20.4 C
Sri Lanka
2 October,2022

පොලිසිය සිතාමතාම අපට පහරදෙන්න මැරයන්ට අවස්ථාව හදලා දුන්නා: ගාලුමුවදොර විරෝධතාකරුවෝ කියති

Must read

■ පුද්ගලයන් ඉලක්ක කර පහරදීලා
■ ආරක්ෂක අංශයකට අනුයුක්ත පිරිසකුත් පහර දෙන්න ආවාදැයි සැකයි

”අරාබි වසන්ත කියලා හඳුන්වන පුද්ගලයා ඔහුගේ බයික් එකේ දෙතුන් වතාවක් එහෙට මෙහෙට ගියා යකඩ පොල්ලක් තියාගෙන. අනුරංගව දැකලා බයික් එක නවත්තලා පිටිපස්සෙන් ඇවිත් තමයි ඔලුවට පොලු පාර ගැහුවේ. අනුරංග හිටියෙත් පොලිස් නිලධාරීන් කිහිපදෙනෙක් එක්ක. පහරදුන් පුද්ගලයාව අඩු ගානෙ අල්ලගන්නවත් පොලිසිය උත්සාහ කළේ නෑ. මේ පහර දීමත් පහරදෙනවාට වඩා වැඩි හානියක් කිරීමේ අරමුණින් කළ ප්‍රහාරයක් බව පැහැදිලියි”

”අපිව වටකරගත්තේ හොඳ උස මහත පිරිසක්. ඔවුන්ගේ පෙනුම, රැවුල කපලා තිබුණු විදිහ වගේ දේවල් එක්ක මොකක් හරි ආරක්ෂක අංශයක කට්ටියක් කියලා හිතුණා. ඊට පස්සෙ ඔවුන් මගෙන් ඇහුවා උඹගෙ ගම කොහෙද කියලා. ආපහු මගේ නම කිව්වා. කොණ්ඩෙ රැවුල වවාගෙන රට හදන්නද ආවෙ කියලා ඇහුවා. ඒත් එක්කම මට පොලු පාරක් ගැහුවා.

■ අමන්දිකා කුරේ

ජනාධිපතිවරයාට ඉල්ලා අස් වන ලෙස බල කරමින් ගාලුමුවදොර පැවැත්වෙන අඛණ්ඩ විරෝධතාවට ආණ්ඩුවේ මැරයන් පහර දී මේ වන විට සතියකටත් වඩා වැඩි කාලයක් ගෙවී ගොස් තිබේ.


මැයි 09 වන දින හිටපු අගමැති මහින්ද රාජපක්ෂට ඉල්ලා අස් නොවන ලෙස බලකරන්නට යැයි පවසමින් ඔහුගේ පාක්ෂිකයන්, ප්‍රාදේශීය දේශපාලනඥයන් සහ කැබිනට් ඇමතිවරුන් අරලියගහ මන්දිරයට රැස් වූ අතර එහිදී හිටපු කැබිනට් ඇමතිවරයෙකු වන ජොන්ස්ටන් ප්‍රනාන්දු ඇතුළු කථිකයන් පැමිණ සිටි පිරිස ඉදිරියේ වෛරී සහගත කතා පවත්වමින් අරලියගහ මන්දිරය ඉදිරිපිට පැවති මයිනා ගෝ ගමට සහ ගාලුමුවදොර පැවැත්වෙන ගෝඨා ගෝ ගමට පහර දීමට ඔවුන්ගේ පාක්ෂිකයන් උසිගන්වන ආකාරය මාධ්‍ය හරහා විකාශය විය. ඒ අනුව පොලු, මුගුරු රැගත් විශාල කණ්ඩායමක් මයිනා ගෝ ගම සිටි විරෝධතාකරුවන්ට පහර දුන්හ. ඒ මොහොතේ මයිනා ගෝ ගම විරෝධතා භූමිය තුළ රැඳී සිටියේ ඉතා සුළු පිරිසක් වූ අතර ප්‍රකෝපකාරී අරලියගහ මන්දිර මැරයෝ ඔවුන්ට අමානුෂිකව පහර දුන්හ. තත්වය පාලනය කිරීමට පොලිසියට නොහැකි වූ බව පැහැදිලිය.


