මේ වනවිට රටේ අගමැතිවරුන් දෙදෙනෙකු සිටින බවත්, නීත්‍යනුකූල ආණ්ඩුව කුමක්දැයි අපැහැදිලි වීම නිසා රාජ්‍ය සේවකයන්ට රාජකාරි කිරීමට බාධා ඇතිවී තිබෙන බවත් නිසි ආණ්ඩුවක් නැතිව රාජ්‍ය සේවකයන් අර්බුදයක සිටින බවත් ඒකාබද්ධ විපක්ෂ පාර්ලිමේන්තු මන්ත‍්‍රී කුමාර වෙල්ගම අනිද්දා සමග පැවසීය.
මේ වනවිට රනිල් වික‍්‍රමසිංහ සහ මහින්ද රාජපක්ෂ යන දෙදෙනාම තමන් අගමැතිවරයායැයි කියමින් සිටින බවත්, නොවැම්බර් 14 වැනිදා පාර්ලිමේන්තුව කැඳවන අවස්ථාවේදී පාර්ලිමේන්තුවේ බහුතරයක් පෙන්වන තෙක් අගමැතිවරයා නිශ්චිතව තීන්දු කළ නොහැකි බවත් කුමාර වෙල්ගම මන්ත‍්‍රීවරයා පෙන්වාදුන්නේය. එතෙක් තමන් අගමැතිවරයායැයි ප‍්‍රකාශ කිරීමට රනිල් වික‍්‍රමසිංහ මහතාට සාධාරණ අයිතියක් ඇති බවද අප කළ විමසීමේදී ඔහු කීය.
මහින්ද රාජපක්ෂ අගමැති ධුරයට පත්කිරීම ව්‍යවස්ථා විරෝධී නොවන බවත්, ව්‍යවස්ථා විරෝධී නම් අධිකරණය ඉදිරියට යන ලෙසත් ඒකාබද්ධ විපක්ෂයේ නායකයන් විසින් කර ඇති ප‍්‍රකාශ පිළිබඳව අප කළ විමසීමකදී ඔහු පෙන්වා දුන්නේ මෙම අර්බුදය ශ්‍රේෂ්ඨාධිකරණයෙන් විසඳිය නොහැකි බවත්, බහුතරය තීරණය කළ යුත්තේ පාර්ලිමේන්තුව විසින් බවත්ය.
තමා ජනාධිපති මෛත‍්‍රීපාල සිරිසේන නායකත්වය දරන කිසිදු රැුස්වීමකට සහභාගි නොවන බවත් ඒකාබද්ධ පොදුජන පෙරමුණේ නායකයන් සහභාගි වන රැුස්වීම්වලට පමණක් සහභාගි වන බවත් වෙල්ගම මන්ත‍්‍රීවරයා වැඩිදුරටත් කීය.
