එජාප පාර්ලිමේන්තු මන්ත්රී මුජිබුර් රහුමාන්
ඒකාබද්ධ විපක්ෂය සති තුනකට පමණ කලින් කොළඹ වටලන බව කියමින් උද්ඝෝෂණයක් සංවිධානය කළා. ඉන්පස්සෙ සති දෙකක් යනතෙක් ඒ වැඬේ කඩාකප්පල් කරන්නට ඒකාබද්ධ විපක්ෂයේ උද්ඝෝෂකයන්ට විස යෙ¥ කිරිපැකට් දුන් බව කීවා. කොළඹට ඒකාබද්ධ විපක්ෂය එද්දී ඒක වළක්වන්න උත්සාහයක් එජාපය පැත්තෙන් ගත්තාද?
කොළඹ වටලනවා කිව්වාට එහෙම කළේ නැහැනේ. එයාලා එහෙනම් කොළඹට එන පිවිසුම් මාර්ග ටිකවත් අවහිර කරන්න එපැයි. කොළඹ ඉන්න එජාප පාක්ෂිකයන් එකතුවුනානම් ඔවුන්ට කොළඹට ඇතුළුවෙන්න ලැබෙන්නේත් නැහැ. ඔබ මතක් කළා වගේ එයාලා ආණ්ඩුව කරපු කාලයේදී අපි ආණ්ඩුවට විරුද්ධව උද්ඝෙ ා්ෂණයක් කරද්දී ඒකට විරුද්ධව තවත් උද්ඝෝෂණ කළා. අන්තිමේදී අපට පහරදෙන්න, අපව මැඬපවත්වන්න ඒ උද්ඝෝසණ පාවිච්චි කළා. අපි ඔවුන්ගෙන් හුඟක් දේවල් ඉගෙනගත්තත් ඔවුන්ගේ උද්ඝෝෂණ කඩාකප්පල් කරන්න අවශ්යතාවයක් අපට තිබුණෙ නැහැ. එහෙත් අපි එහෙම කඩාකප්පල් කරන්න නොහිතපු එක හොඳයි. ඒකෙන් ඔවුන්ගේ දුර්වලතාවය හැමෝටම දැකගන්න හැකිවුණා.
ඒකාබද්ධ විපක්ෂයේ නායකයන් සැලසුම් කරලා තිබුණෙ කොළඹ නගරයට ලක්ෂ ගණනක් ජනතාව ගෙනල්ලා, සති කිහිපයක් රැුඳී ඉඳලා ආණ්ඩුව පෙරළන්න. අගමැතිතුමා රට දාලා යනවා. ජනාධිපතිතුමාව ගන්නවා. සැප්තැම්බර් 06 වෙද්දී මහින්ද රාජපක්ෂ මහත්තයා අගමැති ධූරයේ දිවුරුම් දෙනවා වගේ කතන්දර කියලා තමයි පාක්ෂිකයන්ව කොළඹ ගෙනල්ලා තිබුණෙ. ඒත් අන්තිමේදී හුළං ගියා වගේ බැහැලා ගියා. පොලීසියෙන් ගැහුවෙත් නැහැ, ආණ්ඩුව පැත්තෙන් මොනවාවත් කිව්වෙ නැහැ. එයාලා ඇවිත් කෑගහලා, එයාලාටම ඇතිවුණාම විසිරිලා ගියා. ඒකෙන් ඔවුන්ගෙ පාක්ෂිකයන්ටත් එපා වුණා. අපව කොළමට ගෙනැල්ලා අප වෙනුවෙන් කිසි දෙයක් කරන්න බැරිවුණා කියලා.
ඒකෙන් වැටුණාම ඒ මානසිකත්වයෙන් බේරෙන්නට මොකක්හරි දෙයක එල්ලෙන්න ඔවුන්ට ඕනෑ වුණා. ඒ නිසා තමයි කිරිපැකට් කතාව ගෙනාවේ. මමනම් හිතන්නෙ ඔවුන්ම තමයි ලාබෙට කල් ඉකුත් වූ කිරිපැකට් බෙදන්න ඇත්තේ. ඔවුන්ගේ උඩ ඉඳන් පහළට මුදල් අවභාවිත කිරිම් වෙනවා. දැන් එයාලාට එල්ලෙන්න මාර්ගයක් නැතිව කිරිපැකට් එක උස්සගෙන ගිහින් හරි දුර්වලතාවය වහගන්න උත්සාහ කරනවා. එයාලා ලැජ්ජා වෙන්න ඕනෑ මහා සටන්කරුවෝ, විප්ලවවාදියෝ එයාලා. ආණ්ඩුවක් එළවන්න පාරට ආව මිනිස්සුන්ව කිරිපැකට් එකකින් නැතිකරන්න පුලූවන්ද? මමනම් ලැජ්ජා වෙනවා මේක ගැන. ඕකේ ඉන්නෙ ලොකු සටන් ඉතිහාසයක් තියෙන නායකයෝනේ. වීදි සටන් කරපු ඔය නායකයන්ව අපට ඔය කියන විදියේ කිරිපැකට් එකකින් මර්දනය කරන්න පුලූවන් කියලා කියනවානම් ඒක එයාලාටම ලැජ්ජාවක්. මම දැක්කා ඩලස් මන්ත්රීතුමා අඬනවා ඇවිත්. ඒ කියන විදියට කිරිපැකට් එක නිසා තමයි ආණ්ඩුව ඇල්ලීමේ සටන අසාර්ථක වෙලා තියෙන්නෙ. අපට පේනවා මේවා මොනතරම් බොළඳ, මොන්ටිසෝරි කතාද කියලා.
මුජිබුර් රහුමාන් ඇතුළු පිරිසක් සිරින්ජරයකින් කිරිපැකට්වලට වස ඇතුළුකරලා ඒක මිනිස්සුන්ට බෙදපු බව තමයි අන්තිමේදි සමාජගත වුණ කතාව. මේක ඇතුලේ යම් ජනවාර්ගික බෙදීමක් ඇතිකිරීමේ වුවමනාවකුත් තිබුණා නේද?
අනිවාර්යයෙන්ම. මට ආරංචිවුණ විදියට මුලින්ම ප්රචාරය කරන්න උත්සාහ කරලා තිබුණේ වඳකිරි දුන්නා කියලා. පස්සෙ එයාලා මේක වෙනස් කරලා. මොකද වඳකිරි කිව්වාම කවුරුවත් පිළිගන්නෙ නැති නිසා. වස කිරි දුන්නා කියලා කිව්වෙ. කොහොමහරි මේකට ජාතිවාදී ස්වරූපයක් දෙන්නත් උත්සාහ කළා. මට චෝදනා කළේ මම මුස්ලිම් නිසා.
ඒත් සමහර සමාජ මාධ්ය පිටු මේ කතාව තවත් දුරට ගෙනයමින්, වඳ බෙහෙත් කතාවක් සහ සිංහල ජාතිය වඳකිරීමේ කතාවක් ප්රචාරය කරලා තිබුණා….
ඔව්. එහෙම තමයි සෝෂල් මීඩියාවල දැම්මෙ. මේ කතා සම්බන්ධයෙන් පැමිණිලි කරලා තියෙන්නෙ තුන්දෙනයි. දෙන්නෙක්ම කිරි බීලා නැහැ. අපට දැනගන්න ලැබුණා කියලයි පැමිණිල්ල දාලා තියෙන්නෙ. කිරි බිව්ව එක්කෙනෙක් විතරයි පැමිණිල්ලක් දාලා තියෙන්නෙ. එයා මාතර කෙනෙක්. මේ තරම් කතාකරන මන්ත්රීවරු කිසිවෙක් පැමිණිල්ලක් දාලා නැහැ මේ සම්බන්ධයෙන්. මාධ්ය ඉදිරියේ කියනවා විතරයි. සංවිධානාත්මකව මේක උස්සන්න උත්සාහ කළා. ලංකාවේ මාධ්ය පවා මාධ්ය ඉදිරියට ඇවිත් කියන ඕනෑම දෙයක් පළ කරනවා. ඕනෑම දෙයක් කියන්න පුලූවන්. සාක්ෂි ඕනෑ නැහැ. ඒ නිදහස පාවිච්චි කරමින් මේ කතාව සමාජගත කරන්න උත්සාහ කරනවා. මම පැමිණිල්ලක් දැම්මා. මට මන්ත්රීවරු තුන්දෙනෙක් චෝදනා කළා. එක මන්ත්රීවරයෙක් කිව්වා වීඩියෝපට තියෙනවා කියලා. මම පොලීසියට පැමිණිල්ලක් දැම්මා මේවා සම්බන්ධයෙන් පැමිණිල්ලක් තියෙනවා. අහවලා ළඟ වීඩියෝ තියෙනවා. ඒවා ගෙන්වලා පරීක්ෂණ කරන්න කියලා. මම එන්තරවාසියක් යවලා තියෙනවා මගේ කීර්තිනාමයට හානි කිරීම සම්බන්ධයෙන් නඩු පවරලා. නිකන්ම මාධ්ය ඉදිරියට ඇවිත් පදනමක් නැතිව චෝදනා කරන්න දෙන්න බැහැ. මට තේරෙන්නෙ නැහැ මාධ්යවලට පවා මෙහෙම පදනමක් නැති කතා පළකරන්න අයිතියක් තියෙනවාද කියලා. එහෙම කියන ඕනෑ එකක් පළ කරන්න පුලූවන්ද කියලා.
මුස්ලිම් ව්යාපාරික ප්රජාව ගෝඨාභය රාජපක්ෂ සමඟ ඉන්න බව උදය ගම්මන්පිළ මන්ත්රීවරයා කියලා තිබුණා. ඒ ගැන ඔබේ අදහස මොකක්ද?
ගෝඨාභය රාජපක්ෂ මහත්තයා නෝමිබි කාලයේදී මුස්ලිම් අය එක්ක නෝම්බි අරින්න වැඩවලට සම්බන්ධ වුණා. ශ්රිලනිපයත් එක්ක ඉන්න මුස්ලිම් පිරිසක් උත්සාහ කළේ ඒ හරහා මුස්ලිම් ජනතාව අතර ජනප්රියත්වයක් අරන් දෙන්න. මගේ අදහස ඒක සාර්ථක නැහැ. ගෝඨාභය රාජපක්ෂ ආරක්ෂක අමාත්යාංශ ලේකම් විදියට ඉන්නකොට මුස්ලිම් ජනතාවට කටයුතු කළ ආකාරය මුස්ලිම් ජනතාවට අමතක වෙලා නැහැ. ගම්මන්පිල මහත්තයාට අමතක වෙලා ඇති. ඒත් මුස්ලිම් ජනතාවට අමතක නැහැ. ඒක ව්යාපාරිකයන්ට තමයි හොඳටම මතක. ගෝඨාභය රාජපක්ෂ මහත්තයා ඉන්නකොට මුස්ලිම් ව්යාපාරිකයන් රට දාලා ගියා. ඒ කාලෙ සුදුවෑන්වලින් මුස්ලිම් ව්යාපාරිකයන්ව පැහැරගෙන ගිහින් කප්පම් ගන්න ජාවාරමක් තිබුණා. ඒවා වළක්වන්න ගෝඨාභය රාජපක්ෂට බැරිවුණා. මුස්ලිම් ව්යාපාරිකයන් රට දාලා ඩුබායි, මැලේෂියාවලට ගියා. ඒ පැතිවල පුරවැසිභාවයත් ගත්තා. මුස්ලිම් ජනතාව දන්නවා ගෝඨාභය රාජපක්ෂ බලයට ආවොත් මෙහේ මියන්මාරයක් හදාගන්න පුලූවන් බව.
ඔබ එහෙම කිව්වත් වත්මන් ආණ්ඩුව පවා මුස්ලිම් ජනතාව මුහුණදුන් ප්රශ්න ගැන සංවේදී වුණේ නැහැ….
මේ ආණ්ඩුව බලයට ඇවිල්ලාත් දිගන සිද්ධිය වගේ අවස්ථාවල ගත්ත තීන්දු, ඒවා ක්රියාත්මක වුණ ආකාරය ගැන කළකිරිමක් තියෙනවා. මම පවා ඒවා විවේචනය කරලා තියෙනවා. 2016 මුල් භාගය වෙද්දී ජාතිවාදීන් සමාජ මාධ්යවල යම් බලවේග නිර්මාණය කරගෙන ආවා. මම ඒ ගැන අනතුරු ඇඟවුවා. ඒත් ඒක කියපු තරම් විශ්වාස කළේ නැහැ. ඒ සිද්ධිවලදී ආණ්ඩුව තීන්දු ගන්න ප්රමාද වීම ගැන ලොකු කළකිරීමක් ආණ්ඩුව ගැන තියෙනවා. කොහොම වුණත් පමාවෙලා හරි යම් තීන්දු අරගෙන, යම් පිරිසක් අත්අඩංගුවට අරගෙන තියෙනවා. රිමාන්ඞ් බන්ධනාගාරයේ යම් තීන්දු ගත්ත එක ලොකු දෙයක්. මේ ආන්ඩුව හිතන්න ඕනෑ ජාතිවාදය නිසා විනාශ වෙන්නෙ මේ රටේ සංවර්ධනය.
ආණ්ඩුවට ඒක වැටහිලා තියෙනවා. ඒ හින්දා තමයි තද තීන්දු අරගෙන තියෙන්නෙ. ආණ්ඩුවට තියෙන්නෙ විකල්ප මාර්ග නෙවෙයි. මේ ආණ්ඩුවෙන් ඉදිරියටයි යන්නෙ. හිටපු ආණ්ඩුව එක්ක ගත්තොත් හැම අතින්ම මේ ආණ්ඩුව ඉස්සරහෙන් ඉන්නවා. ඒකෙදී මම කියන්නෙ නැහැ මේක සීයට සීයක් හොඳයි කියලා. මේ ආණ්ඩුව අත්හැරියොත් විකල්පය මොකක්ද කියන ප්රශ්නය තියෙනවා. සුළුතර ජනතාව පැත්තකින් තිබ්බත් බහුතර ජනවර්ගයට අයත් ප්රගතිශීලී අයට පවා නැවත මහින්ද රාජපක්ෂ හෝ වෙන රාජපක්ෂ කෙනෙක් සමඟ හෝ ඉදිරි ගමනක් යන්න බැහැ. නැවත ගෝත්රිකවාදයට යන්න තමයි වෙන්නෙ. වෙන විකල්ප නැහැ.
