No menu items!
29.7 C
Sri Lanka
29 March,2024

රැපිඩ් ටෙස්ට් කරන්නැයි අපි කලින්ම කීවා අපි කියන දේට ඇහුම්කන් දෙන්නේ නැහැ

Must read


රවී කුමුදේශ් – වෛද්‍ය රසායනාගාරවිද්‍යා වෘත්තීයවේදීන්ගේ විද්වත් ආයතනයේ සභාපති


රජයේ වෛද්‍ය නිලධාරීන්ගේ සංගමය මාර්තු 31 වැනිදා නිකුත් කළ නිවේදනයක කොවිඞ්-19 රෝගය මර්දනයට අදාළ වැදගත් කරුණක් සඳහන් කර ඇත. එහෙත් කනගාටුදායක කරුණ වන්නේ එම කරුණම මාස දෙකකට පෙර, පෙබරවාරි මුල සිටම පෙන්වාදුන් සංවිධානයක් ලංකාවේ සිටීමයි. එම සංවිධානය වෛද්‍ය රසායනාගාර විද්‍යා වෘත්තියවේදීන්ගේ විද්වත් ආයතනයයි. මුලින්ම එම සංවිධානය පෙන්වාදුන් අවස්ථාවේ එම යෝජනාව ක‍්‍රියාත්මක කළා නම්, ලංකාවේ මෙතරම් රෝගය පැතිර නොයන්නටද ඉඩ තිබුණි.


ලෝක සෞඛ්‍ය සංවිධානය පවා ‘ටෙස්ට්.. ටෙස්ට්.. ටෙස්ට්..’ හෙවත් හැකි තරම් පරීක්ෂණ කොට රෝගීන් හඳුනාගන්නැයි කියා ඇත.

එම පරීක්ෂණ පැවැත්වීමට අදාළ වෘත්තීය වෛද්‍ය රසායනාගාර විද්‍යා වෘත්තියවේදීන්ය. එම වෘත්තිකයන්ගේ පැත්තෙන්, රෝගය මැඩලීමට යෝජනා පසුගිය කාලය තිස්සේම රජයට යොමුකර ඇතත්, ප‍්‍රමාණවත් ලෙස එයට ඇහුම්කන් දී නැත. අන්තිමේ ඔවුන් මාසයක් තිස්සේ ඉදිරිපත් කළ ප‍්‍රධානම යෝජනාවක් රජයේ වෛද්‍ය නිලධාරීන්ගේ සංගමය ඉදිරිපත් කර ඇත. යෝජනාව මෙසේය. ‘කොරෝනා රෝගීන්ගෙන් සීයට 80කට පමණ සුළු රෝග ලක්ෂණ පමණක් පෙන්වයි. එබැවින් ස්පර්ශකයන් හඳුනාගත්තද රෝගීන් හඳුනාගැනීම මඟහැරීමට ඉඩ ඇත. එමෙන්ම හඳුනාගන්නා සියලූ ස්පර්ශකයක් රසායනාගාර පරීක්ෂණ සඳහා යොමු නොවෙයි. ප‍්‍රතිදේහ හඳුනා ගැනීමේ පරීක්ෂණ මගින් කෙටි කාලයක් තුළ, විනාඩි 15කින් පමණ රෝගීන් තහවුරු කිරීමේ ක‍්‍රමවේද හෙවත් රැුපිඞ් ටෙස්ට් කිහිපයක් මේ වන විට ලොව පුරා විවිධ රටවල හඳුන්වා දී ඇත. එම ක‍්‍රමවේදයන් අප රට තුළටද හඳුන්වා දීමට ඇති හැකියාව වහා සොයාබැලිය යුතුය.’ මේ වෛද්‍ය රසායනාගාර විද්‍යා වෘත්තියවේදීන්ගේ විද්වත් ආයතනයේ සභාපති රවී කුමුදේශ් සමඟ ඉහත යෝජනාව ඇතුළු යෝජනා ගණනාවක් ගැන කළ සංවාදයකි.

මාර්තු 31 වැනිදා රෝගීන් 20ක් හමුවුණා. එතැනින් කතාව පටන්ගනිමු..

මාර්තු 31 වැනිදා අපි කාලයක් තිස්සේ කියපු දෙයක් ඔප්පු වුණා. එක දවසක් ඇතුළත කොවිඞ්-19 රෝගීන් 20ක් හඳුනාගත්තා. ඒකට හේතුව තමයි රෝග ලක්ෂණ නැති අයවත් පරීක්ෂාවට ලක්කිරීම. රෝග ලක්ෂණ නැති අය පරීක්ෂාවට ලකකළ මුල්ම අවස්ථාව ඒක. මාධ්‍යවලින් වාර්තා කළා ලංකාවේ රෝගීන් 20ක් වැනි වැඩි සංඛ්‍යාවක් හඳුනාගත්ත පළවැනි දවස ඒක කියලා. ඒත් ඇත්තටම ඒ කතාව වැරදියි. ඒ දවස වැඩිම රෝගීන් සංඛ්‍යාවක් හඳුනාගත්ත දවස නෙවෙයි. පළවැනි වතාවට රෝග ලක්ෂණ නැති, සැකසහිත රෝගීන් වැඩිම ප‍්‍රමාණයක් පරීක්ෂාවට ලක් කළ දවස. ඒ නිසායි රෝගීන් වැඩි පිරිසක් අහු වුණේ. අපි සෑහෙන කාලයක් තිස්සේ යෝජනා කළ දේ මාර්තු 31 වැනිදා තමයි ක‍්‍රියාත්මක වුණේ. එතෙක් තිබුණු පරීක්ෂා කිරීමේ ක‍්‍රියාවලිය නිසා සීයට අසූවක් රෝගීන් මඟහැරෙන්න ඉඩ තියෙන බව අපි කලින්ම කීවා. ඒ මඟහැරෙන රෝගීන් රෝගය පතුරුවන්න පුළුවන් බවත් කීවා.

වෛද්‍ය රසායනාගාර විද්‍යා වෘත්තීයවේදින්ගේ විද්වත් ආයතනය වැනි මේ මොහොතේ අත්‍යවශ්‍ය සේවාවක විද්වත් ආයතනයක හඩටත් නායකයන් ඇහුම්කන් නොදුන් බව කීම පුදුම සහගතයි. එතකොට ඔබේ ක්ෂේත‍්‍රය ගැන රජයට උපදෙස් දෙන්නේ කවුද?


දැනට වසංගතය ගැන තීන්දු ගැනීම සඳහා ජනාධිපති කාර්යසාධක බලකායක් පත්කරලා තියෙනවා. ජනාධිපතිවරයා වසංගත තත්වය ගැන ක‍්‍රියාත්මක වීමට උනන්දුවක් දක්වන බව අපට පැහැදිලිවම පෙනෙනවා. එහෙත් අපි පවතින තත්වය ගැන ගැටලූ ගණනාවක් ජනාධිපතිවරයාට, අගමැතිවරයාට සෞඛ්‍ය ඇමතිවරියට, සෞඛ්‍ය අමාත්‍යාංශයේ ලේකම්වරියට හා සෞඛ්‍ය සේවා අධ්‍යක්ෂ ජෙනරාල්වරයාට ලිඛිතව දැනුම් දුන්නා. එක ලිපියක් නෙවෙයි, පහුගිය කාලය තිස්සේ ලිපි ගණනාවක් යැව්වා. ඒ මේ ජනාධිපතිවරයාට පෙන්නමින් ඉන්න යාන්ත‍්‍රණය ඒ ආකාරයෙන්ම නිරෝගීව සිද්ධවෙන්නේ නැහැ කියලා. අපි දන්නෙ නැහැ අඩු තරමේ අපි යවන ලිපියක්වත් ජනාධිපතිවරයාට හෝ අගමැතිවරයාට ලැබුණාද කියලා. අපේ යෝජනාවලට ඇහුම්කන් දීම කෙසේ වෙතත් අපි යවපු ලිපි ලැබුණා කියලාවත් ප‍්‍රතිචාරයක් ලැබුණේ නැහැ.


කොවිඞ්-19 අත්දැකීමට අපේ ජීවිත කාලයේ පළවැනි වතාවට මුහුණදෙන්නේ. ඒ නිසා මොන අඩුපාඩු තිබුණත් මේකට තිබිය හැක්කේ එක වැඩපිළිවෙළක් විතරයි. ඒකට සියලූ පුරවැසියන් අනුගත විය යුතුයි. අපි ඒ වැඩපිළිවෙළට දායකත්වය දෙන්න කැමතියි. අපට ඒ සඳහා දායකවීමේ වගකීමක් තියෙන බව විශ්වාස කරනවා. අපට තේරෙන දේ තමයි සෞඛ්‍ය සේවයේ තීන්දු ගැනීමේ යාන්ත‍්‍රණය කාටවත් නොපෙනෙන විදියට දුර්වල වෙලා තියෙන බව. සුද්දාගේ ආණ්ඩුවේ කාලයේ පටන්ම වෛද්‍ය රසායනාගාර සේවාව කියන්නේ ප‍්‍රධාන සෞඛ්‍ය සේවාවන් තුනෙන් එකක්. රසායනාගාර සේවාව කියන්නේ විශේෂඥතාවකින් යුතු වෙනම පද්ධතියක්. මේ සියල්ල තිබියදී අද රසායනාගාර සේවාවේ එක් කොටසක් අකර්මණ්‍යයි. රසායනාගාර සේවාවේ වෘත්තීයවේදී ආයතන පහක් තියෙනවා. පහෙන් එකක් වෛද්‍ය රසායනාගාර විද්‍යාවේදීන්ගේ විද්වත් ආයතනය. අපි සෞඛ්‍ය ගැටලූවකදී අපේ ආයතනවල යෝජනා සහ තීන්දු ඉදිරිපත් කරලා, ඒවා එහෙට මෙහෙට හප්පලා සාමූහික තීරණයක් අරගෙන අදාළ සේවාව ශක්තිමත්ව ක‍්‍රියාත්මක කරනවා. ඒත් කොවිඞ්-19 වසංගතය ගැන අප කතාකරන මොහොත වන තුරු එකම දවසක්වත් රැස්වෙලා තීන්දුවක් ගත්තේ නැහැ. එහෙම සාකච්ඡා කරන යාන්ත‍්‍රණයකට ගිහින් නැහැ.


අපි මේවා ජනමාධ්‍ය එක්ක කියන්නේ, අපට කතාකරන්න කිසිම වේදිකාවක් නැති නිසා. ජනාධිපති කාර්ය සාධක බලකාය රජයේ වෛද්‍ය නිලධාරීන්ගේ සංගමයේ අදහස්වලට විතරක් ඉඩ ලබාදෙන වේදිකාවක් නොවිය යුතුයි. දැන් විශේෂඥ වෛද්‍යවරුන් සැලකිය යුතු පිරිසක් තමන්ගේ අදහස්වලට ඇහුම්කන් නොදීම ගැන චෝදනා කරනවා. සමහර විශේෂඥ වෛද්‍යවරුන්ට විශේෂඥයන් නොවන වෛද්‍යවරුන් උපදෙස් දෙනවා. මේ යාන්ත‍්‍රණය නිවැරදි වෙන්න ඕනෑ. නිවැරදි වෙන්න ඕනෑ බව කවුරුහරි කිව යුතුයි. දැන් සෞඛ්‍ය ක්ෂේත‍්‍රයේ ගැටුමක් තියෙනවා. ඒ ගැටුම ගැන ජනාධිපතිවරයා පරීක්ෂණයක් කළ යුතුයි. සෞඛ්‍ය සේවයේ යහපත සඳහා මේ ගැටුම අවශ්‍යයි.


අදටත් රසායනාගාර සේවාව සම්බන්ධයෙන් සාකච්ඡුාවක් නැහැ. සමහර විට අපි කියන දේ වැරදි වෙන්න පුළුවන්. වෙනත් කියන දේ නිවැරදි වෙන්න පුළුවන්. ඒත් අපි හැමෝම සාකච්ඡා නොකර කිසිම අවසාන තීන්දුවක් ගන්න බෑ. අදහස්වලට ඇහුම්කන් දීලා, සාකච්ඡා කරලා තීන්දුවක් ගන්න ඕනෑ.


