‘ලසන්ත ඝාතනය: අණ ගෝඨාගෙන්ද? පරීක්ෂණ ඇරඹේ’ මේ අපේ ගියවර පුවත්පතේ මුල් පුවත. ඇත්තටම විමර්ශන අංශ මෙම ඝාතනයට හිටපු ආරක්ෂක ලේකම් ගෝඨාභය රාජපක්ෂ සම්බන්ධයැයි සැක කරන්නේ ඇයි?.. ගෝඨාභය රාජපක්ෂ මහතා තමන් මීළඟ ජනාධිපතිවරණයට ඉදිරිපත්වන්නට තමන් සූදානම් යැයි කියන පසුබිමක මේ කරුණ සනාථ කරන තොරතුරු සොයා යෑම බෙහෙවින් වැදගත් ය. ආවාට ගියාට ඔහුට විරුද්ධව කරුණු කීම ඔහුට විරුද්ධව මඩ ප්‍රචාර දියත්කරනවා යැයි පාඨක සැකයට තුඩු දෙන්න පුළුවන්.. ඒනිසා සොයා යමු..

මුල් පරීක්ෂණ
ලසන්ත වික්‍රමතුංග දෙහිවල අත්තිඩියේදී බෝල්ට් ගන් වර්ගයේ ආයුධයකින් හිස සිදුරුකර ඝාතනයට ලක්කරන්නේ 2009/01/08 දාවකය. ඒ මුහුණු ආවරණය කරගෙන ජැකට් දමාගෙන යතුරු පැදියක පැමිණි ආරක්ෂක අංශවල මිනීමරුවන් විසින් ය. ඒ පිළිබඳව සනාථවන තොරතුරු දැන් බොහෝ රහස් පොලිස් විමර්ශන කණ්ඩායම සතුය. මෙම ඝාතනය සිදුවිමෙන් පසු ගල්කිස්ස පොලිසියේ අපරාද අංශය මේ පිළිබඳව පරීක්ෂණ කරන අතර, එහෙත් ඒ පිළිබඳව සෑහිමකට පත් නොවන ලසන්තගේ පවුලේ සාමාජිකයින් ගල්කිස්ස උසාවියට කරන ඉල්ලීමක් මත අධිකරණය මෙම පරීක්ෂණ අපරාද පරික්ෂණ දෙපාර්තමේන්තුව යටතට පත්කරන්නේය. ඒ 2009/11/24 දිනය. ඒ අනුව 2009/11/25 වැනි දින මෙම පරික්ෂණ රහස් පොලිසිය විසින් ගල්කිස්ස පොලිසියෙන් තමන් යටතට ලබාගෙන ඇත. එම ලබාග ැනීමත් සමග ලසන්ත ඝාතන පරීක්ෂණ සක්‍රීය වන්නේය. ඒ අනුව රහස් පොලිසිය ලසන්ත පසුපස පැන්නු දූරකථන අංක 5ක් සොයාගන්නේය. ඉන්පසුව රහස් පොලිසිය එම දූරකථන අංක 5 පිටුපස ගමන් කරන අතර එහිදී එම අංක ලබාගත්තේ යැයි කියන පිච්චෙයි ජේසුදාසන් හමුවන්නේය. එහිදී ජේසුදාසන් අත්අඩංගුවට පත්වෙන අතර ඉන්පසුව රහස් පොලිසිය භාරයේ තිබුණ ලසන්ත ඝාතන පරීක්ෂණ ත්‍රස්තවිමර්ශන කොට්ඨාසයේ වාකිස්ට මහතා යටතට පැවරෙන්නේය. එයට හේතුව ලෙස එවක පොලිස්පති මහින්ද බාලසුරිය කියන්නේ රහස් පොලිසියට වැඩ වැඩි නිසා මෙම පරීක්ෂණ ත්‍රස්ත විමර්ශන කොට්ඨාසයට මාරුකර යවන බවය. මේ ගෝඨාභය මෙම ඝාතනයට අණ දුන්නා යැයි සැක සිතෙන එක තැනැක්‍ ය. මෙම මාරුකිරීමේදි ලසන්ත ඝාතන පරික්ෂණය පමණක් නොව කීත්නොයාර් ට සහ උපාලි තෙන්නකෝන්ට පහර දීමේ සිද්ධිය පිළිබඳ පරීක්ෂණද ත්‍රස්තවිමර්ශන කොට්ඨාශයට මාරුවී යන්නේය. පසුව අනාවරණය වන්නේ මෙම සිද්ධීන් තුනම එකම කණ්ඩායමක් විසින් කරන ලද ක්‍රියා බවය. මෙම කණ්ඩායම කොළඹ ටි්‍රපෝලි යුද හමුදා බුද්ධි කඳවුරේ සිටි බුද්ධි කණ්ඩායමක් බව දැන් තොරතුරු අනාවරණය වී ඇත. මෙම සිද්ධි සියල්ල වන කාලයේ ආරක්ෂක ලේකම්වරයා ගෝඨාභය රාජපක්ෂ බව මතක තබා ගත යුතුය.

ෆොන්සෙකා යටතේ සිටි සෙබළුන් අත්අඩංගුවට
2010/ 02/ 08 වැනි දින ත්‍රස්ත විමර්ශන කොට්ඨාසය විසින් යුද හමුදා සෙබළුන් 17 දෙනෙකු අත්අඩංගුවට ගන්නේය. මෙම කාලය 2010 ජනාධිපතිවරණය නිමවී ඒ ආසන්නතම කාලයයි. පරාජිතයා හිටපු යුද්ධ හමුදාපති සරත් ෆොන්සේකාය. මේ අත්අඩංගුවට ගන්නේ ඔහු යටතේ ඔහුට සමීපව සේවය කළ හමුදා සෙබළුන් කණ්ඩායමක් ය. සිත් අලවන කාරණය වන්නේ මොවුන් ත්‍රස්තවාදය වැළැක්වීමේ පනත යටතේ අත්අඩංගුවට ගෙන පොලිස් ඇපමත මුදා හැරීමය. එය එහෙම වන්නේ කෙසේද?.. එය දන්නේද එවක පොලිසිය පමණි. මෙම අත්අඩංගුවට ගැනීම සිද්ධකරන පොලිස් නිලධාරියාවන අයි. පී ජයසුන්දර ඒ පිළිබඳව සටහන් තබන්නේ ඩී අයි ජී කියපු නිසා, ඕ යි සී කියපු නිසා අත්අඩංගුවට ගත්තා කියාය. රජය පෙරළන්න කුමන්ත්‍රණය කලා යැයි කියමින් මේ පිරිස අත්අඩංගුවට ගත්තද මොවුන් සැබවින්ම අත්අඩංගුවට ගෙන තිබුණේ මෙම ඝාතනයට සරත් ෆොන්සෙකා හසුකිරීම සඳහාය. එහෙත් මේ අත්අඩංගුවට ගැනීම පිළිබඳව කිසිදු තොරතුරක් ගල්කිස්ස අධිකරණයට පොලිසිය වාර්තා කර නැත. ඊට අමතරව මේ අත්අඩංගුවට ගත් කිසිවෙක් හඳුනාග ැනීමේ පෙරෙට්ටුවකට හෝ ඉදිරිපත් කර නැත. එවක ත්‍රස්ත විමර්ශන කොට්ඨාසයේ වැඩ මෙහෙම නම් ඒ වැඩ සඳහා කවුරුන් අණ දෙන්නට ඇතිද?. එවක ආරක්ශක අමාත්‍යාංශ සහ ආරක්ෂක අංශ කටයුතු කළේ කාගේ රිජු නියෝග මතදැයි දන්නා ඕනිම කෙනෙකුට එන්න පුලු‍වන් එකම එක සැකයකි. කෙසේ හෝ පොලිසියේ මේ හැසිරීමත් මෙම ඝාතනයට ගෝඨාභය සැකකරන්නට එක හේතුවක්ය. අනෙක් වැදගත්ම කාරනය වන්නේ ජේසුදාසන් සිරගතව සිට මියගියත් ඔහුගේ තොරතුරු මත අත්අඩංගුවට ගත් කොළඹ ටි්‍රපෝලි කඳවුරේ කන්දේ ගෙදර ප්‍රියවංශ යුද හමුදාවෙන් පඩි ලබමින් අවුරුද්දක පමණ කාලයක් සුවපහසු සිරගත ජීවිතයක් මෙම සිද්ධිය අරඹයා ගෙවා දැමීමය. මෙම කන්දේ ගෙදර ප්‍රියවංශගේ අත්අඩංගුවට ගැනීමෙන් පසුව හෝ වාකිස්ඨගේ ත්‍රස්ත විමර්ශන කොට්ඨාසය ටි්‍රපෝලි කඳවුර මූලික කරගෙන පරීක්ෂණ මෙහෙයවන්නේ නැත. මෙයත් ගෝඨාභය රාජපක්ෂ මෙම ඝාතනයට සැකකරන්නට හේතුවක් ය.

ලසන්ත ඝාතනයට පැමිණි යතුරු පැදිය
2009/01/26 වැනි දින පොලිස් මූලස්ථානයේ පොලිස්පතිතුමාට තොරතුරක් ලැබෙන්නේ ලසන්ත ඝාතනයට පැමිණි යතුරු පැදිය අත්තිඩිය ප්‍රදේශයේ ඇල මාර්ගයක දමා ගොස් ඇති බවය. එහෙත් දැන් අනාවරණය වී ඇති කරුණු කියන්නේ මෙම යතුරු පැදිය ගොඩග ැනීම සඳහා පොලිසිය 25 වැනි දින සිට කටයුතු කර ඇති බවය. සූදානම් වී ඇති බවය. මේවානම් මාරම කතාය. ඒ අනුව පැහැදිලි වන්නේ, මෙම ඝාතන කතාව වෙනතක හැරවීම සඳහා මෙම යතුරු පැදි නාටකය නිර්මාණය කර ඇති බවය. එය තව දුරටත් සනාථ වන්නේ 2015 රෙජීමය පාලන බලයෙන් බැසගිය පසු නැවත සක්‍රීය වන අපරාද පරීක්ෂණ දෙපාර්තමේන්තුවේ පරීක්ෂණ නිසාය. නවතම පරීක්ෂණ තොරතුරුවලින් තහවුරු වී තිබෙන්නේ මේ යතුරු පැදි නාටකය මෙම ඝාතනය එල්.ටී.ටී.ඊ සංවිධානය මත පැටවීම සඳහා කළ එකක් බවය. මෙහිදි හමුදා කණ්ඩායමක් විසින් වව්නියාවේ සෙට්ටිකුලම් හිදී, මෙම යතුරු පැදිය දෙමළ ජාතිකයින් දෙදෙනෙකු සමග පැහැරගෙන ඇත. ඒ 2009/01/18 වැනි දිනය. මෙහිදී පැහැර ගැනීමට ලක්වෙන්නේ විශ්වකුමාර් සහ බාල්‍ රාජ් ය. විශ්වකුමාර් යතුරු පැදියේ හිමිකරුවන අතර බාල් රාජ් බියරයක් බීම සඳහා නගරයට යෑමට බයිසිකලයට නැගි ඔහුගේ හිතවතෙක් ය. මෙහිදී ඇසින් දුටු එක සාක්ෂියක් පවසන්නේ මෙම පුද්ගලයින් දෙදෙනා හමුදා ජීෆ් රථයට නන්වාගෙන එම රථයේ පැමිණි පුද්ගලයෙක් යතුරු පැදියේ ගමන් කළ බවය. ඒ අනුව ඔහු හමුදා සෙබළෙක් වන්නට ඇත. ඔවුන් එලෙස බීර බොන්න ගියා ගියාමය. නැවත පැමිණියේ නැත.
ඉන්පසු දම්බිරිගස්වැව ප්‍රදේශයෙන් වෙඩි තබා ඝාතනය කර පසුව පිළිස්සූ මළ සිරුරු දෙකක් හමුවෙන අතර එම මළ සිරුරුවල ඩී එන් ඒ විමර්ශන මගින් අනාවරණය වන්නේ මෙම පුද්ගලයින් දෙදෙනා පැහැරගැනීමට ලක්වූ විශ්වකුමාර් සහ බාල් රාජ් බවය. එදා ලසන්ත ඝාතනය ත්‍රස්තවාදීන් කළා යැයි කීම සඳහා නිර්මාණය කළ නාටකය අසරණයින් දෙදෙනෙකුගේ ජීවිත බිලි ගත්තේ එසේය. මෙවැනි ඝාතන ඉහළ නියෝගයකින් තොරව කළ හැකිද? ඉන්පසුව මෙම බයිසිකලය අධිආරක්ෂිත මුරකපොලු‍ පසුකර කොළඹ ආවේ කෙසේද?.. ඒඅනුව පැහැදිලි වන්නේ මේ ඝාතනයන් දෙකද යතුරුපැදිය රත්මලාන අත්තිඩියේ ඇලට පැමිණිමේ සියල්ලද ඉහළ උපදෙස් සහ මගපෙන්වීම මත සිදුකර ඇති බවය. මෙම සිද්ධියද ගෝඨාභය රාජපක්ෂ මෙම ඝාතනයට සැකකිරීම සඳහා එක හේතුවක් ය.

ගල්කිස්සේ විමර්ශන
මෙම ඝාතනය සිදුවූ පසු ඒ පිළිබඳව මුලින්ම පරීක්ෂණ ආරම්භ කරන්නේ ගල්කිස්ස පොලිසියේ අපරාධ අංශයයි. එහිදී සිද්ධවී තිබෙන්නේ කුමක්ද? පරීක්ෂණ කිසිවක් සිදුවී නැත. එහෙත් මෙම ඝාතනයේ සාක්ෂි මකාදැමීමට සාක්ෂි වසන්කිරීමට ගල්කිස්ස පොලිසිය ලොකු උනන්දුවකින් කටයුතු කර ඇත. ඒ අනුව ලසන්ත වික්‍රමතුංගගේ සටහන් පොත අතුරුදන් වන්නේය. බොහෝ ලිපි ලේඛන විනාශ වන්නේය. ලසන්ත ඝාතනය පිළිබඳව වැදගත් තොරතුරු රැසක් අනාවරණය කළ ලාල් වැලන්ටයින් නැමැත්තාගේ සාක්ෂි පිළිබඳව කිසිදු සැළකිල්ලක් දක්වා නැත. මේවායින් පෙනෙන්නේ ගල්කිස්ස පොලිසිය මෙම ඝාතනය සිදුවූ මුල් අවදියේම එය වසාදැමීමට උනන්දුවෙන් කටයුතු කර ඇති බවය.
ගල්කිස්ස පොලිසියේ මෙම හැසිරීම පිළිබඳව 2015 සැප්තැම්බර් මාසයෙන් පසුව අපරාද පරික්ෂණ දෙපාර්තමේන්තුව පරික්ෂණ මෙහෙයවන අතර එහිදී මේ පිළිබඳව වැදගත් තොරතුරු රැසක් අනාවරණය වී ඇත. එහිදී වැදගත්ම සාක්ෂිය ලැබෙන්නේ අයි පී සුගතපාලගේ ප්‍රකාශය හරහාය. එහිදී ඔහු පවසන්නේ එවක බස්නාහිර ප්‍රදේශය භාරව සිටි නියෝජ්‍ය පොලිස්පති ප්‍රසන්න නානායක්කාර ‘මේක ගෝඨාගේ වැඩක්. මිනිහට තමයි ලසන්ත මරන්න ඕනි වෙලා තිබුණේ’ යැයි තමන්ට පැවසූ බවය. ඒ අනුව පරීක්ෂණ නිසි ලෙස සිද්ධ නොවුණ බවය. මෙහිදී එවක පොලිස්පති මහින්ද බාලසූරියද හැසිරී ඇත්තේ මෙම පරික්ෂණ සගවනු රිසියෙනි. තත්ත්වය එසේනම් ඔවුන් එලෙස කළේ කාගේ උවමනාව මතද?.. ඔවුන්ට ඉහළින් සිට ඒ සඳහා බලපෑම් කළේ කවුරුන්ද?… සිතා බැලිය යුතුය. ලසන්තගේ ඝාතනය පිළිබඳව ගල්කිස්ස පොලිසියේ මෙම හැසිරීමද මෙම ඝාතනයට අණ දීම පිළිබඳව ගෝඨාභය රාජපක්ෂ සැකකරන්නට එක හේතුවක් ය.

පවුලේ සැකය
ලසන්ත වික්‍රමතුංගගේ දියණිය, බිරිඳ, සහෝදරයා ආදී පවුලේ සියල්ලන්ගේම සැකයද මේවනවිට එල්ලවන්නේ ගෝඨාභ රාජපක්ෂ වෙතය. ඔවුන් එය අපරාද පරීක්ෂණ දෙපාර්තමේන්තුවට ප්‍රකාශ ලෙස ලබාදී ඇත. එයට හේතුව මිග් යානා ගණුදෙනුව පිළිබඳව ලසන්ත වික්‍රමතුංග එවකදී සන්ඬේ ලීඩර් පුවත්පත හරහා කරනු ලැබූ හෙළිදරව්වය. එම හෙළිදරව්ව පිළිබඳව ගෝඨාභය රාජපක්ෂ බෙහෙවින් කෝපයට පත්වී සිට ඇතැයි ඔහුගේ සමීපතමයෝ බොහෝ දෙනෙක් අනාවර්ණය කර ඇත. මාධ්‍යවේදියෙක් ලසන්ත වික්‍රමතුංග පිළිබඳව සම්මුඛ සාකච්ඡාවකදී ගෝඨාභය රාජපක්ෂගෙන් විමසා සිටි විට ඔහු කෝප වී අසන්නේ ‘ලසන්ත කියන්නේ කවුද?’ කියාය. එම හැසිරිමෙන්ද ලසන්ත පිළිබඳව එවක ආරක්ෂක ලේකම්වරයාට තිබුණු කෝපයේ පරිමාව සිතාගන්නට අමාරු නැත. මේ වනවිට මිග් යානා ගනුදෙනුව පිළිබඳව අනාවරණය වී තිබෙන කරුණු අනුව පෙනෙන්නේ ලසන්ත වික්‍රමතුංග එවකදී කරනු ලැබූ හෙළිදරව්ව බොහෝ දුරට නිවැරදි බවය. ඒ අනුව මෙම ඝාතනයට ගෝඨාභය රාජපක්ෂ අණ දුන්නේ දැයි සැකකරන්නට එයද එක හේතුවක් ය. මේ සියළු කරුණු වඩාත් සවිස්තරව ඉදිරිපත් කරමින් පසුගි යදා අපරාද පරීක්ෂණ දෙපාර්තමේන්තුව ගල්කිස්ස අධිකරණයට කරුණු ගොනු කළේ, මේ සියළු තොරතුරු මත සිට මෙම ඝාතනයට ගෝඨාභය රාජපක්ෂ සම්බන්ධ දැයි ඉදිරි විමර්ශන කරන බවය.
මේ අනුව එක පැත්තකින් තමන්ගේ දෙමාපියන්ගේ සොහොන් සෑදීම සඳහා රාජ්‍ය මුදල් අවභාවිතා කලාදැයි අධිකරණය ඉදිරියේ ගෝඨාභය රාජපක්ෂට විරුද්ධව නඩුකටයුත්තක් විමර්ශනය වෙමින් තිබෙන අතර ලසන්ත වික්‍රමතුංග ඝාතන පරීක්ෂණය ආදී බොහෝ පරීක්ෂණද ඔහු සම්බන්ධයෙන් පැවැත්වෙමින් තිබෙන්නේය. ඒ අනුව ජනාධිපති ධූරයට තරග කිරිමේ ඔහුගේ සිහිනයට කුමක් වියහැකිද?….කාලය විසි එය තීරණය කරනු ඇත.■

වගාවන්ට හානි කරමින් දැනට රටපුරා වසන්ගතයක් සේ පැතිර යන සේනා දළඹුවා පිළිබඳ මතිමතාන්තර දිනෙන් දින කළඑළි බසිමින් පවති.
සමහරුන්ට අනුව එය බීජ මඟින් මෙරටට පැමිණි උවදුරක්ය. එම තත්ත්වය ජාත්‍යන්තර භූ දේශපාලන සංදර්භයක් තුළ විග්‍රහ කරමින් සමහරුන් ප්‍රකාශ කරන්නේ සේනා දළඹුවා බලවත් විදේශ රටවල හා බහුජාතික සමාගම්වල කුමන්ත්‍රණයක් බවය. ශ්‍රී ලංකාවේ කෘෂිකර්මාන්තය විනාශ කිරීමටත් විදේශ බලවතුන්ගේ කෘමිනාශක ඇතුළු රසායනික ද්‍රව්‍ය විකුණා ගැනීමටත්, ඒ මඟින් ශ්‍රී ලංකාවේ සරුසාර පොළව විනාශ කිරීමටත් ගෙන ආ කුමන්ත්‍රණයක් බව එම කථාවල සාරයය.
කෙසේ වෙතත් කෘෂිකර්ම අධ්‍යක්‍ෂ ජෙනරාල් ඩබ්ලිව්. එම්. ඩබ්ලිව්. වීරකෝන් මහතා ඒ සම්බන්ධයෙන් කෘෂිකර්ම දෙපාර්තමේන්තුවේ මතය ජනවාරි 22 වැනිදා කෘෂිකර්ම අමාත්‍යාංශයේදී පැවති ප්‍රවෘත්ති සාකච්ඡාවකදී ප්‍රකාශ කළ බව පුවත්පත් වාර්තා කර ඇත. ඒ අනුව කෘෂිකර්ම අධ්‍යක්‍ෂ ජෙනරාල්වරයාගේ මතය වන්නේ සේනා දළඹුවා බීජ මඟින් නොව සුළඟ මඟින් ශ්‍රී ලංකාවට පැමිණ ඇති බවය. ඊසානදිග සුළඟ හරහා සේනා දළඹුවා පැමිණ ඇති බව ඔහු එහිදී කියා ඇත.
සේනා දළඹුවා පිළිබඳව කෘෂි විද්‍යාඥයන්ගෙන් කරුණු විමසූ විට හා අන්තර්ජාලයේ ඇති තොරතුරු පිරික්සු විටද දැනගන්නට ලැබෙන්නේ මේ දළඹුවාට සුළගත් එමට ක්‍රිලෝමීටර් 100ක් වැනි දිගු දුරක් ගමන් කළ හැකි බවය. අසල් වැසි ඉන්දියාවේ කර්නාටක ප්‍රාන්තයේ වගාවටද සේනා දළඹුවාගේ ප්‍රහාරය වැදී ඇති තත්ත්වය තුළ ඉන්දියාවේ සිට සුළඟ මඟින් මෙම දළඹු උවදුර අපට එන්නට ඇතැයි අනුමාන කරන්නට ඇත.
එසේ සුළඟ මඟින් සේනා දළඹුවා නාවත් අසල්වැසි ඉන්දියාවේ සිට සේනා දළඹුවා ශ්‍රී ලංකාවට පැමිණිය හැකි තවත් මාර්ගයක් වන්නේ මුහුදු යාත්‍රා මඟින් සේනා දළඹුවා පැමිණීමේ ඉඩකඩය. ඉන්දීය ධීවරයින් අනවසරෙන් ශ්‍රී ලංකාවේ මුහුදු තිරයේ මසුන් ඇල්ලීමේදී අත්අඩංගුවට පත්වෙන අතර එසේ අත්අඩංගුවට ගන්නා ධීවරයන් සමග ඔවුන් පැමිණි ධීවර යාත්‍රාද අත්අඩංගුවට ගෙන ශ්‍රී ලංකාවට ගෙන ඒම සිදුකරයි. එවැනි අවස්ථාවකදී වුවද එම බෝට්ටුවල සේනා දළඹුවන් ඔවුන් ගෙනෙන ආහාර ද්‍රව්‍ය සමග මෙරටට පැමිණිය හැකිය.
අනෙක් පැත්තෙන් ඉන්දියාව හා ශ්‍රී ලංකාව අතර මුහුදු මඟින් සිදුකරන ජාවාරම්වලදී ගෙනෙන බඩු අතර සේනා දළඹුවන් පැමිණිය හැකිය.
සේනා දළඹුවන් සුළඟෙන් පැමිණියාද නැතහොත් ඉහත කී වෙනත් ආකාරයකින් පැමිණියාද යන කාරණය පසෙකින් තැබුවහොත් ජනප්‍රිය මත දැක්වීම වන බීජ මඟින් සේනා දළඹුවන් මෙරටට පැමිණිය හැකිද? අප සාකච්ඡා කළ කෘෂිකර්ම විශේෂඥයන්ට අනුව නම් එසේ පැමිණීමට තිබෙන ඉඩකඩ ඉතා සිමිතය. එම විශේෂඥයන්ට අනුව එසේ බීජ ගෙන්වන සමාගම් නිසි ක්‍රමවේදයට හෙවත් නිරෝධා යන ප්‍රමිති අනුගමනය කරමින් බීජ ගෙන්වීම ඊට හේතුවය.
මේ බීජ ගෙන්වීම යැයි අප කියන්නේ වගාව සඳහා පිළිගත් ආයතන ගෙන්වන බීජය. එය එසේ යැයි පැත්තකින් තැබූ විට බීජ නොව වෙනත් ආකාරයකට බව ඉරිඟු මෙරටට ගෙන්වන්නේ නැතිද? බඩ පිළිතුර වන්නේ ගෙන්වනවා යන්නය. ඒ සත්ත්ව ආහාර නිෂ්පාදනය සඳහාය. ශ්‍රී ලංකාවේ වගාකරනු ලබන බඩ ඉරිඟු සත්ත්ව ආහාර නිෂ්පාදනය සඳහා යම් වර්ෂයකදී මදි බවට ඇස්තමේන්තු කිරීමෙන් පසු පිළිගත් සත්ත්ව ආහාර නිෂ්පාදකයින්ට ඒ සඳහා අවසර ලබාදීම සිදුකර ඇත. එසේ සත්ත්ව ආහාර සඳහා පිළිගත් සත්ත්ව ආහාර නිෂ්පාදකයින් ගෙන්වූ බඩඉරිඟු කෙළින්ම ඔවුන්ගේ නිෂ්පාදනාගාරවලට යෑම සිදුවී ඇත. එම බඩ ඉරිඟු වෙළෙඳපොළට පැමිණ තිබුණේ නැත.
එහෙත් පිළිගත් සත්ත්ව ආහාර නිෂ්පාදකයන්ට බඩ ඉරිඟු ආනයනය කිරීමට ලබාදුන් ක්‍රමවේදයට වෙනස් ක්‍රමවේදයක් පසුගිය කාලයේ කෘෂිකර්ම අමාත්‍යාංශය ආරම්භ කර තිබුණි. ඒ යහපාලනයේ කෘෂිකර්ම අමාත්‍ය දුමින්ද දිසානායකගේ පාලන කාලයේදීය. ඒ අනුව සිදුකර තිබුනේ සත්ත්ව නිෂ්පාදන සඳහා බව ඉරිඟු ගෙන්විමේ නියමිත කෝටාවක් හෙවත් වාර්ෂිකව බඩ ඉරිඟු මෙටි්‍රක් ටොන් 50000ක් ගෙන්වීමේ අවසරය ආහාර ප්‍රවර්ධන මණ්ඩලය යටතට ගැනීමය. (ජාතික සාගිනි නිවීමේ ව්‍යාපාරය වශයෙන් මේ ආහාර ප්‍රවර්ධන මණ්ඩලය ඊට පෙර පැවත ඇති අතර එම නාමය වෙනස් කිරීම ඊට අදාළ පනත සංශෝධනය කිරීමකින් තොරව සිදුකර ඇත.)
ආහාර ප්‍රවර්ධන මණ්ඩලය නමට ගත් මේ මෙටි්‍රක් ටොන් 50000ක් වු කෝටාව යටතේ ඔවුන් විසින් ආනයනය කිරීමක් සිදුකර නැති අතර එම කෝටාව සත්ත්ව ආහාර නිෂ්පාදකයන් නොවන වෙනත් පිරිසකට වාර්ෂිකව බෙදාදීම සිදුකර ඇත. ඒ මඟින් නිල වශයෙන් ආහාර ප්‍රවර්ධන මණ්ඩලයට කොමිස් මුදලක් ලැබී ඇත. විනිවිදභාවයකින් තොරව බෙදාදුන් මේ කෝටාවෙන් නොනිල වශයෙන් එහි නිර්මාතෘවරයන්ට යම් සැළකිම් ලැබී ඇතුවාට සැක නැත.
කෙසේ වෙතත් මෙම කෝටාව හරහා ශ්‍රී ලංකාවට ගෙන්වනු ලැබූ බඩ ඉරිඟු සියල්ලම සත්ත්ව නිෂ්පාදකයන්ගේ නිෂ්පාදනාගාරවලට ගියාද? ඉන් යම් කොටසක් වෙළෙඳපොළට ගියාද යන ප්‍රශ්නයද දැන් කෘෂිකර්ම ක්ෂේත්‍රයේ විශේෂඥයන්ගේ කථා බහට ලක්වී ඇත.
එසේ කථාබහට ලක්වීමට හේතුව නිෂ්පාදනාග ාරවලට නොගොස් එම බඩ ඉරිඟු වෙළෙඳපොළට ගියහොත් ඒ මහින්ද සේනා දළඹුවා පැමිණීමේ ඉඩකඩක් විවර වීමය.
එහිදී පැන නගින අනෙක් ප්‍රශ්නය වන්නේ එසේ සත්ත්ව ආහාර සඳහා පිළිගත් නිෂ්පාදකයන් නොව නපිරිස් විසින් ආහාර ප්‍රවර්ධන මණ්ඩලයට ලබාදුන් බලපත්‍රය යටතේ බඩඉරිඟු ගෙන්වීමේදී නිසි නිරෝධායන ක්‍රමවේද අනුගමනය කරන්නේ නැතිද යන්නය.
සාමාන්‍යයෙන් ශ්‍රී ලංකාවට ගෙන්වනු ලබන බීජ වර්ග නිරෝධායනයට ලක්කිරීම කොළඹ වරායේදී හා කටුනායකදී සිදුකෙරේ. මෙවැනි බීජ කන්ටේනරය තුළ තිබියදීම නිරෝධානය කිරීම සිදුකරන අතර ඒ සඳහා යන වියදම ආනයනකරු විසින් ගෙවිය යුතුය. එම නිරෝධායන කටයුත්ත සඳහා සැළකිය යුතු මිලක් වැයවන අතර මේ ආකාරයේ වූ කුඩා පරිමාණ ආනයනකරුවන් සිදුකරන්නේ එම සම්මත ක්‍රමවේදයෙන් පිටපැන සිය ලාභ තීරුව වැඩිකර ගැනීමට කටයුතු කිරීමය. එහිදී සිදුවිය හැකි දෙය වන්නේ මේ නිරෝධායන කටයුතු භාගෙට සිදුකොට භාණ්ඩ නිදහස් කර ගැනීමට ආනයනකරුවන් කටයුතු කිරීමය. ඒ සඳහා දක්වන සහායට නිරෝධායන කටයුතු බාර රජයේ නිලධාරීන්ටද සැළකීමක් අනිවාර්යෙන් ලැබෙනවාට සැක නැත.
නමුත් මේ භාග කටයුතුවල හෝ නිරෝධායන නොකිරීමේ තතත්වයන් තුළ අවසන් ප්‍රතිඵලය විය හැක්කේ සේනා දළඹුවා වැනි වසංගත තත්ත්වයන් දේශීය ගොවිතැනට කාන්දු වීමය. ඉතිං සේනා දළඹුවා මැඩීමේ මේ ක්‍රියාන්විතයේදී එම සැකයේ හිල්ද වසා දැමීම ශ්‍රී ලංකාවේ කෘෂිකර්මාන්තයේ හෙට දවසට හොඳය. ඊට තීන්දු තීරණ ගන්නා බලධාරීන සූදානම්ද?■