පසුගිය ජනවාරි 16 වන දින මරදාන සමාජ හා සාමහික කේන්ද්‍රයේ පැවති මාධ්‍ය හමුවකදී සිරකරු අයිතිවාසිකම් සුරැකීමේ කමිටුව ආන්දෝලනාත්මක වීඩියෝවක් මාධ්‍යයට මුදා හැරීයේය. මෙම වීඩියෝව සමග සමාජය මාධ්‍යයේ විශාල කථාබහක් ඒ පිළිබඳව ඇතිවිය. මෙම වීඩියෝවන් මුහුණු පොතේ සංසරණය වන්නටද වැඩිවෙලාවක් ගියේ නැත. ඒ සමගම ඇවිළුණු කතාබහද සංවාදයන්ද බොහෝය. ඒ සමගම පොහොට්ටු ප්‍රේමී මහින්දවාදීන්ද කලබලවන්නට විය. එම කලබලය කෙතරම්ද යත්, ඔවුන්ට එම වීඩියෝවන් තුළ සටහන් වී තිබෙන දින වකවානු පවා කියවා ගන්නට නොහැකි විය. ඔවුන් ඒ දින වකවානුද නොතකා වහා වහා මුහුණු පොතේ සටහන් තැබුවේ වැලිකඩ බන්ධනාගාරය ගැන කථා කළ ප්‍රජාතන්ත්‍රවාදීන් දැන් කෝ කොහිද කියාය. ඔවුන්ට ප්‍රජාතන්ත්‍රවාදය සහ වැලිකඩ ඝාතන මතකයට ආ මේ වීඩියෝවන් තුළ අන්තර්ගත වූයේ මොනවාද? සොයා බලමු.
වැලිකඩ මතකය
දිනය 2012.11.09 වෙනිදාය. ඒ රැඳවියන් 27 දෙනෙකු ලිස්ට් එකක අනුපිළිවෙලට ඉදිරියට කථා කරමින් වෙඩි තැබූ ඒ නින්දිත ඝාතන වැලට පාර කැපූ දවසය. එලෙස සිරකරුවන් 27 දෙනෙකු වෙඩි තබා මරා තබන්නේ ලංකාවේ බන්ධනාගාර ඉතිහාසයට මකා දැමිය නොහැකි කළු පැල්ලමක් එක් කරමින්ය. එම ඝාතනය සිදුවන්නේ මහින්ද රාජපක්ෂ ජනාධිපති ධුරය, ගෝඨාභය රාජපක්ෂ ආරක්‍ෂක ලේකම් ධුරයේද දරන සමයකදීය. ඒ නිසාම මෙම ඝාතන වැල පිළිබඳව පරීක්‍ෂා කල අපරාධ පරීක්‍ෂණ දෙපාර්තමේන්තුවද, එවක බන්ධනාගාරය භාරව සිටි අමාත්‍යවරයා වන චන්ද්‍රසිරි ගජධීර පත්කළ කමිටු දෙකද, මානව හිමිකම් කොමිෂමද, පරීක්‍ෂණ කළත්, කිසිදු සාධාරණයක් වින්දිතයින්ට හිමි නොවුණි. ඒ වෙනුවට ඒ සියලු පරීක්‍ෂණ වාර්තා අතුරුදන් විය. ඒවාට වුණ දේ දන්නේ දෙවියෝ පමණි. එහෙත් එම තත්ත්වය තුළ වුවත් එවක සමාජයේ පැතිරුණු ජනප්‍රිය කථාබහ වූයේ මෙම සංහාරය පිටුපස සිටින්නේ ආරක්‍ෂක ලේකම්වරයා බවය. ඉන් පසුව යහපාලනය පැමිණි පසු අමාත්‍ය විජයදාස රාජපක්ෂ පත් කළ කමිටුව මේ සංහාරය පිළිබඳව සක්‍රීයව කරුණු සොයා බැලුවේය. 2015 ජනවාරියේ පත් වූ එම කමිටුව සිය කාර්යය අවසන් කරමින් අවසන් වාර්තාව අගමැති රනිල් වික්‍රමසිංහට සහ අමාත්‍ය විජයදාස රාජපක්‍ෂට 2015 ජුනි 09 දින භාරදෙන්නේය. ඉන්පසු බොහෝ කලකට එම වාර්තාව අතුරුදන් වන්නේය. ඒ රනිල් වික්‍රමසිංහට සහ විජයදාස රාජපක්‍ෂට, රාජපක්ෂ පවුල සමග තිබෙන සමීප ගණුදෙනු නිසාය. දැන් මෙම වාර්තාවේ කරුණු සියල්ලම පාහේ සමාජ ගතවී අවසන්ය. එයින් අනාවරණය වන කරුණු කියන්නේ එම සංහාරයට අණදී ඇත්තේ ගෝඨාභය රාජපක්ෂ බවය. මේ වනවිට මෙම සංහාරය පිළිබඳව අපරාධ පරීක්‍ෂණ දෙපාර්තමේන්තුවද පරීක්‍ෂණයක් කරමින් තිබෙන්නේය. එම පරීක්‍ෂණයෙන් අනාවරණය වන තොරතුරුද කියන්නේ මෙම සංහාරයේ වැඩි වගකීම ගෝඨාභය රාජපක්‍ෂගේ උරමත බවය. තත්ත්වය මෙසේ වුවත් වැලිකඩ සංහාරයට මුල් වුවායැයි සැකකෙරෙන මේ පුද්ගලයා දැන් කියන්නේ තමන් මිළඟ ජනාධිපතිවරණයට තරග කරන්නට සූදානම් බවය. මෙම සූදානම් ප්‍රකාශ සමග පස්වනක් ප්‍රීතියෙන් පිනාගොස් සිටින රාජපක්‍ෂවාදීන් අගුණුකොළ පැලැස්ස බන්ධනාගාර විඩීයෝව පැමිණි විට උඩ පැන වැලිකඩ ගැන කෑ ගැසූ ප්‍රජාතන්ත්‍රවාදීන්යැයි හඬ තලන්නේ මේ සිද්ධිය මතින් වැලිකඩ සිදුවීම තනුක කර චූදිත තම නායකයා රටේ මීළඟ ජනාධිපති කිරීම සඳහාය. එහෙත් ඔවුන්ගේ මේ හදිස්සියම ඔවුන්ට බූමරංගයක් වී ඇත.
අගුණුකොළපැලැස්සේ සිද්ධිය
සිරකරු අයිතිවාසිකම් සුරැකීමේ කමිටුව මාධ්‍යයට ඉදිරිපත් කළ වීඩියෝ තුළ තිබුණේ මොනවාද? එහි තිබුණේ 2018.11.22 දිනට අදාළ අගුණුකොළපැලැස්සේ බන්ධනාගාරයේ එළිමහනේ සීසීටිවි දර්ශනයන්ය. එම දර්ශනයන්ට අනුව පෙනෙන්නේ රැඳවියන් 60කට ආසන්න පිරිසක් උදෑසන අටත්, නවයත් අතර එළිමහනට ගාල්කර අමානුෂික ලෙස බැටන් පොලුවලින් සහ අතින් පයින් පහර දෙන බන්ධනාගාර නිලධාරීන්ගේ හැසිරීම්ය. මෙම පහරදීමෙන් බොහෝ දෙනෙකුට තුවාල සිදුවී ඇත. එම තුවාලකරුවන් වෙනත් බන්ධනාගාර තුළට මාරු කර යවා ඇති බව දැනගන්නට ලැබේ. මෙම සැලසුම් සහගත ප්‍රහාරයට ප්‍රථම බන්ධනාගාරයේ විදුලිය විසන්ධි කර ඇති බව දැනගන්නට ලැබේ. ඒ එළිමහනේ සවිකර තිබෙන කැමරා ක්‍රියාත්මක නොවීම සඳහාය. එහෙත් එම කැමරා සතු බැටරි බලයෙන් ඒවා ක්‍රියාත්මක වී ඇත. ඒනිසා මේ බිහිසුණු ප්‍රහාරය එහි සටහන් වී ඇත. “සිරකරුවන්ද මනුෂ්‍යයෝය” අපි කථාවට කියන්නේ එසේය. එහෙත් සිරකරුවන්ට සැලකීම සඳහා අපි අන්තර්ජාතිකව එකඟ වී ඇති අවම ප්‍රමිතිය හෝ ආරක්ෂා කරගන්නට මහන්සි වන්නේ නැත. ඒ නිසා නොයෙක් වැරදි සඳහා සිරගතවන සිරකරුවන්ට බන්ධනාගාර නිලධාරීන් සලකන්නේ අමානුෂික ලෙසය. එය මෙම වීඩියෝවද තහවුරු කරයි.
බිහිසුණු ප්‍රහාරයේ මුල
මෙම බිහිසුණු ප්‍රහාරයේ මුල 2018.10.21 වන දින බන්ධනාගාරයේ පැවති උද්ඝෝෂණයේ දක්වා දිවෙන බව ප්‍රකාශවේ. එම උද්ඝෝෂණයට හේතුවී තිබෙන්නේ රැඳවියන් බැලීමට බන්ධනාගාරයට පැමිණෙන පුද්ගලයින් නිරුවත් කර අමානුෂික ලෙස කරන පරික්‍ෂාවය. මෙම පරික්‍ෂාව කරන්නේ විශේෂ කාර්ය බලකාය විසිනි. “මෙහෙමයි මේක වෙන්නේ මෙතන මෙහෙම ආමනුෂික විදියට පරීක්‍ෂා කිරීම් සිදුවෙන කොට රැඳවියන්ට ඒ ගැන දැනගන්න ලැබෙනවා. ඒ ඔවුන්ව බලන්න එන අයගෙන්. ඊට පස්සේ මේ ගැන රැඳවියෝ බන්ධනාගාර අධිකාරි සිරිදත් ධම්මිකට පැමිණිලි කරනවා. එතකොට මිනිහා කියන්නේ මේක එස්ටීඑෆ් වැඩක් උඹලා කැම්පස් ළමයි කරන දෙයක්වත් කරලා බලපන් කියලා.” සිරකරු අයිතිවාසිකම් සුරැකීමේ කමිටුවේ ලේකම් සුදේෂ් නන්දිමාල් සිල්වා මෙම උද්ඝෝණයේ හේතුව සහ මෙම නින්දිත ප්‍රහාරයේ සුලමුල හෙළිකරන්නේ එසේය. ඒඅනුව එම උද්ඝෝණයට අනුබල දෙන්නේද පසුව මෙම අමානුෂික ප්‍රහාර මෙහෙය වන්නේද වර්තමාන අගුණුකොළපැලැස්ස බන්ධාගාරයේ අධිකාරිවරයාය. “මෙයා මේ උද්ඝෝෂණය යන වෙලාවේ රැඳවියන්ට කියලා තිබෙනවා කැන්ටිම කඩන්න කියලා. ඒත් රැඳවියෝ ඒක කරලා නැහැ. මෙයා එදා ඉඳලා රැඳවියෝ එක්ක තරහයි. ඒකත් එක්ක තමයි පසුගිය කාලයේ මහින්ද රාජපක්ෂ හොර අගමැති විදියට පත් වුණාම මෙයා නීතිය අතට අරන් මේ විදියට රැඳවියන් මට්ටු කරන්න යන්නේ” මේ නන්දිමාල්ගේ හඬය. මේ කතාව අනුව මේ අමානුෂික ප්‍රහාරයේ මුලයන් සොයාගැනීම අමාරු නැත. දැන් කරුණු හොඳ හැටි අනාවරණය වී ඇත. දැන් විය යුත්තේ නිසි පරීක්‍ෂණයක් මතින් මෙම ප්‍රහාරයට සම්බන්ධ වූවන්ට දඬුවම් පැමිණ වීමය.
ඇමතිවරියගේ ප්‍රකාශය
“මේ අමානුෂික ප්‍රහාරයට බන්ධනාගාර අධිකාරි සිරිදත් ධම්මික කියන පුද්ගලයා එක්ක ප්‍රධාන ජේලර් ප්‍රදිප් වසන්ත කුමාර, ජේලර්වරුන් වන ඒ.ඩී.එස් සමරවීර, අජිත් කුමාර, අබේගුණවර්ධන වගේ බන්ධනාගාර නිලධාරීන් පහළොවකට වැඩි පිරිසක් දායකවෙලා තිබෙනවා. අපි මේ සිද්ධියේ වීඩියෝ මාධ්‍යයට දැම්මට පස්සේ ඇමතිතුමියගේ මාධ්‍ය ලේකම් මේ සම්බන්ධයෙන් ක්‍රියාත්මක වෙන්න කමිටුවක් දැම්මා කියලා නිවේදනයක් නිකුත් කරලා තියෙනවා. මේ කමිටුව ස්වාධීන නැහැ. මෙකේ ඉන්නේ බන්ධනාගාර නිලධාරීන්මයි. ඒ නිසා මේ කමිටුවෙන් කෙරෙන පරීක්‍ෂණ ගැන අපිට විශ්වාසයක් නැහැ. අපි කියන්නේ ස්වාධීන කමිටුවක් පත්කරලා වැරදිකරුවන්ට දඬුවම් දෙන්න කියලා.” යලිත් මේ ඇහෙන්නේ නන්දිමාල්ගේ හඬය. ඔවුන් ඉල්ලන්නේ මෙම රැඳවියන්ට සාධාරණයයි.
මෙම ප්‍රහාරය පිළිබඳව මාධ්‍ය නිවේදනයක් නිකුත් කරන අදාළ අමාත්‍ය තලතා අතුකොරළ මහත්මියගේ මාධ්‍ය ලේකම්වරයා කියන්නේ බන්ධනාගාර කොමසාරිස් තුෂාර උපුල්දෙනිය ප්‍රමුඛ ත්‍රිපුද්ගල පරීක්‍ෂණ කමිටුවක් මේ පිළිබඳව කරුණු සොයා බලන්නට ඇමතිවරිය විසින් වහාම පත්කර ඇති බවය. ඒ අනුව 2019.01.21 දිනට ප්‍රථම අදාළ වාර්තාව අදාළ පරීක්‍ෂණ කමිටුව විසින් අමාත්‍යවරියට ලබාදිය යුතු බවය. ඒ අනුව අමාත්‍යවරිය විසින් ඉදිරි පියවර ගනු ඇතිබව එම මාධ්‍ය වාර්තාව ප්‍රකාශ කරයි. එම කමිටු වාර්තාව රාජපක්ෂ සමයේ කමිටු වාර්තා මෙන් සැඟවී නොයනු ඇතැයි අපි බලාපොරොත්තු වෙමු. මෙම සිද්ධියට වාගේම වැලිකඩ සිද්ධියේද වගකිව යුතු සියල්ලන්ටම වහාම දඬුවම් ලබාදිය යුතුය. “ සිරකරුවෝද මනුෂ්‍යයෝය” එය ඔප්පු කළ හැක්කේ එවිට පමණි. අගුණුකොලපැලැස්ස බන්ධනාගාර අධිකාරිවරයාගෙන් මේ පිළිබඳ කරුණු විමසීමට දුරකථනයෙන් සම්බන්ධ කර ගැනීමට උත්සාහ කළද එය ව්‍යර්ථවිය.■
