28.3 C
Sri Lanka
30 June,2022

මහින්ද කරුමයක් රනිල් සාපයක්

Must read

බල උමතුවෙන් මහින්ද කළ සාපරාධී උසිගැන්වීම නිසා ගින්නක් ඇවිලිණි. ඔහු වෙනුවෙන් දර දිය අදිමින්, අසත්‍යයම රජ කරවීමට උඩගෙඩි දුන් උදවියගෙන් වැඩි පිරිසක් ගින්නේ ගොදුරු බවට පත්ව විය. කාට කුමක් වුවත් තව දුරටත් රාජ්‍ය බලය භුක්ති විඳීම මහින්දගේ අභිප්‍රායයි. ඊට වඩාත්ම ආරක්ෂිත පිළිවෙත ඔහු තෝරාගෙන සිටියි.


ජන වරමක් නැති, යළි ජනවරමක් ලබන්නට අවස්ථාවක් පවා නැති විය හැකි, රනිල් බල ලෝභයෙන් ”ගෝඨා ගෝ හෝම්” ඔස්සේ රාජපක්ෂවරුන්ගේ අවසානය වළකාලන්නට වේල්ලක් තනන්නට පෙරමං බලා ඇත. එහි ප්‍රතිඵලය වන්නේ යළි ගින්නක් ඇවිලීම ය. ඒ ගින්න වඩාත් දරුණු එකක් වෙන්නටත් බැරි නැත.


මහින්ද රනිල් දෙදෙනාම රටේ අති බහුතරය ප්‍රතික්ෂේප කර ඇත. එය ඇත්තකි. ජනතාව ප්‍රතික්ෂේප කළත් මේ දෙන්නාටම බලය නැතුව ඉන්නට පුළුවන් කමක් නැත. මහින්දට බලය හරිහම්බ කිරීම වෙනුවෙන් අවශ්‍යය. රනිල්ට බලය අවශ්‍ය කරන්නේ ගජ මිතුරන් සමඟ වැජඹෙන්නටය. අද රනිල් කරන්නේ ද එයම ය. රාජපක්ෂලා රැක ගැනීම රනිල්ගේ රෝගයයි. එහෙත් රනිල් කියන්නේ තමා පැමිණ සිටින්නේ රට රැකීමට බවය. මේ බයිලාව අසන්නට ගඳ සුවඳ හඳුනන කිසිවෙකු දැන් නම් කැමති වනු නැත.


ගෝඨාභය රාජ්‍ය පාලනයේ අසමත් බව සනාථ වී හමාරය. තමන් කර තිබෙන වැරදිවලට නීතියෙන් විඳින්නට සිදුවන දඬුවම්වලින් බේරෙන්නට ඔහුට බලය උවමනා විය. බලය අතට ගත් දා සිට ඔහුගේ මුග්ධ පිළිවෙත් හා සමීපතම චෞරයන් හා අපරාධකාරයන්ට රට කොල්ල කන්නට ඉඩ දුන්නේ නීතියේ රැකවරණද ලබා දෙමිනි. නොසිතූ විරූ ලෙස බලය අත හැර දමන්නට සිදුව ඇතත් ඔහු සිය අසමත්කම් යටපත් කරගෙන රනිල්ගේ සරණින් තව දුරටත් පවතින්නට කල්පනා කරයි. රනිල් සූදානම් වන්නේ ගෝඨාභයට ද රැකවරණය ලබා දෙමින් – තමන්ට විස්මයක් කළ හැකි බවට පිල් විදහමින්, අරගලයට අංචි අදින්නටය.

අරගලයෙන් රැකවරණය ද?


අරගලය ගොඩ නැඟෙන්නේ රාජපක්ෂවරුන් අවසන් කිරීමටය, ඔවුන්ගේ දේශපාලන බලව්‍යුහය පුපුරා හැරීමටය. අරගලය ගැඹුරින්ම මතුවුණ සහේතුක කාරණාව වන්නේ රාජපක්ෂලා රට බංකොළොත් කළේය යන්නය. අද රට වැසියන් දරුණු ජීවන සටනකය. රට වැසියන් මේසා දුකකට පත්ව තිබෙන්නේ රාජපක්ෂලාගේ දරුණු – සාපරාධී සොරකම් නිසා බව සුප්‍රකට සත්‍යයකි. ඔවුන් සොරා ගත් ධනස්කන්දයෙන් හරි අඩක් හෝ රටට ලබා ගන්නට හැකි නම් එය අරගලකාමීන්ට විසඳුමකි. එය පහසු නැති බව සැබෑවකි. අපහසුවෙන් වුව යම් මාවතක් තනා ගන්නට ඉහළම පුටුවේ රාජපක්ෂ කෙනෙකු වාඩි කරගෙන පුළුවන් ද? කිසිසේත් නොහැකිය. රනිල් සේවය සපයන්නේ ගෝඨා ගෙදර යන එක වළකා දමන්නටය.


අරගලය ගෝඨා ගෙදර හරින්නට සමත් වනු ඇත. රනිල් කුලී මෙහෙයකට යොදා ගෙන තිබෙන්නේ එය වළකා ගන්නටය. තව දුරටත් රාජපක්ෂලාගේ බලව්‍යුහයට රැකවරණය සලසා ගන්නටය. එයට ඉඩ දිය යුතු ද?


රනිල් කිසියම් අන්දමකට ජනතාවගේ අසහනය තාවකාලිකව හෝ පාලනය කළහොත් රාජපක්ෂවරුන් හොර පාරවල්වලින් යළිත් කරළියට ඒම වළක්වන්නට රනිල්ටවත් නොහැකිය. අවුරුද්දක් කෙසේ හෝ ගෝඨාභයට බලයේ සිටින්නට රනිල් ඉඩ ලබා දුනහොත් රාජපක්ෂ කඳවුරේ නොහොඳ නෝක්කාඩු නිමවී 2015 පරාජයෙන් පසුව යළි බලසම්පන්න වූවා සේම බල සම්පන්න වනු ඇත. 2015 ජයග්‍රහණය පරාජයක් බවට පත් කරන්නට රනිල් එදා ‘ඩීල්‘ දැම්මා සේ මෙදාත් ඔහු කරන්නේ ඊට නොදෙවෙනි කටයුත්තකි. එය ඔහු මෙදා කරන්නේ ‘ස්මාර්ට්‘ අන්දමටය. අලුත් දේශපාලන සංස්කෘතියකටය ඔහු කාටත් ඇරයුම් කරන්නේ. ඔහු කියන අලුත් දේශපාලන සංස්කෘතිය සංස්කෘතිය යනු ගෝඨාභයට රැකවරණයත් – රාජපක්ෂලාට නිරුපද්‍රිත පැවැත්මත් වෙනුවෙන් සියල්ලන් – සියලු පක්ෂ, මැතිසභය සමගියෙන් කටයුතු කිරීමය.


යහ පාලන ආණ්ඩුවේ විනාශය සමගිය නැති වීමය. ඊට පළවෙනි පස් පිඩැල්ල කැපූ රනිල්ට අලුත් දේශපාලන සංස්කෘතියකට නායකත්වය දෙන්නට පුළුවන්කමක් තිබේද? ඒ ගැන වචන ගළපන්නටවත් ඔහුට සදාචාරාත්මක අයිතියක් නැත. 2015 දී ඔහු නොකළ දේ අද කරන බව පිළිගත හැක්කේ කාට ද?


මහ දවාලේ මනුෂ්‍ය ඝාතනයක් සිදු කළ කෙනෙකු සිවුරක් පොරවාගෙන කියන බණ අසා තරුණ අරගලය දිනා ගත් යමක් මේ වන විට වේ නම් එය අතැර දැමිය යුතු නොවේ. දුවන මුවන් දැක නෙළුෑ පළා බිම දමන්නට තරුණ පරම්පරාව අනුවණ වනු නැත.

අපේක්ෂාභංග කළ රනිල්


රාජපක්ෂලාගේ ගැලවුම්කාරයා වන රනිල් යනු තමන්ට ජන වරමක් නොලැබුණ කෝපයෙන් රට නැත්තටම නැති කර දමා පුරවැසියන්ගෙන් පළිගැනීමට දැඩි අධිෂ්ඨානයකින් කටයුතු කරන්නෙකි. ලැජ්ජා – බය නැති, කිසිම ශීලාචාරකමක් නැති, රනිල් භයානක මිනිහෙකි. ඔහු සතු ශක්‍යතා කවරක් වුව ඒවා ද අද වෙන විට පිරිහී තිබේ. මුග්ධ රැළකට ඔහු සිංහයෙකු සේ නායකත්වය දෙන්නට ඉදිරිපත් වන්නේ වී නමුත් ඔහු නරියෙකු සමානය.


ජේ.ආර්. යටතේ දේශපාලනයට අවතීර්ණව රනිල් කළ දෑ අප්‍රමාණයයි කියන්නට පුළුවන. ඒ හැමදේම ඔහු කළේ තමන්ට ඉහළින් ශක්තිමත් පාලකයෙකු සිටි බැවිනි. රනිල් යමක් කළේ නම් ඒ දේ කරන්නට පදනමක් රටේ තිබුණ බවත්, ලෝකයෙන් ඊට අනුග්‍රහ ලබන්නට පුළුවන් තත්වයක් තිබුණ බවත් අමතක කළ යුතු නැත. රනිල් අදක්ෂයෙකි. එය සනාථ වන්නේ ඔහුව පෙරළාගෙන විටෙක චන්ද්‍රිකා ද විටෙක මහින්ද ද බලය අතට ගන්නට සමත් වීමෙනි. රනිල් තුළ තිබුණ දක්ෂතාව නම් පක්ෂය තදින් මිට මොළවාගෙන සිටින්නට හැකිවීමය.


තතු කෙසේ වුව 2015 දී අපත් රටේ නීති ගරුක පුරවැසියන් සමඟ රනිල් වෙනුවෙන් පෙනී සිටියේ ඔහු ගැන අසීමිත විශ්වාසයක් තබමිනි. ඔහු සමඟ දේශපාලනය කළ, ඔහුව දේශපාලනයට කැඳවා ගත් පුද්ගලයන් ඔහු හැර දමා යන්නේ ඔහු විශ්වාස කළ නොහැකි බව ප්‍රසිද්ධියේ පවසමිනි. ඒ හේතු සාධක මතම රනිල්ට රාජ්‍ය බලය ලබා දීම භයානකය යන මතයක් ද රටේ ගොඩ නඟා තිබුණි. මහින්ද එහිද ප්‍රබල චරිතයකි. එනමුත් ‘රනිල්ට බිය විය යුත්තේ ඇයි?‘ යනුවෙන් කරුණු විග්‍රහ කරමින් අපි ඔහු ගැන සාධනීය අන්දමේ විශ්වාසයක් 2015 දී තැබුවෙමු. අපට වැරදිණි. බලය අතට ලැබුණ වහාම ඇත්ත රනිල් මතු විය. ඔහු සිරිසේනට කෙළවා ඔහුද කෙළවා ගත්තේය. එහෙත් ඔහු එක දෙයක් අතපසු කළේ නැත. එය නම් හිරේ යන්නට සිටි උදවියට රැකවරණය ලබා දෙමින් ‘රාජපක්ෂලා‘ ආරක්ෂා කිරීමය. අද ලංකාව මේ තත්වයට ඇද වැටීමට මුල් වුණ කාරණා විමසා බලන විට රනිල්ට කිසිම සමාවක් දෙන්නට පුළුවන්කමක් නැත.


මහින්ද රාජපක්ෂ මේ වන විට සිය පවුල සමඟින් – සිය පරම්පරාව සමඟින් රටට කර තිබෙන විනාශය ‘ලෝක ප්‍රකට‘ යථාර්ථයකි. එහෙත් රනිල්ට එහි වගේ වගක් නැත. රාජපක්ෂලා කළ විනාශය උග්‍රවන තරමට ඔහු තෘප්තිමත් සේ ය. රාජපක්ෂ කඳවුර ගැන මාධ්‍යකරුවෙකු ප්‍රශ්නයක් ඇසූ කල රනිල් ඊට විවේචනාත්මක පිළිතුරක් දෙන බව පෙනී ගියත් ඒ තුළ ඇත්තේ අභ්‍යන්තර තෘප්තියකි.


මහින්ද – රාජපක්ෂ පරම්පරාව, රටට කළ අනර්ථය පුරවැසියන් අති බහුතරයක් පසක් කරගෙන සිටින්නේ පළමු වතාවටය. අද රාජපක්ෂලා ප්‍රපාතය අබියසය. ඔවුන් රනිල් පළිහක් කරගෙන දැන් ලක ලෑස්ති වන්නේ ප්‍රපාතයෙන් ඇද නොවැටී සිටින්නටය. රනිල් ඔවුන්ට රැකවරණයක් සලසමින් ඇත්තටම කරන්නේ කුමක් ද? විනාශයට පත්ව තිබෙන රට අළු දූලි බවට පත් කරන්නටය.


මහින්ද පන්නා දමන්නට ජනතාව පෙළ ගැසෙන්නේ ඔහුගේ ව්‍යාජ චරිතය හා ඔහුගේ පවුලේ – පරම්පරාවේ තක්කඩිකම් උපරිමයෙන් අනාවරණය වුණ සංදර්භයකය. මහින්දට පෙර රනිල් කවුරුන් දැයි රටට අනාවරණය වූ බැවින් ඔහුට ජන වරමක් නොදී ජනතාව පන්නා දැමුව ද, ඔහුට සිය මාමා එලොව සිට සිහිනෙන් දුන් උපදෙස නිසා යළි බලයෙහි උරුමක්කාරයෙකු වී සිටියි. මෙවර රනිල් පන්නා දැමීම කළ යුතු වන්නේ රාජපක්ෂලා වෙනුවෙන් ද – බලය වෙනුවෙන් ද යළි ඉපදෙන්නට බැරි අන්දමටය. ඔහු ඇනකොන්ඩෙකු බව හරියටම හඳුනා ගන්නට ලැබුණේ මෙවර යයි සිතමි.

අලුත් දේශපාලන සංස්කෘතිය


රනිල්ගේ අලුත් දේශපාලන සංස්කෘතිය යනු ව්‍යාජ ප්‍රතිරූපයක් වෙනුවෙන් වදන් හරඹයක් බව මෙදා ඔහු අගමැති ලෙස මැතිසභයට පැමිණි පළමු දවසේම සනාථ විය. ඔහුට අලුත් දේශපාලන සංස්කෘතියක් ගොඩ නැඟීමට අවශ්‍ය නම් ගෝඨාභයට ඒ වෙනුවෙන් යම් කොන්දේසි පැනවීමට තිබුණි. කිසිම කොන්දේසියක් නැතුව අගමැති පුටුවට කෑදර කමට එහි ලැග ගැනීමය කරන්නේ.
නියෝජ්‍ය කථානායක පදවිය වෙනුවෙන් මැති සභය තුළ සිදුවුණ අසික්කිතකම් නිසා මහජන ධනය නාස්ති වීම – කාලය නාස්ති කිරීම ගැන ජනතාව තුළ තිබෙන්නේ කෝපයකි. එය නොදන්නට රනිල් බබෙක් ද? ඇයි ඔහු මේ තනතුරට ඡන්ද විමසීමක් නිර්මාණය කරන්නේ? ඔහුට කරන්නට තිබුණේ එක දෙයකි. එය නම් ගෝඨාභය නැතිනම් බැසිල් සමඟ සාකච්ඡාකොට නියෝජ්‍ය කථානායක තනතුරුට සජබයෙන් ආ යෝජනාවට එකඟත්වය පළ කරමින් පොහොට්ටුවෙන් නමක් ඉදිරිපත් නොකිරීමට හෝ ඉදිරිපත් වුණ නම ඉල්ලා අස් කර ගැනීමටය. රනිල් එය කළේ නැත. එය නොකළ පමණක් නොව පොහොට්ටුවේ පැත්තට ජය ලැබෙන්නට ද කටයුතු කළේය. ඉතින් සමගියෙන් සහයෝගයෙන් එකට වැඩ කරමු – අලුත් දේශපාලන සංස්කෘතියක් ගොඩ නඟමු යනු රනිල්ගේ අමු කුණුහරුප නොවේද?


ජනතාවගේ අප්‍රසාදයට නොව වෛරයට බඳුන්ව සිටින චරිත ගණනාවක් මැති සභයේ සිටියි. දිනේෂ් ගුණවර්ධන සහ ප්‍රසන්න රණතුංග ඉන් දෙන්නෙකි. අගමැති බවට පත්වන රනිල්ගේ සභානායක දිනේෂ්ය, ආණ්ඩු පක්ෂයේ සංවිධායක ප්‍රසන්නය. මේ චරිත ඒ ඒ පුටුවල වාඩි කරවාගෙන මොන අලුත් දේශපාලන සංස්කෘතියක් ද? ජීවිත කාලයේම කළිසම ඇන්ද මිනිහෙකු වන රනිල් ජනතාවගේ පිළිකුළට – කෝපයට පත්ව සිටින මිනිසුන් මුල් පුටුවල වාඩි කරවාගෙන අලුත් දේශපාලන සංස්කෘතියක් ගොඩ නැඟීමට වෙර දැරීම කළිසම ඔලුවෙන් අදින්නට සූදානම් වීමකි. කළිසම ඔහු ඔලුවෙන් අදින්නට ලෑස්ති නැත. එසේ නම්? ඔහු කරන්නේ ගෝඨාභයට – බැසිල්ට ඕන විදිහට කැබිනට් මණ්ඩලය පත් කිරීමට – සියලු පදවිවලට පුද්ගලයන් පත් කිරීමට ඉඩ දෙමින් රාජපක්ෂලාගේ දේශපාලන සංස්කෘතියට යළි උත්පත්තියක් ලබා දීමට නොවේ ද? එය ඔහුගේ අභිමතාර්ථය නොවන්නේ කෙසේ ද?
කිසිම වැදගත් මන්ත්‍රීවරයෙකු රනිල් අගමැතිව සිටින කැබිනට්ටුවේ වාඩි වෙන්නට අකමැති කරුණු දෙකක් නිසාය. පළවෙනි කරුණ ‘ගෝඨා ගෝ හෝම්‘ වෙනුවෙන් රනිල්ගේ රැකවරණය පිටු දැකීමය. දෙවැන්න රනිල් සමඟ අලුත් ගමනක් යන්නට නොහැකි බවට අප්‍රමාණ අත්දැකීම් තිබීමය. රාජපක්ෂලාගේ ආණ්ඩුවේ අන්ත දූෂිතයන් රනිල්ගේ කැබිනට් එකට පත්වීම සිකුරුය. දෙන්නෙකු පත් කර මුට්ටිය දැමීය. කීප දෙනෙකු එකතු කරගෙන ඔවුන්ව ද ඉවර කර දැමීම සැඟවුණ අභිප්‍රාය නොවේද? මොළේ කළඳක් තිබෙන මන්ත්‍රීවරයෙකු වේ නම් රනිල්ට මැති සභයේ කිසිම කටයුත්තකට සහයෝගය නොදිය යුතුය. මහින්ද – ගෝඨාභය සමඟ රනිල් ද අවසන් කිරීම රටේ බහුතර පුරවැසියන්ගේ අපේක්ෂාවයි. එය ඉටු නොවුණ විට ඇවිලෙන ගින්න ත්‍රිවිධ හමුදාවම යොදවා හෝ නිවන්නට පුළුවන් වනු නැත. එතරම්ම තද ජනතා කෝපයක් අද මහ පාරේ තිබේ.

රනිල්ගේ ව්‍යාජ සදාචාරය


රාජපක්ෂලා අසීමිත ණය කන්දරාවක් ලබාගෙන – රටට කිසිම පලක් නැති ව්‍යාපෘති වලට ඉන් ටිකක් වැය කොට ණයවලින් විශාල මුදලක් සාමූහිකව හොරකම් කළ බව රටට දැන් අලුත් පුවතක් නොවේ. හොරකම් කළ ධනය ලබා ගැනීමට අලුත් නීති සම්මත කරන්නට අවශ්‍ය වන්නට පුළුවන. ඒ වෙනුවෙන් රනිල්ට කිසිවක් කළ නොහැකිය, ඔහු කරන්නේ ද නැත. හොරු ඇල්ලීමට නීති සම්මත කරන්නට හොරු ඡන්දය දෙන්නේ කොහොමද?


රනිල් ගයන බයිලාව වන්නේ ‘අපට අතීතය වැඩක් නෑ, අපි ඉස්සරහට යන විදිහයි බලන්න ඕනැ‘ යන්නය. මරේ මරු ය.


රනිල් රාජපක්ෂලාට ගෑවුණු කෙනෙකුට හෝ එරෙහිව නීතිය ක්‍රියාත්මක කරන්නට කිසිම පියවරක් ගන්නේ නැත.


රනිල් ගයන තවත් බයිලාවක් ඇත. එය නම්, ‘මම පළිගන්න යන්නෙ නෑ මම කරන්නෙ කඩා වැටුණ ආර්ථිකය ගොඩ ගන්න මහන්සි වීමයි‘ යන්නය.


මේ තරම් මිහිරි බයිලාවක් මහින්දට – බැසිල්ට – රාජපක්ෂලාට රස විඳින්නට තවත් ලොවක් තිබේ ද?


යහ පාලන ආණ්ඩුව බලයට පත් අවස්ථාවේ සෝභිත හිමියන් රනිල් මුණ ගැසී ඉල්ලා සිටි එක කරුණක් වන්නේ මැති ඇමතිවරුන්ට වාහන බලපත්‍ර දීම හා අසීමිත වරප්‍රසාද දීම ගැන ජනතාවගේ අප්‍රසාදයක් තිබෙන බැවින් ඒවා නතර කරන්න යන්නය. ඒ ඉල්ලීම සෝභිත හිමි රනිල්ගෙන් කළේ සිරිසේන සෝභිත හිමියන්ට පවසා සිටි කාරණා නිසාය. ඔහු මුල් අවස්ථාවේ නිතර කවර කරුණක් අරභයා වුව කීවේ, ‘අගමැතිතුමාටත් කියන්න‘ යන්නය. එය ඔහුගේ කුණුහුරුපයක් බව වැඩි කල් යන්නට පෙර අනාවරණය වූ බව ද කිව යුතුය.


රනිල්ට සෝභිත හිමි කරුණු දක්වන විට බණ අසන විදිහට අසාගෙන උන්නේය. අවසන ඔහු කීවේ ‘මට කරන්න පුළුවන් හැමදේම කරන්නම්, ජනාධිපතිතුමා එක්කත් කතා කරන්න‘ කියාය. මේ අපූරු බෝල පාස් කිරීමක් බව අපට වැටහිණි. සාකච්ඡාව අවසන් වූ පසු මා රනිල් වෙත ගොස් පවසා සිටියේ ‘චෝගම් සැණකෙළියට‘ ආනයනය කරන ලද අලුත්ම බෙන්ස් රථ පනහ කැබිනට් මණ්ඩලයට ලබා දිය හැකි බවත්, අලුතින් බලපත්‍ර ලබා නොදීමට ඒ අනුව හැකි බවත්‘ ය. රනිල් පෙරළා ඇසුවේ, ‘කොහේ ද ඒවා තිබෙන්නේ‘ කියාය. මා පැවසුවේ අපරාධ පරීක්ෂණ දෙපාර්තමේන්තුවට නියෝගයක් ලබා දී ඒවා ලබා ගන්නට පියවර ගන්නා ලෙසයි. රනිල් ඊට දුන් පිළිතුර මෙයයි. ”මේ, මහින්ද අපට ආණ්ඩුව දීලා ගියානෙ. ඒ මදිද? අපි දැන් අලුතින් වැඩ කරන්නයි ඕනෑ” යන්නය.


රනිල් මහින්දලාගේ කිසි හොරකමකට නීතිය ක්‍රියාත්මක නොකරන බව එදින මම කල්පනා කළෙමි. ඒ වග වහාම සනාථ වුණේ ශිරන්ති රාජපක්ෂගෙන් කට උත්තර ගන්නට රනිල් කථානායක නිල නිවස තුළ පහසුකම් සපයා දීමෙනි. ඒ ගැන රනිල්ගෙන් විමසූ විට ඔහු පැවසුවේ, ‘හිටපු ජනාධිපතිගෙ ඉල්ලීම‘ නිසා එය කළ බවයි.


රනිල් පුදුම සෙවලයෙක් යයි එදින මට සිතුණි.

රනිල්ගේ මැජික්


රනිල්ට කඩා වැටුණ ආර්ථිකය ගොඩ නැඟීමට කිසිම සැලැස්මක් නැති බවය මේ වන විට අනාවරණය වී තිබෙන්නේ. ජනතාව අත් විඳින පීඩනය අඩු කිරීමට හෝ ඔහුට පුළුවන් වන්නේ නැත. ඔහුට ජාත්‍යන්තරයෙන් අපමණ ආධාර ලැබී රට දියුණු කරනු ඇත යන්න සිහිනයකි. යහ පාලන ආණ්ඩුවේ අගමැති ලෙස බටහිර රටවලට ගිය රනිල් කිසිම අන්දමක ප්‍රමාණවත් අනුග්‍රහයන් ලබන්නට සමත් වන්නේ නැත. අවසන ඔහුට චීන්නු ළඟ දණ ගසන්නට සිදු විය. චීන්නු රනිල්ට දැමූ කොන්දේසි අතර ප්‍රධාන කොන්දේසිය මහින්ද ආරක්ෂා කළ යුතුය යන්නය. එය රනිල්ට ලේවලින් අත්සන් කර දෙන්නට පුළුවන් ප්‍රතිඥාවකි.


චීන්නු හම්බන්තොට වරාය වෙනුවෙන් කටයුතු කළේ රටට අවාසි අන්දමටය. එය වාසිවන අන්දමට හරවා ගන්නටවත් රනිල්ට හැකි වුණේ නැත. ලොව පුරා සිටින ආයෝජකයන්ගෙන් ආධාර ලබා ගන්නට හැකි බව රනිල් සමහර අමාත්‍යවරුන්ට දන්වා සිටිය ද කිසිම ආධාරයක් නොලැබුණ බව ඒ ඇමතිවරු පවසති. ඒ තත්වය අද වෙන විට වෙනස් වී තිබේ ද? නැත. රනිල්ට පුළුවන් වන්නේ ඉතිරිව තිබෙන්නේ, බැසිල් පටන් ගත් ගනු දෙනු අවසන් කරන්නටය. ඒ ගනු දෙනු රාජපක්ෂලා අවසන් නොකර, රනිල් ලවා අවසන් කරවීමෙන් රනිල් ඉවර වනු ඇත. රාජපක්ෂලාට යළි පිබිදෙන්නට පදනම ද ඉන්ම මතු වෙනු ඇත. රනිල් පටන් ගන්නා හැම දේටම එරෙහි වන්නට දැනටම විමල්ලා – වාසුලා – ගම්මන්පිලලා ලක ලෑස්තිය.


රනිල් සතුයයි හිතන ”මහා මොළයෙන්” 2015 දී කළ නොහැකි දේ අද කළ නොහැකි බව පැහැදිලි කළ යුතු නැත. අවම වශයෙන් පක්ෂයේ බලය රැක ගැනීමටවත් සමත් නොවුණ රනිල් රට ගොඩ නඟන්නේ කෙසේ ද?


කිසිම ආර්ථික ප්‍රශ්නයක් විසඳෙන්නේ නැත. ප්‍රශ්න උග්‍ර වනු ඇත. එහෙත් රනිල් රාජපක්ෂලාට අවශ්‍ය රැකවරණය සලසා දෙන්නට කළ හැකි යටි සූත්තර වැඩ හොඳින් කරනු ඇත.

ගෝඨාභයට – බැසිල්ට අවශ්‍ය දේම තව දුරටත් සිදු කරනු ඇත. ඒ වූ කලී ඔවුන් නීතිය අබිමුවට පත්වන එක වළක්වාලීමය. වසරක් පමණ ගත වුණ පසුව රාජපක්ෂලාගේ – හැත්ත බුරුත්තේ සියලු නඩු වලපල්ලටය.


අරගලය ගොඩ නැඟෙන්නේ නීතිය මත පාලනය කරන රටක් වෙනුවෙනි. දූෂණයෙන් තොර රටක් වෙනුවෙනි. අරගලය දැනටමත් ජන විඥානය ඒ වෙනුවෙන් අවධි කර හමාරය. රනිල් සැලසුම් හදන්නේ අරගලය දිය කර හැර එය අවසන් කිරීමටය. දැනටමත් ඔහු ඒ වෙනුවෙන් සියුම් යටි කූට්ටු වැඩ දියත් කොට තිබේ.


අද අප සිටින්නේ රාජපක්ෂලා සමඟ රනිල්ව ද දේශපාලන භූමියෙන් අතු ගා දැමිය යුතු මොහොතකය. මහින්ද සහ රනිල් සිටින තුරා ලංකාවට අනාගයක් නැත. මොනම විදිහකින් හෝ අනාගතයක් උදා කර ගන්නට ද නොහැකිය. මහින්ද යනු රටට එලව එලවා පළ දෙන කරුමයකි. රනිල් යනු රටට නිදහස් වන්නට බැරි වෛරසයකි, විනාශයකි.


අලුත් දේශපාලන සංස්කෘතියක් ගොඩ නැඟිය යුත්තේ රනිල් නොවේ, රාජපක්ෂලා ද නොවේ. දීප්තිමත් තරුණ පරපුරකි. ඊට කලක් ගත විය හැකිය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි