No menu items!
27.5 C
Sri Lanka
29 March,2024

සතිපොළෙන් මුස්ලිම් වෙළෙඳුන්ව ඉවත් කරන්න හැදූ වෙන්නප්පුව සභාපති

Must read



වෙන්නප්පුව ප‍්‍රාදේශීය සභාවේ සභාපති කේ.වී. සුසන්ත ජනාධිපතිවරයාටත් නැති බලයක් තමන්ට ඇතැයි සිතමින් ලිපියක් ලියා ඇති බව අපි ප‍්‍රවෘත්තිවලින් දුටුවෙමු. ජුනි 24 වැනිදා ඔහු ලිපියකින් දංකොටුව පොලිස් ස්ථානයේ පොලිස් ස්ථානාධිපතිවරයා වෙත ලිපියක් මගින් දැනුම් දී තිබුනේ වෙන්නප්පුව ප‍්‍රාදේශීය සභා බල ප‍්‍රදේශයේ ඇති දංකොටුව සතිපොළ භූමියෙහි වෙළඳාම් කිරීම මුස්ලිම් ජනයාට තහනම් කරන ලෙසය.


එලෙස නියෝග කරන්නට රටේ බලවත්ම රාජ්‍ය පාලන තනතුර ලෙස සලකන ජනාධිපතිවරයාටවත් බලයක් නැත. එය පැහැදිළිවම ආණ්ඩුක‍්‍රම ව්‍යවස්ථාව උල්ලංඝනය කිරීමකි. මේ වන විට දංකොටුව සතිපොළ භූමියට පැමිණෙන වෙළඳ ප‍්‍රජාව අතර මුස්ලිම් ජනතාවද සිටින බැවින් ප‍්‍රදේශවාසීන්ගේ හා වෙළඳ ප‍්‍රජාවගේ දැඩි විරෝධය තමා වෙත ප‍්‍රකාශ කර ඇති බව ඒ ලිපියෙහි සඳඳහන්ව තිබී ඇත. මුස්ලිම් ජනතාවව පැමිණීමෙන් සතිපොළෙහි සාමකාමී වාතාවරණයට බලපෑමක් සිදුවිය හැකි බවත් එහි තිබී ඇත.


සාමකාමී වාතාවරණයට බලපෑම ලෙස හඳුන්වන්නට ඇත්තේ වෙළඳාමට එන මුස්ලිම් අයට එරෙහිව වෙනත් යම්කිසි ජනවර්ගයක පිරිසක් ප‍්‍රචණ්ඩත්වය ක‍්‍රියාත්මක කිරීම විය යුතුය. එසේනම් විය යුත්තේ එලෙස ප‍්‍රචණ්ඩත්වය ක‍්‍රියාත්මක කරන අයට නීතිය ක‍්‍රියාත්මක කිරීමය. ජනවර්ග අතර ගැටුම් ඇතිකරන අයට එරෙහිව දැඩි නීති ලංකාවේ ඇත. එහෙත් කේ.වී. සුසන්ත ප‍්‍රාදේශීය සභාපතිවරයාට කැකිල්ලේ ක‍්‍රමය ප‍්‍රිය කරන්නෙකි. අතට මදුරුවෙක් දෂ්ඨ කරද්දී මදුරුවාව මැරීම වෙනුවට අතකපාදැමීමේ ක‍්‍රමයක් ඔහු අනුගමනය කර තිබුණි. අතක් නැත්නම් මදුරුවා කන්නේ නැතැයි සිතනවාක් මෙන්, මුස්ලිම් අය සතිපොළේ වෙළඳාම් නොකළොත් ගැටලූවක් නැතැයි ඔහු සිතුවා විය හැකිය.


ප‍්‍රාදේශීය සභාපතිවරයා නිකුත් කර තිබුණු එම ලිපිය පිළිබඳව විශාල සංවාදයක් මතුවී තිබුණි. ඔහු කළ ක‍්‍රියාව කිසිසේත්ම අනුමත කළ නොහැකි ක‍්‍රියාවකි. එමෙන්ම කිසිදු ප‍්‍රයෝජනයක් නැති බලරහිත ක‍්‍රියාවකි. එය සරලවම මෝඩ ක‍්‍රියාවක් ලෙස සැලකීමේ වරදක් නැත. කෙසේ වෙතත් ඒ අප ඒ සිදුවීම දෙස බලන ආකාරයයි. ඔහු තමන්ගේ ක‍්‍රියාව දකින්නේ කෙසේදැයි අපි විමසුවෙමු.


‘මගේ මේ ක‍්‍රියාව ගැන හැමෝම කතා කරන්නේ ඒකපාර්ශවිකව. දංකොටුව සතිපොළෙහි මුස්ලිම් ප‍්‍රජාව ව්‍යාපාර කිරිම ගැන පන්සලේ නායක හාමුදුරුවෝ සහ සතිපොලේ ව්‍යාපාරික ප‍්‍රජාවයි මාව හමුවෙලා දිගටම විරෝධය දැක්වුවා. මේ සතිපොළේ සිංහල වෙළෙන්දන් 700 ක් විතර ඉන්නවා. මුස්ලිම් වෙළෙන්දන් කිහිපදෙනයි ඉන්නේ. දංකොටුව නගරයේ පසුගිය කාලේ දිගින් දිගටම හාමුදුරුවරු සහ ප‍්‍රදේශයේ බොහෝ අය එකතුවෙලා පෙළපාලි ගියා මුස්ලිම් අයව මේ පොළෙන් ඉවත් කරන්න කියලා. ඉන්පසුව දංකොටුව නගරයේ ප‍්‍රාදේශීය සභාව යටතේ පවත්වා ගෙන යන දංකොටුව පොලිසියේ සහන මැදිරියකටත් පැමිණිලි ඇවිත් තිබුනා මේ වෙළදුන්ව ඉවත් කරන්න කියලා.

ඉන්පස්සේ දංකොටුව පොලිසියේ ස්ථානාධිපතිවරයා සහ දිසාව භාර පොලිස් අධිකාරිවරයාත් මගෙන් ඉල්ලීමක් කලා මේ වෙළදුන්ව ඉවත් කරලා නගරයේ ආරක්ෂාව පවත්වා ගෙන යාමට උදව් කරනා ලෙස. ඉන්පස්සේ තමයි මම ඔය ලියුම ගැහුවේ. දැන් හැමෝම මට දොස් කියනවා. මට ඕන කලේ දංකොටුව නගරයේ ආරක්ෂාව පවත්වාගෙන යන්න විතරයි.

දංකොටුව නගරයේ ජනතාව පසුගිය සතිය වෙනකම්ම සාමකාමීව කටයුතු කරගෙන ගියා. ත‍්‍රස්ත ප‍්‍රහාරයෙන් පසුවත්. එහෙත් කාදිනල්තුමා ඉතාලියේ ගිහින් කරපු ප‍්‍රකාශයත්, මහා නායක හාමුදුරුවන් කරපු ප‍්‍රකාශයත් නිසා ජනතාව ආපහු බිය වෙලා ඉන්නේ. ඒ නිසා තමයි මේ විදියට හැසිරෙන්නේ. අනෙක ඉන්දියාවෙනුත් කියලා තියෙනවා තවම අනතුර ඉවර වෙලා නැහැ කියලා. ඒවායින් මිනිස්සු කලබල වුණා.’

ඒ ඔහුගේ පැත්තේ කතාවයි. කෙසේ වෙතත් මෙවැනි නියෝගයක් කරන ලෙස තමන් කිසිදිනෙක වෙන්නප්පුව ප‍්‍රාදේශීය සභාපතිවරයාගෙන් ඉල්ලා නොමැති බව දංකොටුව පොලිස් ස්ථානාධිපති තිලිණ හෙට්ටිආරච්චි පැවසීය. සභාපතිවරයාගේ ලිපිය නිත්‍යානුකූල නොමැති බව ලිපිය ලද මොහොතේ තමන් ප‍්‍රාදේශීය සභාපතිවරයාට දැන්වූ බවත් පොලිස් ස්ථානාධිපතිවරයා කීය. අදාල ලිපිය ලැබීමෙන් පසුව එම සතිපොළෙහි වෙළදාම් කරනා මුස්ලිම් ජනතාව දංකොටුව පොලිසියෙන් පවත්වාගෙන යන සහන මැදිරියට පැමිණ සභාපතිවරයාගේ ක‍්‍රියා කලාපය පිලිබදව පැමිණිල්ලක් කල බව ස්ථානාධිපතිවරයා වැඩිදුරටත් ප‍්‍රකාශ කළේය. දංකොටුව පොලීසිය මුස්ලිම් වෙළෙඳුන්ගේ පැමිණිල්ල සම්බන්ධයෙන් ඉදිරියේදී ගන්නා පියවර මොනවාදැයි අප බලා සිටිය යුතුය. විශේෂයෙන්ම මෙය ජාතීන් අතර කලබල ඇතිවිය හැකි සංවේදී සිදුවීමක් නිසා දැඩි පියවරක් ගත යුතුය.


දිසාව භාර පොලිස් අධිකාරිවරයා ගැනත් ප‍්‍රාදේශීය සභාපතිවරයා කියා ඇත. කෙසේ වෙතත් අප දිසාව භාර පොලිස් අධිකාරීවරයාව සම්බන්ධ කරගැනීමට ගත් උත්සාහයද අසාර්ථක විය. ඒ නිසා එය ප‍්‍රාදේශීය සභාපතිවරයාගේ පැත්තෙන් පමණක් කී කතාවකි.

ඒ කරුණු කෙසේවතුදු ප‍්‍රාදේශීය සභාපතිවරයා කියන කතාවටද අපේ අවධානය යොමු කළ යුතුය. ඔහුගේ කැකිල්ලේ විසඳුමට අප එකඟ නැතත්, කාදිනල් හිමිගේ හා මහානායක හිමිවරුන්ගේ කතාවලින් මහජනතාව ඇවිස්සී ඇති බවට කියන කතාව ගැන අවධානය යොමුකිරීම වටින්නේය. සතිපොළේ සිටින මුස්ලිම් වෙළෙන්දන්ව ඔහු උත්සාහ කළේ යම්කිසි බාහිර කණ්ඩායම්වලින් ආ යෝජනා නිසා බවට කරන ප‍්‍රකාශයත් විශ්වාස කළ නොහැකි එකක් නොවේ. බොහෝ ආයතන පසුගිය කාලසීමාව ඇතුලත සුළුජනවර්ග හිංසනයට ලක් කරන තීන්දු ගෙන තිබුණේ එවැනි බලපෑම් නිසාය. විශේෂයෙන්ම බෞද්ධ හිමිවරුන්ගේ බලපෑම් නිසාය. වෙන්නප්පුවේදීත් සිදුවූයේ එයම දැයි අප කල්පනා කළ යුතුය. රාජ්‍ය ආයතන හා මහජන නියෝජිත ආයතන සුළුජනවර්ග පීඩාවට පත්කරන තත්වය වෙනස් කළ යුතුය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි