මේ ප‍්‍රශ්නය පිළිබඳ ව හැකි තාක් සරල, දළ, නිවැරදි අවබෝධයක් බුද්ධිමත් ජනතාවට ලබා දීමයි, මේ ලිපියේ අරමුණ. අදාළ චෝදනාව ගැන විධිමත් විමර්ශනයක් වෛද්‍ය සභාව විසින් කරනු ලබන්නේ, 1927 වර්ෂයේ අංක 26 දරන වෛද්‍ය ආඥා පනතට අනුකූල ව බව කිව යුතු ය.
1 අපචාරයට ලක් වූවා යැයි චෝදනා කරන පුද්ගලයා (විත්තිකරු* විධිමත් දිවුරුම් පෙත්සමක් මගින් චූදිත වෛද්‍යවරයාට එරෙහි ව චෝදනාවක් වෛද්‍ය සභාවේ ලේඛකාධිකාරී වෙත යොමු කළ යුතුයි.
2 ලේඛකාධිකාරී ඒ දිවුරුම් පෙත්සම වෛද්‍ය සභාවේ සභාපතිට යොමු කරයි.
3 සභාපති පෙත්සම සලකා බලා බැලූ බැල්මට චෝදනාව සාධාරණ එකක් යැයි පෙනී යන්නේ නම් එය වෛද්‍ය සභාවේ උපසභාපතිවරයාගේ සභාපතිත්වයෙන් යුත් සමාජිකයන් පස් දෙනකුගේ සංයුතියකින් සමන්විත වන මූලික විමර්ශන කමිටුවක් වෙත මූලික විමර්ශන කටයුතු සඳහා ඉදිරිපත් කරයි.
4 මූලික විමර්ශන කමිටුව විසින් චූදිත වෛද්‍යවරයාට චෝදනාව ඉදිරිපත් කර ඊට පිළිතුරු බැඳීම සඳහා දින 28කට නොඅඩු කාලයක් ලබා දෙයි. අවසන නිශ්චිත දිනයක දී දෙපාර්ශ්වය ම කැඳවා ප‍්‍රශ්න, හරස් ප‍්‍රශ්න ආදිය යොමු කරමින් කමිටුව ප‍්‍රස්තුත කාරණය පිළිබඳ ව යම් දළ අදහසක් ලබා ගැනීමට වෑයම් කරයි.
5 මූලික විමර්ශන කමිටුවේ ලේකම් වශයෙන් කටයුතු කරන ලේඛකාධිකාරී ඒ විමර්ශනයෙන් ලබා ගත් තොරතුරු පිළිබඳ විධිමත් වාර්තාවක් සම්පාදනය කර මූලික දළ නිගමනයක් සහිත ව ස්වකීය වාර්තාව ප‍්‍රධාන කමිටුව වෙත ඉදිරිපත් කරනු ලබයි. ඒ තීරණාත්මක ප‍්‍රධාන කමිටුව සමන්විත වන්නේ, වෛද්‍ය සභාවේ සභාපතිගේ සභාපතිත්වයට අමතර ව පෙර කී මූලික විමර්ශන කමිටුවේ සාමාජිකයන් 5 දෙනාට අයත් නොවූ සාමාජිකයන් 10 දෙනකුගෙනි. ඒ කමිටුව මූලික විමර්ශන වාර්තාව අධ්‍යයනය කර බලා තවදුරටත් විධිමත් පරීක්ෂණයක් කළ යුතු ද, නැති ද යන්න පිළිබඳ පොදු එක`ගත්වයකට පැමිණෙයි. වැඩි දුර විමර්ශන අවශ්‍ය නොවන්නේ නම්, චූදිත වෛද්‍යවරයාට එරෙහි පෙත්සම සනාථ කෙරෙන සාක්ෂ්‍ය නොමැති තත්වයක් මත ඔහු චෝදනාවලින් නිදොස් කොට නිදහස් කරනු ලබයි.
6 වැඩිදුර විමර්ශන සඳහා ඉදිරියට යා යුතු ව ඇති නම්, එනම් චූදිත වෛද්‍යවරයාට එරෙහි ව යම් යම් කරුණු සාධක ගොනු වී ඇති නම් මේ ප‍්‍රධාන විමර්ශන කමිටුව මගින් අධිකරණමය ක‍්‍රියාවලියකට අතිශයින් ම සමාන ව සිදු වන විමර්ශන ක‍්‍රියාවලියක් සිදු කරනු ලබයි.
7 එහි දී වෛද්‍ය සභාවේ නීතිඥයා විසින් චූදිත වෛද්‍යවරයාට චෝදනා පත‍්‍රයක් ගොනු කරනු ලබයි. චූදිතයාට අවශ්‍ය නම් තමන් වෙනුවෙන් නීතිඥ සහාය ලබාගැනීීමට ද මෙහි දී අවකාශ සැලසේ. පැමිණිලි සනාථ කිරීම හෝ නිෂ්ප‍්‍රභ කිරීම සඳහා අදාළ විශේෂඥ සහායන් ලබාගැනීමට ද හැකියාව තිබේ.
8 මේ ප‍්‍රධාන විමර්ශනයේ දී අධිකරණයක දී මෙන් සියලූ තොරතුරු, ඉදිරිපත් කෙරෙන සාක්ෂ්‍ය ආදිය ලේඛනගත කෙරෙයි. හරස් ප‍්‍රශ්න මතු කෙරෙමින් නඩු වාර කල් යවමින් අධිකරණ ක‍්‍රියාවලියකට අතිශයින් ම සමාන ආකාරයෙන් උසාවි කටයුතු අකුරට ම මෙහි දී සිදු කෙරෙයි. මෙහි දී සඳහන් කළ යුතු වැදගත් කරුණක් වන්නේ, මෙම විමර්ශන කමිටු සාමාජිකයන් 10 දෙනා අතරින් පස් දෙනකු වත් අනිවාර්යයෙන් මුල සිට ම අදාළ විමර්ශන කටයුත්තේ ආරම්භයේ සිට අවසානය තෙක් සෑම නඩු වාරයකට ම අඛණ්ඩ ව සහභාගී වී සිටීම අත්‍යවශ්‍ය සාධකයක් වන බවයි. මේ සභාපතිගේ සහභාගීත්වයට අමතර ව ය.
9 අවසානයේ දී වෛද්‍ය සභාවේ සභාපති, නඩුවේ අදාළ සියලූ කරුණු කාරණා සලකා බලා විධිමත් නඩු තීන්දුවක් සම්පාදනය කොට එය විවෘත සභාවේ දී ප‍්‍රකාශයට පත් කරයි. 26 වෙනි ආඥා පනතට අනුකූල ව දඬුවම් නියම කෙරෙයි. ඒ දඬුවම, වෛද්‍ය වෘත්තිය අහිමි වන තරමට බරපතළ වීමට ඉඩ තිබේ.
10 චූදිත වෛද්‍යවරයා හෝ පැමිණිලි පාර්ශ්වය ඒ තීන්දුව ගැන සෑහීමකට හෝ එක`ගතාවකට පත් නොවන්නේ නම් රටේ පොදු නීතිය යටතේ අධිකරණයට අභියාචනා කිරීමට ඔවුන්ට හැකියාව තිබේ.
කාලෝ ෆොන්සේකා
