No menu items!
21.8 C
Sri Lanka
28 March,2024

කොවිඩ් මුවාවෙන් ආණ්ඩුව මර්දනයක් ක්‍රියාත්මක කරනවා
සමගි ජන බලවේගය නියෝජ්‍ය ජාතික සංවිධායක පාර්ලිමේන්තු මන්ත්‍රී
ජේ.සී. අලවතුවල

Must read

■ අමන්දිකා කුරේ

පසුගිය 16 වැනිදා ඔබේ පක්ෂයෙන් සංවිධානය කළ විරෝධතාවට පොලිස් බාධාකිරීම් සිදුකිරීම සම්බන්ධයෙන් නීතිමය ක්‍රියාමාර්ගයකට යනවාද?


පැහැදිලිවම අපි නීතිමය ක්‍රියාමාර්ගයකට යනවා. 2015 හදපු ආණ්ඩුව තුළ 2015ට පෙර තිබුණු කාලයට වඩා හොඳ ප්‍රජාතන්ත්‍රවාදයක් රට තුළ ඇති කළා. නිදහස දුන්නා මිනිස්සුන්ට. මට හිතෙනවා ඒ ආණ්ඩුව නැති වෙන්නත් ඒක හේතුවක් වුණාදෝ කියලාත්. දැන් වෙලා තියෙන්නේ ආණ්ඩුව තිබුණ නිදහස ක්‍රමයෙන් නැතිකරගෙන යන්නේ. ආණ්ඩුව සමගි ජනබලවේගයට බයයි. ජනතාවගේ ප්‍රශ්න කියන්න ජනතාව විපක්ෂ නායකයා එක්ක පාරට බහිනවා කියනකොට මේ ආණ්ඩුව ඔය තරම් කලබල වෙන්න ඕනෑ නෑනේ. යුද්ධෙත් ඉවර වෙලා තියෙද්දි එදා හමුදාව පොලිසිය පාරට දාලා ලොකු යුද්ධයකට ලෑස්ති වෙනවා වගේ ආණ්ඩුව කටයුතු කළේ. මාවතගම මගේ නිවසේ සිට කුරුණෑගල නගරය වෙත එනතෙක් පොලිස් මාර්ගබාධක පහක් තිබුණා. අප බස් හැරෙව්වත් සමහර ජනතාව පාරෙ බස් එකේ නැගලා කොළඹට ආවා. ඒ තරම් පීඩනයකින් ජනතාව ඉන්නේ.


රජය මේ කරපු දේ ලෝකෙ දැක්කාම මොකද වෙන්නේ? මනුස්සයෙක්ට කතා කරන්න රැස්වීමක් පවත්වන්න තියෙන නිදහසනේ මේ සීමා කරන්නේ. ආණ්ඩුව ලැජ්ජ වෙන්න ඕනෑ කාරණයක් මේක. පොලිසියෙන් මේ පෙළපාලිය නවත්වන්න කියලා උසාවි ගණනාවකින් ම ඉල්ලා තිබුණා. උසාවි ගණනාවකින්ම ඒක ප්‍රතික්ෂේප කරලා තිබුණා. පොලිස්පතිට, පොලිස් ඇමතිට, මේවා බලහත්කාරයෙන් ක්‍රියාත්මක කරවපු ඉහළ පොලිස් නිලධාරීන්ට විරුද්ධව ශ්‍රේෂ්ඨාධිකරණයේ මූලික අයිතිවාසිකම් පෙත්සම් ගොනුකරනවා. මේවා ආදර්ශ වෙන්න දෙන්න හොඳ නෑ. ඒක රටේ ප්‍රජාතන්ත්‍රවාදයට විශාල හානියක්.

කොරෝනා වසංගත තත්වය හමුවේ මෙවැනි දැවැන්ත පෙළපාළියක් සංවිධානය කිරීම ගැන විවිධ පාර්ශ්ව ඔබේ පක්ෂයට චෝදනා ගෙන එනවා.


එහෙම චෝදනා ඇවිල්ලා තියෙනවා විවිධ පාර්ශවවලින්. නමුත් වර්තමාන සෞඛ්‍ය අධ්‍යක්ෂ ජනරාල්වරයා දැනගන්න ඕනෑ ජනතාවගේ අදහස් ප්‍රකාශ කිරීමේ අයිතිය විවිධ චක්‍රලේඛ ගහලා නවත්වන්න බෑ කියන එක. එයාත් කඩේ යන්නේ ආණ්ඩුවට. ආණ්ඩුව ඔවුන්ගේ පස්වන සම්මේලනය තිබ්බා. පාසල් විවෘත කරනවා. ගමනාගමනයත් වෙනදා වගේම කෙරෙනවා. ජනතාවගේ ප්‍රජාතන්ත්‍රවාදී අයිතියට විතරක් අවස්ථාව නොදෙන්නේ ඇයි? මේ මතය හදන්නේ ආණ්ඩුවට පක්ෂව. ජනතාව උද්ඝෝෂණ කළා ම විතරද කොවිඩ් හැදෙන්නේ. පාසල්වල ඉන්නේ එන්නත්කරණයට පවා ලක් නොවුණු අය. අපි එක්ක ගියේ එන්නත් කරපු අය. අපි කියන්නේ නෑ සෞඛ්‍ය නිර්දේශ කඩ කරන්න කියලා. කාවවත් මාස්ක් නොදා ගෙනාවේ නෑ. දුරස්ථභාවය ගැන පොඩි පොඩි ප්‍රශ්න ඇති, නමුත් අපි ඊයේ සෙනග ගෙනාපු බස් රථවල ආසන සංඛ්‍යාවට වඩා සෙනග ගෙනාවේ නෑ. යන්න දුන්න සාමාන්‍ය බස් රථවල හිටගෙනත් සෙනග හිටියා. ඒවායින් කොරෝනා පැතිරෙන්නේ නැද්ද? කොවිඩ් තත්වය නම් හැමතැනම එහෙම අදාළ වෙන්න ඕනෑ. ජනතාවගේ නැගිටීමට විතරක් මේක අදාළ වෙන්න විදිහක් නෑ. කොවිඩ් මුවාවෙන් ආණ්ඩුව මර්දනයක් තමයි මේ ක්‍රියාත්මක කරමින් ඉන්නේ.

ලංකාවේ වර්තමාන දේශපාලන ආර්ථික තත්වය ඔබ විග්‍රහ කරගන්නේ කෙසේ ද?


ආර්ථික වශයෙන් හා සමාජීය වශයෙන් ලංකාව අර්බුදයට පත්වෙලා තියෙන්නේ. දැන් ඉන්න ආණ්ඩුවේ මුදල් ඇමතිවරයාගේ සිට සියලුම අය කියන්නේ කොවිඩ් තත්වය නිසා මේ ආර්ථික අර්බුදය ඇති වුණා කියලා. නමුත් ඒක අපි දකින්න නෑ ලෝකෙ අනිත් තැන්වල. උදාහරණයක් හැටියට අපට සමාන තත්වයක් තිබෙන නැගෙනහිර ආසියාවේ රටවල් තමයි ඉන්දියාව හා බංග්ලාදේශය. ඒ රටවල් තුළත් අඩු වැඩි වශයෙන් අපේ රටේ තත්වයට සමාන කොවිඩ් තත්වයන් තිබුණත් එම තත්වය තිබිය දී ම ඒ රටවල් අපේ රටට වඩා ආර්ථික පැත්තෙන් ඉස්සරහට ගිහින් තියෙනවා. බංග්ලාදේශයේ ඩොලර් සංචිත වැඩියෙන් තියෙනවා. දකුණු ආසියාවේ හැම අංශෙන්ම අපි ඉදිරියෙන් හිටියා. දැනුම, ජනතාවගේ ජීවන තත්වය වගේ දේවල් යම් මට්ටමක තිබුණා අනෙක් රටවලට සාපේක්ෂව. ආර්ථික වශයෙනුත් යම් ඉදිරියක් තිබුණා. නමුත් දැන් අපට ඉතිහාසයේ පළමු වතාවට ඩොලර් මිලියන 200ක ණයක් බංග්ලාදේශයෙනුත් ගන්න වෙලා තියෙනවා. දැන් ලංකාව මුහුණ දීලා තිබෙන ඩොලර් අර්බුදයට හේතු ගණනාවක් ම බලපාලා තියෙනවා. ප්‍රධානම හේතුවක් තමයි වර්තමාන රජයේ වැරදි ආර්ථික කළමනාකරණය. 2019 නොවැම්බර් 16 ගෝඨාභය රාජපක්ෂ ජනාධිපතිවරයා බලයට පත්වුණු ගමන් ම කරපු වැරදි ක්‍රියාවක් තමයි වැට් බදු සහනයක් ලබා දීම. එහෙම අහිමි වුණු මුදල සාමාන්‍යයක් හැටියට ගණනය කරලා තියෙනවා. ඒ අහිමි වුණු මුදල රුපියල් බිලියන 600කට ආසන්න මුදලක්. ආදායම් අඩු කරගත්තාට මේ ආණ්ඩුව අනෙක් පැත්තකින් ආදායම වැඩිකරගන්න විදිහක් හිතුවේ නෑ. දින 51 ආණ්ඩුව, පාස්කු ප්‍රහාරය මේ හැමදෙයකටම මුහුණ දීලාත් අපි 2019දී ආණ්ඩුව භාර දෙනකොට සංචිතවල තිබුණා ඩොලර් බිලියන 7.5ක්. අවුරුදු දෙකක් ගත වුණාට පස්සෙ දැන් තියෙන්නේ එයින් ඩොලර් බිලියන 2යි දශම ගණනක්. ඉදිරි වසරේදී අතිවිශාල ණය වාරිකයක් ගෙවන්නත් තියෙනවා. මේ ආණ්ඩුව මුල ඉඳන් ම කළේ ආණ්ඩුවේ ගජමිතුරන්ට වාසි හදලා දීපු එක. එහෙම බදු සහන ලබා දීම තුළ ආදායම් විශාල ප්‍රමාණයක් අහිමි කරගෙන ඉන්නේ. මූඩීස්, ෆිච් ආයතන ලංකාව පහළට දාලා තියෙනවා. මේ ආණ්ඩුව ආවාට පසෙ අපි ශ්‍රේණි දෙකකින් පහළට දාලා තියෙන්නේ. සීසී සෘණ ශ්‍රේණියේ ඒ කියන්නේ ණය ගෙවීමට නොහැකි මට්ටමේ ඉන්නේ. වරායට මේ වෙනකොට ඇවිල්ලා තිබෙන අත්‍යවශ්‍ය ද්‍රව්‍ය, විශේෂයෙන් ම ආහාර ද්‍රව්‍ය සහිත බහාලුම් නිදහස් කරගන්න විදිහක් නැති වෙලා තියෙනවා. පාර්ලිමේන්තුවේ දී ප්‍රකාශ වුණා එහෙම බහාලුම් 1000කට ආසන්න සංඛ්‍යාවක් මේ විදිහට වරායේ ගොඩගැහිලා තිබෙනවා. මම දැක්කා බන්දුල ගුණවර්ධන මහත්තයා කියලා තියෙනවා ඉදිරියේදී අපේ රට බංකොලොත් තැනකට යනවා කියලා. මේ තත්වය තමයි බංකොලොත් කියන්නේ.

සපුගස්කන්ද පිරිපහදුව හදිසියේ වසා දැමීම දකින්නේ කොහොමද?


මම දැක්කා බලශක්ති ඇමතිවරයා මාධ්‍යට ඇවිල්ලා කියනවා බොරතෙල් ගෙන්නන්න බැරි නිසා පිරිපහදුව වහනවා කියලා. එයා ඒකට හේතුව විදිහට කියන්නේ බොරතෙල් ගෙන්වන්න සල්ලි නෑ කියලා. බොරතෙල් ගෙනවන්නට සල්ලි නැති වුණාට පිරිපහදු කරපු තෙල් පැට්‍රෝල්, ඩීසල් හැටියට ගෙන්නන්න සල්ලි තියෙනවා. බොරතෙල් ගෙනැල්ලා පිරිසිදු කරලා අපි ගන්න එකෙන් ලාභයි වගේම ක්ෂේත්‍ර ගණනාවකටම ඒ හරහා නිෂ්පාදන ගණනාවක් සිදු වෙනවා. රටක් හැටියට ලාභයක් ගන්න තියෙන එක වහලා කෙලින්ම සිංගප්පූරුවෙන් හෝ වෙනත් රටකින් පිරිපහදු තෙල් ගෙන්වනවා නම් එතන තියෙන්නේ කොමිස් බලාගෙන කරන දෙයක්. පිරිපහදුව වහනවා නම් අපට හදිසියේම තෙල් මිලදී ගන්න වෙනවා තෙල් හිඟයක් එන එක වළකාගන්න නම්. ඛනිජ තෙල් වෘත්තීය සමිති මතු කරන කාරණය තමයි මේකේදි අත යට ගනුදෙනු කරන්න ලේසි නිසා පිරිපහදුව වහලා දැම්මා කියන එක.

මෙවර අයවැය ගැන ඔබේ අදහස?


විදේශ රැකියා ක්ෂේත්‍රයෙන් පහුගිය කාලේ ඩොලර් බිලියන 7ක හෝ ඊට වඩා වැඩි ආදායමක් ඇවිල්ලා තියෙනවා. ඇඟලුම් ක්ෂේත්‍රයත් ඒ වගේ ක්ෂේත්‍රයක්. තේ, කුරුඳු අපනයනයෙන් ඩොලර් බිලියන දෙකකට ආසන්න මුදලක් හම්බෙනවා. ආයෝජකයො ආවාම ඩොලර් හම්බෙනවා. 2018දී සංචාරක ව්‍යාපාරයෙන් අපි ඩොලර් බිලියන 4.5ක් උපයලා තියෙනවා. ඒක ඩොලර් බිලියන 7-10ක් දක්වා වැඩිකරගන්න තිබුණා. පාස්කු ප්‍රහාරය සංචාරක ව්‍යාපාරයට ගොඩක් බලපෑවත් මාස 3-6ක් යනවිටම නැවත සංචාරක ව්‍යාපාරය නැවත යථා තත්වයට ආවා. මුදල් ඇමති අයවැය ඉදිරිපත් කරද්දි අපි අහපු ප්‍රධාන ප්‍රශ්නය තමයි ඩොලර් හිඟයට මොකක්ද කරන්නේ කියන එක. අයවැය ඉදිරිපත් කරද්දි අනිවාර්යයෙන් ම තිබිය යුතුයි ඒවාට දෙන්න ඕනෑ විසඳුම්.


ඡන්දෙට කලින් මේ ආණ්ඩුව රට විරුවො කියලා විදේශ රැකියාවල නිරත වෙලා ඉන්න අයව හැඳින්වුවේ. කොරෝනා ආවාට පස්සෙ ආණ්ඩුව මොකක්ද ඔවුන්ට කළේ. ඒ මිනිස්සුන්ට ලංකාවට එන්න එපා කිව්වා. ඊට පස්සෙ ලංකාවට එන අයව නිරෝධායනය කරන්න කියලා 150000-350000ත් අතර ගානක් ඔවුන්ගෙන් අයකරගෙන ගජ මිතුරන්ට ලාභ ගන්න හෝටල්වලට දැම්මා. දැන් ඒ මිනිස්සු වෙනුවෙන් මේ අයවැයේ මොනවද කරලා තියෙන්නේ?


රටරැකියාවලට යවන ඒජන්සිත් දැන් වැහිලා යමින් තියෙන්නේ කොරෝනා නිසා. ඔවුන්ගේ කර්මාන්තය දැන් බිඳවැටිලා තියෙන්නේ. ඒක නගාසිටුවන්නවත් මේ අයවැයෙන් වැඩපිළිවෙළක් නෑ.


සංචාරක ව්‍යාපාරයේ සෘජුව 250000ක් ඉන්නවා. වක්‍රව එයින් යැපෙන අයත් 250000ක් විතර දළ වශයෙන් ඉන්නවා. ඔවුන් වෙනුවෙන් මොනවද මේ අයවැයෙන් කරලා තියෙන්නේ. අසල්වැසි මාලදිවයින දුවන්නේ සංචාරක ව්‍යාපාරයෙන්. ඔවුන් හරියට ඒක කළමනාකරණය කරලා තියෙනවා. සංචාරක මඟපෙන්වන්නන් ලීසිං කරලා වාහන තියාගෙන හිටියේ. ලීසිං ගෙවාගන්න බැරිව ඔවුන්ගේ වාහන ලීසිං සමාගම් අරන් ගිහින්. මේ අයවැයෙනුත් ඔවුන් වෙනුවෙන් කිසි දෙයක් කරලා නෑ.


ඩොලර් හොයනවා කියලා කටින් කියලා හරියන්නේ නෑ. ඩොලර් එන මාර්ග නගාසිටුවන්නත් ඕනෑ.

ජීඑස්පී ප්ලස් ශ්‍රී ලංකාවට නොලැබේවිද?


ඇඟලුම් ක්ෂේත්‍රය සම්පූර්ණයෙන්ම ගොඩ නැගිලා තියෙන්නේ ජීඑස්පී ප්ලස් බදු සහනයත් එක්ක. අපේ ඇඟලුම් වැඩි ප්‍රමාණයක් අපි යුරෝපයට යවන්නේ එමඟින්. මේ වෙනකොට බදු සහනය ශ්‍රී ලංකාවට ලැබෙනවාද නැද්ද කියන එක ගැන ලොකු දෙගිඩියාවක් තියෙනවා. දැන් යුරෝපා පාර්ලිමේන්තුවට යෝජනාවක් ගෙනල්ලා තියෙනවා ලංකාවට ජීඑස්පී ප්ලස් දෙන්න ඕනෑ නෑ කියලා. ආණ්ඩුව මේ ගෙනියන මර්දනය ඒකට එක හේතුවක් වෙලා තියෙන්නේ. ආණ්ඩුව එක රටක් එක නීතියක් කිව්වාට ආණ්ඩුවේ අයට එක නීතියක් අනිත් අයට තව නීතියක්.


පහුගිය යහපාලන රජය කාලෙ වර්තමාන අග්‍රවිනිශ්චයකාරතුමා වන එවකට හිටපු නීතිපතිතුමා පවරපු නඩු මේ ආණ්ඩුව කාලෙ දැන් ඉන්න නීතිපතිතුමා ඉල්ලා අස් කරගන්නවා. අධි චෝදනාවක් කියන එක හදන්න ලේසි නෑ. අපරාධ පරීක්ෂණ දෙපාර්තමේන්තුව, මූල්‍ය අපරාධ කොට්ඨාසය පරීක්ෂණ කරලා හොයාගත්තු කරුණු ඇසුරින් තමයි මේ අධිචෝදනා ගොනු කරලා තිබුණේ. ආණ්ඩුව කියනවා මේව බොරු නඩු කියලා. එහෙම බොරු නඩු පවරන්න පුළුවන්ද? සාක්ෂි එක්ක තමයි මේ නඩු පවරලා තියෙන්නේ.


අල්ලස් හා දූෂණ විමර්ශන කොමිසම පවරපු නඩු 45ක් දැන් අයින් කරගෙන තියෙනවා. මේවා අවුරුදු 4ක් හෝ 3ක් විභාග වුණ නඩු. සාමාන්‍ය පොලිස් නිලධාරියෙක් හෝ විදුහල්පතිවරයෙක් රුපිය්ල් 10000ක විතර හරි අල්ලසක් අරන් අහුවුණොත් අල්ලස් කොමිසම ඔවුන්ගේ බෙල්ලෙන් අල්ලන් ගිහින් ඇපත් නැතිව හිරේ දානවා. මේ අයින් කරන් තියෙන්නේ මිලියන් බිලියන් ගණන්වල වංචා දූෂණ පිළිබඳ නඩු. මම ඇතුළු අපේ පක්ෂයේ මන්ත්‍රීවරු අල්ලස් කොමිසමෙන් එහෙම අයින් කරගත්තු නඩු ගැන තොරතුරු දැනගැනීමේ පනත යටතේ විමසීමක් කළා. තවම ඒ තොරතුරු ලැබිලා නෑ. නැවත අපි ඒ ගැන ඉල්ලීමක් කරන්න බලාපොරොත්තු වෙනවා. අපට දැනගන්න පුළුවන් වුණු විදිහට මේ නඩු මේ ආණ්ඩුවේ පාර්ලිමේන්තු මන්ත්‍රීලාගේ ඉඳන් කැබිනට් හා රාජ්‍ය ඇමතිවරුන්ටත් හිටපු ප්‍රාදේශීය සභා සභාපතිවරුන්ටත් අදාලව පැවරුණු නඩු. අල්ලස් කොමිසම කියන්නේ තාක්ෂණික දෝෂයක් තියෙන නිසා නඩු ඉල්ලා අස් කරගත්තා කියලා. එහෙම දෙයක් නම් අනිවාර්යයෙන් ම ඒ දෝෂය හදලා නැවත නඩු පවරන්න ඕනෑනේ.


මෙන්න මේ වගේ ක්‍රියාවන් නිසා තමයි අපට ජීඑස්පී ප්ලස් එක නවතින්න යන්නේ. 2015ට පෙරත් තිබුණේ නෑ. අපි ගොඩක් මහන්සි වෙලා ඒ කාලයේ මේ බදු සහනය ගත්තේ. ඒ වගේම මත්ස්‍යයන් යුරෝපයට අපනයනය කිරීමට තිබුණ බදු සහනයත් අපි මහන්සි වෙලා ගත්තේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි