. කේ. දෙනාවත්ත, ඩී.එච්.ආර්. එන්. ප්‍රේමතුංග, ටී. ඩී. සොලමන්, මරක්කල මානගේ නිරාන් ධනංජය, එම්. සුජිත් වසන්ත කුමාර යන අය අධිකරණය මඟහැර විදේශගත වීමට හැකි බැවින් ඔවුන්ට විදෙස් ගමන් තහනමක් පනවන්නැයි අධිකරණයෙන් ඉල්ලා ඇත.

එයට අධිකරණයේ අවසරය ලැබී ඇති නමුත් ප්‍රශ්නය වන්නේ ඒ වනවිටත් තාක්ෂණික ඇගයීම් කමිටුවේ ප්‍රධානියා විදෙස්ගත වී ඇති බව දැනගන්නට ලැබීමය. ඉහත නම් දෙස බැලූවිට පෙනෙන්නේ සෞඛ්‍ය අමාත්‍යාංශයේ හිටපු ලේකම්, සෞඛ්‍ය අමාත්‍යාංශයේ ප්‍රසම්පාදන අතිරේක ලේකම්, තාක්ෂණික ඇගයීම් කමිටුවේ ප්‍රධානී, වෛද්‍ය සැපයීම් ඒකකයේ අධ්‍යක්ෂ, වෛද්‍ය සැපයීම් ඒකකයේ සහකාර අධ්‍යක්ෂ ඇතුළු පිරිස් මෙම විදෙස් ගමන් තහනමට අදාළ නම් ලැයිස්තුවේ සිටින බවය. හරි නම් සීඅයිඩීය විදෙස් ගමන් තහනම් කරන්න යැයි ඉල්ලන්නට ප්‍රථම මෙම පුද්ගලයින් අත්අඩංගුවට ගෙන ප්‍රශ්නකර ප්‍රකාශ සටහන් කරගත යුතුය. පොල්ගෙඩියක් හොරෙන් කැඩුවත් කුදලාගෙන ගොස් අත්අඩංගුවට ගන්නා රටේ, ව්‍යාජ බෙහෙත් රෝහල්වලට බෙදාහරිමින් රාජ්‍ය මුදල් අවභාවිත කළ බවට චෝදනා ලබන, ඒ පිළිබඳව විශාල වශයෙන් සාක්ෂි පවතින විට පවා අත්අඩංගුවට ගැනීමක් සිදුවන්නේ නැත. ඒ ඇයි?

මෙම සිද්ධිය සම්බන්ධයෙන් මේ වනවිට අපරාධ පරීක්ෂණ දෙපාර්තමේන්තුව ඖෂධ ගෙන්වූ සමාගමේ හිමිකරු හේවගේ සුදත් ජානක ප්‍රනාන්දු, වෛද්‍ය සැපයීම් අංශයේ අධ්‍යක්ෂ, වෛද්‍ය කපිල වික්‍රමනායක, සහකාර අධ්‍යක්ෂ දේවශාන්ති සොලමන්, ගණකාධිකාරි (සැපයුම්) නෙරාන් ධනංජය සහ තොග පාලක සුජිත් කුමාර යන අත්අඩංගුවට ගෙන අධිකරණයට ඉදිරිපත් කළ පසුව රක්ෂිත බන්ධනාගාරගත කර ඇත. පසුගිය 29 දා පැවති නඩු විභාගයේදී මෙම පුද්ගලයන් වෙනුවෙන් පෙනී සිටි නීතිඥයන් තර්ක කළේ මෙම චෝදනාවන් පොදු දේපල පනතට නොවැටෙනා බැවින් මෙම සැකකරුවන් සඳහා ඇප ලබාදෙන ලෙසය. එහෙත් මාලිගාකන්ද මහේස්ත්‍රාත් ලෝචනා අබේවික්‍රම එම ඇප ඉල්ලීම ප්‍රතික්ෂේප කරමින් ප්‍රකාශ කර ඇත්තේ ජනතා මුදල් අවභාවිත කළ මෙම සිදුවීම පොදු දේපල යටතට වැටෙන බවය.

එහෙත් ප්‍රශ්නය වන්නේ මෙම ජාවාරම පිටුපස සිටින තෝරු මෝරුන් අත්අඩංගුවට ගන්නේ කවදා ද යන්නයි. තනතුරෙන් ඉවත් කළ පසුව තම කාර්යාලයේ තිබුණ ලිපි ලේඛනද විනාශ කර යන්නට ගිය ජාතික ඖෂධ නියාමන අධිකාරියේ හිටපු ප්‍රධාන විධායක නිලධාරී වෛද්‍ය විජිත් ගුණසේකරට වරෙන්තු නිකුත් කරන්නට පසුගිය දා මහේස්ත්‍රාත්වරිය විසින් කටයුතු කරනු ලැබීය. එයට හේතුව සේ ප්‍රකාශ වන්නේ සීඅයිඩීයේ පරීක්ෂණ සඳහා සහාය නොදීමය. හිටපු සෞඛ්‍ය ලේකම්වරයා ඉදිරියේ මෙන්ම වෛද්‍ය විජිත් ගුණසේකර ඉදිරියේද සීඅයිඩීය හැසිරෙන්නේ හරිම අමුතු වේශයකින් ය. පුදුම පරෙස්සම් සහගතභාවයකින් ය. ඒ ඇයි? ප්‍රසම්පාදනය සඳහාම යැයි කියමින් හිටපු සෞඛ්‍ය අමාත්‍ය කෙහෙළිය රඹුක්වැල්ල උඩින් ගෙනත් අතාරිනු ලැබූ නුවර සී. බී. රත්නායකගේ ඥාතියෙකු බව කියන සමන් රත්නායක ඉදිරියේද සීඅයිඩීය හැසිරෙන්නේ මෙසේ ය. මේ හැසිරීමට හේතුව කුමක්දැයි සිතා බලන්න. එවිට මෙම ඖෂධ මාෆියාව පිටුපස සිටින ප්‍රබලයින් කවුරුන්ද යන්න අනාවරණය වනු ඇත.

මේ වනවිට අධිකරණය මෙම පරීක්ෂණ සාර්ථක කරගැනීම සඳහා සීඅයිඩීය වෙත අවශ්‍ය සියලුම තොරතුරු ලබාදෙන්න යැයි අදාළ සියලුම රාජ්‍ය ආයතන වෙත නියෝග නිකුත් කර ඇත. මේ ඖෂධ තොගය ගෙන්වන බව ප්‍රකාශ කර ඇති ඉන්දීය ණය යෝජනා ක්‍රමයට අදාළව සකස් කළ කැබිනට් පත්‍රිකා ඇතුළු තොරතුරු, සියලු ලිපි ලේඛන, ඉන්දීය ණය යෝජනා ක්‍රමයෙන් මෙරටට ගෙන්වන ලද ඖෂධ 182ක් සම්බන්ධයෙන් සෞඛ්‍ය අමාත්‍යාංශය සතු වාර්තා, අපරාධ පරීක්ෂණ දෙපාර්තමේන්තුව වෙත භාරදෙන ලෙස සෞඛ්‍ය ලේකම්වරයාට මහේස්ත්‍රාත්වරිය නියෝග නිකුත් කර ඇත. මෙම තත්ත්වය තුළ අපරාධ පරීක්ෂණ දෙපාර්තමේන්තුවට මෙම ඖෂධ වංචාව පිටුපස සිටින ඇත්ත පුද්ගලයින් කවුද යන්න අවශ්‍ය නම් සොයාගත හැකිය. එහෙත් ඉහළ දේශපාලකයන්ගේ අල්ලේ නැටවෙන පොලීසියකට අපරාධ පරීක්ෂණ දෙපාර්තමේන්තුවකට ඇත්ත හොරුන්ට දඬුවම් කරන්නට ශක්තියක් තිබෙයිද? ප්‍රශ්නය එයයි.