ලෝක සෞඛ්‍ය සංවිධානය ‘ටෙස්ට් ටෙස්ට් ටෙස්ට්’ කියලා කීවාට, ලංකාවේ එම ක‍්‍රියාකාරීත්වය කාර්යක්ෂමව සිද්ධවුණේ නැතිද?


එය උපරිම ආකාරයෙන් සිද්ධවුණේ නැහැ. අපි තවම දන්නේ නැහැ කොවිඞ්-19 පාලනයට අදාළ ජනාධිපති කාර්යසාධක බලකායට ගිහින් වෛද්‍ය රසායනාගාර සේවාව ගැන උපදෙස් දෙන්නේ කවුද කියලා. අපි දන්නවා වෛද්‍යවරු යන බව. ඊළඟට වෛද්‍ය පර්යේෂණ ආයතනයෙහි පීසීආර් පරීක්ෂණය කිරීමට සම්බන්ධ විශේෂඥ වෛද්‍යවරයා යනවා. එහෙත් ඔවුන් වෛද්‍ය රසායනාගාර සේවාව ගැන විශේෂඥ දැනුමක් තියෙන අය නෙවෙයි.


පීසීආර් පරීක්ෂණය යැයි කියන්නේ කොවිඞ්-19 රෝගය හඳුනාගැනීම සඳහා දැනට කරන පරීක්ෂණය නේද?


ඔව්, පීසීආර් පරීක්ෂණය සිදුකිරීමට අදාල විශේෂඥ වෛද්‍යවරයා වෛරසවේදය ගැන දන්නවා. එහෙත් සමස්ත ක‍්‍රියාවලිය ඒ ක්ෂේත‍්‍රයෙන් පමණක් සම්පූර්ණ වෙන්නෙ නෑ. රෝගීන් ඇතුළත් කරගැනීම, සාම්පල ලබාගැනීම ආදි ක‍්‍රියාවලිය ගැන ඔහුට විතරක් උපදෙස් ලබාදිය නොහැකියි. වෛද්‍ය රසායානාගාර විද්‍යාව කියන්නේ නවීනතම තාක්ෂණය එක්ක ගැටගැහුණු ක්ෂේත‍්‍රයක්. ඒකට විශේෂඥ දැනුම තියෙන අය ඕනෑ.


ඔබේ යෝජනාවලට මොකද වෙන්නේ..


උත්තරයක්වත් නෑ. අපි මීට කලින් ව්‍යාපෘති වාර්තාවක් විදියට හදලා යැව්වා අපට තියෙන සම්පත් මොනවාද, දැනට අපි කරන පීසීආර් පරීක්ෂණය රෝගීන් වැඩිවෙන වේගයට කරන්න පුළුවන්ද, විකල්ප ක‍්‍රියාමාර්ග මොනවාද කියලා කතාකළා. අපි විකල්ප ඉදිරිපත් කළා. ලෝක සෞඛ්‍ය සංවිධානය ‘ටෙස්ට් ටෙස්ට් ටෙස්ට්’ කියන්න කලින් අපි ඒක කිවා. ඒත් සමහර බලධාරීන් පවා අපව අවඥාවට ලක් කළා. ලෝක සෞඛ්‍ය සංවිධානයත් නොකියපු දේවල් අපි කියනවා, අපි ලෝක සෞඛ්‍ය සංවිධානයට උඩින් යනවා කීවා. අපි කීවාට සතියකට පස්සේ තමයි ලෝක සෞඛ්‍ය සංවිධානය ‘ටෙස්ට් ටෙස්ට් ටෙස්ට්’ කීවේ.


රජයේ වෛද්‍ය නිලධාරීන්ගේ සංගමය රැපිඞ් ටෙස්ට් කරන්නැයි යෝජනා කරලා තියෙනවා, ලංකාවේ රෝගය පැතිරෙන්නත් කලින් ඔබ අප පුවත්පතට පවා රැපිඞ් ටෙස්ට් ගැන යෝජනා කළා. මේ තත්වය ගැන පැහැදිලි කළොත්…


පීසීආර් පරීක්ෂණයෙන් තමයි යම් රෝගියෙකුට තිබෙන රෝගය මොකක්ද කියලා තිතටම හඳුනාගන්න පුළුවන්. ඒත් එම පරීක්ෂණයේ ප‍්‍රතිඵල ලැබීම සඳහා යම් කාලයක් අවශ්‍ය වෙනවා. ඒ වගේම පීසීආර් පරීක්ෂණ කිරීමට යන්ත‍්‍ර සීමිත ප‍්‍රමාණයක් අප සතුව තියෙන්නේ. අපි මේ කතාකරන මොහොත වන තුරු සිද්ධවුණේ රෝගය වැඩි වෙලා රෝහල්ගත වෙන රෝගීන් පරීක්ෂා කිරීම.


කොවිඞ්-19 රෝගයට අදාළ එක් භයානක තත්වයක් තමයි රෝගීන් අතරින් විශාල ප‍්‍රතිශතයක් බරපතළ රෝග ලක්ෂණ නොපෙන්වීම. සීයට විස්සක් පමණ කිසිම රෝග ලක්ෂණයක් පෙන්වන්නේ නැහැ. සීයට හැටක් පමණ පුංචි රෝග ලක්ෂණ පෙන්වනවා. සමහර විට රෝගියෙකුට පුංචි උගුර කැසිල්ලක් පමණක් තියෙන්න පුළුවන්. පොඩි කැස්සක් පමණක් තියෙන්න පුළුවන්. පුංචි උණක් එනවා. කැස්සක්, උණක් ආවාට කවුරුත් රෝහල්ගත වෙන්නේ නැහැ. බරපතළ රෝග ලක්ෂණ නැති අය එන්නේ නෑ. ආවත් හැමෝටම පීසීආර් පරීක්ෂණය කරන්න පහසුකම් අපට නැහැ.
එහෙත් රෝගීන්ව ඉක්මනින් හඳුනාගෙන වෙන් කරන්නත් ඕනෑ. ඒ නිසා අපි කලින්ම කීවා ක්ෂේත‍්‍රයට ගිහින් රැුපිඞ් ටෙස්ට් කියන පරීක්ෂණය කරලා, රෝගීන්ව හඳුනාගන්න කියලා. රැුපිඞ් ටෙස්ට් එකකින්, යම් කෙනෙක්ට කොවිඞ්-19 රෝගයම තියෙනවා කියලා ස්ථීරව තහවුරු කරගන්න බැහැ.

අපි යම් වෛද්‍ය පරීක්ෂණයකින් පස්සේ පාවිච්චි කරනවා පොසිටිව් හා නෙගටිව් කියන යෙදුම් දෙක. පොසිට්ව් කියන්නේ පරීක්ෂණයට අදාළ රෝගය තියෙන බව. නෙගටිව් කියන්නේ රෝගය නැති බව.


යම් කෙනෙක්ට කොවිඞ්-19 තිබුණොත් එම පරීක්ෂණයෙන් නෙගටිව් වෙන්නෙ නෑ. හැම රෝගියාම පරීක්ෂණයෙන් පොසිට්ව් වෙනවා. ඒත් පොසිටිව් වෙන හැමෝම කොවිඞ්-19 රෝගීන් නෙවෙයි. වෙනත් කොරෝනා වෛරසයක් තියෙන රෝගීන්වත් ඒ පරීක්ෂණයට අහුවෙනවා. එච්1එන්1 හෝ, වෙනත් කොරෝනා වෛරසයක් තියෙන කෙනෙක්ව අහුවෙනවා. ලෝකයේ තිබෙන එකම කොරෝනා වෛරසය කොවිඞ්-19 නෙවෙයි. ඕනෑම කොරෝනා වෛරසයක් රැුපිඞ් ටෙස්ට් එකේදී පොසිටිව් වෙනවා.
මේ ක්ෂේත‍්‍රගත පරීක්ෂණය ගෙවල්වලට ගිහින් වුණත් සරලව කරන්න පුළුවන්.

වේගවත්. සැකයක් තියෙන තියෙන හැමෝටම පීසීආර් පරීක්ෂණ කරන්නට අපේ සෞඛ්‍ය සේවයට තිබෙන නොහැකියාව ආවරණය කරන්න එම පරීක්ෂණයට පුළුවන්. සමහරු මේ ලක්ෂණය දකින්නේ මේ පරීක්ෂණයේ අඩුවක් විදියට. ඒත් අපි කියන්නේ මේ වෙලාවේ සාර්ස්, එච්1එන්1 වගේ රෝගයක් අහු වුණත් ඒ අයව වෙන් කරන්න ඕනෑ. ඒ හැම එකක්ම වසංගත.


ඒත් අපට නිශ්චිතවම කොවිඞ්-19 රෝගීන් කී දෙනෙක් ඉන්නවාද කියලා තහවුරු කරගන්න ඕනෑ. ඒ සංඛ්‍යාලේඛන ඕනෑ ඒ සඳහා අපි රැුපිඞ් පරීක්ෂණයෙන් පොසිට්ව් වෙන හැම කෙනාවම නැවත පීසීආර් පරීක්ෂණයට ලක් කරලා, ඔහුට තියෙන්නේ කොවිඞ්-19 ද කියලා නිශ්චිතව තහවුරු කරගන්න ඕනෑ.


ප‍්‍රායෝගිකව එය වැදගත් වෙන්නේ ඇයි?


කොවිඞ්-19 වෛරසය ශරීරගත වෙලා දවස් ගණනාවක් යනතුරු කිසිදු රෝග ලක්ෂණයක් පහළ නොවෙන්නත් ඉඩ තියෙනවා. ඒත් ඇෙඟ් වෛරසය තියෙන නිසා ඒ කෙනා වෛරසය බෝ කරනවා. ඉතාලිය වැනි රටවලින් එන අය නිරෝධායනයට යවන්න කලින් රැුපිඞ් ටෙස්ට් එකට ගුවන්තොටුපළේදීම ලක් කරන්න අපට තිබුණා. මම තදින් විශ්වාස කරනවා ඒ වෙලාවේම පරීක්ෂාව කළා නම් අඩුම තරමේ දෙන්නෙක් පොසිටිව් වෙලා, නිරෝධායන මධ්‍යස්ථානය වෙනුවට රෝහලට යවන්න තිබුණු බව. නිරෝධායන මධ්‍යස්ථාන ඇතුළේදී රෝගය බෝ වුණාද, නොවුණාද කියලා පරීක්ෂණවලින් තහවුරුවෙලා නැහැ. ඒත් ඇතුළේදී ලෙඬේ බෝ වෙන්නට තිබුණු ඉඩකඩ සීමා කරන්න ගුවන් තොටුපළේදී කොවිඞ්-19 පරීක්ෂණය කළා නම් හැකිවෙනවා.


අනෙක් අතට මුලින්ම විවිධ රටවල් ගැන දැක්වුවේ විවිධ ප‍්‍රතිචාර. ඉන්දියාවේ ඉඳන් ආ අය නිදහස් කළා. චීනයේ ඉඳන් ආ අය හරිහැටි පරීක්ෂා කළේ නැහැ. ඒ ගැන ඇහුවාම විවිධ දේවල් කීවා. මේ රෝගයේ තියෙන වැදගත්ම ලක්ෂණය තමයි, රෝගයට අපට වගේ ජාති ජම්ම රටවල් කුල නෑ. අපි චීනෙ හොඳයි, ඉතාලිය නරකයි කීවාට කොවිඞ්-19 ඒවා තෝරන්නේ නෑ.


එතැනින් පස්සේ ලංකාව ඇතුළේදීත්, රැුපිඞ් ටෙස්ට් කළා නම් රෝග ලක්ෂණ පෙන්වන්නේ නැති රෝගීන් විශාල පිරිසක් හඳුනාගන්න තිබුණා. අපට සැකයක් තියෙන සියලූ දෙනාවම පරීක්ෂා කරන්න තිබුණා. එහෙනම් ඒ අය ලෙඬේ පතුරුවන එක නවත්වන්න තිබුණා.


ඊට අවශ්‍ය ශ‍්‍රම සම්පත තිබුණාද?


අපි වෛද්‍ය රසායනාගාර විද්‍යාඥයන් අසූවක් ක්ෂේත‍්‍රයට ගිහින් රැුපිඞ් පරීක්ෂණ කරන්න ලෑස්ති වෙලා ඉන්නවා. ඒ නම් ලැයිස්තුව අපි ලිඛිතව දැනුම් දුන්නා. අපව පාවිච්චි කරන්න කියලා ඉල්ලූවා.


ලෝකයේ දියුණු රටවල් රැපිඩ් ටෙස්ට් කරනවාද?


දියුණු රටවලට මේවා කරන්න අවශ්‍ය නෑ. උදාහරණයක් විදියට චීනය සැලකුවොත්, චීනය පුරා පීසීආර් පරීක්ෂණය කළ හැකි විද්‍යාගාර, පරීක්ෂණ කට්ටල විශාල ප‍්‍රමාණයක් තියෙනවා. ඉහළම මට්ටමේ විද්‍යාගාර ඔවුන්ට තියෙනවා. අපි විෂය හදාරන්නට චීනයේ ගිහින් තියෙනවා. එයාලාට පීසීආර් සඳහා තාක්ෂණය හා යන්ත‍්‍ර ගොඩක් තියෙන නිසායි රැුපිඞ් ටෙස්ට් නොකරන්නේ.


දැනට පීසීආර් පරීක්ෂණ හරිහැටි සිද්ධ වෙනවාද?


මෙතෙක් පීසීආර් පරීක්ෂණය පවා අවශ්‍ය තරමට සිද්ධවුණේ නැහැ. පරීක්ෂණ කෙරුණු වේගය මදි. ඒ පරීක්ෂණය කරන්න සේවකයන් අවශ්‍ය නම්, ඒ පිළිබඳව විශේෂ ප‍්‍රාගුණ්‍යයක් සහ පුහුණුවක් තියෙන වෛද්‍ය රසායනාගාර විද්‍යාඥයන් 25 දෙනෙකුගේ කණ්ඩායමක නම් ලැයිස්තුවක් යවලා තියෙනවා. අපට තියෙන පහසුකම් උපරිම පාවිච්චි කරමින්, පැය විසිහතරේම වැඩකරලා හරි උපරිම පරීක්ෂණ ප‍්‍රමාණයක් කරන්න ඕනෑ. රෝහල්ගත වෙන රෝගීන්ව පමණක් පරීක්ෂා කරලා මදි.


සෞඛ්‍ය අමාත්‍යාංශය හෝ සෞඛ්‍ය අධ්‍යක්ෂ ජෙනරාල්වරයා පවා තොරතුරු නොදන්න පීසීආර් යන්ත‍්‍ර ලංකාවේ තියෙනවා. විවිධ නිලධාරීන් රටේ විවිධ තැන්වලට ගෙනාපු පීසීආර් යන්ත‍්‍ර තියෙනවා. සමහර ආයතනවලට ලැබුණ පරිත්‍යාග තියෙනවා. ඒත් ඒ සමහර යන්ත‍්‍රවල තාක්ෂණය බලන තාක්ෂණික කමිටුවටවත් වෛද්‍ය රසායනාගාර සේවයේ විශේෂඥයන්ව පත් කරලා නෑ. සමහර යන්ත‍්‍ර තාක්ෂණික ඇගයීමට ලක් නොකළ නිසා ඒවායෙන් ප‍්‍රයෝජනයක් ගන්න බැහැ. සමහර යන්ත‍්‍රවල පද්ධතිය තියෙන්නේ චීන හෝ කොරියන් භාෂාවලින්. අපි හිතන්නේ ලංකාවේම යන්ත‍්‍ර 25ක් විතර ඇති. මේ ගැන සංගණනයක් කරන්න කියලා අපි ඉල්ලූවා.

අපි දන්න යන්ත‍්‍ර ගැන විස්තර යැව්වා. අපි මුලින්ම කළ දැනුම්දීම් සහ ඒ ගැන ඔබේ පුවත්පත ඇතුළු මාධ්‍යවලට තොරතුරු දුන්න නිසා තමයි දැනට ක‍්‍රියාත්මක වෙන සමහර පීසීආර් යන්ත‍්‍ර ක‍්‍රියාත්මක කරන තැනට පත්වුණේ. ඒත් මීටත් වඩා පරීක්ෂණ ක‍්‍රියාත්මක කළ හැකියි.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි