ආණ්ඩුවේ හවුල්කාර පක්ෂ හා සංවිධාන එකොළහක සන්ධානය මෙවර මැයි දිනය එක්ව පැවැත්වීම සඳහා අවධානය යොමු කර ඇතැයි වාර්තාවේ.
ඒ සම්බන්ධයෙන් වූ යෝජනාවක් ශ්‍රී ලංකා නිදහස් පක්ෂය පාර්ශ්වයෙන් මේ වනවිට ඉදිරිපත්ව ඇති බව වැඩිදුරටත් වාර්තාවේ.
මේ සම්බන්ධයෙන් කළ විමසීමකදී ශ්‍රී ලංකා නිදහස් පක්ෂයේ ඉහළ නිලධාරියකු ප්‍රකාශ කළේ මෙම පක්ෂ හා කණ්ඩායම් එකොළහේ සන්ධානය තවදුරටත් වෙනත් පක්ෂ හා කණ්ඩායම් සමඟ පුළුල් කළ යුතු බව එම පක්ෂයේ මතය බවයි. අවසන් වරට මාර්තු 16 වැනිදා පැවති එම පක්ෂ සන්ධානයේ සාකච්ඡාවට හා ඉන්පසු පැවති මාධ්‍ය හමුවට එම පක්ෂය සහභාගි නොවුණේ මන්දැයි කළ විමසීමේදී ඔහු පැවසුවේ එම සාකච්ඡාව හදිසියෙන් යොදා ගත් එකක් බවත් ඒ වනවිට පක්ෂයේ ප්‍රතිසන්ධාන කටයුතු සඳහා පක්ෂ ප්‍රධානීන් වෙනත් ස්ථාන වෙත ගොස් තිබූ බවය.■
