No menu items!
22.3 C
Sri Lanka
29 March,2024

මෝදි මහින්දට 13 මතක් කර දෙයි

Must read

20 වැනි ආණ්ඩුක්‍රම ව්‍යවස්ථා සංශෝධනය ගැන මේ දවස්වල පැවැත්වෙන බලවත් විවාදයට අමතරව, 13වැනි සංශෝධනය ගැනද, ජාතිවාදී සහ ජාතිකවාදී බලවේග ඉදිරියට පැමිණ අදහස් පළකරනු දකින්නට ලැබේ. ඔවුහු, ජනාධිපතිවරණයේදීත්. මහ මැතිවරණයේදීත් පොහොට්ටු පක්‍ෂය බලයට ගෙනඒම සඳහා වැදගත් කාර්යභාරයක් ඉටු කළ අය වෙති. ඒ බලවේග 20 වැනි සංශෝධනයට දක්වන විරෝධයේ එක් හේතුවක් වන්නේ, ආණ්ඩුව මේ වෙලාවේ නව ව්‍යවස්ථාවක් සම්මත කර ගැනීම සඳහා වෑයම් නොකොට 20 වැනි සංශෝධනය සඳහා පමණක් බර දැමීමය. ඔවුන් කියන්නේ අලුත් ව්‍යවස්ථාවක් මුලින්ම සම්මත කර ගත යුතු බවයි.

ඒ අලුත් ව්‍යවස්ථාව 13වැනි සංශෝධනයෙන් නීතිගත කරන ලද පළාත් සභා නැති ව්‍යවස්ථාවක් විය යුතු බව ඔවුන්ගේ තර්කයයි. ඒ තර්කය සාධාරණීකරණය සඳහා මේ දිනවල එම ජාතිකවාදී බලවේග විවිධ ආකාරයෙන් මාධ්‍ය හමුවේ සිය අදහස් දක්වන බව පෙනේ. 

ඒ අතර, ඉන්දියාවේ අගමැති නරේන්ද්‍ර මෝදි හා අගමැති මහින්ද රාජපක්‍ෂ අතර, දූරස්ථ සංවාදයක් 26 වැනි සෙනසුරාදා පැවැත්විණි. ඒ සංවාදය පිළිබඳ අණ්ඩුව විසින් මාධ්‍යවලයට නිකුත් කළ ප්‍රවෘත්ති හා රූප වාර්තා අනුව, මෝදි සහ මහින්ද අතර, එකිනෙකාට සුබ පතා ගැනීම්, ස්තුති කිරීම්, ප්‍රශංසා කිරීම් වැනි දේවල් පමණක් හුවමාරුවී තිබේ.

එම නායක හමුවෙන් පසු, ලංකාව හා ඉන්දියාව, ඒකාබද්ධ ප්‍රකාශයක් නිතුත් කළේය. රටවල් දෙක එවැනි ඒකාබද්ධ ප්‍රකාශයක් නිකුත් කළේ අවුරුදු දහයකට පමණ පසුයැයි වාර්තා වෙයි. එම නිවේදනයේදී, දෙරට අතර ආර්ථික සහයෝගිතාව, බෞද්ධ ආගමික සිද්ධස්ථාන සංවර්ධනය වැනි දේවල් ගැන කතා කරන අතරම, ඉතාමත් වැදගත් දේශපාලන කාරණයක් ගැනද සඳහන් කර තිබේ.

එනම් 13 වැනි ආණ්ඩුක්‍රම ව්‍යවස්ථා සංශෝධනයයි. ඒ සම්බන්ධයෙන් නිවේදනයේ දැක්වෙන්නේ මෙසේය.

‘අගමැති මෝදි එක්සත් (ඹබසඑැා) ශ්‍රී ලංකාවක් තුළ සමානාත්මතාව, යුක්තිය, සාමය සහ ගෞරවය සඳහා වූ දෙමළ ජනතාවගේ අපේක්‍ෂාවන් පිළිබඳව ආමන්ත්‍රණය කරන ලෙස ශ්‍රී ලංකා රජයට අවධාරණය කළේය. ඒ සඳහා ආණ්ඩුක්‍රම ව්‍යවස්ථාවේ 13වැනි ආණ්ඩුක්‍රම ව්‍යවස්ථා සංශෝධනය ක්‍රියාත්මක කරමින්  සංහිඳියා වැඩපිළිවෙළ ඉදිරියට ගෙන යන ලෙසත් අවධාරණය කරන ලදි.  මහජනතාවගෙන් වරම් ලැබී තිබෙන ආකාරයට, සංහිඳියාව වර්ධනය කරමින් දෙමළ ජනතාව ඇතුළු රටේ සියලුම වාර්ගික කණ්ඩායම්වල අපේක්‍ෂාවන් මුදුන්පත් කරගැනීම සඳහා කටයුතු කරන බවට අගමැති මහින්ද රාජපක්‍ෂ ප්‍රකාශ කළේය.’

මේ ඒකාබද්ධ ප්‍රකාශනය තුළ ඉන්දියාව, ‘එක්සත් ශ්‍රී ලංකාවක්’ ගැන දක්වා තිබීමත්, 13 වැනි සංශෝධනය ක්‍රියාත්මක කරන ලෙස අවධාරණය කිරීමත්, 13 එපායැයි කියන පිරිසට අලුතින් සිතන්නට ඉඩක් සලසා දෙයි. කොටින්ම ඔවුන් හිතට ගත යුත්තේ තමන් වැනි අන්ත ජාතිකවාදීන්ට වුවමනා පරිදි 13 කටුගා දැමීමට ඉන්දියාව නම් ඉඩක් නොදන බවයි. මීට පෙර අවස්ථාවක ඉන්දියාවට 13ප්ලස් තත්වයක් ගැන පොරොන්දු දුන් මහින්ද රාජපක්‍ෂ,  මේ ඒකාබද්ධ නිවේදනයේදී 13 ගැන ඍජුව කතා කිරීම මගහැර තිබීමෙන් පෙනෙන්නේ මෝදිට එකක් කියා ලංකාවේ අනුගාමිකයන්ට තවෙකක් කියා, ‘ගෙදර ගියොත් අඹු- මග හිටියොත් තෝ’ වැනි වීමට ඔහු දක්වන බියයි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි