ඒකාබද්ධ විපක්ෂයේ දැනට කටයුතු කරමින් සිටින පක්ෂවල එකතුවෙන් බිහිකරගැනීමට බලාපොරොත්තුවන සන්ධානය එළිදැක්වීමේ උත්සවය පවත්වන්නේ එක්සත් ජාතික පක්ෂයේ අපේක්ෂකයා නම් කිරීමෙන් පසුව බව අනිද්දා සමඟ අදහස් දැක්වූ ඒකාබද්ධ විපක්ෂයේ නායකයන් කිහිපදෙනෙක් පැවසූහ.
එක්සත් ජාතික පක්ෂය සමඟ දැන් සිටින කණ්ඩායම් කිහිපයක්ම එම පක්ෂයෙන් නම් කරන අපේක්ෂකයා කවුද යන්න තීන්දු කිරීමෙන් පසුව තම කණ්ඩායමට එකතුවනු ඇතැයි බලාපොරොත්තුවන බව එම නායකයෝ කීහ.
අපේක්ෂකයා ලෙස සජිත් ප්‍රේමදාස මහතා නම් කළොත් රවී කරුණානායක ප්‍රමුඛ රනිල් හිතවාදී කණ්ඩායම්ද, අපේක්ෂකයා ලෙස රනිල් වික්‍රමසිංහ මහතා නම් කළොත් සජිත් හිතවාදී කණ්ඩායම්ද ඒකාබද්ධ විපක්ෂය හා එකතුවනු ඇතැයි එම නායකයෝ පැවසූහ. ඒකාබද්ධ විපක්ෂයේ සන්ධානය එළිදැක්වීමේ උත්සවයේදී එම කණ්ඩායම් වේදිකාවට නංවාගනිමින්, මැතිවරණ ව්‍යාපාරයේ උද්යෝගය ඉහළ නංවාගැනීමට හැකිවෙතැයි බලාපොරොත්තු වන බවද ඔවුහු කීහ.
මේ පිළිබඳව කළ විමසීමකදී ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ ප්‍රකාශ කළේ එක්සත් ජාතික පක්ෂයෙන් අපේක්ෂකයෙකු නම් කිරීමෙන් පසුව තවත් කණ්ඩායම් ඒකාබද්ධ විපක්ෂයේ සන්ධානයට එකතුවනු ඇතැයි තමන්ද බලාපොරොත්තු වන බවයි. ඒ කවුද යන්න පිළිබඳව ඔහු වැඩි විස්තර ප්‍රකාශ නොකළේය. ප්‍රතිවාදියා හරිහැටි නොදැන සන්ධානය ඉක්මන් කිරීමෙන් පලක් නැති බව ඔහු වැඩිදුරටත් කීය.
