No menu items!
26.2 C
Sri Lanka
28 March,2024

කංගනාගේ කෑගැසීම

Must read

බොලිවුඞ් සිනමාව තුළ බොහෝ සිහින දැකීමේ හැකියාවක් අද තියෙනවා. සිනමා රසිකයෙක්ට සිනමාව තුළ සිහින වීරයන් වීරක්‍රියා කරන අන්දම නැරඹිය හැකියි. එහෙත් බොලිවුඩය ගැන සිහින දකින සාමාන්‍ය කෙනෙකු එක් සිහිනයක් පමණක් නොදැකිය යුතුයි. ඒ බොලිවුඩයේ සිනමා වීරයෙක් හෝ වීරවරියක් වීමේ සිහිනයයි. බොලිවුඩයේම පවුලක පුතෙකු නොවේනම් බොලිවුඞ් සිනමාවේ වීරයෙකු බවට පත්වීම තහනම් සිහිනයක් පමණයි. බොලිවුඞ් පවුලක දියණියක හෝ රූ රැජිණ තරඟයක ජයග්‍රාහිකාවක් බවට පත් නොවුණොත් වීරවරියක බවට පත්වීම සිහිනයක් පමණයි. ඒ තහනම් සිහිනය දැක සාර්ථක වූ උදවිය ඉන්නේ අතොලොස්සයි.


අපි කතාකරන්නේ ඒ තහනම් සිහිනය දැක සාර්ථක වූ කංගනා රනවුත් නම් වූ ඇය ගැනයි. ඇය සිහිනය හැබෑ කරගැනීමෙන් පසුව නිහඬව හිටියේ නැහැ. ඒ වෙනුවට බොලිවුඞ් සිනමාවේ පවුල්වාදයට එරෙහිව ප්‍රමුඛතම හඬ නඟන්නා බවට ඇය පත්වුණා.


අද බොලිවුඞ් සිනමාවේ සිටින ප්‍රධාන නිළියන් අතර දක්ෂතමයා ඇය බවට කිසි සැකයක් අපට නම් නැහැ. ඇගේ බෑගයේ ඉන්දීය ජාතික සම්මාන තුනක් සහ ෆිල්ම්ෆෙයා සම්මාන පහක් තිබෙනවා. ෆිල්ම්ෆෙයා සම්මාන කෙසේවෙතෙත් ඉන්දීය ජාතික සම්මානයක් ලැබීම පහසු නැහැ. ඉන්දියාවේ භාෂා 29ක සිනමා කර්මාන්තවලින් වසරකට චිත්‍රපටි 1600ක් පමණ නිෂ්පාදනය වෙනවා. ඒ සියලු නිර්මාණ ඉන්දීය ජාතික සම්මානයට තරඟ කරනවා.


බොහෝවිට බොළඳ නිර්මාණ නිපදවන බොලිවුඩයට ජාතික සම්මාන ලැබෙන්නේ අඩුවෙන්. කාජල්, කරීනා, රාණි මුඛර්ජි, දීපිකා පදුකෝන් වැනි ප්‍රසිද්ධ රංගන ශිල්පිනියන් බොහෝදෙනෙක් එකදු ඉන්දීය ජාතික සම්මානයක්වත් දිනා නැහැ. ශ්‍රීදේවි ඒ සම්මානය දිනාගත්තේත් සිය අවසාන චිත්‍රපටියෙනුයි. එහෙව් සම්මාන උළෙලකදී තෙවරක් සම්මාන ලබන්නටත්, පිට පිට දෙවරක්ම සම්මානය ලබන්නටත් සමත්වූ කංගනා ගේ විශිෂ්ඨත්වය අමුතුවෙන් පෙන්විය යුතු නැහැ.


එහෙත් ඇගේ කතාව විශේෂ වෙන්නේ පහළ තැනක සිට ඉහළම තැනට ආ නිසා නොවෙයි. ඇය ඉහළට විත්, තනිව කරන හඬනැඟීම් නිසායි. කංගනා රනවුත්ගේ කේන්ද්‍රීය ගතිලක්ෂණය ලෙස ඇගේ ‘කෑගැසීම්’ සැලකිය හැකියි. බොලිවුඩයේ මෙන්ම ඉන් පිටත ඉන්දීය දේශපාලනයේ පවා තමන් දකින අඩුපාඩුවලට එරෙහිවිකෑගසන්නියක්’ ලෙස ඇය අද ප්‍රසිද්ධයි. ඇය පසුපස මාධ්‍යවේදීන් අද දුවන්නේ ඇය කාගේ හැසිරීමක් ඊළඟට ප්‍රශ්න කරනු ඇතිදැයි සොයන්නටයි.


අප සති ගණනාවකට පෙර දකුණු ඉන්දීය රංගන ශිල්පිනී නයනතාරා ගැන ලීවේ නයනතාරාගේ සටන් කලාව නම් මාතෘකාවෙන්. නයනතාරා දෙමළ කිසිවිටෙක ආන්දෝලනාත්මක සංවාදවලට මැදිහත්වුණේ නැහැ. ඇය පුරුෂාධිපත්‍යයෙන් පිරුණු සිනමාවක කාන්තා චරිත කේන්ද්‍ර කරගත් චිත්‍රපටිවල රඟපෑවා. ඇය ඒ රංගනයෙන් කැරැල්ලක් ගැසුවද, කිසිදා වචනවලින් ආවේග පිට කළේ නැහැ. කංගනා රනවුත්ගේ ප්‍රවේශය නයනතරාට සම්පූර්ණ ප්‍රතිවිරුද්ධ ආස්ථානයක් ගත්තා. කංගනා බොලිවුඩයේ පුරුෂ කේන්ද්‍රීය, පවුල් කේන්ද්‍රීය ආකල්පවලට සිනමා නිර්මාණවලින් මෙන්ම සම්මුඛ සාකච්ඡාවලින්ද අභියෝග කළා. කොටින්ම කීවොත් ඇය තමන්ගේ හිතේ තියෙන අදහස් මෙන්ම පීඩනයද නිර්භයව කෑගසා පිට කළා. එහෙත් ඇය කෑගසා පැමිණිලි කරමින් නිහඬව සිටියේ නැහැ. තම කටයුත්ත උපරිම ප්‍රමිතියෙන් යුතුව නිමකරන්නටද ඇය සමත්වුණා.


ඇය බොලිවුඩයට එන්නට හේතු වූ පසුබිම් කතාව වුව අපූරුයි. ඒ නිසාම ඇය මේ වෙද්දී තමන්ගේම කතාව චිත්‍රපටියක් ලෙසත් නිෂ්පාදනය කරමින් ඉන්නවා. හිමාචල් ප්‍රදේශ්වල සිටි ඇය සිනමා නිළියක් වන්නට මුම්බායි වෙත පැමිණ තිබුණා. මුල් කාලයේදී සිය පියාගේ වියෙහි පුද්ගලයෙකු අතින් ලිංගික හිංසනයට ලක්වෙන්නට ඇයට සිදුව තිබුණා. අසීරුවෙන් සිනමාවේ ඉඩක් හොයාගන්නට ඇයට හැකියාව ලැබී තිබුණා.


අවුරුදු 13කට පෙර ගැන්ග්ස්ටර් චිත්‍රපටියෙන් ඇය සිනමාවට ආවා. කංගනා රනවුත් සිනමාවට බාහිරින් පැමිණි කඩාවැටීමට නියමිත තරුවක් පමණක් වුණා. ඇගේ උච්චාරණයේ අඩුපාඩු නිසා ඇයව විහිළුවක් වුණා. ඇයට ඉංග්‍රීසි කතාකළ නොහැකි නිසා ඇයව හෑල්ලුවට ලක් කළා. විදෙස් රටවල ඉගෙනුම ලබා ඉන්දියාවට පැමිණි ජනප්‍රිය රංගන ශිල්පිනියන් හා ලෝක රූ රැජිණ තරඟ දිනූ රංගන ශිල්පිනියන් මෙන් නොව ඇගේ ඇඳුම් විලාසිතා විහිළුවට ලක්වුණා. ඇය රඟපෑ වික්ෂිප්ත කාන්තාවන්ගේ චරිත ඇගේ ජීවිතයේම දිගුවක් බඳු වුණා.


එහෙත් දශකයක් ඇතුලත ඇය බොලිවුඞ් සිනමාව පාලනය කරන්නට පටන්ගත්තා. ඇයට විවිධාකාර උච්චාරණයන් සැහැල්ලුවෙන් අනුකරණය කළ හැකිවුණා. ඉංග්‍රීසිය ඉගෙනගත් ඇයට ඉංග්‍රීසි භාෂාවෙන් ජාත්‍යන්තර සමුළු අමතන්නට ආරාධනා අද ලැබෙනවා. ඇඳුමක් හරියට අඳින්නේ නැතැයි විහිළුවට ලක්වූ ඇය අද ඉන්දියාවේ ජනප්‍රියම විලාසිතා වෙළඳනාමවල සන්නාම ප්‍රවර්ධකයා ලෙස කටයුතු කරනවා. ගෝලීය විලාසිතා අයිකනයක් ලෙස ඇයව පිළිගැනෙනවා.
ෆැෂන් චිත්‍රපටියේ ඇය රඟපෑ සහාය චරිතය වෙනුවෙන් ඇය මුලින්ම ඉන්දීය ජාතික සම්මානය ලබා තිබුණා. එයින් පසුව වුව ඇයව දෙවැනි ගණයේ රංගන ශිල්පිනියක් ලෙස සැලකුවා. දැවැන්ත සිනමා නිර්මාණවල ප්‍රධාන චරිත ලබාදෙන්නට තරම් ඇයව කිසිවෙක් විශ්වාස කළේ නැහැ. අප ඉහත කී පරිදි ඇයව හෑල්ලුවට ලක් කළා. එහෙත් ඇය තමන්ගේ අඩුපාඩු උපරිමයෙන්ම නිවැරදි කරගත්තා. 2014 දී ක්වීන් චිත්‍රපටිය සාර්ථක වෙද්දී ඇය කවුදැයි බොහෝදෙනෙක් හඳුනාගත්තා. ඇය ප්‍රධාන චරිතය රඟපෑ ක්වීන් චිත්‍රපටිය වෙළඳපොලේදී සාර්ථක වූ අතරේම ඉන්දීය ජාතික සම්මානයත් ඇය වෙත ගෙනාවා. අතිවිශිෂ්ඨ රංගනය තුළින්ම චිත්‍රපටියක ඉරණම වෙනස් කිරීමේ බලයක් ඇති ශිල්පිනියක් ලෙස ඇයව ඇගයීමට ලක් වුණා.


ඉන්පසුව 2015 වසරේදී ඇය තනු වෙඞ්ස් මනු දෙවැනි චිත්‍රපටියේ ද්විත්ව චරිතයක් රඟපෑවා. ඒ චරිත දෙක එකිනෙකට කෙතරම් වෙනස්දැයි කිවහොත්, චරිත දෙක රඟපෑවේ එකම ශිල්පිනියදැයි ප්‍රේක්ෂකයන් පවා විස්මයට පත්වෙන තරම් විශිෂ්ඨ වුණා. ඒ නිසාම ඇය පිට පිට දෙවැනි වතාවටත් ඉන්දීය ජාතික සම්මානය ලැබුවා. තනු වෙඞ්ස් මනු දෙවැනි චිත්‍රපටිය කාන්තා ප්‍රධාන චරිතයක් සහිත සාර්ථකම බොලිවුඞ් චිත්‍රපටිය ලෙස බොක්ස් ඔෆිස් වෙළඳපොලේදි වාර්තා තැබුවා. අද ඇගේ චිත්‍රපටි බලන්නට සෙනඟ ඇදෙන්නේ ඇය ජනප්‍රිය පවුලක දියණියක් වන නිසාවත්, ඇගේ කලවා යුගලය බලන්නටවත් නෙවෙයි. ඒ වෙනුවට රංගන ශිල්පිනයක් ලෙස ඇය ගොඩනඟාගත් ගෞරවය මත ප්‍රේක්ෂකයන් සිනමාහල්වලට ඇදෙන්නට වුණා.


ඒ ජනප්‍රියත්වය ලබා බොලිවුඩයේ ඉදිරිපෙළ අසුන් ලබාගත් පසුව නිහඬව සිටීමේ හැකියාවක් ඇයට තිබුණත්, ඇය කෑගැසීමේ පුරුද්ද අත්හැරියේ නැහැ. ඉන්දියාවට ‘මීටූ‘ ව්‍යාපාරය එද්දී ඇය එහි ප්‍රමුඛ මුහුණක් බවට පත්වුණා. ක්ෂේත්‍රයේ පිරිමින් අතින් තමන්ට පෞද්ගලිකව සිද්ධවූ අසාධාරණයන් මෙන්ම, වෙනත් අයට සිදුවූ අසාධාරණයන් ගැනත් ඇය හඬනැඟුවා. කාන්තාවන් වැඩි පිරිසක් සමඟ සම්බන්ධතා පැවැත්වීම පිරිමින්ට වීරකමක් වෙද්දී, ගැහැණුන්ට එය චරිත ඝාතනයක් වීම ගැන ඇය ප්‍රශ්න කළා.


සියල්ලට වඩා ඇය බොලිවුඩයේ පවුල්වාදයට එරෙහිව දියත් කළ සටන ජනප්‍රිය වුණා. කරන් ජෝහාර්ගේ ජනප්‍රිය රූපවාහිනී වැඩසටහන වන කොෆී විත් කරන් වැඩසටහනකදී ඇය පවුල්වාදය ගැන චෝදනාවක් කරන් ජෝහාර්ට එල්ලකළා. එය මුලින් කරන් ජෝහාර් හා කංගනා අතර පෞද්ගලික මත ගැටුමක් බවට පත්වුණත්. කල්යද්දී සමාජ මාධ්‍යවලින් පවුල්වාදයට එරෙහිව කංගනා සමඟ එක්ව හඬනඟන විශාල හමුදාවක් බිහිවුණා. මේ දක්වාම පියවරුන්ගේ ජනප්‍රියත්වය සමඟ සිනමාවට එන හැකියාවක් නැති දරුවන්ට එරෙහිව හඬක් නැඟෙන්නේ කංගනා ඇවිලූ ගිනිපුපුර නිසායි.


මේ වෙද්දී කංගනා චිත්‍රපටි අධ්‍යක්ෂවරියක් වීමට සැලසුම් හදනවා. ඇය 2018 වසරේ තිරගත වූ ‘මනිකර්ණිකා‘ චිත්‍රපටියේදීත් සම අධ්‍යක්ෂවරියක් ලෙස කටයුතු කළා. ඒ සියල්ල සමඟ කංගනා බොලිවුඞ් සිනමා සිහින දකින්නන්ගේ වීරවරියක්ව සිටිනවා. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි