No menu items!
27.5 C
Sri Lanka
29 March,2024

Off Road ආර්ථික ඒකනි..ආර්ථික මඩොල්දූවේ හීන සහ අවතාර

Must read

මඩොල්දුව කියන්නෙ ලංකාව නම්වූ දූපත ඇතුළෙ තියෙන දුපතක්. ආදරණීය කොල්ලෝ දෙන්නෙක් මාටින් වික‍්‍රමසිංහ මවපු මඩොල්දූවට අහම්බෙන් වගේ යනවා. ගිහිල්ල එහි එළවළු හෙම වගා කරලා ස්වයංපෝෂිතව ජීවත් වෙනවා. ඒ මදිවට දූපතට අරක්ගත් අවතාරයක් පවා එලවල දාලා දැහැමින් හෙමින් ජීවත්වෙනවා.

කොරෝනාවලින් පස්සේ දේශීය ආර්ථිකයක් (home grown echonomy ) හදාගෙන රටේ අවතාර එලවල දාලා ආඩම්බරයෙන් ඉන්න පුළුවන් හීන ගැන සාඩම්බර කථාබස් දැන් කණින් කොණින් ඇහෙනවා. ජාතික අභිමානය, සිංහ කොඩිය, තැඹිලි වතුර, ජාතික ඇඳුම් සහ හැට්ට ඔසරි සමග ගුවන්ගත වෙලා ඉන්න අපිට මේ ජාතික ආර්ථික කථා සමග අභාව්‍යකාශගත වෙන්න ලේසියෙන් පුළුවන්.

ලෝක ආර්ථිකය කියන්නෙ කොරෝනා වගේ දෙයක්. ඒ කියන්නෙ ලෝකයේ හැම මිනිහෙක්ම අදෘශ්‍යමාන ආර්ථික පුංජයකින් එකට සම්බන්ධ වෙලා තියනවා. චීනයේ වුහාන් ප්‍රාන්තයේ ඉන්න මිනිහා සහ ලංකාවේ මයියංගණේ ජීවත් වෙන මනුස්සයාට එකවගේ කොරෝනා ආසාදන අනතුර දැනෙනවා වගේ මේ දෙගොල්ලොම ආර්ථික ජාලයකිනුත්  එකට සම්බන්ධ වෙලයි  තියෙන්නෙ.

කොරොනා නිසා අධෝභාගය මූට්ටු වී සිටින ඩොනල්ඞ් ට්‍රම්ප් පහුගියදා මාධ්‍ය සාකච්ඡාවකදී කිව්වෙ  රට සම්පූර්ණයෙන්ම ලොක් ඩවුන් කරන්නේ නැතිව රටේ ආර්ථිකය ආරක්ෂා කරගන්නා බවයි. හෙට දවසේ ඇමරිකාවේ ආර්ථිකය ආරක්ෂා කරගැනීම වෙනුවෙන් අද ජනතාවගෙන් කිසියම් ප්‍රමාණයක් ජීවිත වන්දි ගෙවන්න සිදුවී ඇති බව ඔහු කෙලින්ම කියනවා. මේ ‘කිසියම් ප්‍රමාණය’ ලක්ෂයක් පමණ වෙයි කියලා තමයි බොහෝ දෙනෙක් උපකල්පනය කරන්නේ.

මිනිස් ජීවිතවල වටිනාකම්වලට වඩා ආර්ථික සාධක උත්කර්ෂයට පත් උනු වකවානුව ඉතා හොඳින් දැකගන්න පුළුවන් උනු කාලයක් තමයි මේ කොරෝනා සමය. ලිබරල් ආර්ථික ප්‍රතිසංස්කරණ හඳුන්වාදෙමින් මහා බි‍්‍රතාන්‍යයේ මාග්‍රට් තැචර් ප්‍රකාශ කළේ සමාජයක් යනුවෙන් දෙයක් නොපවතින බවත් ඇත්තේ පුද්ගලික මිනිස් ඒකක බවත්. මෙහි කුටප්‍රාප්තියට පත්වී දැන් සමාජය වෙනුවට වෙළඳපොළ ආර්ථිකය ආදේශ වී මිනිසුන් වෙනුවට පුද්ගලික ආර්ථික ඒකක සම්බන්ධ වී තිබෙනවා.

දේශීය ආර්ථිකයක් කියන්නේ අද කාලේ ලස්සන සැරසිල්ලක්. විශේෂයෙන් ජාතිකවාදය රාජ්‍ය ප්‍රචාරක බලාධිකාරයේ න්‍යෂ්ටිය බවට පත්වූ ශ‍්‍රී ලංකාව වගේ ආණ්ඩුවල. කොහොම උනත් මිනිස්සු අතුරුදහන් වූ සමාජයක ජීවත්වන හුදකලා ආර්ථික පුංජ බඳුවූ මිනිසුන් රොත්තකගේ ජිවන විලාසිතාවලට පුංචි පුංචි ‘එඩිටින්’ දමා දේශීය ආර්ථික නිර්මාණය කළ නොහැකියි. ඒ සඳහා ලෝක ආර්ථික මකුළු දැල ‘එඩිට්’ කරගත යුතුව තිබෙනවා. හැබැයි එය සමනළ වර්ණ මාධ්‍ය මෙහෙයුමක් නොවෙයි. මහපොළවේ ජීවත්වෙන සමාජ දේශපාලන වැඩක්.

සරද සමරසිංහ     

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි