19.3 C
Sri Lanka
27 September,2022

ආයෝජන මණ්ඩලයේ ඉල්ලා අස්වීම්
දෙකක් කඩතොලු හදාගනීද?

Must read

එකක් කඩතොලු මකාගන්නට ගොස් දෙකක් කඩතොලු හදා ගත්තයි ඉඳුරුවේ ආචාරියා යැයි කියමන මේ අවස්ථාවේ සිහියට නැගේ. ඒ මේ වනවිට ශ්‍රී ලංකා ආයෝජන මණ්ඩලය ආශ්‍රිතව පැනනැඟී ඇති ගැටලුව පිළිබඳව සලකා බැලීමේදීය.


ශ්‍රී ලංකා ආයෝජන මණ්ඩලයේ සභාපතිවරයා ඇතුළු අධ්‍යක්ෂ මණ්ඩලයේ හා අධ්‍යක්ෂ ජනරාල්වරයාගේ ඉල්ලා අස්වීම් බාරගත නොහැකි බව ජනාධිපතිවරයා කියා ඇත. ඒ බව ජනාධිපති ලේකම් ආචාර්ය පීබී ජයසුන්දර දැනුම් දී ඇත. ලංකා ආයෝජන මණ්ඩලයේ සභාපති සංජය මොහොට්ටාල, අධ්‍යක්ෂ මණ්ඩල සාමාජිකයන් වන හර්ෂ සුභසිංහ, හර්ෂ කබ්රාල්, සංජය කුලතුංග, ජයමිණි පැල්පොල හා අධ්‍යක්ෂ ජනරාල් වන පසන් වනිගසේකර තනතුරුවලින් ඉල්ලා අස්වූයේ දෙසැම්බර් 02 වැනිදාය. එම ඉල්ලා අස්වීම් බාරගැනීමට නොහැකි බව ජනාධිපතිවරයා කියා ඇත්තේ දෙසැම්බර් 05 වැනිදාය.
ශ්‍රී ලංකා ආයෝජන මණ්ඩලයේ සභාපතිවරයා ඇතුළු අධ්‍යක්ෂ මණ්ඩල සාමාජිකයන්ගේ හා අධ්‍යක්ෂ ජනරාල්වරයාගේ ඉල්ලා අස්වීම් බාර ගැනීම ජනාධිපතිවරයා ප්‍රතික්ෂේප කිරීමත් සමඟ එහි වෘත්තීය සමිති එම ඉල්ලා අස්වූ නිලධාරීන්ට එරෙහිව යළි සටනට අවතීර්ණ වී ඇත. එහි වෘත්තීය සමිති ජනාධිපතිවරයාට ලිපියක් යවමින් දැනුම් දී ඇත්තේ ඔවුන්ව නැවත ආයෝජන මණ්ඩලයට පත් නොකරන ලෙසය.


එම මණ්ඩලයට සම්බන්ධ අපගේ ආරංචි මාර්ග ප්‍රකාශ කරන්නේ ජනාධිපතිවරයාගේ තීරණය එසේ වූවත් සංජය මොහොට්ටාල මහතාට යළි එහි සභාපති තනතුරේ කටයුතු කිරීමට අදහසක් නැති බවය. ඔහු කියා ඇත්තේ ආයතනයේ සේවකයන් ඔහුට විරුද්ධ නම් එහි තවදුරටත් කටයුතු කළ නොහැකි බවය. සභාපතිවරයා ඇතුළු අධ්‍යක්ෂ මණ්ඩලයට විරුද්ධව අත්සන් කරන ලද ලිපියට 1100ක් පමණ වන එහි සමස්ත කාර්ය මණ්ඩලයෙන් 850ක පමණ පිරිසක් අත්සන් කර තිබීම එයට හේතුවය. මේ වනවිට ආයෝජන මණ්ඩලය තුළ ඇති සියලු වෘත්තීය සමිති මෙම විරෝධයට එකතුවී ඇත. ආණ්ඩුවේ ප්‍රධාන පක්ෂය වන ශ්‍රී ලංකා පොදුජන පෙරමුණට අයත් වාණිජ කර්මාන්ත හා සේවා ප්‍රගතිශීලි සංගමයද එම විරෝධයේ කොටස්කරුවෙක්ය.


