තරිඳු උඩුවරගෙදර
වත්මන් ආණ්ඩුව බලයට පත්වෙද්දී රටේ ප‍්‍රජාතන්ත‍්‍රවාදය, මානව අයිතිවාසිකම්, සමානාත්මතාව ඇතුළු නවීන ලිබරල්වාදී දේශපාලන සංකල්ප විශ්වාස කළ පිරිසක් බලාපොරොත්තු වුණ වෙනසක් තියෙනවා. එහෙත් ජාතික රූපවාහිනිය වගේ තැන් හරහා ඒ වෙනස සිද්ධවුණේ නැහැ. ඒ ගැන ඔබේ අදහස මොකක්ද?
ජාතික රූපවාහිනිය පමණක් නෙවෙයි, මේ ආණ්ඩුවම බලාපොරොත්තු සම්පූර්ණයෙන්ම සඵල කළේ නැති බව හැමෝටම පිළිගන්න සිද්ධවෙනවා. තොරතුරු පනත වගේ හොඳ දේවල් බොහොමයක් තිබුණු බව ඇත්ත. ඒත් අපි මීට වඩා බලාපොරොත්තු වුණා. ඇත්තටම මිනිස්සුන්ට මේ වගේ තත්වයකින් ප‍්‍රයෝජන ගන්න පුරුදු නෑ. යම් නිදහසක් ඇතිවුණාම ඒකෙන් උපරිම ප‍්‍රයෝජන ගන්න මිනිස්සුන්ට බැරිවුණා. ඒක මම දකින්නේ සම්පූර්ණ සිස්ටම් එකේ අඩුපාඩුවක් විදියට. ආණ්ඩු පෙරළියත් එක්ක ජාතික රූපවාහිනියේත් දේශපාලන කණ්ඩායම්වල වෙනසක් මිස ලොකු රැුඩිකල් පරිවර්තනයක් වුණේ නෑ.
මට මේ පත්වීම ලබාදුන්න මංගල සමරවීර ඇමතිවරයා විවෘත මනසක් ඇති පුද්ගලයෙක්. ඒ නිසා මට හිරවෙන්නට සිදුවෙන්නේ නෑ. මට ආණ්ඩුවේ න්‍යාය පත‍්‍රයට අනුගත වෙන්න සිද්ධවුණත්, මම එයාලාගේ පිටියට ගිහින් පිනුම් ගහන්න ලෑස්ති නෑ. මම මේ වැඬේ කරන්නේ මාස දහඅටක් විතරයි. මේක එක විදියක උගුලක්. මේක ඉවරවුණාම උගුලක හිරවුණා වගේ මම ආණ්ඩුව හෝ පක්ෂ දේශපාලනය ඇතුළේ හිරවෙන්න බෑ. එළියට ගිහින් මගේ සුපුරුදු වැඬේ කරන්න ඕනෑ. ඒ නිසා කෙටි කාලයක් ඇතුළත ජාතික රූපවාහිනියේ සහෝදරයන් සමඟ මොකක් හෝ හොඳ දෙයක් කරලා එළියට බහින්න බලාපොරොත්තු වෙනවා.
ඔබේ පත්වීම සමඟ කතාබහට ලක්වුණ දෙයක් තමයි මේ රූපවාහිනී ක්ෂේත‍්‍රය මොන තරම් පිරිමින්ගේ ආධිපත්‍යයට යටවුණ ක්ෂේත‍්‍රයක්ද, කාන්තාවන්ට එහි වැඩකටයුතු කිරීම මොන තරම් අසීරුද කියන එක. ඒ සංවාදය ගැන ඔබේ අදහස මොකක්ද?
මගේ පත්වීම සමඟම සැලසිනේ ආයතනයට සහ ස්වාධීන රූපවාහිනී සංස්ථාවටත් ප‍්‍රධානීන් විදියට කාන්තාවන් පත් කරන්නට ජනමාධ්‍ය අමාත්‍ය මංගල සමරවීර මහතා කටයුතු කළා. මේක සුවිශේෂ තත්වයක්. මොකද මා බොහෝ දෙනෙක් පිළිගන්නා පරිදි, ස්ත‍්‍රීපුරුෂ සමාජභාවය කියන එක අනියම් විදියට රාජකාරී මට්ටමේදීත් බලපෑම් කරනවා. කාන්තාවන් ඉහළ තනතුරුවල සිටියත්, එහෙම අයට වැඩ කිරීම අභියෝගයක් වෙනවා. ඒ පැත්තෙන් මංගල සමරවීර අමාත්‍යවරයා ගත්ත තීන්දුවේම තියෙනවා තීරණාත්මක සහ එඩිතර ස්වභාවයක්. පත්වීම සමඟ අපි තුන්දෙනාම සමඟ මංගල සමරවීර ඇමතිවරයා කීව කතාවක් තියෙනවා. ඔහු පෙන්වපු ආකාරයට, පිරිමින් යම්කිසි විදියක වගකීම් සහිත සහ අභියෝගාත්මක තනතුරුවලට පත්වුණාම, එතැන බලය ස්ථාපනය වෙලා තියෙද්දී බොහෝවිට ඒ තනතුරේ වගකීම කාන්තාවන් තරම්ම ඇඟට ගන්නේ නැහැ. අනෙක් පැත්තෙන් මුදල් පරිපාලනයේදීත් ප‍්‍රතිශතයක් විදියට, පිරිමින්ට සාපේක්ෂව කාන්තාවන් ඉදිරියෙන් ඉන්නවා. මොකද පිරිමින් මේ තනතුරු සමඟම එළියේ දේශපාලනය කරනවා වැඩියි. මම ඔහුගේ කතාව දකින්නේ මේ ආයතනවල මට කලින් හිටපු පුද්ගලයන් සම්බන්ධ කාරණයක් විදියට නෙවෙයි. කාගේවත් කැරැුට්ටු සහතිකයක් නෙවෙයි, පොදු දේශපාලනික කාරණයක්. ඇමතිවරයා මීට කලිනුත් තමන් යටතේ තිබුණු ආයතනයකට කාන්තාවක් පත්කරලා ආයතනය සාර්ථකත්වයට ගෙනියන්න සමත්වෙලා තියෙනවා. මම හිතන විදියට ඇමතිවරයා කීව මේ කාරණය සර්වකාලීන, පොදු තත්වයක් නෙවෙයි. සාපේක්ෂ තත්ත්වයක්.
කලා ලෝකයේ නමක් ගොඩනඟාගත්ත කෙනෙක් විදියට මෙතැනට පත්වීමෙන් පසුව තමන්ගේ බලාපොරොත්තු සහ රජයේ අපේක්ෂා ඉටු කරමින් කටයුතු කිරීම දකින්නේ මොන වගේද?
ඒක විශාල අභියෝගයක්. මේක රාජ්‍ය මාධ්‍යයක්. ජාතික රූපවාහිනිය ඉතිහාසය තුළ හැමදාම පක්ෂ දේශපාලනයේ හදවත වගේ පවතින ආයතනයක්. අපට කවදාවත් මේ පක්ෂ දේශපාලන ධුරාවලියෙන් බැහැර වෙන්න බෑ. එතකොට ඔවුන් බලාපොරොත්තු වන න්‍යාය පත‍්‍ර තියෙන බව බැහැර කරන්න බෑ. හැබැයි මංගල සමරවීර ඇමතිවරයා කාන්තාවන් අතරිනුත් ඉනෝකා සත්‍යාංගනීව මෙතැනට පත් කරගන්නට හේතුවක් තියෙනවා. ඔහුම කියා තියෙනවා, ඉනෝකා වගේ කෙනෙක්ව පිටින් මෙතැනට ගෙනෙන්නේ ජාතික රූපවාහිනිය ඉදිරියට ගෙනෙන්න අවශ්‍ය නිසා කියලා. ජාතික රූපවාහිනිය නරඹන්නන් සංඛ්‍යාව අතින් ලංකාවේ හත්වැනි තැනට ඉන්නේ. මේ තත්වය වෙනස් කිරීමේ බලාපොරොත්තුව ඔවුන්ට තියෙනවා. හැබැයි රේටින් ඉහළ දැමීමට වඩා වෙනස් වැඩක් මගෙන් බලාපොරොත්තු වෙනවා. මිනිස්සුන්ව තෘප්තියට පත් කරන්න පුළුවන්, ඒ වගේම නිර්මාණශීලී වැඩසටහන් හරහා මේක කරන්න අවශ්‍ය බව මම හිතනවා. ජාතික රූපවාහිනියේ යම්කිසි ඇල්මැරුණු ස්වභාවයක් තියෙනවා නම්, ඒක වෙනස් කරලා මිනිස්සුන්ගේ ජීවිත එක්ක බද්ධ වෙච්ච නිර්මාණ තෝතැන්නක් බවට ජාතික රූපවාහිනිය පත් කරන්නට මම බලාපොරොත්තු වෙනවා.
ජාතික රූපවාහිනියේ ඉහළ හැකියාවලින් යුතු නිෂ්පාදකවරුන් සහ නිෂ්පාදකවරියන් ඉන්නවා. ඔවුන්ගේ හැකියාවන්ට නිදහසේ ඉස්මතු වෙන්නට ඉඩකඩ ලැබිලා නැති බව තමයි මේ දින කිහිපයට මට පෙනෙන්නට තියෙන්නෙ. ඔවුන්ට උද්යෝගයෙන් වැඩකටයුතු කරන්නට අවස්ථාව ලබාදීමයි වැදගත්.
ඔබ කරන්නට බලාපොරොත්තු වන වෙනස්කම් මොනවාද?
අපි තරගකාරී පරිසරයක ඉන්නේ. ඒ නිසා මගේ අදහස් සම්පූර්ණයෙන්ම කියන්නට මගේ කැමැත්තක් නැහැ. පොදුවේ කතාකරන්නම්. එක් පැත්තකින් ජාතික රූපවාහිනියේ ටෙලිනාට්‍ය අංශයේ වෙනසක් කළ යුතුයි. මෑත කාලය වෙද්දී ස්වාධීන රූපවාහිනිය ටෙලිනාට්‍ය විකාශය හරහා ප‍්‍රගතිශීලී ලක්ෂණ සමඟ ඉදිරියට ආවා. ජාතික රූපවාහිනිය ඒ තත්වයට ඇවිත් නැහැ. රූපවාහිනී කලාව ඇතුළේ ටෙලිනාට්‍ය කියන්නේ ඉතාම වැදගත් අංගයක්.
ඊට අමතරව ප‍්‍රාසංගික කලාව නිරූපණය කරන වැඩසටහන්, ළමා වැඩසටහන්, අධ්‍යාපනික වැඩසටහන්, වාර්තා වැඩසටහන් අතින් ගත්තාම අනෙක් නාලිකාවලට වඩා පසුපසින් ඉන්නවා. ජාතික රූපවාහිනිය ඉදිරියෙන් ඉන්නේ ක‍්‍රීඩා අංශයෙන්. ඒකටත් ප‍්‍රධාන හේතුවක් තමයි ක‍්‍රිකට් තරග විකාශය කරන්නට අනෙක් නාලිකාවලට සාපේක්ෂව ජාතික රූපවාහිනියට ලැබෙන අවස්ථාව.
මම කියන්නේ නැහැ ජාතික රූපවාහිනිය කිසිවක් නොකරන හිස් පෙට්ටියක් කියලා. ඉතා සාධනීය වැඩසටහන් තිබුණා. නම් වශයෙන්ම කීවොත් යථාරූප, සිහිනයකි ?, අරුම පුදුම රෝද හතර වගේ හොඳ වැඩසටහන් රැුසක් තියෙනවා. සත්‍ය තත්වය කීවොත් ඒවා පොදු සමාජයේ ජනප‍්‍රියත්වය අතින් ඉදිරියෙන්ම තියෙන වැඩසටහන් නෙවෙයි. හැබැයි ඒවා හොඳ වැඩසටහන්. මම උත්සාහ කරන්නේ ජනප‍්‍රියත්වයෙනුත් මීට වඩා ඉහළ ගුණාත්මක වැඩසටහන් ගෙන එන්නට. හැබැයි ජනප‍්‍රියත්වය පිණිස අනෙකුත් නාලිකාවල කරන මට්ටම අපි කොපි කරන්න යන්නේ නැහැ. රේටින් වැඩි කරගන්න ඔවුන් කරන අරගලය තුළ ඔවුන්ව හඹා යන්න අපි කොහෙත්ම උත්සාහ කරන්නෙ නෑ. මම ඒකට කිසිසේත්ම ඉඩ දෙන්නෙත් නෑ. ජනප‍්‍රියත්වය නැතිව ටීවී කරනවා කියන එකත් මුලාවක්. අපි අනිවාර්යයෙන්ම ජනප‍්‍රිය විය යුතුයි. හැබැයි අපි අනෙක් හැමෝම යන පාරේ නොයා යුතුයි.
ජාතික රූපවාහිනිය ගැන කතාකරද්දී හැමෝගේම අවධානය යොමුවෙන්නේ ජාතික රූපවාහිනිය ගැන විතරයි. නේත‍්‍රා ටීවී නාලිකාව ආයතනයට අයිති දෙමළ නාලිකාව. නේත‍්‍රා ටීවී අනෙකුත් දෙමළ රූපවාහිනී නාලිකාවලට සාපේක්ෂව ඉතාම පසුගාමීයි. මේ නාලිකාවේ වෙනසක් කරන්න බලාපොරොත්තුවක් නැද්ද?
ඒක හරි. මමත් අභ්‍යන්තරයෙන් තොරතුරු හොයා බලද්දී නේත‍්‍රා ටීවී ඉතා දුර්වල තත්වයක තියෙන බව අවබෝධ කරගත්තා. එහි වෙනසක් කිරීම අප කළයුතු දෙයක්ම නෙවෙයි. දෙමළ වැඩසටහන් සිංහල අයට හදන්න බෑ. ඒ රසය, හදගැස්ම එක්ක ගැටගැහෙන්නෙ නැතිව අපට ඒක කරන්න බෑ. ඒ නිසා අපි දෙමළ නිෂ්පාදකවරුන්ව සම්මුඛ පරීක්ෂණ හරහා කැඳවන්න සැලසුම් කරනවා. ඒ හරහා හොඳ නිර්මාණශීලී අයව ගෙන්වාගෙන සාර්ථකත්වය ලැබිය යුතුයි.
