එජාප නායක රනිල් වික‍්‍රමසිංහ එළැඹෙන ජනාධිපතිවරණයේදී තරග නොකරන තත්ත්වයක් උදාවී ඇතැයි අනිද්දා වෙත වාර්තා වේ.
මේ පිළිබඳව අදහස් දැක්වූ ආණ්ඩුවේ අමාත්‍යවරයෙකු ප‍්‍රකාශ කළේ සජිත් පේ‍්‍රමදාස, කරූ ජයසූරිය, පාඨලී චම්පික රණවක යන අයගෙන් කෙනෙකුට අපේක්ෂකයා වීමට රනිල් වික‍්‍රමසිංහගේ ආශීර්වාදය ලැබෙන තත්ත්වයක් දැන් පක්ෂය තුළ උදාවී ඇති බවය.
මේ අතර පසුගියදා සමාජ මාධ්‍ය වෙත වීඩියෝ පටයක් නිකුත් කරමින් අමාත්‍ය මංගල සමරවීර ප‍්‍රකාශ කළේ එළැඹෙන ජනාධිපතිවරණයට රනිල් වික‍්‍රමසිංහගේ ආශීර්වාදය සහ සහාය ඔස්සේ සජිත් පේ‍්‍රමදාස තරග කරනු ඇති බවය. අමාත්‍ය මංගල සමරවීරගේ අදහස අනුමත කරමින් අනිද්දා වෙත අදහස් දැක්වූ එජාප පසුපෙළ මන්ත‍්‍රී කණ්ඩායමේ ප‍්‍රබලයෙකු ප‍්‍රකාශ කළේ මංගල සමරවීර මහතාගේ අදහස වටා පක්ෂයේ බොහෝ පිරිසක් එකතුවෙමින් ඇති බවය. ඒ අනුව පක්ෂ නායකත්වය යම් හෙයකින් සජිත් පේ‍්‍රමදාස වෙත අපේක්ෂකත්වය නොදී සිටින්නට කටයුතු කළහොත් එජාපයේ පසුපෙළ මන්ත‍්‍රී කණ්ඩායම සහ බොහෝ ජ්‍යෙෂ්ඨයන් දැඩිව සිටිමින් එයට විරුද්ධව දැඩිව සටන් කරනු ඇති බව එම මන්ත‍්‍රීවරයා ප‍්‍රකාශ කළේය.
තවත් එජාප අමාත්‍යවරයෙකු ප‍්‍රකාශ කළේ අපේක්ෂකයා පිළිබඳව දැනට පක්ෂය තුළ උද්ගතවී තිබෙන ප‍්‍රශ්නය නිරාකරණය කර නොගතහොත් ඉදිරියේදී අනිවාර්යයෙන් පක්ෂ බිඳී යනු ඇති බවය. එම තත්ත්වය තේරුම් ගෙන නිසා දෝ රනිල් වික‍්‍රමසිංහ පාර්ශ්වයෙන් සුබවාදී ප‍්‍රතිචාර ලැබෙන බව ඔහු ප‍්‍රකාශ කරයි. එහෙත් කවුද තරගයට ඉදිරිපත්වන්නේ යන්න තවමත් විවෘත බව ප‍්‍රකාශ කරන ඒ මහතා ඉහත පාර්ශ්ව තුනෙන් වැඩි වාසි සහිත පුද්ගලයා අපේක්ෂකයා වනු ඇති බවද ප‍්‍රකාශ කරයි.