ජනාධිපතිවරයාගේ විෂය යටතේ පවතින ශ්‍රී ලංකා ආයෝජන මණ්ඩලයේ සභාපතිවරයා ඇතුළු අධ්‍යක්ෂ මණ්ඩලයට එහි සේවක පාර්ශ්වයෙන් මෙවැනි විරෝධයක් පැනනඟින්නේ එහි සිදුකරන්නට ගිය වෙනස්කමක් හෙවත් ප්‍රතිසංස්කරණයක් හේතුවෙන්ය.


එම ප්‍රතිසංස්කරණයට අදාළ කැබිනට් මණ්ඩල පත්‍රිකාව හිටපු මුදල් ඇමතිවරයා වශයෙන් අගමැති මහින්ද රාජපක්ෂ 2021.03.22 සහිතව ශ්‍රී ලංකා ආයෝජන මණ්ඩලයට වෘත්තිකයින් බඳවා ගැනීම යනුවෙන් ඉදිරිපත් කර ඇත. එහි සඳහන් කරන්නේ ප්‍රධාන නියාමන ආයතනවල හා රාජ්‍ය ව්‍යාපාරවල ධාරිතාව ඉහළ නැංවීම සඳහා 2021.02.08 දිනැති අමාත්‍ය මණ්ඩල තීරණය යටතේ එම අමාත්‍ය මණ්ඩල සංදේශයේ යෝජනා ක්‍රියාත්මක කිරීම සඳහා භාණ්ඩාගාර ලේකම්ගේ සභාපතිත්වයෙන් නිල කමිටුවක් පත්කර ඇති බවත් එම කමිටුව මෙම කැබිනට් මණ්ඩල පත්‍රිකාවට අදාළ ශ්‍රී ලංකා ආයෝජන මණ්ඩල යෝජනාව සලකා බලා ඇති බවත්ය.


ඒ යටතේ ආයෝජන මණ්ඩලය හඳුනාගත් ප්‍රධාන තනතුරු සඳහා වෘත්තිකයින් බඳවා ගැනීමට යෝජනාවලියක් ඉදිරිපත් කර ඇති අතර එහි සේවකයින්ගේ හා වෘත්තීය සමිතිවල විරෝධය එල්ල වී ඇත්තේ එයටය. ආයෝජන මණ්ඩලයේ දැනට පවතින සම්මත වැටුප් ව්‍යුහයන් විශේෂ කුසලතා සහිත වෘත්තිකයින් ආකර්ෂණය කරගැනීමට ප්‍රමාණවත් නොවන බැවින් නව වැටුප් තල සහිතව 29 දෙනෙකු බඳවා ගැනීමට ඒ මගින් අවසර ලබාදී ඇත. මෙම අර්බුදය නිර්මාණය වනවිට ඉන් 09 දෙනෙකු බඳවාගෙන ඇත.
මෙසේ බඳවා ගන්නා අයගේ වැටුප්තල ලෙස කැබිනට් පත්‍රිකාවට අමුණා ඇති ලේඛනයේ දැක්වෙන්නේ රුපියල් 675,000ත් රුපියල් 775,000ත් අතර වැටුපකට නියෝජ්‍ය අධ්‍යක්ෂ ජනරාල්වරු 02ක්, රුපියල් 500,000ත් රුපියල් 675,000ත් අතර වැටුපකට විධායක අධ්‍යක්ෂවරු 04 දෙනෙක්, රුපියල් 400,000ත් රුපියල් 500,000ත් අතර වැටුපකට අධ්‍යක්ෂ ශ්‍රේණිය සඳහා 05 දෙනෙක්, රුපියල් 250,000ත් රුපියල් 350,000ත් අතර වැටුපකට ජේ්‍යෂ්ඨ නියෝජ්‍ය අධ්‍යක්ෂ තනතුරු 18ක් සඳහා පුද්ගලයින් බඳවා ගන්නා බවයි. එමෙන්ම එම පුද්ගලයින් කොන්ත්‍රාත් පදනම මත බඳවා ගන්නා බවත් සයමාසිකව සිදුකරන ඔවුන්ගේ කාර්යසාධනය ගැන පරික්ෂාවකින් පසු එම කොන්ත්‍රාත් කාලයන් දීර්ඝ කිරීම සම්බන්ධයෙන් තීරණ ගත යුතු බවත් එහි සඳහන්ය.
කැබිනට් අනුමැතිය ලැබුණු මෙම තීන්දුව අනුව පුද්ගලයින් 09 දෙනෙකු බඳවා ගැනීම හා ඒ ගැන එහි වෘත්තීය සමිති පාර්ලිමේන්තුවේ කෝප් කමිටුවට දැනුම් දීමත්, ඉන්පසු කෝප් කමිටුව ආයෝජන මණ්ඩල සභාපතිවරයා ඇතුළු වගකිවයුත්තන් කැඳවා මේ පිළිබඳ ප්‍රශ්න කිරීමත් මෙම අර්බුදයේ ප්‍රකාශිත හැරවුම් ලක්ෂය විය. මාධ්‍ය මගින් මෙම කරුණු එළියට ආවේ ඒ අනුවය.


ඒ නිසාම මෙම අර්බුදයට වගකිව යුත්තේ ආණ්ඩු පක්ෂ සාමාජික කෝප් කමිටු සභාපති ආචාර්ය චරිත හේරත් බවට ආණ්ඩුවේ පාර්ශ්වයෙන් චෝදනා එල්ල වන්නට විය. ශ්‍රී ලංකා ආයෝජන මණ්ඩලය එම කැබිනට් මණ්ඩල තීරණය ලබාගෙන ඇත්තේ කැබිනට් මණ්ඩලය නොමඟ යවමින් බවට එහිදී කෝප් කමිටු සභාපතිවරයා ප්‍රශ්න කර ඇති බවද වාර්තා වන අතර එසේ නොමඟ යන්නට තරම් අගමැති මහින්ද රාජපක්ෂ හා ජනාධිපති ගෝඨාභය රාජපක්ෂ බබ්බු නොවන බව ආයෝජන මණ්ඩල සභාපතිවරයා ඇතුළු අධ්‍යක්ෂ මණ්ඩල නිලධාරීන්ගේ ඉල්ලා අස්වීම ප්‍රතික්ෂේප කර ඔවුන් තවදුරටත් විශ්වාස බවට ජනාධිපතිවරයා වෙනුවෙන් ජනාධිපති ලේකම් ආචාර්ය පීබී ජයසුන්දර කර ඇති රෙකමදාරුවෙන් පෙනේ.


නැවත සභාපතිවරයා ඇතුළු අධ්‍යක්ෂ මණ්ඩලය සේවයට එන්නේ නම් ආයෝජන මණ්ඩල වෘත්තීය සමිතිද කරබාගෙන නොසිටින බව ජනාධිපතිවරයාට යැවූ ලිපියෙන් පෙන්නුම් කර ඇත. ඒ අනුව එකක් කඩතොලු මකන්නට ගොස් දෙකක් කඩතොලු හදාගන්නේ ඉල්ලා අස්වීම් පිළිනොගන්නා බව සඳහන් කළ ආචාර්ය පීබී ජයසුන්දරගේ ලිපියද නැතහොත් කැබිනට් මණ්ඩල තීරණය ප්‍රශ්නකර මෙම අර්බුදයේ හැරවුම් ලක්ෂ්‍යය නිර්මාණය කළ ආචාර්ය චරිත හේරත්ද යන්න ඉදිරියේදී තීරණය වනු ඇත. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි