■ පුරවැසියා
රාජපක්ෂවරුන්ගේ ජාවාරම්කාර දේශපාලනය ගැන සමීපව යම්කිසි අදහසක් ලබා ගැනීමට වුවමනා නම් මේ දවස්වල අවධානය යොමු කළ යුත්තේ හම්බන්තොට ලුණු ලේවායේ සිද්ධිය කෙරෙහිය. එම ලුණු ලේවායේ සභාපතිවරයාගේ පාලනයට එරෙහිව හම්බන්තොට නගරාධිපති කූප්‍රකට එරාජ් ප්‍රනාන්දුගේ නායකත්වයෙන් යුතුව ආරම්භ කර ඇති මැර ප්‍රචණ්ඩ විරෝධයට මේ වනවිට මාසයකට අධික කාලයක් ගතවී තිබේ.
හම්බන්තොට ලුණු ලේවායේ සභාපතිවරයාව එම තනතුරෙන් ඉවත් කරන ලෙස ඉල්ලා මෙම මැර ප්‍රචණ්ඩ විරෝධතාව පවත්වන අතර එම ඉල්ලීම ඉටුවන තුරු සිය විරෝධය අත්නොහරින බව හම්බන්තොට නගරාධිපතිවරයා ප්‍රකාශ කර ඇත. හම්බන්තොට ලුණු ලේවාය ඉදිරිපිට විරෝධතා පුවරු ප්‍රදර්ශනය කරමින් ආරම්භ වූ එම විරෝධතාව මේ වනවිට ස්ථීර අට්ටාලයක් සකස් කර මාරාන්තික උපවාස දක්වන භූමියක් දක්වා රූපාන්තරණය වී ඇත.
මෙසේ වීමට හේතුව ප්‍රසිද්ධ මැරයෙකු වන හම්බන්තොට නගරාධිපතිගේ මැරකම් හමුවේ පරාජය බාරගෙන කරබාගෙන යන්නට නීතිඥයකු වන එහි සභාපතිවරයා සූදානම් නොවීමය. ඔහු කියන්නේ මුළු ලුණු ලේවාලයේ කාර්ය මණ්ඩලයම ඔහු සමඟ සිටින බවත්, මෙතෙක් පාඩු ලබමින් තිබූ එම ආයතනය ඔහුගේ පාලනය යටතේ ලාභ ලබන තත්වයට පත්කර ඇති බවත්ය. ඔහුට විරුද්ධව කටයුතු කරන්නේ ලුණු නිකුත් කිරීම් ජාවාරමක් බවට පත්කරගෙන ඒවායින් මුදල් හම්බ කළ පිරිස් බවත්ය. මේ වනවිට ලුණු ලබාගැනීමේ ක්‍රමවේදය ඔහු විවෘත කර ඇතැයිද ඒ මගින් ජාවාරම්කාරයන්ගේ අයථා මුදල් ඉපැයීම් නතර වී ලුණු ලේවාය ලාභ ලබන තැනක් බවට පත්වී ඇතැයිද ඔහු කියා තිබේ. එම පැහැදිලි කිරීම් සනාථ කරමින් ලුණු ලේවායේ පක්ෂ විපක්ෂ භේදයකින් තොරව සියලු වෘත්තීය සමිති හා සේවකයන් මේ වනවිට සභාපතිවරයා සමඟ එක පෙළට සිටගෙන සිටිති.
ලුණු ලේවායේ සභාපතිවරයාට මෙන්ම එහි සේවකයින්ටද හම්බන්තොට නගරාධිපතිවරයා ඇතුළු මැර විරෝධතාකරුවන්ගෙන් මරණීය තර්ජන මෙන්ම ශාරීරික පහරදීම්ද සිදුවී ඇතත් එම විරෝධතා කරුවන්ටවත්, විරෝධතා අට්ටාලයටවත් කිසිවක් මෙතෙක් සිදුවී නැත. සභාපතිවරයා ඇතුළු සේවකයින්ගේ පැමිණිලි පොලිස් කුණු කූඩයෙන් ගිනි ගොඩටත් ගොස් හමාර වී ඇති සේය.
විරෝධතාකරුවන් ප්‍රචණ්ඩව හැසිරෙන හැම අවස්ථාවකම එය පාලනයට පිරිස් මදිවී අවට පොලිස් ස්ථානවලින් පිරිස් කැඳවා සාමය ආරක්ෂා කිරීමට උත්සාහ ගැනීම පමණක් පොලීසියේ රාජකාරිය බවට පත්වී ඇත. සාමය කඩන්නවුන්ට එරෙහිව ගන්නා පියවරක් නැත.
මෙසේ වන්නේ නිකම්ම නිකම් ස්ථානයක නොවේ. රට කරවන රාජපක්ෂ පවුල් සමාගමේ උපන් භූමිය වන හම්බන්තොටදීමය. ඔවුන් විසින් පත්කරන ලද සභාපතිවරයාට එතරම් හරියක් වන්නට දී රාජපක්ෂවරුන් හම්බන්තොටදීම මෙතරම් මුනිවත රකින්නේ ඇයි? හේතුව පැහැදිලිය. හම්බන්තොට නගරාධිපතිවරයා යනු රාජපක්ෂවරුන්ගේ අන්තේවාසික පුද්ගලයෙකිය. එදා හම්බන්තොට වරාය නිරීක්ෂණයට ආ විපක්ෂ නියෝජිතයින්ට පහර දීම, රාජපක්ෂලාගේ මැරකම්වලට එරෙහිව වීදියේ විරෝධය පෑ ජයතිලක බණ්ඩාර ඇතුළු කලාකරුවන්ට පහර දීම සිදුකළ සට්ටැඹියා ඔහුය.
ආයතනයේ දියුණුවට හා නීතියට අනුව කටයුතු කරන විද්වත් පත්කිරීමක් වන ලුණු ලේවායේ නීතිඥ සභාපතිවරයාට වඩා රාජපක්ෂවරුන්ට අවශ්‍ය වන්නේ මේ වැනි මැර නගරාධිපති නියෝජිතයින්ය. අවශ්‍ය විට මැරකම ඔවුන් කරන්නෝය. ඊටත් එහා ගොස් හැමදාම අවශ්‍යතාවයේ පවතින ජාවාරම්කාර මුදල් සෙවීමද ඔවුන් කරනවා ඇත. ලුණු ලේවායට එරෙහි උද්ඝෝෂණවලින් පෙන්නුම් කරන්නේ එම ජාවාරමට වැට බැඳීම නිසා ආදායම් අහිමි වීමෙන් උරණ වූ පිරිසගේ හැසිරීමයි.
ජාවාරම්වලට වැට බඳිනවාට රාජපක්ෂලා කැමති නැත. හම්බන්තොට මේ ආකාරයේ මැර උද්ඝෝෂණ ඒ නිසාය. මේ මැරකම්වලට එරෙහිව කිසිදු පියවරක් නොගෙන පොලීසිය අහක බලාගෙන සිටීමෙන් පෙන්නුම් කරන්නේද එයය. ජාවාරම්කාර ව්‍යාපාරවලට රාජපක්ෂලා විරුද්ධ නම් මෙවැනි උද්ඝෝෂණ හම්බන්තොට ඇතිවිය නොහැකිය. හම්බන්තොට නගරාධිපති රාජපක්ෂලාටත් උඩින් සිටින කෙනෙක්ද? නැත. ඔහු රාජපක්ෂලාගේ නියෝජිතයෙකු පමණය. මේ මොහොතේ ඔහු කරමින් සිටින්නේ රාජපක්ෂලාගේ එම නියෝජිත ධුරයේ කටයුතුය. නැත්නම් මේ ආකාරයේ මැර නාටකයක් හම්බන්තොට ලුණු ලේවායට එරෙහිව රාජපක්ෂලාගේ හම්බන්තොටදීම සිදුවිය නොහැකිය.
හම්බන්තොට සම්බන්ධයෙන් රාජපක්ෂලාගේ ඇත්ත එය නම් මුළු රටම සම්බන්ධයෙන් එය එසේ නොවී පවතීද? අප තේරුම් ගත යුත්තේ එයය.■
