ආරක්ෂක මාණ්ඩලික ප්රධානී අද්මිරාල් රවීන්ද්‍ර විජේගුණරත්න අපරාධ පරීක්‍ෂණ දෙපාර්තමේන්තුව හෙවත් සීඅයිඞීය මඟහැර මෙක්සිකෝව බලාගොස් තිබුණේ සැප්තැම්බර් 10 වැනිදාය.
මීට පෙර සීඅයිඞීය එම පැහැර ගැනීමේ සිදුවීමට අදාළව අධිකරණයට වාර්තා කර තිබුණේ ආරක්ෂක මාණ්ඩලික ප‍්‍රධානියා අත්අඩංගුවට ගැනීමට අවසර ලබාදෙන ලෙසය. අධිකරණයට වාර්තා කිරීමෙන් පසු සීඅයිඞීය අද්මිරාල් විජේගුණරත්නට දන්වා තිබුණේ නාවික හමුදා මූලස්ථානයේ පිහිටි ඔහු පදිංචි වී සිටින මහල් ගොඩනැඟිල්ල ඡායාරූපගත කිරීමට අවශ්‍ය බවය. එහිදී අද්මිරාල් විජේගුණරත්න දන්වා තිබුණේ නීති උපදෙස් ලබාගැනීමෙන් පසු ඒ පිළිබඳව දැනුම් දෙන්නම් කියාය. ප‍්‍රකාශයක් ලබාගැනීම සඳහා අද්මිරාල් විජේගුණරත්නට සීඅයිඞීයට එන ලෙස දන්වා තිබුණේ එම සිදුවීමෙනුත් පසුය.
පසුගිය කාලය පිළිබඳව ආපසු හැරී බැලීමෙදී නාවික හමුදාව තුළ වඩාත් අප‍්‍රසාදයට ලක්වූ නාවික හමුදාපතිවරයා වශයෙන් අද්මිරාල් විජේගුණරත්න හැඳින්වීම වඩාත් සුදුසුය. ඔහුගේ බිරිඳගේ හැසිරීම්, බිරිඳ, පුතා හා සුරතලා වූ බල්ලාට ලබාදුන් පහසුකම්, වත්මනේ නාවික හමුදාවෙන්ම නීතියට පටහැනිව ඔහු ලබාගන්නා පහසුකම් ඊට නිදසුන්ය.
නාවික හමුදා සේවා වනිතා ඒකකය තුළ ඔහුගේ බිරිඳගේ කි‍්‍රයාකාරකම්ද නාවික හමුදාව සතු හෝටල් භාවිත කිරීමේදී හා වාහන භාවිත කිරීමේදී ඔහුගේ බිරිඳ, දරුවා හා සුරතලා වන බල්ලා වෙනුවෙන් සැපයූ පහසුකම්ද ඒ අතරින් කැපීපෙනෙන බව නාවික හමුදාවේ රියල් නාවිකයන්ගේ අදහසය. නාවික හමුදාපතිවරයා වශයෙන් නිල නිවසක් පවතිද්දී ඔහු නාවික හමුදා මූලස්ථානයේ නිලධාරී මහල් ගොඩනැගිල්ලේ එක් මහලක්ම (8වැනි මහල) ඔහුගේ පරිහරණයට යොදා ගැනීම ඊට ඇති එක් හොඳ නිදසුනක්ය. නිල නිවසේ ඔහුගේ බිරිඳ සිටින විට ඔහු නාවික හමුදා මුලස්ථානයේ ගොඩනැඟිල්ලේ එක් මහලක් ඔහුගේ පදිංචියට ගැනීම කොතරම් දක්ෂකමක්ද?
ඒ පමණක්ද නොවේ. ඔහුගෙන් පසු නාවික හමුදාපති ධුරයට පත් වයිස් අද්මිරාල් ටී. සින්නයියාට නිල නිවස ලබානොදී සිටීමම කොතරම් දක්ෂකමක්ද? එය හම්බන්තොට වරාය සේවක උද්ඝෝෂණය ආවරණයට එහි ගිය ජනමාධ්‍යවේදියෙකුට ඔහු බජාර් චණ්ඩියෙකු මෙන් පැන පැන පහරදීමටත් වඩා දක්ෂකමක් නොවේද?
වර්තමානයේත් ඔහු නාවික හමුදා මූලස්ථානය භාවිත කරන්නේ ඔහුගේ අම්මා අප්පාගේ බුදලය මෙන්ය. එහි සීඞීස්එම් හෙවත් ආරක්ෂක මාණ්ඩලික ප‍්‍රධානියාගේ වාහන නැවැත්වීම සඳහා ස්ථාන වෙන්කරගෙන ඇත. කොළඹ වරාය චෛත්‍ය අසල ඔහුගේ ගමන් පිරිවරගේ වාහන නැවැත්වීම සඳහා ස්ථානයක් වෙන්කරගෙන තිබේ. ඔහු පාවිච්චි කරන වාහන ගණන 32කි. ඔහුගේ ආරක්‍ෂාව සඳහා යොදවා සිටින ආරක්ෂක නිලධාරීන්ගේ සංඛ්‍යාව 126කි. මේ කිසිවක් ඔහුගේ අදක්ෂකමක් ලෙස අප සැලකිය යුතු නැත.
තරුණයින් 11 දෙනෙකු පැහැරගෙන යෑමේ සිද්ධියේ අධිකරණය මඟහැර සිටින සැකකරුට රැුකවරණ සපයාදී ඔහු එම අපරාධයට අනුබල දෙන්නේ ඒ දක්ෂකම නිසාය. ජනමාධ්‍යවේදියෙකුට ප‍්‍රසිද්ධියේ පහරදීම දක්වා වූ අපකීර්තිමත් හැසිරීමක් පෙන්නූ ඔහුට තවදුරටත් ජනාධිපතිවරයා විසින් සේවා දිගුවක් ලබාදෙන්නේ ද ඔහුගේ ඒ දක්ෂකම නිසාය.
ඔහුගේ එම දක්ෂකම ගැන කියන තවත් සාධකද දැන් අපට හමුවී ඇත. ඉන් එකක් වන්නේ නාවික හමුදා සුබසාධක අරමුදලේ මුදල් ඊට කිසිදු සම්බන්ධයක් නැති කටයුතු වෙනුවෙන් ලබාගැනීමේ ඔහුගේ දක්ෂතාවය. මේ සුබසාධන අරමුදල වූ කලි නාවික හමුදා සාමාජීකයන්ගෙන් මාසිකව රුපියල් 75ක මුදලක් ලබාගෙන ගොඩනඟා ඇති අරමුදලකි. එය ඇත්තේ නාවික හමුදා සමාජිකයන්ගේ හා යුද්ධයේදී මියගිය, ආබාධිත වූ හා අතුරුදන් වූ නාවික හමුදා සාමාජිකයන්ගේ හා ඔවුන්ගේ පවුල්වල සාමාජිකයන්ට සුබසාධනය සැලසීම සඳහාය.
එම සුබසාධක අරමුදලෙන් 2016 හා 2017 යන වර්ෂ දෙකේදී රුපියල් මිලියන 233.6ක මුදලක් විදේශීය පුහුණු පාඨමාලා සඳහා අත්තනෝමතික ලෙස අද්මිරාල් විජේගුණරත්නගේ නාවික හමුදාපති කාලය තුළ දී ලබාගෙන ඇත. මේ පිළිබඳව ජනාධිපති මෛතී‍්‍රපාල සිරිසේනගේ උදහසට ලක්වූ අඩුම කාලයක් නාවික හමුදාපතිධුරය දැරූ ටී. සින්නයයියා විසින් ලිඛිතව ආරක්ෂක අමාත්‍යාංශයේ ලේකම්වරයාට දැනුම් දී ඇත. ඒ 2017.08.30 දින සහිතවය. එහි පිටපතක් ජාතික අයවැය දෙපාර්තමේන්තුවේ අධ්‍යක්ෂ ජෙනරාල්වරයාට යවා ඇත.
එහි සඳහන් කර ඇත්තේ 2016 වර්ෂයේ පුහුණු කටයුතු වෙනුවෙන් වෙන්කර තිබූ රුපියල් මිලියන 822ක ප‍්‍රතිපාදනය තුළ වියදම් දැරිය හැකි ලෙස විධිමත් පුහුණු සැලැස්මක් සකස්කර කි‍්‍රයාත්මක නොකර හා මහා භාණ්ඩාගාරයේ සිිහි කැඳවීම් අනුව පුහුණු සැලැස්ම සංශෝධනය නොකර අවිධිමත් ලෙස කටයුතු කිරීම තුළින් පැනනැඟුණු මූල්‍ය ඌනතාව සපුරා ගැනීම සඳහා නාවික හමුදා සුබසාධන අරමුදලෙන් රුපියල් මිලියන 130.4ක මුදලක් පුහුණු කටයුතු සඳහා ලබාගෙන ඇති බවය. ඒ 2016.10.07 දින සිට 2016.12.31 දින දක්වා වූ කාලය සඳහාය.
එසේ තිබියදීත් දක්ෂතාවට පින්සිදුවන්නට එම සෙල්ලම 2017 වර්ෂයේදීත් කි‍්‍රයාත්මක කර ඇති අද්මිරාල් විජේගුණරත්න මහා භාණ්ඩාගාරයෙන් ලබාදුන් උපදෙස් හා අවධාරණයන් තුට්ටුවකට මායිම් නොකරමින් එම වර්ෂයෙ,් එනම් 2017.08.08 දින සිට 2017.08.21 දින දක්වා වූ සති දෙකක කාලයේදී භාණ්ඩාගාරය ලබාදුන් රුපියල් මිලියන 700ක ප‍්‍රතිපාදනය ඉක්මවා යමින් නාවික හමුදා සුබසාධක අරමුදලෙන් රුපියල් මිලියන 103.2ක මුදලක් විදේශ පුහුණු පාඨමාලා සඳහා ලබාගෙන ඇත. ඒ ද භාණ්ඩාගාරය විසින් මුලින් ලබාදුන් රුපියල් මිලියන 600ක මුදල මදි බව පවසමින් කරුණු ඉදිරිපත් කිරීමෙන් පසු අතිරේකව ලබාදුන් රුපියල් මිලියන 100ක මුදලද අවසන් කිරීමෙන් පසුය.
එම වසරේ ඊළඟ මාස හතරක කාලයත්, ඉන්පසු මේ දක්වා කාලයත් ඔහු නාවික හමුදාපති ලෙස කටයුතු කිරීමට අපගේ පින්වත්, සිංහල බෞද්ධ, රණවිරු මිනීමරු හිතැති ජනාධිපතිවරයා ඉඩ ලබාදුන්නේ නම් නාවික හමුදා සුබසාධන අරමුදලට සිදුවන දේ හිතා ගැනීමටවත් බැරිය.
විදේශීය පුහුණු පාඨමාලා ලෙස සඳහන් වූවද 2017 වර්ෂයේදී නාවික හමුදා සුබසාධන අරමුදලෙන් සති දෙකක කාලයකදී ලබාගෙන ඇති රුපියල් මිලියන 103.2 මුදලින් ගොස් ඇති විදේශ ගමන්වලින් ගමන් 12ක් යෙදී ඇත්තේ නිල විදේශ සංචාර වශයෙන්ය. ඒවා කිසිසේත්ම විදේශ පුහුණු පාඨමාලා නොවේ. එම සතිදෙකක කාලයේ සිදුවූ විදේශ සංචාර 32න් පුහුණු පාඨමාලා සංචාර ඇත්තේ 20ක් පමණය.
ඒ අනුව ඉන්දියාවට නිල විදේශ සංචාර 3ක්ද, ඇමරිකාවට නිල විදේශ සංචාර 2ක්ද, සිංගප්පූරුවට නිල විදේශ සංචාර 2ක්ද, ඉන්දුනීසියාව, තායිලන්තය, රුසියාව, පිලිපීනය හා එක්සත් රාජධානියට එක් නිල විදේශ සංචාරය බැගින් ද ගොස් තිබේ.
ඉහත කී නාවික හමුදා සුබසාධක අරමුදලට තට්ටුකිරීමේ මේ සියලූ තොරතුරු මුසාවාදා වේරමණී ශික්ෂාපදය කඩමින් සිටින ශී‍්‍ර ලංකා ප‍්‍රජාතාන්ත‍්‍රික සමාජවාදී ජනරජයේ ජනාධිපති මෛතී‍්‍රපාල සිරිසේන උන්නැහේට ලැබී ඇත. ඒ ආරක්ෂක ඇමති වූ ඔහුගේ අමාත්‍යාංශ ලේකම්වරයාට නිල වශයෙන් මේ තොරතුරු යොමු කර ඇති බැවින්ය. මුසාවාදා දෙස දෙස රට වටේ යෑමටත් වේලාව මදීවී ඇති අපගේ ජනාධිපතිවරයාට එම තොරතුරු අසන්නට හෝ කියවන්නට වේලාවක් ලැබී නැති හැඩය. අද්මිරාල් රවීන්ද්‍ර විජේගුණරත්න සීඅයිඞීය මඟහැර මෙක්සිකෝවට යෑමට හදාගන්නේ එහෙව් කාර්ය බහුල තත්ත්වයක අපේ ජනාධිපතිවරයා සිටින තත්ත්වයකය. ඉතිං ඒකට දක්ෂතාව නොකියා වෙන කුමක් කියන්නද?