No menu items!
26.1 C
Sri Lanka
28 March,2024

ගෝඨාභයගේ ඊළඟ පියවර සුළුවෙන් තැකිය යුතු නැත

Must read

■ පුරවැසියා

මැයි 11 වැනිදා රාත්‍රියේ ජනාධිපතිවරයා හදිසියේම ජාතිය ඇමතුවේය. රටේ පවතින දේශපාලන අස්ථාවරභාවය ගැන ඔහු එහිදී කීවේ ඉදිරි සතියක කාලයක් තුළ නව අගමැතිවරයකු හා කැබිනට් මණ්ඩලයක් පත්කරන බවය. ඒ අනුව සිතාගත හැක්කේ දැනට විපක්ෂයේ කටයුතු කරන පක්ෂවලින් තොරව ඔහු ආණ්ඩුවක් පිහිටුවන බවය. ආණ්ඩුව සමඟ තවමත් සිටින හා මෙතෙක් සිටි දැනට ස්වාධීන යැයි කියන පිරිස් එම ආණ්ඩුවේ කොටස්කාරයන් වනු ඇත. දැනට සිදුවී ඇති හමුවීම් අනුව එක් ආසනයක් පමණක් හිමි රනිල් වික්‍රමසිංහද, සජිත් ප්‍රේමදාස සමඟ එකඟතාවක් නැති සමගි ජනබලවේගයේ යම් පිරිසක්ද මේ මොහොතේ පවතින තත්වයෙන් රට බේරා ගැනීමේ සද් චේතනාවෙන් යැයි කියමින් සමහරවිට මෙම අලුතින් පිහිටුවන ආණ්ඩුවේ කොටස්කාරයන් විය හැකිය.


අගමැතිවරයෙක් හා කැබිනට් මණ්ඩලයක් නොමැතිව රට පවත්වාගෙන යා නොහැකි බව ඇත්තය. එහෙත් අගමැති මහින්ද රාජපක්ෂ ඉල්ලා අස්වීමෙන් පසු ප්‍රසිද්ධ ආරාධනාවකින් යුතුව විපක්ෂය සමඟ ජනාධිපතිවරයා සාකච්ඡා කරන අයුරක් අප දුටුවේ නැත. විපක්ෂයේ පිරිස් සමඟ යම් සාකච්ඡාවක් ඔහු කර තිබුණේ නම් ඒ රහසිගතවය. කොහොමත් සමගි ජන බලවේගයේ හා ජාතික ජන බලවේගයේ ස්ථාවරය ඔවුන් ජනාධිපතිවරයාට පැහැදිලිවම දන්වා තිබුණි. එම පක්ෂ නායකයන් කීවේ ජනාධිපතිවරයාද සිය ධුරයෙන් ඉල්ලා අස්විය යුතු බව හා එසේ වුවහොත් ඔවුන් ආණ්ඩුව බාර ගැනීමට සූදානම් බවය. නොඑසේව ජනාධිපතිවරයා නායකත්වයේ තබාගෙන ආණ්ඩු පිහිටුවීමට එම පක්ෂ සූදානම් නැති බවය. එම පක්ෂ දෙකේ එකී ස්ථාවරයන් නිවැරදිය. රට සමාජ ආර්ථික වශයෙන් පත්වී ඇති මෙම අර්බුදයට වගකිවයුතු ප්‍රධානියා වෙන කවුරුවත් නොව ජනාධිපතිවරයාය. රටේ මහජන ඉල්ලීම වන්නේද ජනාධිපතිවරයා ධුරයෙන් යායුතු බවය. ධුරයෙන් යායුතු යැයි මහජනයා ඉල්ලීම් කරන පුද්ගලයකු සමඟ තවදුරටත් ආණ්ඩු කිරීමේ හැකියාවක් විපක්ෂයකට තිබිය නොහැකිය.


ආණ්ඩුව සමඟ දැනට සිටින පිරිස හා ස්වාධීන වී ඇති පිරිස් සමඟ සහ අවශ්‍ය නම් විපක්ෂයේ කිහිප දෙනෙකු සමඟ පිහිටුවන ආණ්ඩු පිළිගැනීමට මහජනතාව සූදානම් නැති බව අප තේරුම් ගත යුක්තකි. විදෙස්ගත ශ්‍රී ලාංකිකයින්ද එවැන්නක් පිළිගැනීමට සූදානම් නැත. ඒ අනුව ප්‍රශ්නය විසදෙන්නේ නැති බව පැහැදිලිය. ජනාධිපතිවරයා ජාතිය ඇමතීමේ කතාවේ එක් පැත්තක් එසේය.


ජනාධිපතිවරයාගේ ජාතිය ඇමතීමේ කතාවේ අනෙක් වැදගත්ම කොටස වූයේ පසුගිය 09 වැනිදා සිදුවූ අවාසනාවන්ත සිදුවීම් ගැන අදහස් දැක්වීමය. එහිදී ඔහු එම අවාසනාවන්ත තත්වය ඇතිවීමට තුඩු දුන්නේ අරලිය ගහ මන්දිරයේ සිදුවීම බව අවධාරණය කළද, එහි වරදකරුවන් සම්බන්ධයෙන් නීතියට අනුව යම් ක්‍රියාමාර්ගයක් ගන්නා බවක් සෘජුව ප්‍රකාශ කළේ නැත. මයිනා ගෝ ගම හා ගෝටා ගෝ ගම සාමකාමී විරෝධතා කරුවන්ට එරෙහිව මැර ප්‍රහාර එල්ල කළ පුද්ගලයින්ට එරෙහිව නීතියට අනුව යම් ක්‍රියාමාර්ගයක් ගන්නා බවක්ද කීවේ නැත. එහෙත් අවධාරණය කරනු ලැබුවේ එම මැර ප්‍රහාරවලින් පසු රටපුරා ඇති වූ ප්‍රචන්ඩ සිදුවීම්වලට එරෙහිව දැඩි ක්‍රියාමාර්ග ගැනීමේ අධිස්ථානයකි. ඒ අනුව පරණ පුරුදු ගෝඨාභය රාජපක්ෂ යළි අවතීර්ණ වී සාමකාමී විරෝධතාකරුවන්ට පහරදීම නිසා ප්‍රචන්ඩ වූ පිරිස්වලට එරෙහිව යමක් කරන බව ඔහුගේ වචනවලින් මෙන්ම එය ප්‍රකාශ කළ ස්වරූපයෙන්ද අපට පෙන්නුම් කළේය.
පුරවැසියාගේ අදහස වන්නේ මේ වූ කලී ජනාධිපති ගෝඨාභය රාජපක්ෂගේ අනතුරු ඇඟවීමකි. යළි නිල නොවන රාජ්‍ය මර්ධනය කැඳවන බවට කළ දැනුම් දීමකි. ඊට අදාල රාජ්‍ය නිවේදනද අපට එම දිනයේද අසන්නට ලැබුණි. ඉන් එකක් වන්නේ මහජන විරෝධතා සඳහා ජනතාව කැඳවූ හෝ ජනතාවට ආමණ්ත්‍රණය කළ ෆේස්බුක් ඇඩ්මින්ලා 50ක් හඳුනාගත් බව හා ඔවුන්ට එරෙහිව කටයුතු කරන බවට නිවේදනය කිරීමය.


ඒ නිසා මේ මොහොතේ දරුණු පසුබෑමක සිටියත් ගෝඨාභය රාජපක්ෂ හෝ රාජපක්ෂවරු ගැන සැහැල්ලුවෙන් සිතීම අප අත්හැරිය යුතුය. මන්ද ඔවුන්ට සිදුවී ඇති දේපල විනාශවීම්, ප්‍රසිද්ධියේ ජීවත්වීමට නොහැකි වීම් ආදිය ඉවසන්නේ නැති බව අප තේරුම්ගත යුතුය. රජ පවුලක් වශයෙන් රාජ්‍ය පාලනයේ සිටි හා තවමත් නිල වශයෙන් රාජ්‍ය බලය හොබවන ඔවුන් සිහසුනෙන් බැස යද්දී නිකම්ම බැස යනු ඇතැයි අප සිතිය යුතු නැත. ඔවුන් අවසානයේ බැස යනු ඇත්තේ උපරිම වාඩුද ගෙන මේ රට තව තවත් අගාධයට ඇද දැමීමෙන් පසුවය.


රටපුරා හදිසි තත්වයක් නොපැවතියදී හදීසි නීතිය ප්‍රකාශයට පත්කිරීම, කොළඹ ආශ්‍රිතව විශේෂ තත්වයක් නොපැවතියදී සූදානම් තත්වයේ විශේෂ හමුදා කණ්ඩායම් කොළඹට කැඳවීම ආදිය අපට පෙන්නුම් කරන්නේ පරණ පුරුදු ගෝඨාභය රාජපක්ෂ ඇතුළු රාජපක්ෂ පාලනයේ යම් සූදානමක් පිළිබඳවය. ඒ නිසා උද්දාමයෙන් යුතුව කිසිවක් සුළවෙන් තකා රාජපක්ෂවරුන්ට එරෙහි විරෝධය දක්වන්නන් හා විරෝධතාකරුවන් කටයුතු කළ යුතු නැත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි