No menu items!
27.4 C
Sri Lanka
29 March,2024

ලොහාන් රත්වත්තගේ සිදුවීම සහ ඥානසාර හිමිගේ ප්‍රකාශය ගැන පරීක්ෂණ නෑ-පොලිස් මාධ්‍ය ප්‍රකාශක

Must read

■ ප්‍රියාශා හෙට්ටිහේවා

අනුරාධපුර බන්ධනාගාරයට ගොස් සිරකරුවන්ට තර්ජනය කිරීම සම්බන්ධයෙන් ලොහාන් රත්වත්ත රාජ්‍ය අමාත්‍යවරයාට විරුද්ධව සහ ඉදිරියේදී එල්ලවිය හැකි අන්තවාදී ප්‍රහාරයක් සම්බන්ධයෙන් රූපවාහිනී වැඩසටහනකදී ප්‍රකාශ කළ ගලගොඩඅත්තේ ඥානසාර හිමි සම්බන්ධයෙන් පැමිණිලි ලැබී නොමැති බැවින් මේ දක්වා පරීක්ෂණ ආරම්භ වී නොමැති බව පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නිහාල් තල්දූව පවසයි.


පොලිස් මාධ්‍ය ප්‍රකාශකවරයා මේ බව ‘අනිද්දා‘ට ප්‍රකාශ කළේ, අදාළ සිද්ධි සම්බන්ධ පරීක්ෂණ කටයුතුවල තත්ත්වය පිළිබඳ විමසූ අවස්ථාවේදීය.


කෙසේ නමුත් අද (සැප්තැම්බර් 17) දින මාධ්‍ය වාර්තා කළේ, රාජ්‍ය අමාත්‍යවරයා සම්බන්ධයෙන් අපරාධ පරීක්ෂණ දෙපාර්තමේන්තුව වෙත ලැබී ඇති පැමිණිල්ල විමර්ශනය කරන ලෙස මහජන ආරක්ෂක අමාත්‍ය රියර් අද්මිරාල් සරත් වීරසේකර විසින් පොලිස්පති චන්දන වික්‍රමරත්න හට උපදෙස් ලබා දී ඇති බවය.


මෙම මස 12 වන දා අනුරාධපුර බන්ධනාගාරයට ගොස් එහි සිටි සිරකරුවන් සිර මැදිරිවලින් පිටතට ගෙන පිස්තෝලයක් තබා ඔවුන්ට තර්ජනය කිරීමේ සිද්ධියක් සම්බන්ධයෙන් අමාත්‍යවරයාට එරෙහිව සිරකරු අයිතිවාසිකම් සුරැකීමේ කමිටුව ඊයේ (සැප්තැම්බර් 16) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.

නමුත් පොලිස් මාධ්‍ය ප්‍රකාශකවරයා පැවසුවේ, ඔවුන් අපරාධ පරීක්ෂණ දෙපාර්තමේන්තුවට ලිපියක් භාර දී තිබූ බවත් මේ වන තෙක් සිද්ධිය සම්බන්ධයෙන් පැමිණිල්ලක් ලැබී නොමැති බවත්ය.


සිරකරු අයිතිවාසිකම් සුරැකීමේ කමිටුව භාර දුන් ලිපියට අනුව අපරාධ පරීක්ෂණ දෙපාර්තමේන්තුව අනුගමනය කරන ක්‍රියාමාර්ගය තමා නොදන්නා බවත් පරීක්ෂණයක් කරන ලෙස තවමත් දැනුම් දී නොමැති බවත් පොලිස් මාධ්‍ය ප්‍රකාශකවරයා පැවසීය.

සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා සහ ලේකම් සුදේශ් නන්දිමාල්ගේ අත්සන්වලින් යුතු ලිපියේ සඳහන් වන්නේ, රාජ්‍ය අමාත්‍යවරයා කළ ඇති වැරදි මෙරට ක්‍රියාත්මක නීතිය අනුව වරෙන්තුවක් නොමැතිව අත්අඩංගුවට ගත හැකි වැරදි ගණයට අයත් වන බවය.


පිස්තෝලයක් භාවිත කරමින් මරණ තර්ජන කිරීම 1966 අංක 18 දරණ පීඩාකාරී ආයුධ පනතේ 4 (1) අ, ආ සහ 4 (2) යටතේ වරදක් වන අතර දණ්ඩ නීති සංග්‍රහය යටතේ මිනී මැරීමට තැත් කිරීම යන වරද ද එහිදී සංස්ථාපනය වී ඇතැයි අදාළ ලිපියේ සඳහන් වේ.


විවිධ ජනවර්ගවලට අයත් රැඳවියන් විශාල පිරිසක් සිටින අනුරාධපුර බන්ධනාගාරයට ගොස් දෙමළ සිරකරුවන් පිරිසක් පමණක් තෝරාගෙන මරණ තර්ජන කිරීම ඇතුළු අමානුෂික සහ අවමන් සහගත සැලකිල්ලට ලක් කිරීම ජාත්‍යන්තර සිවිල් හා දේශපාලන අයිතිවාසිකම් පිළිබඳ සම්මුති පනත (ICCPR) යටතේ ද වරදක් බව එම ලිපියේ දැක්වේ.


තව ද බන්ධනාගාර කොමසාරිස් ජනරාල් තුෂාර උපුල්දෙණිය ලොහාන් රත්වත්ත රාජ්‍ය අමාත්‍යවරයාට ඉහත අපරාධය කිරීමට අවශ්‍ය ආධාර අනුබල දීම සිදු කර ඇති බවත් ඒ අනුව යුතුකම් පැහැර හැරීම සහ සිද්ධිය වසන් කිරීම සම්බන්ධයෙන් ඔහු සහ බන්ධනාගාර මාධ්‍ය ප්‍රකාශක චන්දන ඒකනායකට එරෙහිව නීතිය ක්‍රියාත්මක විය යුතු බවත් ලිපියේ සඳහන් වේ.


තව ද රාජ්‍ය අමාත්‍යවරයා තම මිතුරන් පිරිසක් සමග වැලිකඩ බන්ධනාගාරයට ඇතුළු වීමේ සිද්ධියක් සම්බන්ධයෙන් ද මාධ්‍ය වාර්තා පළ විය. එහිදී විවාහක රූ රැජිණක ද එම අවස්ථාවේ බන්ධනාගාරයට ඇතුළු වූ බව මාධ්‍ය වාර්තා කළේය.


ඒ සම්බන්ධයෙන් සීසීටීවී දර්ශන පිරික්සීමක් සිදු කර ඇත්දැයි විමසූ විට පොලිස් මාධ්‍ය ප්‍රකාශකවරයා පැවසුවේ, තව ම එම සිද්ධිය සම්බන්ධයෙන් ද පරීක්ෂණ ආරම්භ කර නොමැති බවය.


මේ අතර එල්ල විය හැකි අන්තවාදී ප්‍රහාරයක් සම්බන්ධයෙන් ගලගොඩඅත්තේ ඥානසාර හිමි කළ ප්‍රකාශය සම්බන්ධයෙන් අවධානය යොමු කර ඒ පිළිබඳව අපක්ෂපාතී, පුළුල් පරීක්ෂණයක් කරන ලෙස කොළඹ අගරදගුරු කාර්යාලය පොලිස්පතිවරයාගෙන් ඉල්ලා තිබිණි.


ඊට අමතරව එම ප්‍රකාශය සම්බන්ධයෙන් විමර්ශනයක් කරන ලෙස සමස්ත ලංකා ජයමිතුල් උලමා සංවිධානය ද නිවේදනයක් නිකුත් කර තිබේ.


නමුත් අදාළ ප්‍රකාශය සම්බන්ධයෙන් ද මෙතෙක් පරීක්ෂණ ආරම්භ වී නොමැති බවත් පොලිස්පතිවරයාට ඒ සම්බන්ධයෙන් ඉල්ලීමක් ලැබී ඇත්දැයි තමා නොදන්නා බවත් පොලිස් මාධ්‍ය ප්‍රකාශකවරයා පැවසීය.


නිල වශයෙන් ඒ සම්බන්ධ දැනුම් දීමක් කර නොමැති බැවින් පොලිස්පතිවරයා තීරණයක් ගත් පසු ඒ සම්බන්ධ දැනුම් දීමක් කරනු ඇතැයි ද පොලිස් මාධ්‍ය ප්‍රකාශකවරයා ප්‍රකාශ කළේය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි