■ අමන්දිකා කුරේ
ගිංතොට තුනී ලෑලි සංස්ථා සේවකයන්ගේ පාරිතෝෂික මුදල් නොගෙවීම සම්බන්ධයෙන් ගාල්ල මහේස්ත්‍රාත් උසාවියේ පවරා ඇති අංක 90661 දරණ නඩුවේ විත්තිකරුවන් අත් අඩංගුවට ගැනීම සඳහා වරෙන්තු නිකුත් කර අවුරුද්දකුත් මාස දෙකක් ගත වී තිබියදීත් ඔවුන්ව අත් අඩංගුවට නොගන්නේ මන්දැයි ගාල්ල දිස්ත්‍රික් ආණ්ඩු පක්ෂ මන්ත්‍රී චන්දිම වීරක්කොඩි පොලිසිය බාර ඇමති සරත් වීරසේකරගෙන් පාර්ලිමේන්තුවේදී අද දින (සැප්තැම්බර් 21) ප්‍රශ්න කළේය.
ඊට පිළිතුරු දෙමින් වීරසේකර අමාත්‍යවරයා පැවසුවේ ඔවුන් 2020/10/07 නුගේගොඩ උසාවියේ අංක 26482 හා 28340 දරණ නඩු වලට ඉදිරිපත් වූ බව හා මෙම මස 14 වන දින උසාවියට පැමිණ භාර වී වරෙන්තුව ඉවත් කරගෙන ඇති බවය.
එම පිළිතුර තමාට පිළිගත නොහැකි බවට ප්‍රකාශ කළ චන්දිම වීරක්කොඩි මන්ත්‍රීවරයා එම විත්තිකරුවන් අත් අඩංගුවට නොගැනීම සම්බන්ධයෙන් පොලිසියට විවේචනයක් ඉදිරිපත් කළ අතර එම විත්තිකරුවන් වන කස්තුරිආරච්චිගේ යසසිරි හා ජේ.ජී.අයි උදයංගනී කස්තුරිආරච්චි යන පුද්ගලයන් ප්‍රසිද්ධියේ සිය ව්‍යාපාරික කටයුතු වල නිරත වෙමින් සිටියදීත් ඔවුන්ව අත් අඩංගුවට ගැනීමට නොහැකි වූයේ මන්දැයි යළි ප්‍රශ්න කළේ ය.
අමාත්‍ය සරත් වීරසේකර ඒ සම්බන්ධයෙන් ප්‍රකාශ කරනු ලැබුවේ ඔවුන්ගේ කොළඹ පදිංචි ලිපිනයට පොලිසිය ගියද ඔවුන් එහි රැඳී නොසිටි බැවින් අත් අඩංගුවට ගැනීමට නොහැකි වූ බවයි. වරෙන්තු විශාල ප්‍රමාණයක් පැමිණෙන බැවින් ඒ සම්බන්ධයෙන් එකින් එක සොයා බැලීමට තරම් පොලිසිය ප්‍රමාණවත් නොවන බවත් දැන් ඔවුන් උසාවියට බාර වී ඇත් නිසා ගැටළුවක් නොමැති බවත් වැඩිදුරටත් ප්‍රකාශ කළේ ය.
මෙම විත්තිකරුවන්ට එරෙහිව විශාල නඩු ප්‍රමාණයක් ඇති බැවින් එක් නඩුවකට ඉදිරිපත් වූ පමණින් එය නොසලකා හැරිය නොහැකි බව ප්‍රකාශ කළ චන්දිම වීරක්කොඩි මන්ත්‍රීවරයා, මෙම විත්තිකරුවන්ට එරෙහිව පවරා ඇති අනෙකුත් නඩු වලද වින්දිතයන්ට සාධාරණයක් ඉෂ්ට කරන ලෙස ඉල්ලා සිටියේ ය. මෙම තුනී ලෑලි සංස්ථාවට අයිති උපකරණ ද වෙනත් ස්ථාන වලට රැගෙන යමින් පවතින බැවින් ඒ සම්බන්ධයෙන් ද පොලිසිය දැනුවත් කළ ද කිසිඳු ක්‍රියාමාර්ගයක් ගෙන නොමැති බැවින් එම සංස්ථාව ආශ්‍රිතව පොලිස් මුරපොළක් ඉදිකර එම දේපළ රැකගැනීමට කටයුතු කරන ලෙස මන්ත්‍රීවරයා අවසාන වශයෙන් ඉල්ලා සිටියේය.■