මයිනා ගෝ ගමට පහර දීමට පැමිණෙන මැර කණ්ඩායම් අතර පාර්ලිමේන්තු මන්ත්‍රී සනත් නිශාන්ත, පාර්ලිමේන්තු මන්ත්‍රී මිලාන් ජයතිලක සහ මොරටුව නගරාධිපති සමන් ලාල් ඇතුළු ප්‍රාදේශීය දේශපාලනඥයන් රැසක් සිට තිබේ. මයිනා ගෝ ගම විරෝධතා භූමියේ විරෝධතාකරුවන් ඉදිකර තිබූ සියල්ල කඩා බිඳ දමා ඒවාට ගිනි තබන ප්‍රකෝපකාරී පිරිස පාර්ලිමේන්තු හා ප්‍රාදේශීය දේශපාලනඥයන්ගේ සහභාගිත්වය සහ සහයෝගය ඇතිව ගාලුමුවදොර විරෝධතා භූමියට ද පැමිණුණු අතර ගෝඨා ගෝ ගමේ විශාල පිරිසකට පහර දී බරපතළ තුවාල සිදු කර විරෝධතාකරුවන් ඉදිකර තිබූ කුටි හා ස්මාරක විශාල ප්‍රමාණයක් කඩා ගිනිබත් කරනා තෙක් පොලිසියට ඔවුන් පාලනය කරගැනීමට අදාළ කිසිවක් කරගැනීමට නොහැකි විය.


සනත් නිශාන්ත ඇතුළු මැරයන් ගාලුමුවදොරට පහර දීමට පැමිණෙන විට එය වළක්වනවා වෙනුවට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්ධු තෙන්නකෝන්, සනත් නිශාන්ත මන්ත්‍රීවරයා සමග කතා කරමින් පැමිණෙන අයුරුද මාධ්‍ය හරහා විකාශය විය. එවැනි විශාල හානියක් වළක්වා ගැනීමට හෝ පොලිසිය ක්‍රියා නොකළ බව එතැන සිට සියැසින් දුටු පුද්ගලයන්ගේ අත්දැකීම සහ මාධ්‍ය වාර්තා හරහා පැහැදිලි වේ. එමෙන් ම ඇතැම් ගාලුමුවදොර විරෝධතාකරුවන්ට පහර දී තිබෙන්නේ පොලිසියේ නිලධාරීන් විසින් ම බව අපි පසුගිය සතියේ ඔබට වාර්ත කළෙමු.


ගාලුමුවදොරට එල්ල වූ පහර දීමට මැදි ව පහරකෑමට ලක් වූ සහ තුවාල ලැබූ අය කිහිපදෙනෙකු අප හමුවුණු අතර ඔවුහු 09 වන දින ලැබූ භයානක අත්දැකීම පිළිබඳව අප සමග විස්තර කළහ. සිය අත්දැකීම අප සමග බෙදාගත් කිහිපදෙනෙකුම ඉල්ලා සිටියේ ඔවුන්ගේ නම් ගම් සඳහන් නොකරමින් එම තොරතුරු පළකරන ලෙසයි. අප සමග අදහස් පළකළ ඇතැම් පුද්ගලයන් පැවසුවේ එම පහර දීමේ දී ඇතැම් ක්‍රියාකාරීන් සොයමින් පහර දුන් බවයි. දුරකථනයේ ඡායාරූප තබාගෙන ඔවුන්ව සොයා ඇති අතර ඔවුන් හඳුනාගෙන පහර දීමට පැමිණි පුද්ගලයන් ද පහර දීමට එම ක්‍රියාකාරීන් සොයමින් ගොස් ඇත.


වනජීවී ඡායාරූප ශිලිපිනියක වන මධුශා නිශාන්ති ඇගේ අත්දැකීම පිළිබඳව අපට මෙලෙස විස්තර කළා ය.


‘මම මේ අරගලය පටන් ගත්ත දිනවල සිටම මෙතන ඉන්නවා. අපි කූඩාරම් ඉදිකරලා තියෙන තැන කූඩාරම්වල තමයි රැඳී සිටින්නේ. 09 වැනිදා උදේ වෙද්දි අපට අදහසක් තිබුණා ප්‍රහාරයක් එල්ල වේවි කියලා. ඒත් එක්කම අපට ආරංචි වුණා මයිනා ගෝ ගම සිටි අපේ පිරිසට පහර දීලා කියලා. අපේ යාළුවෝ එතැන හිරවෙලා කියලා අපට කතාකරලා කිව්වා. ඒත් එක්කම අපට ඉක්මන්ට ආරක්ෂා වෙන්න වැඩක් හදාගන්න කියලා කතා කරපු අය කිව්වා. අපි ඒ ගැන පොලිසියෙන් ඇහුවාම පොලිසියෙන් කිව්වේ අපේ ආරක්ෂාව ගැන බය වෙන්න එපා පොලිසියෙන් බලා ගන්නවා කියලා.”


එම ස්ථානයේ ප්‍රමාණවත් පොලිස් නිලධාරීන් ප්‍රමාණයක් හෝ ගැටුම වැළැක්වීමට අවශ්‍ය මාර්ග බාධක හෝ හරිහැටි යොදා නොතිබූ බව මධූෂා පවසයි.


”ඈතින් අපට කෑගහගෙන එන සද්දෙ ඇහුණා. කට්ටිය පොලු අරගෙන දුවගෙන එනවා අපි දැක්කා. කලින් දවස් ටිකේ වැස්සට තෙමුණු නිසා මම ටිකක් අසනීප වෙලා හිටියේ. ඒ නිසා මම රතු කුරුස කඳවුර පැත්තට ගිහින් බේරෙන්න උත්සාහ කළා. ඒත් අපේ අත්‍යවශ්‍ය බඩු වගයක් ගන්න තියෙනවා කියලා මතක් වුණු නිසා අපි හිටිය කූඩාරම ළඟට ගියාට පස්සෙ පොල්ලක් අතේ තියන් හිටපු වයසක පුද්ගලයෙක් බැන්නා උඹලට අපි යන්න කිව්වා නේද, දැන් ඉතින් ගුටි කාපන් කියලා. ඒ පුද්ගලයා මට පහර දුන්නේ නෑ. ඒත් එක්කම තව පිරිසක් ඇවිල්ලා එතන ඉඳපු සියලු දෙනාටම පහර දෙන්න ගත්තා. මගේ කකුල්වලටත් පොලු පාරවල් වැදුණා. වාසනාවකට අස්ථිවලට හානි වෙලා තිබුණේ නෑ. මට උණ වැළඳිලා සිටි අතරම තමයි මේ විදිහට ගුටි කන්න සිදු වුණෙත්. පොලිස් නිලධාරීන්වත් අපිව බේරගන්න ආවේ නෑ. ගුටි කනකොට මට හිතුණේ මම ඒ ගෙවන්නේ මගේ ජීවිතේ අවසාන තප්පර කීපය කියලා. මොකද ඒ තරම් ප්‍රකෝප වෙලා ඒ ආව මිනිස්සු හිටියේ.”


නිර්නාමිකව සිටිනු කැමති වූ තරුණයෙකු අප සමග පැවසුවේ පිරිස විසිරුවා හැරීමට අවශ්‍ය කඳුළු ගෑස්, ජල ප්‍රහාරක රථ ආදිය සූදානම් කර තිබුණද පොලිසිය හා කැරලි මර්දන ඒකක විසින් මැර කණ්ඩායම්වලට චේතාන්විතවම අරගල භූමියට පහර දීමට අවස්ථාව සකසා දුන් බවයි.


”ෆෙස්බුක් එකේ දාලා තිබුණ වීඩියෝ එක්ක අපි දැනගත්තා දැන් පිරිස අරලියගහ මන්දිරේ ඉඳන් ගාලුමුවදොර පැත්තට එනවා කියලා. අපට කරන්න දෙයක් තිබුණේ නෑ. අපි පාර අයිනට වෙලා බලාගෙන හිටියා. කැරලි මර්දන නිලධාරීන්, පොලිස් නිලධාරීන් සහ කඳුළු ගෑස් ගහන අයත්, ජල ප්‍රහාරක රථත් ඉස්සරහට යනවා අපි දැක්කා. පැය බාගයකට විතර පස්ස ලොකු ඝෝෂාවක් එක්ක අපට තේරුණා දැන් කට්ටිය ගාලුමුවදොරට පහර දෙන්න එනවා කියලා. ඒ වෙලාවේ ඔවුන්ව වළක්වන්න කඳුළු ගෑස් හෝ ජල ප්‍රහාර හෝ එල්ල කළේ නෑ. ඒ වගේ ම පොලිසියේ, විශේෂ කාර්ය බලකායේ හා කැරලි මර්දනේ නිලධාරීනුත් ලොකු උනන්දුවකින් ඔවුන්ව නැවැත්තුවේ නෑ. ඔවුන් ටික ටික පස්සට ආවා. ඒ විදිහට මැර කණ්ඩායම වන් ගෝල් ෆේස් එක හරියට ම ආවා. එතන ඉඳන් ඒ ආව පිරිසේ මුලින් තිබුණ කළහකාරී බව වැඩි වුණා. ඇවිස්සුණු කූඹි ගුලක් වගේ වටේ තිබුණු ටෙන්ට් ටික කඩලා ගිනි තියන්න ගත්තා. හිටපු හැමෝටම එළව එළවා යකඩ පොලුවලින් ගහන්න ගත්තා.’


ඒ වන විට ඉදිරියේන් ම රැඳී සිටි ගාලුමුවදොර අරගලකරුවන්ට එම විශාල වේගයත් සමග මැර කණ්ඩායම පහරදුන් බව මේ තරුණයා පවසයි. මුලින් ම පහරකෑමට ලක් වූ සියලු දෙනාම බරපතළ තුවාල ලබා රෝහල් ගත කරන්නට සිදු වූයේ මෙලෙස මැර කණ්ඩායම ගාලුමුවදොර අරගල භූමියට ඇතුල් වීමත් සමග ඔවුන්ගේ ප්‍රකෝපකාරී බව වැඩි වූ නිසා බව ඔහු පෙන්වා දෙයි. බරපතළ තුවාල ලබා දැඩි සත්කාර ඒකකයේ ප්‍රතිකාර ලැබූ අනුරංග ඇතුළු පිරිසට පහර දුන්නේ මේ අවස්ථාවේදීය.


”අපට බේරෙන්න විදිහක් තිබුණේ නෑ. අපිත් ආත්මාරක්ෂාවට පහර දුන්නා. ඒත් එක්කම බණ්ඩාරනායක පිළිමේ හරියෙන් ආව පිරිසක් එක පාරම ඇවිත් අපේ කූඩාරම් ටික කඩලා දැම්මා. ඒ විදිහට තමයි ඔවුන් සාන්ත ජෝන් ගිලන් රථ හමුදා වෛද්‍ය කඳවුර පවා කඩලා දාලා තිබුණේ. අපේ හිටපු ක්‍රියාකාරී නංගි කෙනෙක්ට අඬගහලා තමයි ගහලා තියෙන්නේ. මගේ නම සහ තවත් කීප දෙනෙකුගේ නම කියමින් සොයලා පහර දුන්නේ.’


මෙම පහර දීමට පැමිණි කණ්ඩායම සැලසුම්සහගතවම මෙම ස්ථානයට පහර දීමට පැමිණ ඇති බව එයින් පැහැදිලි බව ඔහු පවසයි. මෙම ස්ථානයේ ක්‍රියාකාරීව මැදිහත් වන කිහිපදෙනෙකු ඉලක්ක කරමින් මෙම මැර කණ්ඩායමේ පිරිසක් ඔවුන් සොය සොයා පහර දී තිබේ.
”අපට තියෙන සැකය තමයි ඒ විදිහට හොය හොයා ගහන්න හෙවුවේ, ගහලා නිකන් අත හරින්න නෙවෙයි කියන එක. කොහොමත් ගහන්න ආව එකේ හැමෝටම ගහනවානේ. ඒ විදිහට එක එක අයව සොයන්නේ පහර දෙනවාට වඩා බරපතළ හානියක් කරන්න කියලා පැහැදිලි සැකයක් මට තිබෙනවා. අපි ගෝඨා ගෝ ගම ඉන්නේ නැතිව පාරේ ඉඳපු නිසා ඒ කණ්ඩායමට අපිව අහු වුණේ නෑ. නමුත් පාර දිගේ පැමිණි කළහකාරී පිරිස්වලට අපට මුහුණ දෙන්න වුණා.”


අරාබි වසන්ත යනුවෙන් හඳුන්වන අශාන්ත නාලක විජේසිංහ නම් පුද්ගලයා විසින් අනුරංගට යකඩ පොල්ලකින් හිසට පහර දී තිබෙන්නේ ද ඒ අවස්ථාවේ දී ය.


”අරාබි වසන්ත කියලා හඳුන්වන පුද්ගලයා ඔහුගේ බයික් එකේ දෙතුන් වතාවක් එහෙට මෙහෙට ගියා යකඩ පොල්ලක් තියාගෙන. අනුරංගව දැකලා බයික් එක නවත්තලා පිටිපස්සෙන් ඇවිත් තමයි ඔලුවට පොලු පාර ගැහුවේ. අනුරංග හිටියෙත් පොලිස් නිලධාරීන් කිහිපදෙනෙක් එක්ක. පහරදුන් පුද්ගලයාව අඩු ගානෙ අල්ලගන්නවත් පොලිසිය උත්සාහ කළේ නෑ. මේ පහර දීමත් පහරදෙනවාට වඩා වැඩි හානියක් කිරීමේ අරමුණින් කළ ප්‍රහාරයක් බව පැහැදිලියි”
ගාලු මුවදොර අරගලයේ ආබාධිත යුද සෙබළුන්ද කුටියක රැඳී සිටි අතර පහර දීමට පැමිණි කළහකාරී පිරිස ඔවුන්ට ද පහරදුන් බව කහවත්ත ප්‍රදේශයේ සිට මෙම අරගලයට සම්බන්ධ වී සිටින තරුණයෙකු වන ධනංජය නාමල් තරුණයා පවසයි.


‘අපි හිටියේ මයිනාගෝගම. ගහන්න එනවා කියලා ආරංචි වුණාම කට්ටිය ගිහින් මොකද වෙන්නේ කියලා බලාගෙන හිටියේ. ආබාධිත යුද සෙබළුත් ඇතැම් අය ඉස්සරහට ගිහින් හිටියා. නමුත් මේ කළහකාරී පිරිස කඩා වැදිලා ඉවක් බවක් නැතිව යකඩ පොලුවලින් හැමෝටම ගහගෙන ගියා. ඒ ආබාධිත සෙබළුන්ට පවා ගැහුවා. ගල්වලිනුත් ගැහුවා. ගල් වැදිලා මටත් සුළු තුවාල කීපයක් වුණා. සනත් නිශාන්ත සහ සමන් ලාල් ප්‍රනාන්දුලා එතනට කලහකාරී පිරිස සමග ඇවිල්ලා ඔවුන්ට ඒවා විනාශ කරන්න ඉඩ දීලා බලාගෙන ඉන්නවා අපි දැක්කා.”
මෙම දේශපාලනඥයන්ද පොලු මුගුරු තබාගෙන සිටි බව ඔහු පවසයි.


”අපට පෙනුණ දෙයක් තමයි ඒ දේශපාලනඥයෝ ඔවුන් එක්ක ආව පිරිස කළහකාරී කරන්න තව තවත් උසි ගැන්වීම් කරනවා කියන එක. ඒ නිසා තමයි එතන ඉඳපු කාන්තාවන්ට පවා අමානුෂික විදිහට ඔවුන් පහර දුන්නේ.” එම තත්වය පාලනය කරගැනීමට පොලිසියට හෝ විශේෂ කාර්ය බලකා නිලධාරීන්ට නොහැකි වූ බව ධනංජය පවසයි.


”අපිව බස් හෝල්ට් එකක් පිටිපස්සට කොටු වෙලා හිටියේ. එතැන 25ක පමණ පිරිසක් තමයි සිටියේ. උද්ඝෝෂණයක් විසිරුවන්න හැකි තරම් ආරක්ෂක අංශ එතැනට කැඳවලා නෑ කියලා අපට පැහැදිලිවම පෙනුණා. එතැන රාජකාරියේ යොදවලා තිබුණු පොලිස් නිලධාරීන්ගෙන් සහ විශේෂ කාර්ය බලකා නිලධාරීන්ගෙන් එතැන පාලනය ගිලිහිලා තිබුණේ. ඔවුන්ගේ ඒ හැසිරීමත් එක්ක වගේ ම එතැනට ප්‍රමාණවත් පොලිස් නිලධාරීන් යොදවා නොතිබුණු නිසා පැහැදිලියි මේ සිද්ධිය සිතා මතා කළ එකක් කියලා. අපි සෑහෙන්න අමාරුවෙන් තමයි එතැනින් අපේ ජීවිතය බේර ගත්තේ. ජීවිතය බේරගත්තා කියන්න හේතුව තමයි ඔවුන් හිටපු ප්‍රකෝපකාරී තත්වයත් එක්ක අපිව ඔවුන්ට මැදි වුණා නම් ඔවුන් අපිව පහර දීලා විතරක් අත් හරින්නේ නැති නිසා. ඒ විදිහට අපිව ඔවුන්ට හසු වුණා නම් අපේ ජීවිත අනතුරක් පවා වෙන්න තිබුණා එතැන තිබුණ තත්වයත් එක්ක.”


තවත් නිර්නාමිකව සිටිනු කැමති වූ තරුණයෙකු පැවසුවේ, මෙම පහර දීම සඳහා කළහකාරී පිරිස පැමිණුණේ පොලිසියේ පූර්ණ අනුදැනුම මත බවයි.


”පොලිසිය පාර දිගේ ආවා ගාලුමුවදොර පැත්තට. පස්සට පස්සට ආවේ. කළහකාරී පිරිස මුහුදු වෙරළ අයිනෙන් කිසිම බාධාවක් නැතිව මේ පැත්තට ඇතුල් වුණා. ගාලුමුවදොර පිටියේ සමහර තැන් වහලා තිබුණා තණකොළ පෑගෙන නිසා. ඒ තිබුණු වැටවල් පවා කඩාගෙන ඔවුන් ආවේ. නගර සභාවෙන් ඉදි කරලා තිබුණු වැටවල් එතෙක් ම තිබුණා. නමුත් මේ පිරිස ඒ වැටවල්වල තිබුණු පොලු පවා කඩාගෙන ආවා පහර දෙන්න. පොලිසිය ඔවුන්ව නවත්වන බවක් අපට පෙනෙන්න තිබුණේ නෑ.’


එමෙන් ම ජල ප්‍රහාර ද මුලින් ම එල්ල කර තිබෙන්නේ සාමකාමීව සිටි ගාලුමුවදොර අරගලකරුවන්ට බව ඔහු පෙන්වා දෙයි.


”ජල ප්‍රහාරක රථ තුනක් තිබුණා. දෙකක් එන අයගේ ඉස්රසරහටම ගියත් ඒවා ආපහු ආපස්සට ආවා. වතුර ගහන්න පටන් ගනිද්දිම මුලින් ම වතුර ගැසුවේ අපේ අයට. කලහකාරී පිරිස එලවන්න ගහනවා වෙනුවට අපටම තමයි ඒකත් ගැහුවේ. අපි පොලිසියේ අයට පෙන්වුවා ගහනවා කියලා අපේ අයට. අපි අඬ අඬ ඇහුවා අපට ඇයි මෙහෙම කරන්නේ කියලා පොලිස් නිලධාරීන්ගෙන්. නමුත් ඔවුන් කිසිම තැකීමක් නොකර තමයි හිටියේ.”


මෙම තරුණයාගේ ද නම කියමින් පහරදීමට සොයා තිබේ. ”එතකොට මම ෆෙස්බුක් ලයිව් වීඩියෝවක් දෙමින් හිටියේ. එක පාරටම පිටිපස්සෙන් එක්කෙනෙක් මගේ නම කියනවා ඇහුණා. මම පිටිපස්ස හැරුණම දැක්කා ඒ පුද්ගලයා මට පහර දෙන්න එනවා කියලා. අපි හිටපු කීප දෙනා රතු කුරුස කඳවුර පැත්තට දිවුවා.’


නමුත් ඔවුන්ට බේරීමට අවස්ථාවක් ලැබී නොමැති අතර ඔවුන්ව කිහිපදෙනෙකු විසින් වටකරගෙන තිබේ. ”පොලු ගත්ත හතර පස් දෙනෙක් දුවමින් සිටිය මාවත් මගේ සගයාවත් වට කරගත්තා.”


මෙම පහර දීමට පැමිණි පිරිසගේ බාහිර ලක්ෂණ යම් ආරක්ෂක අංශයක සේවය කරන නිලධාරීන් මෙන් බව මෙම තරුණයා පවසයි.


”අපිව වටකරගත්තේ හොඳ උස මහත පිරිසක්. ඔවුන්ගේ පෙනුම, රැවුල කපලා තිබුණු විදිහ වගේ දේවල් එක්ක මොකක් හරි ආරක්ෂක අංශයක කට්ටියක් කියලා හිතුණා. ඊට පස්සෙ ඔවුන් මගෙන් ඇහුවා උඹගෙ ගම කොහෙද කියලා. ආපහු මගේ නම කිව්වා. කොණ්ඩෙ රැවුල වවාගෙන රට හදන්නද ආවෙ කියලා ඇහුවා. ඒත් එක්කම මට පොලු පාරක් ගැහුවා. මම ඒ පොලු පාර කාගෙනම රතු කුරුස කඳවුර ඇතුළට පැන්නා. ඒත් එක්කම ඒක ඇතුළේ ඉඳපු අය කිව්වා ඒකෙන් එළියට යන්න කියලා. මේ ඔක්කොමත් වෙලා ටික වෙලාවක පස්සේ තමයි කඳුළු ගෑස් ගැහුවේ.”


පහසුවෙන් මුල් අවස්ථාවේදීම වළක්වා ගැනීමට තිබූ ප්‍රහාරයක් පොලිසිය සහ අදාල අංශ විසින් ඒ ඒ අවස්ථාවල නවත්වා නොගත් නිසා මෙම හානිය සිදු වූ බව මේ වන විට සක් සුදක් සේ පැහැදිලිව තිබේ.


වගකීම් භාර නිලධාරීන් විසින් මානව හිමිකම් කොමිසම හමුවේ දුන් සාක්ෂිවල ද තිබෙන්නේ මෙම ප්‍රහාරය වළක්වා ගැනීමට නොහැකි වූයේ ඉහළින් පැමිණි බලපෑම් නිසා බවයි. පහර දීම සිදුවන විට එම ස්ථාන දෙකෙහිම රැඳී සිටි සියලු දෙනාගේ නිරීක්ෂණය වන්නේ පොලිසිය විසින් මෙම ගැටුම වළක්වා ගැනීමට කිසිදු උත්සහයක් නොගත් බවයි. එසේ නම් මෙය සිතා මතාම පහරදීමේ සැලසුම් මත ක්‍රියාත්මක වූවක් බව පැහැදිලිය. සාමාන්‍යයෙන් විරෝධතාවක් විසිරුවා හැරීමට භාවිත කරන කඳුළු ගෑස් හා ජල ප්‍රහාර පවා පොලිසිය එල්ල කරන්නේ විශාල විනාශයක් සිදුවන්නට ඉඩ හැර සෑහෙන වේලාවක් ගත වූ පසුවය. එම ප්‍රහාරවලින් ද වැඩි ප්‍රමාණයක් එල්ල කර තිබුණ කළහකාරී පිරිසට නොව එතැන රැඳී සිටි සාමකාමී විරෝධතාකරුවන්ට ය.


අප පසුගිය සතියේ වාර්තා කළ අන්දමට පොලිසිය විසින්ද විරෝධතා කරුවන්ට පහර දී තිබේ. එසේ නම් පොලිසිය සිට තිබෙන්නේ පහරකෑ පීඩකයාගේ පැත්තේ නොව පහර දුන් අනීතික මැරයන්ගේ පැත්තේය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි