No menu items!
29.7 C
Sri Lanka
29 March,2024

‘ආධ්‍යාත්මික ශක්තියෙන් සාෆිගේ පාපෝච්චාරණයක් ගන්නට හැදූ රතන හිමි හා හත්පොළේ ගාගන්නා දිවයින

Must read

සාෆිගේ දියණියන් දෙදෙනා වෙතත් දිවයිනේ වෛරී ප‍්‍රහාරය එල්ලවෙයි


අත්අඩංගුවට ගෙන අපරාධ පරීක්‍ෂණ දෙපාර්තමේන්තුව භාරයේ මේ වන විට රඳවා තිබෙන කුරුණෑගල දොස්තර මොහොමඞ් සාෆි හමුවීමට අතුරලියේ රතන හිමි දැරූ වෑයම අසාර්ථක වූ බව, පසුගිය සතියේ අනිද්දා පුවත්පතේ පළමු පිටුවේ ප‍්‍රවෘත්තියකින් අපි එළිදරව් කෙළෙමු.

ආධ්‍යාත්මික බලය


පසුගිය සතියේ, රතන හිමියන් දොස්තර සාෆි හමුවන්නට උත්සාහ කළේ, සිංහල කාන්තාවන් වඳ බවට පත්කිරීමට සීසර් සැත්කම්වලදී කටයුතු කළ බවට ඔහු ලවා ‘පාපෝච්චාරණයක්’ ලබාගත හැකිදැ’යි බලන්නටය. තමාට යම් ආධ්‍යාත්මික බලයක් තිබෙන බවත්, එම ආධ්‍යාත්මික බලයෙන් දොස්තර සාෆි මෝහනයට පත්කර තමා කළ ‘වරද’ පිළිගන්නා තත්ත්වයට ඔහු පත්කළ හැකි බවත්, ඒ අනුව කරන ප‍්‍රකාශයක් හෙවත් පාපෝච්චාරණයක් සටහන් කරගෙන ඔහු වරදකරු කළ හැකි බවත්, අතුරලියේ රතන හිමියෝ අපරාධ පරීක්‍ෂණ දෙපාර්තමේනතුවේ (සීඅයිඞී* ජ්‍යෙෂ්ඨ පොලිස් නිලධාරියකු ¥රකථනයෙන් අමතා දෙසුවෝය.


පොලිසිය භාරයේ සිටින සැකකරුවකුගෙන් පොලිසිය ලබාගන්නා ප‍්‍රකාශයක් පාපෝච්චාරණයක් හැටියට නොසැලකෙන බවත්, එය සැකකරුට එරෙහිව සාක්කියක් හැටියට උසාවිය භාර නොගන්නා බවත්, ජනාධිපතිගේ උපදේශකයකුද වන මේ භික්‍ෂුව දැන නොසිටින්නට හේතුවක් නැත. එසේම අපරාධ පරීක්‍ෂණ දෙපාර්තමේන්තුව භාරයේ, ත‍්‍රස්තවාදය වැළැක්වීමේ පනත යටතේ රැුඳවුම් නියෝගයක් සහිතව රඳවා සිටින සැකකරුවකු, ඔහුගේ නීතිඥයාට හා පවුලේ සමීපතමයකුට හැරෙන්නට අන් කිසිවකුට මුණ ගැසෙන්නට නොදෙන බවද මේ භික්‍ෂුව නොදැන සිටින්නට විදියක් නැත.


එසේනම්, ඔහු මේ ඉල්ලීම කරන්නේ කුමන බලයකින්ද? හේතු දෙකකි. එකක්, තමා නීතියට ඉහළින් සිටින්නකුයැයි මේ කාලයේ බොහෝ භික්‍ෂූන් මෙන්ම රතන හිමියන්ද සිතයි. නීතියෙන් කළ නොහැකි දෙයක් වුවද, තමාගේ චීවරයේ බලයෙන් කරවාගත හැකියැයි ඔහු සිතයි. ඒ බලහත්කාරය ඇතිවය ඔහු අපරාධ පරීක්‍ෂණ දෙපාර්තමේන්තුවේ නිලධාරියකුට කතාකොට දොස්තර සාෆි මුණගැහෙන්නට අවස්ථාව බයක් සැකක් නැතිව ඉල්ලන්නේ. එහෙත්, ඔහුට ඒ අවස්ථාව ලැබුණේ නැත. සීඅයිඞීයේ නිලධාරීන් කොන්ද කෙලින් තබාගෙන වැඩ කරන පිරිසක් නිසාය.

මඩවලෙන් ගොඩ එන්නට


රතන හිමියන් දොස්තර සාෆිගෙන් පාපෝච්චාරණයක් ගන්නට, තමාගේ ‘මහා ආධ්‍යාත්මික බලය’ යොදාගන්නට තැත් කෙළේ ඇයි? ඊට ඇති දෙවැනි හේතුව කුමක්දැයි කියතොත්, දොස්තර සාෆිට එරෙහිව කළ වෛරී මෙහෙයුම නිසා නිසා රතන හිමි, දිවයින පත්තරය, කුරුණෑගල දිසාව භාර නියෝජ්‍ය පොලිස්පති ඇතුළු බොහෝදෙනකු, මේ වන විට බෙල්ල මැදින් හිරවී සිටින උගුලෙන් ගැලවෙන්නට වෙනත් ක‍්‍රමයක් නැති බව පෙනෙන නිසාය. ඇත්ත එළිවන්නට වන්නට, මේ අයගේ බොරු තවතවත් දියවෙයි. ඒ ඉරණමෙන් ගැලවෙන්නට නම්, දොස්තර සාෆි ලවා පාපෝච්චාරණයක්වත් කරගත යුතුයැයි රතන භික්‍ෂුව සිය සදහම් අසපුවේදී සමීපතමයන්ට කියා තිබේ. සීඅයිඞීයට කතාකර, දරන්නට හැදුවේ ඒ අවසාන උත්සාහයයි.

පැමිණිලි ගණන් කරන දිවයින


ඒ අතර, කුරුණෑගලටත් තදාසන්න අනෙකුත් ගලේවෙල හා දඹුල්ල රෝහල්වලටත් දොස්තර සාෆිට එරෙහිව එන පැමිණිලි ගණන හැමදාම දිවයින පුවත්පතේ මුල් පිටුවේ පළකිරීමට විශේෂ වාර්තාකරුවන් යොදවා ඇත. ඔවුන්ට පවරා ඇති කාරිය පැමිණිලි ගණන් කිරීමය. දැන් පැමිණිලි 900ද ඉක්මවා ඇති බව වාර්තා කරන නමුත්, ඒ පැමිණිලි කුමන ස්වභාවයේ ඒවාදැයි වාර්තාකරන්නට දිවයින හිතාමතාම පැහැර හරියි. ඒ බොහෝමයක්, සීසර් සැත්කමෙන් පසු, කකුල රිදීම්, කොන්ද කැක්කුම්, ඇස් පෙනීම දුර්වලවීම් වැනි ‘ජාතිය වඳකිරීමට’ මෙලෝ සම්බන්ධයක් නැති විප‍්‍රකාරය. පැමිණිලි ගණන් කරන්නට දිවා ? දෙකේ මහත් කැපවීමෙන් කුරුණෑගල සේවයේ යොදවා ඇති මාධ්‍යකරුවන්ගෙන්, ඒ කාන්තාවන්ගෙන් විමසා පැමිණිලිවල ස්වභාවයද දැනගන්නට, මහජනතාවගේ දැනගැනීම සඳහා ඒ ගැන වාර්තා කරන්නට, දිවයිනට අපහසුවක් තිබෙන්නට හේතුවක් නැත. එසේ නොකරන්නේ මන්ද? සමහර කාන්තාවන්, පැමිණිල්ල සටහන් කරගත් පසුව අසන ඊළඟ ප‍්‍රශ්නය වන්නේ, ‘අපට වන්දි ලැබෙන්නේ කවදාද’ යන්න බව පොලිසියේ නිලධාරීහු කියති. මේ අසරණ කාන්තාවන්, මේ සා අවමානයකට හා දුෂ්කරතාවකට පත්කළේ දිවයිනේ ජඩමාධ්‍ය භාවිතාව පමණක් නොවේ, ඊළඟ ඡුන්දයේදී පොහොට්ටුවෙන් ඡුන්දය ඉල්ලන්නට බලාසිටින වෛi චන්න ජයසුමනගේ වන්දි බොරුව හා මහින්ද රාජපක්‍ෂ මහතා මොකක් හෝ වන්දියක් ලබාදීමට වූ පොරොන්දුවයි.

එකිනෙකා පාවාදීම


දිවයින පත්තරේ හේමන්ත රන්දුනු අපරාධ පරීක්‍ෂණ දෙපාර්තමේන්තුවට ගොස් දුන් කටඋත්තරයේ, තමාට දොස්තර සාෆිි ගැන තොරතුරු දුන්නේ කුරුණෑගල ඞීඅයිජී බව කියා තිබේ. තමන්ට තොරතුරු සපයන මූලාශ‍්‍ර ගැන එළිදරව් නොකිරීමට ජනමාධ්‍යවේදීන්ට අයිතියක් තිබෙන බවට ලංකාවේ අධිකරණ තීන්දු පවා තිබියදී, තොරතුරු මූලාශ‍්‍රයේ අවසරය මත මිස, එම මූලාශ‍්‍ර හෙළි නොකිරීමේ සදාචාරමය වගකීමක් තිබෙන බව ශ‍්‍රී ලංකා කර්තෘ සංසදයේ වෘත්තීය ප‍්‍රතිපත්ති මාලාවේද දක්වා තිබියදී (දිවයිනද කර්තෘ සංසද සාමාජිකයෙකි.* හේමන්ත රන්දුනු සිය මූලාශ‍්‍රය අපරාධ පරීක්‍ෂණ දෙපාර්තමේන්තුවට හෙළිකිරීම මූලාශ‍්‍ර පාවාදීම ගැන සිත්ගන්නාසුලූ අවස්ථාවකි. දිවයින පුවත්පතේ කර්තෘ අනුර සොලමන්ස්ද, ‘ඒ කාන්තාවන් 4000ම තව්හිද් ජමාත් සංවිධානයේ දොස්තර වඳකළ බවට තමාට සාක්‍ෂි සහිතව ඔප්පු කළ හැකියැ’යි, සීඅයිඞීයට ප‍්‍රකාශය දෙද්දී දැඩිව කීි බවක් දැනගන්නට නැත. ඔහු සීඅයිඞීයට කියා ඇත්තේ, රන්දුනු මහතා දීර්ඝ කාලයක් තිස්සේ පුවත්පතට වාර්තා සපයන බැවින්, ඒ ගැන විශ්වාස කොට මේ ප‍්‍රවෘත්තියද පළකළ බවත් ඊට වඩා දෙයක් ගැන නොදන්නා බවත්ය. කුරුණෑගල ඞීඅයිජී හෙටානිද්දා අපරාධ පරීක්‍ෂණ දෙපාර්තමේන්තුවට ගොස් දෙන ප‍්‍රකාශය අනුව, හේමන්ත රන්දුනුගේද ‘ජනමාධ්‍ය වෘත්තිකභාවය’ තීන්දු වනු ඇත.

කුරුණෑගල ඞීඅයිජී


කුරුණෑගල දිසාව භාර නියෝජ්‍ය පොලිස්පති කිත්සිරි ජයලත්ගේ බිරිඳද කුරුණෑගල මහරෝහලේ වෛiවරියකි. දොස්තර සාෆිගේ බිරිඳ කියන විදියට, කුරුණෑගල නගරයේ තිබුණු ඉඩමක් තමන්ට විකුණන ලෙස කුරුණෑගල වෙළෙඳ සංගමය දොස්තර සාෆිට කියා තිබේ. තවත් හවුල්කරුවන් තිදෙනකුට හවුලේ අයිති ඒ ඉඩම විකුණන්නට දොස්තර සාෆි අකමැති විය. දොස්තරවරයා ‘පැහැදිලි කළ නොහැකි වත්කම් අයිතිකරගැනීම’ නම් චෝදනාව යටතේ කුරුණෑගල ඞීඅයිජී විසින් අත්අඩංගුවට ගැනෙන්නේ ඉන් පසුවය.

මේ වරද ගැන විමර්ශන කරන්නේ අල්ලස් හෝ ¥ෂණ චෝදනා විමර්ශන කොමිසම විසිනි. එහෙත්, ඞීඅයිජී වැට පැන්නේය. ඒ අතර, දිවයිනද ඞීඅයිජී විසින් ලබාදුන් වඳ කිරීමේ ප‍්‍රවෘත්තිය පළකළ අතර, ඉන්පසු ඇරඹුණු භීම සමය තුළ පළමුව දොස්තර අත්අඩංගුවට ගෙන පසුව ඔහුට විරුද්ධව පැමිණිලි ඉල්ලන, නීති විරෝධී තත්ත්වයට පොලිසිය පත්වුණේය. දැන් දොස්තර සාෆි තමා එලෙස නීති විරෝධීව අත්අඩංගුවට ගැනීම සම්බන්ධයෙන් වන්දි ඉල්ලා මූලික අයිතිවාසිකම් පෙත්සමක් ගොනුකිරීමට සූදානම් වෙයි.


සිංහල කාන්තාවන් 4000ක් වඳ කළ බවට ප‍්‍රධාන ප‍්‍රවෘත්තියෙන් බොරු කී දිවයින සමාජ අවමානයෙන් ගැලවෙන්නට දැන් පැමිණිලි ගණන් කරමින් වාර්තා කරයි. එහෙත්, ඒ ඊනියා පැමිණිලිවල වසන්ත සමයද දැන් තුනීවී ගොස්ය. දැන් දිනකට පැමිණිල්ලක්වත් නොලැබෙන ගානය. එනයින් දිවයින කර්තෘගේ වඳසැත්කම් 4000ක ඉලක්කය නොපෙනෙන තරම් බොහෝ දුරය.
එහෙත්, ඒ නොහැකි ඉලක්කය අල්ලාගැනීම සඳහා දිවයින ඇති තරම් විනාශකාරී බොරු තවමත් ගොතමින් සිටියි. ජුනි 16වැනි ඉරිදා දිවයිනේ මනෝජ් අබේදීර ලියූ ‘වඳ කරලා විතරක් නෙවෙයි දසවධත් දිලා’ නමැති ලිපියද එවැනි විනාශකාරී බොරු සහිත ලිපියකි. එහි ඇති කාරණා කිහිපයක් මෙසේය.

  1. පැමිණිලි කළ 1000කට ආසන්න මවුවරුන් අතරින් 200කට ආසන්න පිරිසක් ස්ථිර වඳභාවයට පත්ව ඇති බවට සැක පහළ වී තිබේ… එම 200 දෙනා ෂාෆිගේ සිසේරියන් සැත්කම්වලින් පසු විවිධ සංකූලතාවන්ට සහ අතුරු ආබාධවලට ලක්ව සිටිති. (ඒ අනුව පැමිණිලිි 1000න් 800ක්ම බොරු ඒවා බව මනෝජ් අබේදීරම කියයි. ඒ 200ත් වඳභාවයට පත්වීම ගැන ’සැකයක්‘ පමණකි ඇත්තේ. එහෙත්, ඔවුන් විවිධ සංකුලතා හා අතුරු ආබාධවලට ලක්ව තිබේ. අබේදීර ‘ස්ථිර වඳභාවය’ හැටියට අර්ථ දක්වන්නේ ඒ සංකුලතාද?*
  2. පැමිණිලි කළ මවුවරුන් අතරින් 400කට වැඩි පිරිසක් තවමත් සිටින්නේ තමන් වඳභාවයට පත්වූවේද යන්න සැකහැර ගැනීමේ පරීක්ෂණයකට සහභාගි වීම සඳහාය. ඔවුන් ෂාෆි කළ සිසේරියන් සැත්කම්වලින් පළමු දරුවා බිහිකර වසර 2-3ක් අතර කාලයක් ගතකළ අයය. (මුල් 200 ස්ථිරව වඳවූ බව කියන අබේදීර, තව 400ක් පොරොත්තු ලේඛනයේ තබයි. ඒ 400 අවුරුදු 2ක් 3ක් යනතුරු තමන්ට දරුවන් නැත්තේ ඇයිදැයි කිසිම විශේෂඥයකුට පෙන්වා අසා නැද්ද? සැක හැර දැනගැනීමට දිවයින බොරු ප‍්‍රවෘත්තිය පළවනතුරු සිටියේ ඇයි?*
  3. රෝහල් බලධාරීන් පවසන්නේ ෂාෆිට එරෙහිව පැමිණිලි කළ මවුවරුන්ට වඩා පැමිණිලි නොකළ මවුවරුන් ගණන ඉතා ඉහළ අගයක් ගන්නා බවයි. (හෙළිවන කරුණුවලින් තමන්ගේ බොරුව කඩාවැටෙන බව දන්නා අබේදීර, දැන් ‘ඊටත් එහා ඇති සත්‍යයක්’ ගැන කියයි. 4000ක් වඳ බව සහතික කර කී දිවයිනට, ඒ ‘ඉතා ඉහළ අගයක් ගන්නා පැමිණිලි නොකළ කාන්තාවන්’ ගැන විස්තර සොයාගොස් පාඨකයාට දන්වන්නට බැරි ඇයි? 4000ක් ගැන ප‍්‍රවෘත්ති පළකළේ මේ පිරිස ගැන තොරතුරු නැතිවද? මේ විදියට නම්, මේ සිදුවීමේ ඇත්ත ගැන හොයන්නට මේ කපේදී බැරිය.*
  4. සාෆි සිය විජ්ජාව සඳහා භාවිත කරන න්‍යාය ‘අසාමාන්‍ය වේගය සහ අසාමාන්‍ය කලබලය’ය. ඔහුගේ මෙම අසාමාන්‍ය වේගය හේතුවෙන් සෙසු කාර්ය මණ්ඩලයද ඒ මොහොතේ සිටිනුයේ අවසිහියෙන් මෙනි. ඒ අතරවාරයේ සිංහල මවකගේ බඩ අස්සට අත දමා, පැලෝපීය නාලය විනාඩි කිහිපයක් මිරිකාගෙන සිටීම සාෆිට ඉතා පහසුය. (අසාමාන්‍ය කලබලයෙන් හා වේගයෙන් සැත්කම් කිරීම, සෙසු කාර්ය මණ්ඩලය අවසිහියෙන් සිටීම, බඩ අස්සට අත දමා නාලය අවහිර කිරීම යනාදිය ‘දිවයිනටම ආවේණික ජාතිවාදී ස්පෙෂල්’ හැර වෙන මොනවාද?*
  5. පළමු දරු ප‍්‍රසූතිය සඳහා කුරුණෑගල රෝහල වෙත ඇතුළු වූ මවක වෛද්‍යවරුන් යොමුකර තිබුණේ, සාමාන්‍ය දරු ප‍්‍රසූතිය සඳහාය. එදින මධ්‍යම රාත‍්‍රියේ ඇයව බලෙන් ප‍්‍රසූතාගාරය වෙත රැුගෙන ගිය සාෆි, සිසේරියන් සැත්කමක් සඳහා ඇය භාජන කරනු ලැබුවේ තනිවමය. සාෆි වෛද්‍යවරයා තමාව බලෙන් තල්ලූ කරගෙන ගොස් තනිවම අනවශ්‍ය ආකාරයෙන් සිසේරියන් සැත්කමක් සඳහා යොමු කළ බවට ඇය චෝදනා කරයි. මවගේ, වෛද්‍ය වාර්තා පරීක්ෂා කිරීමේදී පෙනීගියේ ඒ සඳහා අන් කිසිදු වෛද්‍යවරයෙකු හෝ රෝහල් කාර්ය මණ්ඩලයේ අයෙකු අත්සන් තබා නොමැති බවය. සාෆි පමණක් එක් ස්ථානයක අත්සන් තබා තිබුණි. (‘බලෙන් ප‍්‍රසූතාගාරය වෙත රැුගෙන ගිය’, ‘බලෙන් තල්ලූ කරගෙන ගොස්’, ‘තනිවම’ සැත්කමක් කිරීම වැනි සංකල්පනා ජාතිවාදයෙන් අන්ධවූ දිවයින පුවත්පත්කලාවේම ඇති විෂබීජ මිස අන් කිසිවක් නොවේ. තමන්ගේ පාඨකයන්ට දිවයින බෙදාදෙන්නේ මේ තරම් ළාමක කුණුකසළද? කාර්ය මණ්ඩලයේ අන් අය අත්සන් නොකළ පමණින්, ‘අන් කිසිවකු ඊට සහභාගි නොවුණු බව’ තීරණය කළ හැක්කේ අබේදීර වැනි ‘වෘත්තීය මාධ්‍යවේදීන්ට’ම පමණි.*

සාෆිගේ දරුවන්ටත් වෛරයේ ගින්න


මෙතෙක් කල් දොස්තර සාෆි පසුපස හමාගිය මේ ජඩමාධ්‍යවේදීන්්, තමන්ගේ බොරුව නිසා පත්වු සමාජ අවමානයෙන් ගැලවෙන්නට නොහැකිව, දැන් සාෆිගේ දියණියන් දෙදෙනා වෙතද තවත් අමූලික බොරු අලූතෙන් ගොතමින් පහර දෙන්නට පටන්ගෙන තිබේ. මනෝජ් අබේදීර මෙසේ කියයි.
‘සාෆිට අයත්ව තිබූ රසකැවිලි ව්‍යාපාරයක් පිළිබඳව ද මේ වන විට හාහෝවක් මතුව තිබේ. කුරුණෑගල ප‍්‍රදේශයේ පාසල් ආපන ශාලා සඳහා බූන්දි වැනි පැණි රස ආහාර සපයන ලද්දේ සාෆි බවට කටකතා පැතිර යමින් තිබේ. ඒ අතර සාෆිගේ දියණියන් දෙදෙනා විසින් තමන් ඉගෙනගත් පාසලේ දැරියන් වෙත, සනීපාරක්ෂක තුවා නොමිලේ බෙදාදීමක් පිළිබඳවද එම පාසලේ දෙමව්පියන් අතර සැකයකට තුඩු දී තිබේ.’


ජාතිවාදීන්ට තමන්ගේ වුවමනාව සපුරාගැනීම සඳහා දරුවන් වුවද බිල්ලට ගත හැකි බවට මීට වඩා තවත් සාක්‍ෂි අවශ්‍යද? මේ කතාවෙන් බලාපොරොත්තු වන්නේ ඒ දැරියන් දෙදෙනාගේද පාසල් ගමන අත්හිටුවා, සාෆිගෙන් ගත නොහැකි වුණු වාඩුව ගැනීම මිස අන් කුමක්ද?

ශක්තික හිරේ දැම්මේත් මේ ඞීඅයිජී


මේ වන විට රිමාන්ඞ් බන්ධනාගාරගතව සිටින ශක්තික සත්කුමාරට, සාමාන්‍ය නීතිය යටතේ චෝදනා නැගිය හැකිව තිබියදීත්, අයිසීසීපීආර් යටතේ චෝදනා නගා ඇප නැතිව රිමාන්ඞ් බන්ධනාගාරගතව තබන්නට අදාළ උපදෙස් පොල්ගහවෙල පොලිසියට දී තිබුණේත්, මේ ඞීඅයිජී කිත්සිරි ජයලත් සහ වයඹ පළාත භාර ජ්‍යෙෂ්ඨ පොලිස් නිලධාරීන් බව සටහන් කළ යුතුය.

ඞීඅයිජීට එරෙහිව නීතිය


කුරුණෑගල දිසාව භාර ඞීඅයිජී සීඅයිඞීයට ගොස්, රන්දුනුට තමා එවැනි තොරතුරක් නොදුන්නේයැයි කීවේ නම්, රන්දුනුත්, දිවයිනත් හාන්සිය. දුන්නායැයි කීවොත්, 4000ක් වඳවූ බවට ‘සාධාරණ සැකයක් ඇතිකර ගැනීමට’ තමාට තිබුණු තොරතුරු ඔහු සීඅයිඞීයට හෙළිකළ යුතුය.


මේ අන්තෝජටා බහිජටා තත්ත්වයේ සිටින ඞීඅයිජී නිසා, සීඅයිඞීය මුහුණ දුන් අපහසුතාව ඉතා විශාලය. පසු ගිය කාලයේ සිදුවූ විවිධාකාර ඝාතන හා අපරාධ සම්බන්ධව, විශේෂයෙන්ම පාස්කු ඉරිදා ප‍්‍රහාරයට අදාළව සිය සීමිත විමර්ශන නිලධාරීන් සමග දිවා ? නැතිව විමර්ශන කටයුතුවල යෙදීසිටින සීඅයිඞීයට දොස්තර සාෆිගේ ‘මහා අපරාධය’ ගැන විමර්ශනය කිරීමට අතිරේක ශ‍්‍රමයක් දැන් දරන්නට සිදුවි තිබේ. පැමිණිලි සටහන් කරගැනීම සඳහා විස්සකට අධික නිලධාරීන් සංඛ්‍යාවක් යොදවා ඇති අතර, ඔවුන්ට නවාතැන් ගැනීම සඳහා කුරුණෑගල ප‍්‍රදේශයේ නිවෙසක් කුලියට ගන්නට පවා සීඅයිඞීයට සිදුවිය. ඒ මහජනතාවගේ මුදල් වියදම් කරමිනි. ඔවුන් මෙහෙයවීම සඳහා යොදවා ඇත්තේ, පසුගිය කාලයේ සීඅයිඞී විමර්ශන මෙහෙයවූ දක්‍ෂතම නිලධාරීන් දෙදෙනකි. මේ විමර්ශන, ඊළඟට කළ යුතු වෛi පරීක්‍ෂණ මේ ආදි දේවල් සඳහා වැයවන්නේ කාගේවත් පෞද්ගලික බූදලයෙන් නොවේ. රටේ මහජනතාවගේ මුදල්ය. මේ සියල්ල සලකා බලා, බොරු තොරතුරු ලබාදීම හරහා කළ විනාශයට ඞීඅයිජී කිත්සිරි ජයලත්ට එරෙහිව නීතිය ක‍්‍රියාත්මක කරන්නට සිදුවුණොත් එය පුදුමයක් නොවේ.


දැනටමත් ඔහුට එරෙහිව නැගී ඇති චෝදනා කිහිපයකි. ජාතීන් අතර කලබල ඇතිකළ හැකි පුවතක් පොලිස් මාධ්‍ය ප‍්‍රකාශකවරයා දැනුවත් නොකොට මාධ්‍ය වෙත ලබා දීම, හිතාමතාම ජාතීන් අතර කලබල ඇති වීමට අනුබල දීම හා ඔහු විසින් නිර්මාණය කරන ලද පුවතට අදාළ කරුණු සම්බන්ධයෙන් සොයා බැලීමට සහ ඒ පිළිබඳව ලැබී ඇති පැමිණිලි එකින් එක විභාග කිරීමට පොලිස් දෙපාර්තමේන්තුවට විශාල පිරිසක් යෙදවීමට සිදුවීම ඔහුට එල්ලවී ඇති චෝදනා වේ.


‘ඞීඅයිජී මාරු කළොත් රටම ඉවර කරනවායැයි නාද කල අතුරලියේ රතන භික්‍ෂුව, ඞීඅයිජීට එරෙහි මේ චෝදනාවන් සම්බන්ධයෙන් කරන්නේ කුමක්දැයි අපි බලා සිටිමු.x

x අරුණ ජයවර්ධන

මනෝජ් අබේධීරගේ සනීපාරක්ෂක තුවා විසකුරු බොරුව

මාධ්‍යවලින් එල්ල වූ එක් චෝදනාවක් වී තිබුණේ පාසල් දැරියන්ට වෛද්‍ය සාෆිගේ දියණියන් දෙදෙනා සනීපාරක්ෂක තුවා බෙදාදී ඇති බවය. පත්තරයක ලියන්නට තරම් සනීපාරක්ෂක තුවා බෙදා ඇති නම්, පාඨක හිසෙහි මැවෙන්නේ දැරියන් දෙදෙනෙකු මලූ දෙකක සනීපාරක්ෂක තුවා දමාගෙන පාසලේ පන්තියෙන් පන්තියට ගොස් මිතුරන් අතර සනීපාරක්ෂක තුවා බෙදන චිත‍්‍රයකි. ඒ කතාවට වෛද්‍ය සාෆිගේ බිරිඳ වන වෛද්‍ය නසීර් ෆාතිමා ඉමාරා පිළිතුරු දුන්නේ මෙසේය.


‘මගේ දුවලා දෙන්නා පාසලේ දරුවන්ට සනීපාරක්ෂක තුවා බෙදුවා කියලා පත්තරවල තියෙනවා. මගේ පොඩි දුව ඉන්නේ පහ වසර. එයා සනීපාරක්ෂක තුවා කියන වචනේ තේරුම දන්නෙත් නැහැ. මගේ ලොකු දුවට අවුරුදු පහළොවයි. එයාගෙන් එක දවසක් පංතියේ හිටපු ළමයෙක් සනීපාරක්ෂක තුවායක් ඉල්ලගෙන තිබුණා. ඒ ළමයා පංතියේ හිටපු තව ළමයි දෙන්නෙක්ගෙන් ඉල්ලලා තමයි තුන්වෙනියාට මගේ දුවගෙන් ඉල්ලාගෙන තියෙන්නේ. එහෙම දෙයක් සිද්ධවෙලා තියෙන්නේ එකම එක දවසක් විතරයි.’
පාසලේ මුස්ලිම් මිතුරු මිතුරියන්ගෙන් තෑග්ගක් හෝ ආහාරයක්වත් බාර නොගන්නා ලෙස සිංහල මාපියන් දරුවන්ට උපදෙස් දෙන තැනට වෛරී විෂ වර්ධනය කිරීමේ පහත් වුවමනාවක් මේ මාධ්‍ය ආයතනවලට ඇත.x


රේඛා නිලූක්‍ෂි හේරත්

අපරාධ පරීක්ෂණ දෙපාර්තමේන්තුව කරගෙන යන පරීක්ෂණයට පිටින් ගොස්, කුරුණෑගල රෝහල් අධ්‍යක්ෂ සරත් වීරබණ්ඩාර වෙනම පරීක්ෂණයක් කරමින් සිටියි. මීට පෙර සෞඛ්‍ය අමාත්‍යාංශය විශේෂඥ කමිටුවකින් ආරම්භ කළ පරීක්ෂණයද නවත්වා තිබුණේ එය අපරාධ පරීක්ෂණ දෙපාර්තමේන්තුව කරන පරීක්ෂණයට බාධාවක් වන නිසාය. එහෙත් මේ වෙද්දී පැමිණිලි ඉදිරිපත් කළ මවුවරුන් 15 බැගින් රෝහලට ගෙන්වමින් කුරුණෑගල රෝහල් අධ්‍යක්ෂවරයා පරීක්ෂණ මෙහෙයවමින් සිටියි.


දිවයින පුවත්පත ජුනී 19 වන දින වාර්තා කර ඇත්තේ වෛද්‍ය ෂාෆි සිංහල මවුවරුන් සඳහා සිසේරියන් සැත්කම් කරද්දී ඔහුගේ හැසිරීම සහ ක‍්‍රියාකරන ආකාරය ඉතාම සැකසහිත තත්ත්වයක පැවැති බවට ශල්‍යාගාරවල රාජකාරි කරන හෙද නිලධාරිනියන් ඇතුළු කාර්ය මණ්ඩලය කුරුණෑගල ශික්ෂණ රෝහලේ පරීක්ෂණ සිදුකරන විශේෂ විමර්ශන කමිටුව හමුවේ ප‍්‍රකාශ ලබාදී ඇති බවය. ශල්‍යාගාරවල රාජකාරි කරන හෙද නිලධාරිනියන් 69 දෙනා අතරින් 39 දෙනකුම මේ වන විට එම විමර්ශන කණ්ඩායම හමුවේ ෂාෆි වෛද්‍යවරයාගේ මෙම සැක කටයුතු ක‍්‍රියාවන් පිළිබඳ ප‍්‍රකාශ ලබාදී ඇති බවත්, ඉදිරියේදී මේ සම්බන්ධයෙන් තවත් හෙද නිලධාරිනියන් 30 දෙනකුගෙන් ප‍්‍රකාශ ලබා දීමට නියමිත බවත් ඒ ප‍්‍රවෘත්තියේ සඳහන්ය.


මේ විශේෂ පරීක්ෂණ පිළිබඳව කුරුණෑගල රෝහලේ අධ්‍යක්ෂක සරත් වීර බණ්ඩාර බණ්ඩාර මහතාට ¥රකථන ඇමතුමක් ලබාදුන් අපි කරුණු විමසුවෙමු. ඔහු පැවසූවේ ජූනි මස 27 වන දින තමන්ට සාක්ෂි ලබා දීමට උසාවිය ඉදිරියේ පෙනී සිටින්න යැයි අණ කර ඇති නිසා වෛද්‍ය සාෆි සම්බන්ධයෙන් සාක්ෂි එකතු කර ගැනීමට මෙම පරීක්ෂණය ආරම්භකර ඇති බවය. එහෙත් රෝහල් අධ්‍යක්ෂවරයාගෙන් අධිකරණය බලාපොරොත්තු වන්නේ මව්වරුන් පරීක්ෂා කොට ඒ තොරතුරු ලබාදීම නොවේ. මවුවරුන්ගේ සාක්ෂි පරීක්ෂා කිරීමේ කටයුත්ත අධිකරණය කරන්නේ අධිකරණ වෛද්‍ය නිලධාරීන් හරහාය.


තමන්ගේ බලයට ඉහළින් ගොස් කුරුණෑගල රෝහල් අධ්‍යක්ෂවරයා කරන මේ පරීක්ෂණයේදී ලබාදුන් සාක්ෂියැයි සඳහන් කරමින් දිවයින ලියා තිබුණේ වෛද්‍ය සාෆි මුස්ලිම් මවුවරුන්ගේ සිසේරියන් සැත්කම් කරද්දී හොඳින් කාලය ගෙන ඒ සැත්කම් කළ බවට හෙදියන් කී බවයි. ඒ කාලය මැන්නේ කෙසේද, ඒවා වාර්තා වී තිබෙනවාද නැද්ද යන්න අප දන්නේ නැත. මුස්ලිම් මවකට දරුවෙක් ඉපදුණු පසුව දරුවා ඉහළට ගෙන යාඥාවක් කළ බවත්, ඒ සාක්ෂිවලදි හෙළිවූ බව දිවයින ලියා තිබුණි. දරුවෙක් ඉපදුණු පසුව ඕනෑ ආගමක භක්තිකයෙකුට යාඥාවක් කරන්නට අයිතියක් ඇත. යාඥාවේ කතාව ගැන වෛද්‍ය සාෆිගේ බිරිඳ මෙසේ කීවාය.


‘කවුරු හරි අම්මා කෙනෙක් ඉල්ලීමක් කලොත් විතරක් මගේ මහත්තයා යම් යම් අවස්ථාවලදී එහෙම කරලා තියෙනවා. ඒකට කියන්නේ ආසාන් කියලා (ඉස්ලාම් බැතිමතුන්ට දෙවියන් නමදිනන්නට පල්ලියෙන් කරන ආරාධනාව* දරුවෙක් ඉපදුනාම ඒ දරුවාගේ කණට කරලා අපි රහසක් කියනවා වගේ තමයි ඒ කාර්ය කරන්නේ. ළ`ග ඉන්න කෙනෙක්ටවත් ඇහෙන්නේ නැහැ ඒක’.
පොලිස් ආරංචිමාර්ග අනුව සීඅයිඞීය මෙම සිදුවීම ගැන පරීක්ෂණ සාර්ථකව මෙහෙයමින් සිටියි. මේ වෙද්දී පැමිණිලි කර ඇති මව්වරුන් 1000 පමණ ක් අතරින් මව්වරුන් 601 කට ආසන්න පිරිසකගෙන්ද, කුරුණෑගල රෝහලේ අධ්‍යක්ෂකවරයා ඇතුළු වෛද්‍යවරුන් 20 කගෙන්ද, ප‍්‍රසව හා නාරි විශේෂඥ වෛද්‍යවරුන් 06 ගෙන්ද, කුරුණෑගල රෝහලේ හෙදියන් 69ගෙන්ද, රෝහල් කාර්ය මණ්ඩලයේ 18 දෙනෙකු ඇතුළු පුද්ගලයන් 758 කගෙන් මේ වන විට අපරාධ පරික්ෂණ දෙපාර්තුමේන්තුව ප‍්‍රකාශ ලබා ගෙන ඇත. අධිකරණ වෛද්‍යවරුන්ගේ කමිටුවක් මගින් වෛද්‍ය සාෆි සියාබ්දීන් තමන්ව වඳ භාවයට පත් කර ඇතැයි පැමිණිලි කර ඇති මව්වරුන්ව විද්‍යාත්මකව පරීක්ෂා කර බැලිමට ඉදිරියේදී කටයුතු සුදානම් කර ඇත.x

රේඛා නිලූක්‍ෂි හේරත්

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි