No menu items!
19.9 C
Sri Lanka
29 March,2024

පවුල නැත්නම් ධනුෂ් නැහැ

Must read


අවුරුදු 35 වෙද්දී ෆිල්ම්ෆෙයා සම්මාන හතක් ලබාගැනීම පමණක් නොවෙයි, වයස අවුරුදු 35 වෙද්දී රංගන ශිල්පියෙක්, නිෂ්පාදකවරයෙක්, චිත්‍රපටි අධ්‍යක්ෂවරයෙක්, ගායකයෙක්, ගී පද රචකයෙක් හා තිර පිටපත් රචකයෙක් ලෙස සාර්ථක වීම අපූරුයි. ඒ සියල්ල කළ ඔහු, වෙන්කටේස් ප්‍රභූ කස්තුරිරාජා යන නමෙන් උපත ලබා ‘ධනුෂ්’ යන නමෙන් දෙමළ සිනමා අහසට පැමිණියා. ධනුෂ් ඉන්දීය ජාතික සම්මානය අඩුම වයසකදී ලද රංගන ශිල්පියායි. හොලිවුඞ් චිත්‍රපටියක ප්‍රධාන චරිතය රඟපෑමේ ගෞරවයද 2018 දී ඔහු හිමිකරගත්තා.


කෙසේ වෙතත් මෙය ධනුෂ් ලැබූ ජයග්‍රහණ ලැයිස්තුගත කිරීමේ අරමුණෙන් ලියන්නට පටන්ගත් සටහනක් නොවෙයි. ධනුෂ් නම් දැවැන්ත චරිතයට සමඟ සිටින ධනුෂ්ගේ පවුල ගැන මොහොතක් කතාකරන්නට ලියූවක්. පවුල නැත්නම් අප සියළුදෙනාම දන්නා ධනුෂ් නැහැ. වෙන්කටේෂ් ප්‍රභූ නම් අතිවිශිෂ්ඨ කෝකියෙක් ගැන සුළු පිරිසක් විතරක් දැනගෙන ඉන්නට තිබුණා. අනෙක් පැත්තෙන් පවුලේ අය කියන විදියට ධනුෂ් නැත්නම් පවුල නැහැ.


2019 ආනන්ද විකටන් සම්මාන උළෙලේදී ධනුෂ් විසින් හොඳම නළුවාට හිමි සම්මානය ලබාගත්තා. 2018 වර්ෂයේ හොඳම සිනමා රංගනය ‘වඩ චෙන්නායි’ චිත්‍රපටියේ ධනුෂ්ගේ රංගනය බවට විවාදයක් තිබුණේ නැහැ. කෙසේ වෙතත් සම්මානය ලද මොහොතේ ඉතාම සුන්දර අවස්ථාවක් දකින්නට ලැබුණා. ධනුෂ් සම්මානය ලැබීමෙන් පසුව ඔහුගේ මව, පියා සහ සහෝදරියන් දෙපළ වේදිකාවට පැමිණියේ ධනුෂ්ව පුදුමයට පත් කරමින්. ඒ මොහොතේ පවුලේ අය ධනුෂ් ගැන කතාකළා. එය සංවේදී අවස්ථාවක් වුණා.


ධනුෂ්ගේ පියා කස්තුරිරාජා සුළු පරිමාණයේ චිත්‍රපටි අධ්‍යක්ෂවරයෙක්. මව ගෘහණියක්. එක් සහෝදරියන් දෙදෙනාම වෛද්‍යවරියන්. ධනුෂ්ගේ අයියා දැවැන්ත චිත්‍රපටි අධ්‍යක්ෂවරයෙක් වන සෙල්වරාඝවන්. ඔහු මේ අවස්ථාවට පැමිණ තිබුණේ නැහැ.


‘සිනමාවෙ හිටපු ගොඩක් අය මට පුතෙක් කියල කෙනෙක් ඉන්න බව දැනගත්තෙ තුල්ලවදෝ ඉලමෙයි චිත්‍රපටිය බැලුවාට පස්සෙ. මෙයා හීරෝ කෙනෙක් වෙන්නෙ කොහොමද. මේ ඇඟත් එක්ක කියලා තමයි ලිව්වෙ.’ ධනුෂ්ගේ තාත්තා ධනුෂ් ගැන කතාකරන්න පටන්ගත්තේ එහෙම.
ධනුෂ්ගේ අම්මා කතාකරන්න පටන්ගත්තෙ සිනමාව ගැන නෙවෙයි. ‘එයා ළමයි හතරදෙනෙකුගෙන් අන්තිමයා. පුංචි කෙනා. හැමෝම සතුටින් හිටියෙ එයා හින්දා. දැන් වුණත් මෙයා ගෙදර ආවාම පොඩි එකෙක් වගේ සෙල්ලම් කරනවා, බොරුවට ගහගන්නවා. මට තවම එයා පුංචි ළමයෙක්. ළමයි දෙන්නෙකුගෙ තාත්තා කෙනෙක් කියලා හිතන්නවත් බැහැ.’ ඇය කියනවා.


‘ඉන්දීය ජාතික සම්මාන උළෙලේදී ලොකු ලොකු අය ඇවිල්ලා සම්මාන අරගෙන යනවා. අපි ඉඳගෙන බලාගෙන ඉන්නවා කොහෙද අපේ කොල්ලා කියලා. අන්තිමේ පොඩි කොල්ලෙක් වගේ ඇවිල්ලා සම්මානය ගත්තා. චෙන්නායිවලට එන්න සල්ලි නැතිව හිටපු කාලයක් අපට තිබුණා. චෙන්නායිවල ඉඳගෙන එක රුපියලට දෙකට දුක්විඳපු කාලයක් තිබුණා. ජාතික සම්මානය ලැබුණ වෙලාවෙ ඒ කාලය මතක් වෙලා මගේ ඇහැට කඳුළු ආවා.’ තාත්තා නැවත කියනවා.


කස්තුරිරාජා, දැවැන්ත මුදලක් වියදම් කළ දැවැන්ත චිත්‍රපටි නිර්මාණය කළ අධ්‍යක්ෂවරයෙක් නෙවෙයි. එහෙත් ඔහු දෙමළ සිනමාවට කලාත්මක වටිනාකමක් එකතු කළ අධ්‍යක්ෂවරුන් සුළුතරයක් අතරින් කෙනෙක්. එසේ වුව කස්තුරිරාජාගේ පවුල නඩත්තු කරන්නට තරම් දැවැන්ත ආදායමක් ඔහුට තිබුණේ නැහැ. ඒ නිසාම ඔවුන් දැවැන්ත ආර්ථික අපහසුතා සමඟ ජීවත් වී තිබුණා. ඒ නිසාමදෝ ධනුෂ් සිනමා නළුවෙක් වෙන්නට කිසිම ආසාවකින් සිටි කෙනෙක් නෙවෙයි. ධනුෂ්ට තිබුණු සිරුරේ ප්‍රමාණය, හැඩය ආදිය නිසා සිනමා නළුවෙක් වුණත් පුංචි චිත්‍රපටි කිහිපයක රඟපෑම මිසක දැවැන්ත තරුවක් වීමට පසුබිමක් ධනුෂ්ට කොහෙත්ම තිබුණේ නැහැ. ඒ නිසා ධනුෂ්ගේ අයියා සෙල්වරාඝවන්, තමන් රචනා කළ පළවැනි චිත්‍රපටියේ රඟපාන්නට 16 හැවිරිදි කෙසඟ කොල්ලෙක් වූ ධනුෂ්ට කතාකරද්දී ඔහු එය ප්‍රතික්ෂේප කර තිබුණා. ධනුෂ් තුල්ලවදෝ ඉලමෙයි චිත්‍රපටියේ රඟපාන්න කැමති වුණේ අයියාගේ බලකිරීම් නිසායි. එලෙස අහම්බෙන් නළුවෙක් වූ ධනුෂ් අවසානයේදී දෙමළ සිනමාවේ අනාගත තරුව බවට පත්වුණා.


‘එයා චෙෆ් කෙනෙක් වෙන්න තමයි කැමැත්තෙන් හිටියෙ. ඒත් එයා කරන ඕනෑ දෙයක් තිතටම පර්ෆෙක්ට් විදියට කරන්න මහන්සි වුණා. ඒ නිසා අපි හිතුවෙ එයා අතිවිශිෂ්ඨ චෙෆ් කෙනෙක් වේවි කියලා. සිනමාවට ඒවි කියලා මම හිතුවෙ නැහැ. දැන් හැමතැනම එයා ගැන හැමෝම කතාකරනවා. සෝෂල් මීඩියාවල, ටීවීවල එයා ගැන කතාකරනවා. ඒත් එයා ගැන කතාකරන්න අවස්ථාවක් අපට ලැබිලාම නැහැ. මම බොහොම ආඩම්බරයෙන් කියනවා අර ඉන්නෙ මගේ මල්ලි. මම ඩොක්ටර් කෙනෙක් වුණත් මම ජීවිතයෙ මොනවා කළත්, ධනුෂ්ගෙ අක්කා කියන එක තමයි මගේ පළවැනි අයිඩෙන්ටි එක. ඒක මට දෙවියන් දීපු ලොකු වරමක්.’ ධනුෂ්ගේ අක්කා ආනන්ද විකටන් වේදිකාවේදී එසේ කියද්දී එය අතිශයින් සංවේදී අවස්ථාවක්ව තිබුණා.
‘මෙච්චර ලොකු තරුවක් වෙයි කියලා ඒ කාලයෙ දැනන් හිටියෙ නැහැ. මෙයා දෙමළ සිනමාවෙන් හින්දි සිනමාවට ගියා. දැන් එයා ඉංග්‍රීසි චිත්‍රපටිත් රඟපානවා වුණත් එයා ඒ කිසිදෙයක් හොයාගෙන ගියේ නැහැ. ඒ සේරම එයා ගාවට හොයාගෙන ආවා.’ කස්තුරිරාජා කී කතාව ඇත්තක් බව පෙනෙන්නේ ධනුෂ්ගේ අතීතය දෙස බලද්දීයි.
ධනුෂ්ගේ සිනමා ජීවිතය කියන්නේත් ඔහුට පවුලෙන් ලද ත්‍යාගයක්. ධනුෂ්ගේම අයියා සහ තාත්තා නැතිනම් ධනුෂ්ව කිසිවෙක් සිනමා වීරයෙකුට තෝරාගන්නෙ නැහැ. සෙල්වරාඝවන් ලියූ අපූරු චිත්‍රපටි පිටපත් ධනුෂ්ගේ සිනමා දිවියේ ආරම්භය ඉතාම පැහැදිළිව සටහන් කර තබන්නට හේතුවුණා.


පෙර කී විදියට ධනුෂ් සිනමාවට ආවේ වයස අවුරුදු 17දී තුල්ලවදෝ ඉලමෙයි චිත්‍රපටියෙනුයි. තුල්ලවදෝ ඉලමෙයි අධ්‍යක්ෂණය කළේ ධනුෂ්ගේ පියා කස්තුරිරාජා සහ ධනුෂ්ගේ අයියා සෙල්වරාඝවන්. පිටපත ලීවේ සෙල්වරාඝවන්. මේ චිත්‍රපටිය නරඹන්නට තරුණයන් විශාල වශයෙන් ආවා. බොක්ස් ඔෆිස් ජනප්‍රියත්වයක් මේ චිත්‍රපටියට ලැබුණේ නැතත් ස්ලීපර් හිට් එකක් ලෙස සාර්ථක වුණා. විචාරකයන් චිත්‍රපටියට හොඳ ප්‍රතිචාර දැක්වුවා.
ධනුෂ්ගේ අයියා සෙල්වරාඝවන් විසින්ම නිර්මාණය කළ ධනුෂ් රඟපෑ දෙවැනි චිත්‍රපටිය වන කාදල් කොන්ඩෙන් චිත්‍රපටිය අතිවිශිෂ්ඨ සිනමා කෘතියක් වුණා. මෙය නිල වශයෙන් සෙල්වරාඝවන් අධ්‍යක්ෂණය කළ පළවැනි චිත්‍රපටිය. ඒ චිත්‍රපටියේදී ධනුෂ් වසරේ විශිෂ්ඨම රංගනයක් ඉදිරිපත් කරද්දී සුපර්හිට් සාර්ථකත්වයක් ලැබුවා. එතැනින් පසුව ධනුෂ් සිනමාවට එන්නට අදිමදි කළ හේතු එකින් එක මැකී ගියා. කෙසඟ කොල්ලෙක් වුව ධනුෂ් ‘සිනමා මැටීරියල්’ එකක් වුණා.


සිනමා තිරය මත ධනුෂ්ට තිබුණු ජවය තේරුම් ගන්නට 2003 තිරගත වූ තිරුඩා තිරුඩි චිත්‍රපටියේ ‘මන්මදරාසා’ ගීයේ වීඩියෝව පමණක් නැරඹීම ප්‍රමාණවත්. තිරුඩා තිරුඩි ඒ වර්ෂයේදී දෙවැනි සාර්ථකම චිත්‍රපටිය බවට පත්වුණේ අවුරුදු 18 ධනුෂ්ව දෙමළ ප්‍රේක්ෂකයන්ගේ සිත්වල රඳවමින්. එතැන් පටන් අධ්‍යක්ෂවරුන් දැවැන්ත පිටපත් රැගෙන ධනුෂ්ව සොයා ආවා. හොලිවුඞ් චිත්‍රපටියක් පවා ධනුෂ්ව සොයා ආවා. කස්තුරි රාජා කීවේ ඇත්ත. අධ්‍යක්ෂවරුන් ධනුෂ්ව සොයා ආවා. එහෙත් ඒ අධ්‍යක්ෂවරුන්ට හුදු රංගන ශිල්පියෙක් නොවී, උපරිමය ලබාදෙන්නට ධනුෂ් විශිෂ්ඨයෙක් වුණා.
කලෙක කමල් හසන් රඟපෑ ජනප්‍රිය කලාත්මක චිත්‍රපටි හා රැජිණිකාන්ත් රඟපෑ ජනප්‍රිය මසාලා චිත්‍රපටි යන මහා කණු දෙක මත ගොඩනැඟුණු දෙමළ සිනමාව හෙට දිනයේදී තනිව තමන්ගේ කර මත තබාගෙන යා හැකි බව ධනුෂ් පෙන්වා හමාරයි. දෙමළ සිනමාවේ අනාගත කමල්, අනාගත රැජිණි යන දෙදෙනාම තමන් බව ධනුෂ් පෙන්වා හමාරයි. ධනුෂ්ගේ පවුල නොතිබුණානම් ඒ විශිෂ්ඨත්වය අද අප දෑස් ඉදිරියේදී දකින්නට නොලැබෙන්නත් ඉඩ තිබුණා. ඇතැම් මිනිසුන්ට සාර්ථකත්වය පවුල නිසාම අහිමි වෙනවා. ඒත් සමහරුන්ට සාර්ථක වෙන්නට පවුලක් නැතිවම බැහැ. ධනුෂ් දෙවැනි වර්ගයට අයිතියි.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි