21 C
Sri Lanka
6 October,2022

අපේක්ෂා රෝහලේ ඖෂධ හිඟයෙන් රෝගී ජීවිත අනතුරේ

Must read

■ ධනුෂි ලිහිණිකඩුව


මහරගම අපේක්ෂා රෝහලේ පවතින ඖෂධ හිඟය සඳහා ඉදිරියේ දී කඩිනමින් විසඳුම් නොලැබුනහොත් රෝගීන්ගේ ජීවිත අනතුරට පත් විය හැකි බව රජයේ ඖෂධවේදීන්ගේ සංගමයේ නිළධාරියකු අනිද්දාට අදහස් දක්වමින් පැවසීය.


රටේ පවතින අර්බුදකාරී තත්ත්වය හමුවේ මහරගම අපේක්ෂා රෝහගේ රෝගීන්ට අවශ්‍ය වී ඇති ඖෂධ වර්ගවල හිඟය හේතුවෙන් රෝගීන් සඳහා අඛණ්ඩව ප්‍රතිකාර සැපයිය නොහැක තත්ත්වයක් උදා විය හැකි බවත් ජාත්‍යන්තර හෝ දේශීය වශයෙන් පරිත්‍යාග මත මේ මොහොතේ යම් යම් බෙහෙත් වර්ග එම රෝහලට ලැබුන ද ඒවා කෙතරම් කාලයක් සඳහා ප්‍රමාණවත් වේ ද යන්න නිශ්චිතවම කිව නොහැකි බවත් එම නිළධාරියා පැවසී ය.


ඒ අනුව පැක්ලිටැක්සෙල් නැමැති ඩිම්බකෝෂයේ උසස් පිළිකා සහ පියයුරු සහ පෙනහළු පිළිකා ඇතුළු අනෙකුත් විවිධ පිළිකා සඳහා ප්‍රතිකාර කිරීමට පළමු පෙළ සහ පසුව ප්‍රතිකාර ලෙස භාවිතා කරන ටැක්සොයිඩ් රසායනික චිකිත්සක කාරක ඖෂධය මේ වන විට පවතින්නේ මාත්‍රා 10ක ප්‍රමාණයක් පමණක් බවත් ඉදිරියේ දී එය හිඟ විය හැකි බවත්, පිලිකා සෛල වර්ධනය අඩු කරන ෆිල්ග්‍රාස්ටිම් නැමැති ඖෂධය නැවත නොලැබුණහොත් දැනට පවතින ප්‍රමාණය ප්‍රමාණවත් වන්නේ අද දිනයට (මැයි 05) පමණක් බවත් ඔහු ප්‍රකාශ කර සිටියේ ය. ක්ලෝරැම්බසිල් ඕරල් නැමැති නිදන්ගත වසා ලියුකේමියාව, හොඩ්කින්ගේ රෝගය සහ අනෙකුත් ලිම්ෆෝමා වැනි රුධිර හා වසා පද්ධතියේ විවිධ වර්ගයේ පිළිකා සඳහා ප්‍රතිකාර කිරීමට භාවිතා කරන, බාහිර රෝගී අංශයෙන් ලබාගත යුතු පිළිකා නාශක ඖෂධය මේ වන විට සම්පූර්ණ හිඟ තත්ත්වයක් පවතින බවත් ඔහු ප්‍රකාශ කරයි.


මේ පිළිබඳ අප කළ විමසීමේ දී නියෝජ්‍ය සෞඛ්‍ය සේවා අධ්‍යක්ෂක ජනරාල්වරයා සඳහන් කර සිටියේ රට තුළ පවතින තත්ත්වයත් සමග සියලු රෝගවලට ලබා දෙන ඖෂධවල හිඟ තත්ත්වයක් පවතින බවයි. මේ වන විට සෞඛ්‍ය අමාත්‍යංශය අදාළ වැඩ පිළිවෙළවල් හරහා හිඟ බෙහෙත් ගෙන්වා ගැනීමට කටයුතු කරන බවත් ඔහු වැඩිදුරටත් ප්‍රකාශ කළේ ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි