20.5 C
Sri Lanka
19 August,2022

ජනාධිපති ක්‍රමය තියාගන්න පොහොට්ටුව කැමතියි

Must read


මහින්ද රාජපක්ෂ විධායක ජනාධිපති ක්‍රමය අහෝසි කිරීමට එකඟ බව පවසා තිබුණද, මාධ්‍ය වාර්තා කරන ආකාරයට නුදුරේදී විධායක ජනාධිපති ක්‍රමය අහෝසි කරන බව ප්‍රකාශ කර නොමැති බවත්, මේ මොහොතේ විධායක ජනාධිපති ක්‍රමය අහෝසි කිරීමට ඒකාබද්ධ විපක්ෂයේ ප්‍රබල නායකයන් සියලුදෙනාම පාහේ විරුද්ධ බවත් අනිද්දා සමඟ අදහස් දැක්වූ ඒකාබද්ධ විපක්ෂයේ නායකයෝ කිහිපදෙනෙක් කීහ.

විධායක ජනාධිපති ක්‍රමය අහෝසි කිරීම ගැන හිටපු ජනාධිපති මහින්ද රාජපක්ෂගේ මතය පිළිබඳව අප කළ විමසීමකදී ශ්‍රී ලංකා පොදුජන පෙරමුණේ බැසිල් රාජපක්ෂ පැවසුවේ විපක්ෂ නායක මහින්ද රාජපක්ෂ විධායක ජනාධිපති ක්‍රමය අහෝසි කිරීමට එකඟ වුවද, ඒ සමඟම සිදුවිය යුතු තවත් වෙනස්කම් කිහිපයක්ම පෙන්වා දී තිබෙන බවත්, මහමැතිවරණයක් හෝ ජනාධිපතිවරණයක් පැවැත්වීමට කලින් විධායක ජනාධිපති ක්‍රමය අහෝසි කිරීමට එකඟ නොවන බව මහින්ද රාජපක්ෂ ප්‍රකාශ කර ඇති බවත්ය.

මේ වෙද්දී විධායක ජනාධිපති ක්‍රමය අහෝසි කිරීමට ජනවරමක් නොමැති බවත්, අවසාන වරට ලැබුණු ජනවරමද අහෝසි වී තිබෙන බවත් මහින්ද රාජපක්ෂ කියා ඇතැයි වැඩිදුරටත් ඔහු කීය. ඒ නිසා මහමැතිවරණයකින් හෝ ජනාධිපතිවරණයකින් මේ සඳහා ජනවරමක් ලැබිය යුතු බවත්, ඊට අමතරව මැතිවරණ ක්‍රමය හා බලය බෙදීමේ ක්‍රමය ඇතුළු ව්‍යවස්ථාවේ අනෙකුත් ප්‍රතිපාදනද විධායක ජනාධිපති ක්‍රමයට ගැළපෙන ආකාරයට වෙනස්විය යුතු බවත් මහින්ද රාජපක්ෂ ප්‍රකාශ කර ඇතැයි බැසිල් රාජපක්ෂ මහතා කීය. මහින්ද රාජපක්ෂගේ මෙම ස්ථාවරයන් වෙනස් වී ඇතැයි තමන් දැනුවත්ව ප්‍රකාශයක් කර නොමැති බවද ඔහු කීය.

මීට අමතරව විධායක ජනාධිපති ක්‍රමය අහෝසි කිරීම පිළිබඳව අදහස් දැක්වූ පාර්ලිමේන්තු මන්ත්‍රී වාසුදේව නානායක්කාරද ඉහත අදහස් පෙන්වාදුන්නේය. ඊට අමතරව, මේ මොහොතේ දේශපාලන බලතුලනය පවත්වාගෙන යෑම සඳහා විධායක ජනාධිපති ක්‍රමය පැවතිය යුතු බවද ඔහු කීය. තමන් විධායක ජනාධිපති ක්‍රමය අහෝසි කිරීමට එකඟ වුව මේ මොහොතේ එය කළ නොහැකි බව වාසුදේව නානායක්කාර මන්ත්‍රීවරයා කීවේය. මහින්ද රාජපක්ෂ විසින් විධායක ජනාධිපති ක්‍රමය අහෝසි කිරීමට සැලසුම් කර ඇතැයි පළවෙන වාර්තා ගැන තමන් කිසිවක් නොදන්නා බවද ඔහු කීය.

මහින්දානන්ද අලුත්ගමගේ ඇතුළු ඒකාබද්ධ විපක්ෂයේ තවත් මන්ත්‍රීවරු කිහිපදෙනෙක්ම අනිද්දා සමඟ අදහස් දක්වමින් ඉහත අදහස් තහවුරු කළෝය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි