මීළඟ සතියේ සිට බදාදා දිනවල ශ්‍රී ලංකා පොදුජන පෙරමුණේ බැනරය යටතේ මාධ්‍ය හමුවක් නොපවත්වන බවත් ඒ වෙනුවට විපක්ෂ නායක කාර්යාලයේ සිට විපක්ෂයේ පක්ෂ නායකයන්ගේ මාධ්‍ය හමුවක් පවත්වනු ඇති බවත් අනිද්දා සමඟ අදහස් දක්වමින් එජනිස පාර්ලිමේන්තු මන්ත්‍රී ඩලස් අලහප්පෙරුම පැවසීය.
ශ්‍රී ලංකා පොදුජන පෙරමුණේ බැනරය යටතේ පොදුජන පෙරමුණු කාර්යාලයෙහි මාධ්‍ය සාකච්ඡාවලට සහභාගි වීමට ශ්‍රීලනිපය නියෝජනය කරන පාර්ලිමේන්තු මන්ත්‍රීවරුන් අකමැත්තක් දක්වන නිසා, වඩා සුදුසු ක්‍රමවේදයක් ලෙස ඉහත කී ආකාරයට මාධ්‍ය හමුව පැවැත්වීමට එකඟ වූ බව ඔහු කීය.
ජනවාරි 23 වැනි බදාදා උදෑසන 10ට විපක්ෂ නායක කාර්යාලයෙහි සහ බත්තරමුල්ලේ ශ්‍රී ලංකා පොදුජන පෙරමුණු කාර්යාලයෙහි මාධ්‍ය හමු දෙකක් පැවැත්වීමට නියමිතව තිබුණි. කෙසේ වෙතත් ශ්‍රී ලංකා පොදුජන පෙරමුණේ බැනරය යටතේ පැවැත්වීමට නියමිතව තිබුණු මාධ්‍ය හමුව පැයකටත් වඩා ප්‍රමාද වී පවත්වා තිබුණු අතර එම මාධ්‍ය හමුවට පැමිණෙන බව සඳහන් කර තිබුණු පාර්ලිමේන්තු මන්ත්‍රීවරුන් පැමිණ සිටියේද නැත.
මේ පිළිබඳව කළ විමසීමකදී නිර්නාමිකව අදහස් දැක්වූ ශ්‍රී ලංකා පොදුජන පෙරමුණේ ප්‍රබලයෙකු පැවසුවේ පාර්ලිමේන්තු මන්ත්‍රී ඩලස් අලහප්පෙරුම විසින් විපක්ෂයේ පාර්ලිමේන්තු මන්ත්‍රීවරුන්ට එම මාධ්‍ය සාකච්ඡාවට සහභාගි නොවන ලෙසත්, එම සාකච්ඡාව නොපවත්වන ලෙසත් පවසා තිබුණු බවයි. ඒ නිසා පැවැත්වීමට නියමිතව තිබුණු මාධ්‍ය සාකච්ඡාව කඩාකප්පල් වූ බව එම මන්ත්‍රීවරයා කීය.
කෙසේ වෙතත් අනිද්දා සමග අදහස් දක්වමින් එම ප්‍රකාශය ප්රතික්ෂේප කළ ඩලස් අලහප්පෙරුම මන්ත්‍රීවරයා කීවේ බදාදාට මාධ්‍ය හමුව පවත්වන ස්ථානය පිළිබඳව ගැටලු‍වක් තිබුණු බවත්, ජනවාරි 23 වැනි බදාදා එම ගැටලු‍ව නිරාකරණය වූ බවත්ය. එය අවබෝධයකින් යුතුව සිදුවූවක් බවත්, කිසිදු ගැටුමක් ඇති නොවූ බවත් ඔහු කීය. ඒ පිළිබඳ වැඩිදුර අදහස් දක්වමින් ඔහු ඉහත ප්‍රකාශය සිදුකළේය.■
පොහොට්ටු මාධ්‍ය හමු නෑ ඩලස් අලහප්පෙරුම
නීතිමය වාර්තාවක් හැදුවේ ජනපතිගේ ඉල්ලීමට : ජයම්පති
නව ව්‍යවස්ථාව පිළිබඳව නීතිමය ස්වරූපයේ වාර්තාවක් ඉල්ලා සිටියේ ජනාධිපති මෛත්‍රීපාල සිරිසේන විසින් බවත් එම වාර්තාව ආණ්ඩුක්‍රම ව්‍යවස්ථා මණ්ඩලයට ඉදිරිපත් කර ඇති පසුබිමක ඉදිරියේදී නව ව්‍යවස්ථාව පිළිබඳව අවසන් කෙටුම්පතක් සකස් කළ යුතු බවත් අනිද්දා කළ විමසිමකදී පාර්ලිමේන්තු මන්ත්‍රී ආචාර්ය ජයම්පති වික්‍රමරත්න පැවසීය.
මීට පෙර ආණ්ඩුක්‍රම ව්‍යවස්ථා මෙහෙයුම් කමිටුව හා අනුකමිටු හය විසින් ව්‍යවස්ථා යෝජනා ඇතුළත් වාර්තා ඉදිරිපත් කර තිබුණි. එම වාර්තාවල නව ව්‍යවස්ථාවක් පිළිබඳ යෝජනා ඇතුළත්ව තිබුණේ සාමාන්‍ය යෝජනා ලෙස පමණක් බවත්, ඒ වෙනුවට නීතිමය ස්වරූපයෙන් වාර්තාවක් සකස් කරන ලෙස ජනාධිපති මෛත්‍රීපාල සිරිසේන විසින් ඉල්ලූ බවත් ඔහු පෙන්වා දුන්නේය.
කෙසේ වෙතත් විද්වත් කමිටුව විසින් සකස් කළ වාර්තා දෙකේ අවසාන එකඟතා නොමැති බව ඔහු කීය. උදාහරණයක් ලෙස එම වාර්තා දෙකේ ඇති ඇතැම් යෝජනාවලට තමන්ද එකඟ නොවන බව ඔහු පෙන්වාදුන්නේය.
ඒ අනුව මීළඟට කළ යුත්තේ පාර්ලිමේන්තුවේ සියලු සාමාජිකයන්ගෙන් සමන්විත ආණ්ඩුක්‍රම ව්‍යවස්ථා මණ්ඩලය විසින් දැනට ඉදිරිපත්ව ඇති සියලු යෝජනා පිළිබඳව විවාද කළකිරීම බවත්, ඒ අදහස් මත පදනම්ව ආණ්ඩුක්‍රම ව්‍යවස්ථාව පිළිබඳ මෙහෙයුම් කමිටුව විසින් අවසන් වාර්තාවක් හා ඒ සමග කෙටුම්පතක් ඉදිරිපත් කළ යුතු බවත් ඔහු කීය.■
මෛත්‍රීට අපේක්ෂකත්වය නැතිව සන්ධාන බෑ : මහින්ද සමරසිංහ
ජනාධිපති මෛත්‍රීපාල සිරිසේනට ජනාධිපතිවරණ අපේක්ෂකත්වය ලබා නොදුන්නොත් ශ්‍රී ලංකා නිදහස් පක්ෂය හා ශ්‍රී ලංකා පොදුජන පෙරමුණ අතර සන්ධානයක් ඇති කර නොගත යුතුයැයි අනිද්දා කළ විමසීමකදී පාර්ලිමේන්තු මන්ත්‍රී මහින්ද සමරසිංහ පැවසීය.
මෙම කණ්ඩායම් දෙක එකම සන්ධානයකින් 2015 පාර්ලිමේන්තු මැතිවරණයට ඉදිරිපත් වූ අවස්ථාවේදී තමන් ඇතුළු ශ්‍රීලනිප අපේක්ෂකයන් ගණනාවක් පරාජය කිරීමට පොදුජන පෙරමුණේ දැන් සිටින කණ්ඩායම සංවිධානාත්මකව කටයුතු කළ බවද ඔහු සිහිපත් කළේය.
මෙම පක්ෂ දෙක අතර සන්ධානයක් ඇතිවෙන්නේ නම් දෙපාර්ශ්වයේම සාමාජිකයන්ගේ දේශපාලන අනාගතය සුරක්ෂිත විය යුතු බවත්, මෛත්‍රීපාල සිරිසේන ජනාධිපතිවරණ අපේක්ෂකයා ලෙසත්, මහින්ද රාජපක්ෂ අගමැති අපේක්ෂකයා ලෙසත් නම් කළහොත් පමණක් එම ආරක්ෂාව සහතික වනු ඇති බවත් ඔහු කීය.
මෛත්‍රීපාල සිරිසේන මහතාට ජනාධිපතිවරණ අපේක්ෂකත්වය ලබා නොදුන්නොත්, සන්ධානගත වෙනවාට වඩා ශ්‍රීලනිපය තනිව මැතිවරණවලට ඉදිරිපත් වීම වඩා සුදුසු බව ඔහු කීය. එලෙස සන්ධානගත වීමෙන් ශ්‍රීලනිප මන්ත්‍රීවරුන්ට ලැබිය හැකි ආසන ප්‍රමාණයට වැඩි ප්‍රමාණයක් තනිව ඉදිරිපත් වීමෙන් ලැබිය හැකියැයි තමන් විශ්වාස කරන බවද මන්ත්‍රීවරයා පැවසීය.
මෛත්‍රීපාල සිරිසේන ජනාධිපතිවරයා ඔක්තෝබර් 26 වැනිදායින් පසුව කටයුතු කළ ආකාරයත් ඔහු විසින් කර ඇති සේවයත් නිසා ඔහුට ජනාධිපතිවරණ අපේක්ෂකත්වය ලබා නොදීමට කිසිදු හේතුවක් නැතැයි තමාගේ මතය වන බව ඔහු කීය.■
එජාප සන්ධානය රනිල් නිසා නැවතිලා
එක්සත් ජාතික පෙරමුණේ සාමාජික පක්ෂ විසින් නව සන්ධානයක් පිහිටුවීමේ කටයුත්ත සම්පූර්ණයෙන්ම ඇනහිට තිබෙන බවත්, එයට හේතුව පසුපෙළ මන්ත්‍රීන්ගේ විරෝධයට වඩා රනිල් වික්‍රමසිංහ විසින් සන්ධාන යෝජනාව මඟහැරීම බවත් අනිද්දා සමග අදහස් දැක්වූ එක්සත් ජාතික පෙරමුණේ පක්ෂ නායකයෙක් පැවසීය.
ජනාධිපතිවරයා විසින් නීති විරෝධී ලෙස පාර්ලිමේන්තුව විසුරුවා එක්සත් ජාතික පක්ෂයේ නායක රනිල් වික්‍රමසිංහගේ නායකත්වයට තර්ජනයක් ඇතිවූ අවස්ථාවේදී ඔහු තම බලය ආරක්ෂා කරගැනීම සඳහා පුළුල් සන්ධානයක් ඇතිකිරීම පිළිබඳව යෝජනා කළද, දැන් තම නායකත්වය තහවුරු වී තිබෙන නිසා රනිල් වික්‍රමසිංහ විසින් එම යෝජනාව මඟහරින බව අනිද්දා සමග අදහස් දැක්වූ එම පක්ෂ නායකයා කීය.
නව සන්ධානයක් පිහිටුවීම සඳහා සියලු කටයුතු පසුගි ය කාලයෙහි සුදානම් කර තිබුණු බවත් සන්ධානය සඳහා ව්‍යවස්ථාවක්ද සකස් කර තිබුණු බවත් ඔහු පැවසීය. නව පක්ෂයක් මැතිවරණ කොමිෂන් සභාවෙහි ලියාපදිංචි කළ නොහැකි නිසා, දැනට පවතින පක්ෂයක නාමය හා ලකුණ නව සන්ධාන නාමය හා ලකුණට වෙනස් කරගත යුතුව තිබුණු බවත්, එලෙස වෙනස් කරගැනීමට දැනට පවතින පක්ෂයක අයිතිය පවා ලබාගෙන තිබුණු බවත් ඔහු කීය. කෙසේ වෙතත් මේ වෙද්දී ඒ සාකච්ඡා සියල්ල දින නියමයක් නැතිව කල් ගොස් තිබෙන බව ඔහු වැඩිදුරටත් පැවසීය. ඒ නිසා සන්ධානය පිළිබඳව සාකච්ඡාව කඩාකප්පල් වී තිබෙන බව ඔහු පෙන්වාදුන් අතර රනිල් වික්‍රමසිංහ විසින් එම සාකච්ඡාව ඉදිරියට ගෙන නොගොස්, සාකච්ඡා කල් දමා ඇතැයි ඔහු කීය. නැවත මැතිවරණයක් ළංවී, රනිල් වික්‍රමසිංහ මහතාගේ නායකත්වය පිළිබඳව ප්‍රශ්නයක්
ඇතිවුවහොත් සන්ධාන ක්‍රියාවලිය යළිත් ක්‍රියාත්මක වනු ඇතැයි තමන් විශ්වාස කරන බවද ඔහු විශ්වාසය පළ කළේය.■
තවත් ජනපති ඝාතන කුමන්ත්‍රණයක් ගැන පෙර දැනුම්දීමක්
ආරක්ෂක අමාත්‍යාංශයේ ලේකම් හේමසිරි ප්‍රනාන්දු කොළඹ නාලන්දා විද්‍යාලයේ පැවති උත්සවයකදී පසුගි යදා කළ ප්‍රකාශය මේ වන විට ආන්දෝලනයක් ඇති කර තිබේ. ඔහුගේ කථාවේ සාරය වූයේ යම් ත්‍රිවිධ හමුදා සාමාජිකයෙකු මිනිමැරුමක් සිදුකළ විට එම පුද්ගලයා රණවිරුවකු නොවන බවත්, එවැනි මිනීමැරුවන්ට එරෙහිව රටේ නීතිය අනුව කටයුතු කර දඬුවම් ලබාදෙන බවත් මේ ආකාරයේ සාහසිත මිනීමැරුමක් සිදුකළ හමුදා අපරාධකරුවන් පිරිසකට එරෙහිව සාක්ෂි සහිත එවැනි තොරතුරු ලබාදෙන ලෙස දෙමළ ඩයස්පෝරාවට අභියෝග කරන බවත්ය.
රණවිරුවන් අපරාධකරුවන් නොවන බවටත් අපරාධකරුවන් රණවිරුවන් නොවන බවටත් වූ ආරක්ෂක අංශයට අයත් සාමාජිකයෙකු වශයෙන් මුල් ආන්දෝලනාත්මක ප්‍රකාශය කරනු ලැබුයේ හිටුපු නාවික හමුදාපති ට්‍රැවිස් සින්නයියා වන අතර ඒ ඔහු නාවික හමුදාපති ධූරයේ වැඩ බාර ගැනීමෙන් පසු පැවති ප්‍රථම මාධ්‍ය හමුවේදීය. එම ප්‍රකාශය සිදුකළ ට්‍රැවල් සින්නයියාට සිදුවූයේ ලංකා ඉතිහාසයේ අඩුම දිග ගණනක් නාවික හමුදාපතිධුරය දැරූ පුද්ගලයා වශයෙන් සේනාධිනායක ජනාධිපතිවරයාගේ උදහසට ලක්වී ගෙදර යන්නටය. ජනාධිපතිවරයා එම තීරණය ගත් අවස්ථාවේදී ට්‍රැවිස් සින්නයියාගේ දෙමළ ජාතිකත්වයත්, හින්දු ආගමිකත්වයත්, ඒ වනවිටත් අධිකරණය හරහා සීඅයිඩීය ඉල්ලා සිටි නාවික හමුදා අපරාධකරුවන්ට එරෙහි සාක්ෂි ඔහු විසින් ලබාදේය යන අවිශ්වාසයක් බලපාන්නට ඇත.
ට්‍රැවිස් සින්නයියා අනුව යමින් එම ආන්දෝලනාත්මක ප්‍රකාශය නැවත පුනරුච්චාරණය කරන ලද්දේ යුද හමුදාපති මහේෂ් සේනානායකය. ඒද ඔහු යුද හමුදාපති ධුරයට පත්වීමෙන් පසු පළමු මාධ්‍ය හමුවේදීය. ප්‍රකාශය එසේ වුවද ඔහුගේ ක්‍රියාව නම් එතැන් සිට අද දක්වා එසේ වුයේ නැත. යුද හමුදා අපරාධකරුවන්ට අදාළ සාක්ෂි කිසිවක් ඔහු අධිකරණයට ලබාදුන්නේ නැත. ඒ වෙනුවට එම සාක්ෂි වසන් කරමින් පරීක්ෂණ කණ්ඩායම්වලට අනවශ්‍ය සාක්ෂි ලබාදෙමින් අපරාධකරුවන් ආරක්ෂා කරන ක්‍රියාපිළිවෙතක නැයැලී සිටී. සේනාධිනායක ජනාධිපති මෛත්‍රීපාල සිරිසේන හමුදා අපරාධකරුවන්ට එරෙහි සාක්ෂි කිසිවක් අධිකරණයට හෝ පරීක්ෂණ කණ්ඩායම්වලට ලබානොදෙන ලෙසට කළ දැනුම්දීම යුද හමුදාපතිවරයා අකුරටම ඉටුකරන සෙයකි. ඒ කීකරුකමට ඔහුට මේ වනවිට සේවා දිගු දෙකක් ලැබී තිබේ.
මේ ආන්දෝලනාත්මක ප්‍රකාශය අනුව ආරක්ෂක අමාත්‍යාංශයේ ලේකම් හේමසිරි ප්‍රනාන්දුට ඉදිරියේදී කියම් ඉරණමක් අත්වේදැයි දැන්ම කිව නොහැකිය. එම තීරණය ඇත්තේ ජනාධිපතිවරයා අතේය. ප්‍රශ්නය ඇත්තේ එතැන නොවේය. හේමසිරි ප්‍රනාන්දු මහතා කිව් ලෙසටම එම බිහිසුණු අපරාධය සිදුකළ හමුදා සාමාජිකයන්ට එරෙහිව ජනාදිපතිවරයා යටතේ පවතින නීතිපති දෙපාර්තමේන්තුව නියමානුකූල වගන්ති යටතේ නඩු පවරා විද යන්නය.
හේමසිරි ප්‍රනාන්දු මහතා ඔහුගේ කථාවේදී ප්‍රකාශ කළේ තරුණයන් 5 දෙනෙකු ඇතුළු 11 දෙනෙකු කප්පම් ලබා ගැනීම සඳහා පැහැරගෙන ගොස් කොළඹ නාවික හමුදා මුලස්ථානයේ හා ත්‍රිකුණාමල ගන්සයිඞ් කඳවුරේ රඳවාගෙන සිට පසුව අතුරුදන් කරන ලද සිද්ධිය විය හැකි බවට අනුමාන කළ හැකිය. දිවයින පුවත්පතේ සමන් ගමගේ ආරක්ෂක අමාත්‍යාංශයේ ලේකම්වරයාට එම ප්‍රකාශය සම්බන්ධයෙන් පහර පිට පහරදෙමින් එම නාවික හමුදා අපරාධකරුවන් ආරක්ෂා කරමින් ජනවාරි 22 දින පළවු පුවත්පතේ සුපුරුදු ලියවිල්ලක් ලියා ඇත්තේ ඒ නිසා විය හැකිය.
එම ලිපියේදී සමන් ගමගේ විශේෂ කරුණක් යළි කරලියට ගෙනැවිත් ඇත. ඒ එල්ටීටීඊ සංවිධානය සතුව තිබී ආරක්ෂක අංශ සතුවූ ස්නයිපර් වර්ගයේ අවියක් අතුරුදන් වි ඇති බව හා එවැනි ස්නයිපර් අවි පිළිබඳ විශේෂඥතාවයක් දැක්වූ පුනරුත්ථාපනය වූ එල්ටීටිඊ නායකයෙකු වූ ඉලන්කියන් මාස්ටර් අතට එම ගිනිඅවිය පත්වී තිබූ බවට පසුගිය කාලයේ කරුණු අනාවරණය වූ බවත් මේ වනවිට එම එල්ටීටීඊ නායකයා අතුරුදන්ව ඇති බවත්ය.
එම දිවයින ලේඛකයා නැවත මතුකරන්නට උත්සාහ කරන්නේ පරීක්ෂණ පැවැත්වීමෙන් පසු පට්ටපල් බොරුවක් බවට පත්වූ ජනාධිපතිවරයා හා ආරක්ෂක අමාත්‍යාංශයේ හිටපු ලේකම් ගෝඨාභය රාජපක්ෂ ඝාතන කුමන්ත්‍රණ ප්‍රමාදය සම්බන්ධයෙන් කුලී ඔත්තුකරුවකු වූ නාමල් කුමාර නැමැත්ා සමාජගත කළ දිවයින වැනි පුවත්පත් හිස උඩ තබාගෙන ගිය සත්‍යතාවයෙන් තොර කරුණය.
ඒ පිළිබඳ පරීක්‍ෂණවලදී හෙළිවී තිබුණේ පොලිස් ත්‍රස්තවිමර්ශන ඒකකයට එල්ටීටීඊයෙන් අත්අඩංගුවට ගත් හෝ වෙනත් ස්නයිපර් වර්ගයේ ගිනි අවියක් ලබාදී නැති බවය. ලබාදී තිබී ඇත්තේ එල්එන්ජී වර්ගයේ ගිනි අවියක් පමණය. ජනාධිපති ඝාතනය සඳහා එම ගිනි අවිය නැගෙනහිර පළාතේ දී පුහුණුවට යොදාගත් බවට මතු කළ ප්‍රලාපයද පසුව පලාපයක් බවට පත්විය. ඒ රජයේ රස පරීක්‍ෂකවරයා සිදුකළ පරීක්ෂණයේදීය.
ජනාධිපති ඝාතන කුමන්ත්‍රණයක් ඇත්තටම නැතත්, එවැනි ඝාතන කුමන්ත්‍රණයක් ජනාධිපතිවරයාට අත්‍යාවශ්‍ය නිසා ඔහු පොලීසිය ඔහුගේ බාරයට ගත්තේය. ඒ ජනාධිපති ඝාතන කුමන්ත්‍රණයේ පරීක්ෂණ යථාර්ථවාදී අවසානයක් කරා ගෙනයන්නට යැයි පවසමින්ය. ඒ නිසාම ඔහුගේ ධුරකාලය අවසන් වනතෙක්ම පොලිසිය ඔහු යළි නොදෙනු ඇත. ජනාධිපති ඝාතන කුමන්ත්‍රණය අලුත් ආකාරයකින් අලුත් වටයකින් කරලියට එනු ඇත. සමන් ගමගේගේ දිවයින පුවත් වාර්තාව එහි දැනුවත් හෝ නොදැනුවත් පළමු සඳහන විය හැකිය.
අප එසේ කියන්නේ ඒ සම්බන්ධයෙන් අපට වාර්තාවී ඇති සුවිශේෂි කරුණක් නිසාය. එම සුවිශේෂ කරුණ වන්නේ තරුණයන් 5 දෙනෙකු ඇතුළු පුද්ගලයන් 11දෙනෙකු කප්පම් ලබා ගැනීම සඳහා පැහැරගෙන ගොස් අතුරුදන් කිරීමේ සිද්ධියේ එක් ප්‍රබල සැකකරුවකු වී සිටින නාවික හමුදා සාමාජික සුමිත් රණසිංහ සම්බන්ධයෙන් ආරක්ෂක මාණ්ඩලික ප්‍රධානිී රවීන්ද්‍ර විජේගුණරත්නගේ නියෝග මත නාවික හමුදාව කටයුතු කරමින් සිටින ආකාරය.
මෙවැනි අපරාධයක සැකකරුවන්ට රිමාන්ඞ් භාරයට පත්වීමෙන් පසු ඇප ලැබුණත් යළි සේවයේ පිහිටුවීමක් සිදු නොකළත් රණසිංහ ඇතුළු පිරිසකට ජනාධිපතිවරයාගේ විශේෂ කරුණාව හේතුවෙන් යළි රැකියාව ලැබීම සිදුවිය. ඉන් මුලින්ම අනතුරකට මුහුණ පෑවේ මෙම අපරාධය පිළිබඳ ප්‍රධාන නාවික හමුදා සාක්ෂිකරුවන් වූ ලක්සිරි හා වෙලගෙදර යන නාවික හමුදා නිලධාරීන් දෙදෙනාය. ඔවුන් දෙදෙනා ඔවුන් මුහුණ පා ඇති අනතුර පිළිබඳ පරීක්ෂණ පවත්වන අපරාධ පරීක්ෂණ දෙපාර්තමේන්තුවටද, ඒ මඟින් අධිකරණයටද, ශ්‍රී ලංකා මානව හිමිකම් කොමිෂමටද දැනුම්දීමක් කළෝය. අමතරව සේනාධිනායක ආරක්ෂක අමාත්‍ය ජනාධිපති මෛත්‍රීපාල සිරිසේනවද දැනුවත් කළේය.
වින්දිතයින් හා සාක්ෂිකරුවන් ආරක්ෂාකිරීමේ පනත යටතේ රැකවරණයන ලැබිය යුතු එම නාවික හමුදා නිලධාරීන් දෙදෙනා සම්බන්ධයෙන් ශ්‍රී ලංකා මානව හිමිකම් කොමිෂමද, අපරාධ පරීක්ෂණ දෙපාර්තමේන්තුවද නාවික හමුදාවෙන් කරුණු විමසුවෝය. ලැබුන පිළිතුර වූයේ එම සාක්ෂිකරුවන්ට අනතුරක් හෝ බලපෑමක් නොවන ආකාරයට එම අපරාධයේ සැකකරුවන්ව සේවයේ යොදවා ඇති බවයි.
මේ නාවික හමුදා සාක්ෂිකරුවන් දෙදෙනා සේවයේ යොදවා සිටියේ නාවික හමුදා මුලස්ථානයේය. ඉන් ලක්සිරි නැමැති නිලධාරියාට ආරක්ෂක මාණ්ඩලික ප්‍රධානි රවීන්ද්‍ර විජේගුණරත්නගෙන් දිගින් දිගටම බලපෑම් එල්ල විය. අවසානයේ ඊළඟ උසස්වීම ලබානොදී ජනාධිපති මෛත්‍රීපාල සිරිසේන ඔහුව ගෙදර යැව්වේය. ඉතිරි වී සිටියේ වෙලගෙදර නැමැති නිලධාරියා පමණය. සාක්ෂිකරුවන්ට බලපෑමක් නොවන ආකාරයට නාවික හමුදා මුලස්ථානයෙන් පිට රාජකාරිවලට යොදවා ඇතැයි කියූ ඉහතින් සඳහන් සුමිත් රණිසිංහව නාවික හමුදා මුලස්ථානයේ ඒකකයකට මාරුකර තිබුනේ ඒ අතරවාරයේය. එහෙත් ඇත්තටම සිදුවී තිබුනේ වෙනතකි. නිලවශයෙන් එසේ අනුයුක්ත කර ඇතැයි සඳහන් කළද හිටපු නාවික හමුදා බුද්ධි අංශ නිලධාරියෙකු වූ සුමිත් රණසිංහව නැවතත් නාවික හමුදා බුද්ධි අංශයට අනුයුක්ත කර තිබුණි. ඔහුට තවත් යටත් නිලධාරීන් කණ්ඩායමක්ද ලබාදී තිබුණි. ඒ අනුව ඔහුට කිසිදු සටහන් තැබීමකින් හෝ පරීක්ෂා කිරීමකින් තොරව ඕනෑම ස්ථානයක ගමන් බිමන් යෑමේ හැකියාව ලැබී ඇත. ඕනෑම වර්ගයේ ගිනි අවියක් භාවිත කිරීමේ හැකියාව ලැබී ඇත. ඕනෑම පුද්ගලයෙකුගේ දුරකථන විශ්ලේෂණ වාර්තා ලබා ගැනීමේ හැකියාව ලැබී ඇත. මේ තත්ත්වය තරුණයින් 5 දෙනෙකු ඇතුළු 11 දෙනෙකු පැහැරගෙනගොස් අතුරුදන් කිරීමේ නඩුවේ වින්දිතයින්ට හා සාක්ෂිකරුවන්ට අයහපතක් හා අතුරුදායක බව අමුතුවෙන් කිව යුතු නැත.
අප මීට පෙර සඳහන් කළ නැවතත් කරලියට ගෙන ඒමට සූදානම් අතුරුදන් එල්ටීටීඊ ස්නයිපර් ගිනි අවිය හා ඉලන්කියන් මාස්ටර් නැමැති හිටපු එල්ටීටීඊ සාමාජිකයා යන්නමේ සුමිත් රණසිංහ සමග දැන් ඇති බවද අපගේ නාවික හා ආරක්ෂක අමාත්‍යාංශ ආරංචි මාර්ග ප්‍රකාශ කරයි. ඒ මේ ස්නයිපර් වර්ගයේ ගිනි අවිය යොදාගෙන ඉලන්කියන් මාස්ටර් නැමැති හිටපු එල්ටීටීඊ සාමාජිකයා ජනාධිපතිවරයා ඝාතනයට සැලසුම් කරන බවට වූ මතවාදයක් රෝපණය කිරීම තුළින්ය. පසුගියදා ආරක්ෂක මණ්ඩල රැස්වීමකදී ඒ පිළිබඳ ජනාධිපතිවරයාට සැලකර ඇත්තේ ආරක්ෂක මණ්ඩලික ප්‍රධානී රවීන්ද්‍ර විජේගුණරත්නය. විජේගුණරත්නගේ රෙකමදාරුව වී ඇත්තේ එම හිටපු එල්ටීටීඊ සාමාජිකයාව හා ගිනි අවිය අත්අඩංගුවට ගැනීමේ මෙහෙයුම බාරදිය හැකි සුදුසු පුද්ගලයා සුමිත් රණසිංහ බවත්, ඔහුට එය බාරදීමට අවසර දෙන ලෙසත්ය.
ඉල්ලු පරිදිම ජනාධිපතිවරයාගෙන් ඊට අවසර ලැබී ඇති අතර ආයුධ සන්නද්ධ බුද්ධි අංශ සෙසු නිලධාරීන් පිරිසක් සමග සුමිත් රණසිංහව ඒ සඳහා මුදාහැර ඇත. මේ දිනවල ඔහු හා කණ්ඩායම එම බුද්ධි මෙහෙයුම යැයි කියමින් ත්‍රිකුණාමලය, මඩකලපුව, ආදී ප්‍රදේශවල සැරිසරන බව ප්‍රකාශ වේ. ඒ අනුව ඉදිරි දිනවලදී එල්ටීටීඊ ය විසින් ජනාධිපතිවරයා ඝාතනය කිරීමේ අලුත් කුමන්ත්‍රණයක තොරතුරු අපට ලැබෙන්නට ඉඩ ඇත. මේ සටහන ඊට පෙර ඒ ගැන කෙරෙන පෙර දැනුම්දීමක් වශයෙන්ය. මන්ද ඉදිරියේදී එළැඹීමට නියමිත ඇත්තේ මැතිවරණ සමයක් බැවින්ය.■
යහපාලන වැරදි සොයන්න ජනාධිපති කොමිසමක්
පසුගිය යහපාලන ආණ්ඩු කාලය තුළ රජයේ ආයතනවල සිදුවී ඇතැයි සැලකෙන දූෂණ, වංචා සාපරාධි ලෙස විශ්වාසය කඩවීම්, සාපරාධී දේපල පරිහරණය, රැවටීම බලය හෝ අධිකාරිය, රජ්‍ය සම්පත් හා වරප්‍රසාද අනිසි ලෙස පාවිච්චි කිරීම හෝ අවභාවිතය සම්බන්ධයෙන් සොයාබැලීම සඳහා ජනාධිපතිවරයා විශේෂ කොමිෂන් සභාවක් පත්කර තිබේ.
ඉහත කී වැරදි ක්‍රියාවන්හි ප්‍රතිඵලයක් ලෙස රාජ්‍ය වත්කම්වලට, රාජ්‍ය ආදායමට බරපතළ අලාභ හෝ හානි සිදුවී තිබීම සම්බන්ධයෙන් දේශපාලන පදවි දැරූ හා තවදුරටත් දරමින් සිටින පුද්ගලයන්ට සහ රජයේ සේවකයන් හා ව්‍යවස්ථාපිත මණ්ඩලයන්හි නිලධරයන් වශයෙන් සේවයේ නිරතව සිටි සහ තවදුරටත් සේවයේ නිරතව සිටින පුද්ගලයන්ට එරෙහිව බරපතළ චෝදනා පිළිබඳ මහජන පැමිණිලි, තොරතුරු හා සෙසු කරුණු ලබා ගැනීම මෙම කොමිෂන් සභාවේ අරමුණ වේ.
එම තොරතුරු පිළිබඳ කඩිනම්, අපක්ෂපාති හා පුළුල් විමර්ශන පැවැත්වීම, ඒවාට නීති ප්‍රකාරව වගකිව යුතු පුද්ගලයින් හඳුනා ගැනීම, එම හඳුනාගැනීම්වලට අදාළ නීති කෘත්‍ය ඇරඹීම සඳහා පොලිසියට අල්ලස් හෝ දූෂණ චෝදනා විමර්ශන කොමිසමට හෝ වෙනත් අධිකාරියකට පැවරීම, සාපරාධි නීති කෘත්‍ය සඳහා නීතිපතිවරයාට ඉදිරිපත් කිරීම ආදිය එම කොමිෂන් සභාවට අයත් කාර්යයන් වේ.
මෙම කරුණු පරීක්ෂා කිරීම් සිදුවන්නේ 2015 ජනවාරි 14 දින සිට 2018 දෙසැම්බර් 31 දින දක්වා කාලයට අදාළවය. මෙම කොමිෂන් සභාවේ සභාපතිවරයා වශයෙන් හිටපු ශ්‍රේෂ්ඨාධිකරණ විනිසුරු උපාලි අබේරත්න පත්කර ඇත. එහි සෙසු සාමාජිකයන් වන්නේ හිටපු මහාධිකරණ විනිසුරු සරෝජනී කුසලා වීරවර්ධන, හිටපු විගණකාධිපති පී.කේ.ඒ. ප්‍රේමතිලක, ලලිත් ආර් ද සිල්වා හා හිටපු නියෝජ්‍ය පොලිස්පති විජය අමරසිංහය.■
ව්‍යවස්ථාව හදන්නේ ජාතිවාදීන්ට වුවමනා විදියටද?
අලුත් ව්‍යවස්ථාවක් නීතිගත කර ගන්නට පුළුවන් තත්ත්වයක් පෙනෙන්නේ නැත. මේ අවුරුද්දත්, ලබන අවුරුද්දත් මැතිවරණ වසර බවට පත් වන්නට බොහෝ දුරට ඉඩකඩ තිබියදීත්, අඩු ම ගණනේ අලුත් ව්‍යවස්ථාවක කෙටුම්පත වත් සකස් කර ගන්නට තව ම හැකි වී නැත. මැතිවරණ මුවවිටෙහි දී ව්‍යවස්ථා සංශෝධනයකට ඇති ඉඩ අවම බව ද කිව යුතු නැත.
එසේ තිබිය දී, ගෙනෙන්නට හදන ව්‍යවස්ථාවෙන් රට දෙකඩ වන්නට නියමිත යැයි ද, රට කොටස් නවයකට කැඩෙන ෆෙඩරල් රාජ්‍යයක් නිර්මාණය වන්නට නියමිත යැයි ද, කියමින් මහජනතාව ඉදිරියේ බිල්ලන් මවා පාන ව්‍යාපෘතිය දැනටමත් ඇරඹී තිබේ. බල ලෝභයෙන් මත් වුණු, මහින්ද රාජපක්ෂ මහතා ප්‍රමුඛ ඔහුගේ දූෂිත බල ඇණියේ එකී බල ලෝභය සංතෘප්ත කරනු වස්, ජාතිවාදය, ආගම්වාදය ඉදිරියට දමා ගෙන කෙරෙන කතාබහ ද දැන් හැම දවසක ම මාධ්‍යවල යහමින් දකින්නට අසන්නට ලැබේ.
මේ වන විට, අලුත් ව්‍යවස්ථාවට එරෙහි ව යමින්, සියලු සිංහල බෞද්ධ ජාතිවාදී ආගම්වාදී සංවිධාන හා පුද්ගලයන් එක තැනකට එකතු කරනවා යැයි කියන සංවිධාන ද ගොඩ නැගී තිබේ. වෙන වෙන ම, විවිධ පෙරමුණුවල අන්තවාදය වගා කළ භික්‍ෂූන්, ගිහියන්, ඊනියා උගතුන් මෙන් ම ජාතික චින්තකයන් ද මේ එක ම පෙරමුණක එකට හිඳිමින් සිටිනු දක්නට ලැබේ.
මේ පිරිස ම අසුන් ගන්නා තවත් පෙරමුණකින් කියන්නේ, ව්‍යවස්ථාව හැදිය යුත්තේ භික්‍ෂූන් වහන්සේලාගේ අනුදැනුම මත, ඔවුන්ගෙන් පිරිසක් ද ඇතුළත් කර ගත් කමිටුවකින් බව ය.
තමන්ගේ සිය ගණන් ශාඛා බෙදී ගිය ශාසන නිකායවල විනය කතිකාවත් පවා සම්මත කර ගෙන පිළි ගන්නට නොහැකි වුණු භික්‍ෂූන්, ඒවා රටේ නීතියෙන් පිළි ගැනීම ගැන දෙකට බෙදී වාද විවාද කර ගන්නා භික්‍ෂූන්, රටේ ආණ්ඩුක්‍රම ව්‍යවස්ථාව හදන්නට තමන් දායක කර ගන්නට යැයි කීම තරම් තවත් විකාරයක් තිබේ ද?
අනෙක, මේ අන්තවාදී ජාතිවාදීන් දායක කර ගෙන සැදිය හැකි නවීන ව්‍යවස්ථාව කුමක් ද?
ඔවුන්ට අවශ්‍ය, බුද්ධාගම රාජ්‍ය ආගම වනවා දකින්නට ය. බුද්ධ ශාසනයට රාජ්‍ය අනුග්‍රහය දෙනවාත්, අනෙක් ආගම්වලට එවැනි සැලකීමක් නොකරනවාත් බලන්නට ය. සිංහල භාෂාව එක ම රාජ්‍ය භාෂාව වනවා බලන්නට ය. (දැන් දමිළ ද රාජ්‍ය භාෂාවකි.) සියලු බලතල තම අතේ ගුලි කර ගත්, එක ම රජ කෙනකුගෙන් රට පාලනය වනවා දකින්නට ය. ඒ රජාගේ සියලු අනුග්‍රහයන් බුද්ධාගමට, බුද්ධ ශාසනයට හිමි වනවා දකින්නට ය. ලංකාව සිංහල බෞද්ධයන්ගේ රට හැටියට හඳුන්වනවා දකින්නට ය. දමිළ මුස්ලිම් මිනිසුන්, සිංහලයන්ට දෙවැනි ජන කොටසක් ලෙස නීතියෙන් ම නියම කරනවා දකින්නට ය. රටේ සියලු ම වරප්‍රසාද හා වරදාන, අවස්ථාවල මුල් කොටස සිංහල බෞද්ධයන්ට ලැබෙනවා දකින්නට ය. රට මධ්‍යයේ අධිකාරිවාදී ආණ්ඩුවක් බිහි වනවා දකින්නට ය. දමිළ හෝ මුස්ලිම් හෝ මිනිසුන් සමග කිසි ම ආකාරයක පාලන බලය බෙදා හදා ගැනීමක් නොවනවා දකින්නට ය. සංඛ්‍යාත්මක සුළුතරයන්ට කිසි ම කේවෙල් කිරීමක් කළ නොහැකි වනවා දකින්නට ය. කොටින් ම බහුතර ජාතියේ වුවමනා එපාකම් මත පමණක් රට පාලනය වනවා දකින්නට ය.
මෙවැනි අන්තවාදී අදහස්වලින් පිරෙන ව්‍යවස්ථාවක් බහුත්වවාදී රටකට ගැළපෙන්නේ කොහොම ද? මේ සියවසේ දියුණු ලෝකයට ගැළපෙන්නේ කොහොම ද?
ඒ අතර, මේ අන්තවාදීන් සමග සාකච්ඡා කළ යුතු යැයි ද, ව්‍යවස්ථාව සම්පාදනය කිරීමේ දී ඔවුන්ගේ අදහස්වලට ද ඉඩක් දිය යුතු යැයි ද සමහර වියත්හු කියති.
මේ අන්තවාදීන් සමග සාකච්ඡා කිරීමෙන් ඇති ඵලය කුමක් ද? ඔවුන්ගේ අන්තවාදී අදහස්වලින් රටට සමාජයට ඇති ඉදිරි ගමන කුමක් ද? ඔවුන්ගේ අදහස් ව්‍යවස්ථාවට ඇතුළත් කිරීමෙන් ඇති වන, අයහපත මිස, යහපත කුමක් ද?
අප අලුතෙන් හදා ගන්නා ව්‍යවස්ථාව අධිකාරිවාදී අදහස් පිරුණු ව්‍යවස්ථාවක් විය යුතු ද? නැති නම්, මිනිස් නිදහස ආරක්ෂා කෙරෙන, සුළුතරයන්ට සමාන ලෙස සලකන, නවීන දැක්මක් ඇති ව්‍යවස්ථාවක් විය යුතු ද?■
ගෝඨා සැරසෙන්නේ සන්නද්ධ ව්‍යවස්ථා විරෝධි කුමන්ත්‍රණයකට කුමන්ත්‍රණයකටද?
ජනතාව සුදානම් නම් ඉදිරි ජනාධිපතිවරණයට තරග කිරීමට තමන් සුදානම් බව ආරක්ෂක අමාත්‍යාංශයේ හිටපු ලේකම්වරයෙකු වූ ගෝඨාභය රාජපක්ෂ පැවසු බව ජනවාරි 14 වැනි සඳුදා පුවත්පත් කිහිපයකම පළවී තිබුණි.
ජනවාරි 12 වැනිදා බත්තරමුල්ලේ හෝටලයක පැවති වියත් මඟ සංවිධානයේ සම්මන්ත්‍රණයක් අමතමින් ඔහු ඒ බව පැවසුවේ යැයි සමහර පුවත්පත් සඳහන් කර තිබුණි. එහෙත් හෝටලය කුමක්ද යන් සඳහන්ව තිබුණේ නැත. එහෙත් වාර්තාවන් සියල්ලේම ඔහු කීවා යැයි සඳහන් දෙයෙහි සමානකමක් දක්නට ලැබුණි.
පසුගිය මාස කිහිපයේදී නිහඬව සිටි හා ඊට පෙර වියත් මග එළිය නැමැති සංවිධාන නාමයෙන් රටවටා සම්මන්ත්‍රණ පවත්වමින් ගිය ගෝඨාභය රාජපක්‍ෂට ජනාධිපති වරණයට තරග කරනවා යැයි මෙතෙක් නොකී අදහසක් කියන්නට සිත්වුයේ ඇයි? මෙතෙක් ගෝඨාභය රාජපක්ෂ රට හැඳිය යුත්තේ කෙසේද හා රට හදන්නේ කෙසේද යන්න පිළිබඳ වැඳි බණ දේශනා කළා මිස ඔහු දේශපාලනික යැයි කිවේ ද නැත.
ගෝඨාභයගේ මේ ප්‍රකාශ නිමිත්ත අපි තේරුම් ගත යුත්තේ පසුගිය දිනවල සිදුවූ සිදුවීම් සමගය. ඉන් ප්‍රධානතම සිදුවීම වූයේ ඉදිරි ජනාධිපතිවරණයට මෛත්‍රීපාල සිරිසේන ශ්‍රී ලංකා නිදහස් පක්ෂයේ හා රාජපක්‍ෂවරුන්ගේ ශ්‍රී ලංකා පොදු ජන පෙරමුණේ අපේක්ෂකයා වශයෙන් තරග කිරීමට සූදානම් බවට මහින්ද සමරසිංහ කළ ප්‍රකාශයයි.
සමරසිංහ මන්ත්‍රීවරයාගේ එම ප්‍රකාශයෙන් වික්ෂිප්තභාවයට පත්වූ පිරිස බොහෝය. ඒ නිසාම එම ප්‍රකාශයට පක්ෂව මෙන්ම විපක්ෂවද අදහස් පලකිරීම් දෝරේ ගලන්නට විය. එහිදී ශ්‍රී ලංකා පොදුජන පෙරමුණේ හැම අදහස් ප්‍රකාශ කිරීමකම අවසාන හරය වූයේ ඉදිරි ජනාධිපතිවරණ අපේක්ෂකයා කවුද යන්න තීරණය කිරීම මහින්ද රාජපක්‍ෂට බාරදී ඇති බවත් මහින්ද රාජපක්ෂ විසින් තෝරා දෙනු ලබන පුද්ගලයාට සහාය දීමට තමන්ට සිදුවන බවත්ය.
නමුත් ජනාධිපතිවරණය අපේක්ෂකයා කවුද යන තීරණාත්මක ප්‍රශ්නය ඇසූ හැම විටම වෙලාවට බලාගමු යන ලිස්සා යන පිළිතුරු මිස වෙනත් පිළිතුරු මහින්ද රාජපක්‍ෂට තිබුනේ නැත.
අනෙක් පැත්තෙන් මෛත්‍රීපාල සිරිසේන පාර්ශවයෙන් එම ප්‍රකාශය එන්නෙත් නිකම්ම නොවන බව අප තේරුම් ගත යුතුය. මහින්ද රාජපක්‍ෂව අගමැති කිරීමේ ව්‍යවස්ථා කුමන්ත්‍රණය වූ කලී මෛත්‍රීපාල සිරිසේනගේ එම අනාගත සැලැස්මේ එක් ප්‍රබල කඩ ඉමක්ය. ජනාධිපති ඝාතන කුමන්ත්‍රණය එහි ආරම්භයය. 2019 ජනවාරි 8 වැනිදායින් පසු යනු තමාම ජනාධිපතිවරණයට ඉල්ලන්නේ නම් මෛත්‍රීපාල සිරිසේනට ඕනෑම අවස්ථාවක ජනාධිපතිවරණයක් කැඳවිය හැකි අවස්ථාවක්ය. එසේ නොකළත් මෙම වසරේ අග ව්‍යවස්ථානුකූලවම ජනාධිපතිවරණයක් කැඳවෙන්නේය. පාර්ලිමේන්තුව විසුරුවා හැරීමේ නීති විරෝධි ගැසට්ටුවෙන් පසු මාධ්‍ය කැඳවා උත්සව ශ්‍රීයෙන් ශ්‍රී ලංකා පොදු ජන පෙරමුණේ සමාජිකත්වය ගත් මහින්ද රාජපක්ෂ ඇතුළු නඩයේ මන්ත්‍රී ධූර අහෝසි කරනවාද, නැද්ද යන්න දැන් රැඳී ඇත්තේ මෛත්‍රීපාල සිරිසේනගේ අතේය. ඒ නිසා මෛත්‍රීපාල සිරිසේනගේ පැත්තෙන් ගත් කළ මහින්ද රාපපක්ෂ ඇතුළු නඩය ගැට ගසා ඔහුට තබාගත හැකි එකම අවස්ථාව මෙයය. ඉදිරි මහමැතිවරණයකදී මේ කිසිවකු ශ්‍රීලනිපයෙන් තරග කරන්නේ නැත.
මෛත්‍රීපාල සිරිසේන ශ්‍රී ලංකා පොදුජන පෙරමුණක් සමග දීගකමින් යන්නට යන මේ ගමනින් සිහින බොඳවන එක් පුද්ගලයෙකු වන්නේ ගෝඨාභය රාජපක්ෂ හා ඔහුගේ කල්ලියය. මම සුදුසුයි. තරගයට මමත් ඉන්නවා යැයි ගෝඨාභය රාජපක්ෂ කියන්නේ ඒ නිසාය.
එසේ නම් මෙතෙක් ගෝඨාභය ට නුසුදුසුකමක් තිබුණේද? ඔව්. ඒ ඔහු ශ්‍රී ලංකා ඇමරිකා ද්විත්ව පුරවැසියකු වීමය. එසේ වුවද රාජපක්ෂ පාලන කාලයේදී ද්විත්ව පුරවැසිභාවය ලබාදීම නතර කරන ලද්දේ ගෝඨාභය රාජපක්ෂ විසින්ය.
ගෝඨාභය රාජපක්ෂගේ ඇමරිකා පුරවැසිභාවය ඉවත් කරගන්නට ඔහු අයදුම්පතක් ඉදිරිපත් කර ඇති බවත් එහි කටයුතු සිදුවෙමින් පවතින බවටත් වූ කථා ප්‍රචාරය කර හරිනු ලැබුයේ මීට මාස ගණනාවකට පෙරදීය. ජනතාව සූදානම් නම් මම සූදානම් නැමැති ගෝඨාභයගේ මේ ප්‍රකාශයට දින කිහිපයකට පෙර රාජපක්‍ෂවාදී වෙබ් අඩවි ප්‍රචාරය කර හරිනු ලැබූයේ ගෝඨාභයගේ ඇමරිකානු පුරවැසිභාවය ඉවත් කර ඇති බවයි. නමුත් ඊට අදාළ කිසිදූ මුලාශ්‍රයක් ඉදිරිපත් කර තිබුනේ නැත. ඉන්පසු ඉන් එහාට යමින් ගෝඨාභයගේ ඇමරිකානු පුරවැසිභාවය ඉවත් කර ගැනීම විකිපීඩියා වෙබ් අඩවියද වාර්තා කර ඇති බව දැක්වූ මාධ්‍ය වාර්තා පළවිය. විකිපීඩියා වෙබ් අඩවියේ වත්මනේ ගෝඨාභය රාජපක්ෂ ශ්‍රී ලංකා පුරවැසියකු වශයෙන් සඳහන් කර ඇති බවත්, මීට පෙර එම අඩවියේ ඔහු ඇමරිකානු ශ්‍රී ලංකා ද්විත්ව පුරවැසියකු වශයෙන් නම් කර තිබූ බවත් එම වාර්තාවල වැඩිදුරටත් දැක්විණ.
මේ වෙබ් අඩවිකාරයෝ නොදන්වාට හෝ නොදන්නවා වාගේ පෙන්නුවාට විකිපීඩියා වෙබ් අඩවිය යනු කුමක්දැයි වෙබ් පරිශිලනය කරන්නන් දන්නෝය. විකිපීඩියා වෙබ් අඩවිය හොඳ මුලාශ්‍රයක් ලෙස සැලකෙන්නේ නැත. ඊට තොරතුරු ඇතුළත් කළ හැකි අතර එහි ඇති තොරතුරු ඉවත් කළද හැකිය. එම වෙබ් අඩවිය පාදක කරගන්නා මුලාශ්‍ර සමහර විට යම් කරුණක් පිළිබඳ සත්‍යයම තොරතුරු නොවේ. උදාහරණයකට ශ්‍රී ලංකාවේ ජාතික ක්‍රීඩාව පිළිබඳව අන්තර්ජාල සෙවුමක් සිදු කළ හොත් විකිපීඩියා හි එය දැක්වෙන්නේ වොලිබෝල් යනුවෙන්ය. ඒ සඳහා පාදකරගෙන ඇත්තේ ඩෙලිනිව්ස් පුවත්පතේ පළවූ වාර්තාවන්ය. එහෙත් ඇත්තම තත්ත්වය වූ කලී ශ්‍රී ලංකාවට නීතිමය වශයෙන් නම් කරන ලද ජාතික ක්‍රීඩාවක් නොමැතිය යන්නය.
ඒ අනුව ගෝඨාභය රාජපක්ෂ වියත් මඟ සම්මන්ත්‍රණයේදී කිව යුතුව තිබුණේ ජනතාව සූදානම් නම් ඔහුද සූදානම් කථාව නොව ඔහු ඔහුගේ ඇමරිකානු පුරවැසිභාවය ඉවත් කරගත්තා යන්නය. දේශ ප්‍රේමී ඔහු එසේ නොකියන්නේ හා එසේ කියන්නට බිය වන්නේ ඇයි? ඇත්තටම ඔහු ඔහුගේ ඇමරිකානු පුරවැසිභාවය ඉවත් කරගෙන නැති නිසා විය හැකිය.
දැන් යමකුට ප්‍රශ්නයකන් මතුවිය හැකිය. ද්විත්ව පුරවැසියෙකුට ශ්‍රී ලංකාවේ ජනාධිපතිවරණයකට තරග කළ නොහැකි නම් ඇමරිකානු පුරවැසිභාවය ඉවත් කර නොගත් ගෝඨාභය තරග කරන්නේ කෙසේද යන්නය. ‘ජනතාව සූදානම් දැයි’ ගෝඨාභය අසන්නේ ඒනිසාය. ජනාධිපතිවරණයකදී ශ්‍රී ලංකා පොදුජන පෙරමුණෙන් හෝ වෙනත් පක්ෂයකින් ගෝඨාභයට නාමයෝජනා බාරදිය හැකිය. ඔහුගේ නාමයෝජනාව ප්රතික්ෂේප කිරීම සඳහා ඔහු ද්විත්ව පුරවැසියකුද නැද්ද යන්න එම අවස්ථාවේදී පරීක්ෂා කළ හැකි කරුණක් නොවන්නේය. එය අධිකරණ ක්‍රියාදාමයකින් පසු තීරණයක් ලැබිය යුතු කරුණක්ය. එය බොහෝ විට ජනාධිපතිවරණ ප්‍රතිඵලවලින් පසු උදාවිය හැකි තත්ත්වයක්ය. නිකමට හෝ ගෝඨාභය රාජපක්ෂ ජනාධිපතිවරණ තරගයෙන් ජයග්‍රහණය කර තිබුණහොත් එය නීති විරෝධී යැයි කියමින් අධිකරණ තීන්දුවක් ලැබුනද රටේ ඇතිවිය හැක්කේ විශාල කැළඹිලිකාරි තත්ත්වයක්ය. ජනාතාව යැයි ඔහු හිතනවා ඇත්තේ එවැනි තත්ත්වයකදී ඔහු වෙනුවෙන් පොලු මුඟුරු, ඇතැතිව වීදි බසින ජනතාවටය. මිල්ටරි බලයද ඊට එක්කරගත් විට ගෝඨාභයට නීතියේ ආධිපත්‍යය වැඩක් නැති වනු ඇත. වර්තමානයේ මෛත්‍රීපාල සිරිසේන කළාක් මෙන් එහි දීත් ඇතිවනු ඇත්තේ ව්‍යවස්ථා විරෝධී කුමන්ත්‍රණයක්ය. එය නිකම්ම කුමන්ත්‍රණයක් නොව සන්නද්ධ ව්‍යවස්ථා විරෝධි කුමන්ත්‍රණයක් වනවාට සැක නැත.■
වෛද්‍ය සංගමයේ කුරුමානම වරදී බෙල්ලන නිර්දෝෂීයි
වෛද්‍ය රුක්ෂාන් බෙල්ලන සෞඛ්‍ය ක්ෂේත්‍රය තුළ ප්‍රකට පුද්ගලයෙකි. ඔහු රජයේ වෛද්‍ය නිලධාරීන්ගේ සංගමය විසින් සෞඛ්‍ය ක්ෂේත්‍රය තුළ පවත්වාගෙන යන බලයට එරෙහිව අදහස් දැක්වූ වෛද්‍යවරයෙකි. ඔහු රජයේ වෛද්‍ය නිලධාරීන්ගේ සංගමයට විකල්පයක් ලෙස රජයේ වෛද්‍ය නිලධාරීන්ගේ සංසදය නමින් වෛද්‍ය වෘත්තිය සමිතියක් බිහි කළේය.
රාජපක්ෂ ආණ්ඩුව සමයේදී රජයේ වෛද්‍ය නිලධාරීන්ගේ සංගමය විසින් එවකට සිටි රජයට එරෙහිව ප්‍රසිද්ධියේ අදහස් පළ නොකළ බව අමුතුවෙන් කිව යුතු නැත. එවැනි කාලයක සෞඛ්‍ය අමාත්‍යාංශයේ දූෂණ වංචාවලට එරෙහිව රුක්ෂාන් බෙල්ලන වෛද්‍යවරයා එකල අදහස් පළ කළේය. කෙසේ වෙතත් රාජපක්ෂ පාලන සමයේ අවසාන කාලයෙහි සිටි සෞඛ්‍ය අමාත්‍යවරයා මෛත්‍රීපාල සිරිසේනය. වෛද්‍ය රුක්ෂාන් බෙල්ලනගේ අදහස් දැක්වීම් මෛත්‍රීපාල සිරිසේනටද එරෙහි අදහස් දැක්වීම් විය.
මෛත්‍රීපාල සිරිසේන සෞඛ්‍ය ඇමතිවරයා ධුරයෙන් ඉවත්ව 2014 අවසානයේදී ජනාධිපතිවරණ පොදු අපේක්ෂකයා විය. ඒ අතර 2014 දෙසැම්බර් 30 වැනිදා සෞඛ්‍ය අමාත්‍යාංශයේ නිලධාරීන් සහභාගී වූ අභ්‍යන්තර රැස්වීමකදී වෛද්‍ය රුක්ෂාන් බෙල්ලන විසින් සෞඛ්‍ය අමාත්‍යාංශය ගැන අදහස් දක්වා තිබුණි. එහිදී මෛත්‍රීපාල සිරිසේන සෞඛ්‍ය මෑත කාලයේ අසාර්ථකම සෞඛ්‍ය ඇමතිවරයා ලෙස හඳුන්වා තිබුණි. ඒ සිදුවීම හේතු කර ගනිමින් මෛත්‍රීපාල සිරිසේන මහතා ජනාධිපති ධූරයට පත්ව මාසයක් ගතවෙද්දී වෛද්‍ය රුක්ෂාන් බෙල්ලනගේ වැඩ තහනම් කොට පරීක්ෂණයක් ආරම්භ කර තිබුණි. ජනාධිපතිවරණ සමයේදී අපේක්ෂකයෙක්ට මාධ්‍ය ඉදිරියේ අපහාස කිරීම වැඩ තහනමට හේතු ලෙස දක්වා තිබුණේය.
එසේ වුවද වෛද්‍ය රුක්ෂාන් බෙල්ලන වෛද්‍යවරයා අදහස් දැක්වූ අවස්ථාවේදී මාධ්‍ය එම ස්ථානයේ සිටි නැත. එය නිලධාරීන්ගේ රැ ස්වීමක් වූ අතර මහින්ද රාජපක්ෂ පාර්ශ්වයට හිතවත් වෛද්‍යවරයෙකු විසින් එම අදහස් දැක්වීම වීඩියෝවක් ලෙස ස්වාධීන රූපවාහිනියට ලබා දී තිබුණි. අනෙක් අතට රුක්ෂාන් බෙල්ලන වෛද්‍යවරයා ලියාපදිංචි වෘත්තිය සමිතියක සභාපතිවරයා වන අතර, ඔහුට මාධ්‍ය ඉදිරියේ වුව අදහස් දැක්වීමට අයිතියක් තිබුණි. කෙසේ වුවත් එම චෝදනාව පිළිබඳව රාජ්‍ය සේවා කොමිෂන් සභාව විසින් පරීක්ෂණයක් සිදු කර තිබුණි. පරීක්ෂණ වාර්තාව නිකුත් විය. ඔහු චෝදනාවලින් නිදහස් කර තිබුණි. ඔහුව නැවත සේවයේ පිහිටුවීමට නියෝග කර තිබුණි. ඒ අනුව 2017 දෙසැම්බර් 16 දින වෛද්‍ය රුක්ෂාන් බෙල්ලන ජාතික රුධිර පාරවියලන මධ්‍යස්ථානයේ වැඩබලන අධ්‍යක්ෂවරයා ලෙස පත් කර තිබුණි.
වැඩබලන අධ්‍යක්ෂවරුන් ලෙස නිලධාරීන්ව පත් කිරීම යහපත් සම්ප්‍රදායක් නොවන බව කිව යුතුය. වැඩබලන නිලධාරීන්ව පත් කරන්නේ දේශපාලන අධිකාරියේ වුවමනාවටය. නිසි උසස්වීම් හා සුදුසුකම් නැතිවම වැඩබලන නිලධාරින්ව පත් කළ හැකිය. වැඩබලන තනනතුරු ලබාගන්නටත්, ඒවායේ රැඳී ඉන්නටත් දේශපාලන නායකයන්ව සතුටු කළ යුතුය. සෞඛ්‍ය ක්ෂේත්‍රයේ නම් රජයේ වෛද්‍ය නිලධාරින්ගේ සංගමය සතුටු නොකර එවැනි තනතුරුවල රැඳී සිටීම අසීරු බව රහසක් නොවේ.
සෞඛ්‍ය ක්ෂේත්‍රයේ වැදගත් තනතුරු රැසක ඉන්නේ වැඩබලන අධ්‍යක්ෂවරුන් හා අතිරේක ලේකම්වරුන්ය. එහෙත් ඒ තත්වයට විරෝධය දක්වමින් රජයේ වෛද්‍ය නිලධාරීන්ගේ සංගමය හඬනඟා තිබුණේ නැත. එහෙත් රජයේ වෛද්‍ය නිලධාරීන්ගේ සංසදය විසින් වැඩබලන නිලධාරීන්ව ඉවත් කොට, ඉහළ තනතුරුවල පුරප්පාඩු පුරවන ලෙස දිගින් දිගටම හඬ නඟා තිබුණි.
ඒ පත්වීමෙන් පසුව ටික දිනෙකින් ජනාධිපති මෛත්‍රීපාල සිරිසේන නිලධාරීන් කිහිපදෙනෙකු සමඟ එම පත්වීම පිළිබඳව විවේචනය කර තිබුණි. ඊට ටික දිනෙකට පසුව වෛද්‍ය රුක්ෂාන් බෙල්ලනට විරුද්ධව රජයේ වෛද්‍ය නිලධාරීන්ගේ සංගමයේ දැඩි විරෝධයක් මතුවී තිබුණු අතර, රුක්ෂාන් බෙල්ලන හා සෞඛ්‍ය අමාත්‍ය රාජිත සේනාරත්නගේ සහෝදරයෙකු සම්බන්ධ වී දූෂණ වංචා සිදුකොට ඇතැයි චෝදනා එල්ලවිය.
ජාතික රුධිර පාරවියලන සේවයේ වැඩ බලන අධ්‍යක්ෂ වෛද්‍ය රුක්ෂාන් බෙල්ලන මහතා ලේ බැංකු ව්‍යාපෘතිය සඳහා අමාත්‍ය මණ්ඩලය අනුමැතිය නොමැතිව එන්.ජී.එස්. නම් යන්ත්‍රයක් මිලදී ගැනීමට උත්සාහ කිරීම, ඊට අදාළව සකස් කරන ලද ලිපියක ව්‍යාජ තොරතුරු ඇතුලත් කිරීම, එම ලිපියේ දිනය පෙර දාතම කරන ලෙසට වෛද්‍යවරියකට උපදෙස් දීම එක් චෝදනාවක් විය.
රුපියල් මිලියන 72 ක ඇස්තමේන්තුවක් සහිත සේවා ගිවිසුමක් 2018 වසර සඳහා ඇති කරන්නට උත්සාහ කළ බවත්, එම ඇස්තමේන්තුවට 2017 වර්ෂයේදී වැය වී තිබුණේ රුපියල් මිලියනකට වඩා අඩු මුදලක් බවත් දෙවැනි චෝදනාව විය.
එම චෝදනා රැගත් මාධ්‍ය වාර්තා ප්‍රධාන ධාරාවේ මාධ්‍ය ආයතන රැසක පළවිය. බෙල්ලනට එරෙහිව ජාතික රුධිර පාරවියලන මධ්‍යස්ථානයේ සේවය කරන රජයේ වෛද්‍ය නිලධාරීන්ගේ සංගමයේ සාමාජිකයන් විරෝධයකද නිරත විය. බෙල්ලනව ඉවත් නොකළොත් දීප ව්‍යාප්ත විරෝධයක් සංවිධානය කරන බවට තර්ජනය කළේය.
ඒ වෙද්දීත් රජයේ වෛද්‍ය නිලධාරීන්ගේ සංසදය නම් වෛද්‍ය රුක්ෂාන් බෙල්ලන සභාපතිත්වය දරණ වෘත්තිය සමිතිය සෞඛ්‍ය අමාත්‍ය රාජිත සේනාරත්නව ප්‍රතිපත්තිමය වශයෙන් දැඩිව විවේචනය කර තිබුණු අවස්ථා බොහෝය. අනෙක් අතට වෛද්‍ය බෙල්ලන රජයේ වෛද්‍ය නිලධාරීන්ගේ සංගමයේද දැඩි විවේචකයෙක් බව ඉහතින් කීවෙමු. එවැනි පසුබිමක සෞඛ්‍ය සේවයේ තතු දන්නෝ එම චෝදනාව එලෙසම බාරගත්තේ නැත. අනෙක් අතට සෞඛ්‍ය ක්ෂේත්‍රයේ දූෂණ වංචා රැසකදී නිහඬවම සිටි රජයේ වෛද්‍ය නිලධාරීන්ගේ සංගමය වෛද්‍ය බෙල්ලනට එරෙහිව විරෝධතා දැක්වීම ඇතැම් අයට විහිළුවක් විය.
සියල්ල මැද වෛද්‍ය බෙල්ලන ජාතික රුධිර පාරවියලන මධ්‍යස්ථානයේ තනතුරෙන් ඉල්ලා අස්වුණේය. තමන්ට ඇති සියළුම චෝදනා පිළිබඳ පරීක්ෂණයක් සිදු කරන ලෙස ලිඛිතව ඉල්ලා සිටියේය.
ඒ අනුව සෞඛ්‍ය අමාත්‍යාංහයේ හදිසි වැටලීම් අංශ්‍ය විසින් ඔහුට ඇති චෝදනා පිළිබඳව මූලික විමර්ශණයක් සිදුකර තිබුණි. විමර්ශණය වෙත ඉදිරිපත් වූ සාක්ෂි වලින් වෛද්‍ය බෙල්ලන විසින් තාක්ෂණික ඇගයීම් කමිටුවල නිර්දේශ වලට පිටින් ගොස් තීරණ ගැනීමට උත්සාහ කළ බව හෝ, තාක්ෂණික ඇගයීම් කමිටුවලට බලපෑම් කිරීමට උත්සාහ කළ බව ඔප්පු වී තිබුණේ නැත. ඔහු විසින් මිලියන 72 ක මුදලක් ශීතකරණ අලු‍ත්වැඩියාව සඳහා යෝජනා කර තිබුණද, එය තාක්ෂණික ඇගයීම් කමිටුවෙන් ප්රතික්ෂේප කළ පසුව ඔහු එම යෝජනාව ක්‍රියාවට නංවා තිබුණේ නැත.
ඒ අනුව ජාතික රුධිර පාරවියලන මධ්‍යස්ථානය අකර්මණ්‍ය කරමින්, වෛද්‍ය රුක්ෂාන් බෙල්ලනව එලවන්නට රජයේ වෛද්‍ය නිලධාරීන්ගේ සංගමය කටයුතු කර තිබුණේත්, ඊට පෙර ඔහුගේ වැඩ තහනම් කර තිබුණේත් ඔහුගේ වැරදි නිසා නොවේ. ඔහු තම තමන්ගේ න්‍යායපත්‍රවලට අනුකූල නොවීම නිසා තිබුණු පෞද්ගලික වෛරය පිරිමසා ගැනීම් ලෙසය.
එවැනි පුද්ගලයන්ට මාධ්‍ය ආයතන අල්ලාගෙන, තමන්ගේ විරුද්ධවාදීන්ව දූෂිතයන් ලෙස හංවඩු ගැසීමද අපහසු කටයුත්තක් නොවේ. දූෂණ වංචා චෝදනා එල්ලකිරීමට අවැසි ලෙස ලියකියවිලි ආදිය සකස් කිරීම රොකට් විජ්ජාවක් නොවේ.
මේ තත්ත්වය බෙල්ලන පමණක් මුහුණදෙන අත්දැකීමක් නොවේ. දූෂණයට, වංචාවට, විවිධ පුද්ගලයන්ගේ ආධිපත්‍යයට එරෙහිව හඬනඟන නිලධාරීන් බොහෝ දෙනෙකුට මේ අත්දැකීමට මුහුණදීමට සිදුවෙයි. බෙල්ලන වැනි නිලධාරීන්ට මුහුණදීමට සිදුව තිබෙන අත්දැකීම්, හඬක් නඟන්නට කැමති බොහෝ නිලධාරීන්ගේ හඬවල් නිහඬ කිරීමටද හේතු වී තිබෙන බව අවසානයේ ලියා තැබිය යුතුය.■
■ හංසි මානවඩු
ව්‍යාපෘති පමාවන සිරිසේනලාගේ කොරියා ළැදියාව
ආරක්ෂක, මහවැලි සංවර්ධන හා පරිසර අමාත්‍යංශ තමා ජනාධිපතිධුරය දරන කාලය තුළ අවැසි බවට ජනාධිපති මෛත්‍රීපාල සිරිසේන කරන ලද ඉල්ලීම් ප්‍රකාරව සිදුවුනේ 19 වැනි සංශෝධනයේ අන්තර්කාලින විධි විධාන යටතේ එම අමාත්‍යාංශ ඔහුට දැරීමේ හැකියාව ලබාදීමය.
එමඟින් කියවුනේ එම අමාත්‍යාංශ විෂයන්ට ජනාධිපතිවරයා පෞද්ගලිකව දැඩි කැමැත්තක්, ඇල්මක් දක්වන බවය. ඒ සඳහා වූ අප නොදන්නා විශේෂ හේතු ජනාධිපතිවරයාට තිබිය හැකිය. එවැනි විශේෂ හේතු පසුගිය කාලයේදී ඔහු ප්‍රදර්ශනය කරමින්ද සිටියේය. ඉන් එකක් වුයේ ආරක්ෂක අමාත්‍යවරයා වශයෙනුත්, සේනාධිනායකවරයා වශයෙනුත් ඔහු හමුදා අපරාධකරුවන්ව ආරක්ෂා කරමින් කටයුතු කිරීමය. අදටත් හමුදා අපරාධකරුවන් විසින් මරාදමන ලද අතුරුදන් කරන ලද හා පහර දෙන ලද පුද්ගලයන්ට හා ඔවුන්ගේ පවුල්වල සාමාජිකයන්ට යුක්තිය ඉටුවී නැත්තේ ජනාධිපතිවරයා විසින් විමර්ශන කණ්ඩායම්වලට සිදුකරන මේ බලපෑම් නිසාය. ඒ ගැන අප පුවත්පත ඕනෑතරම් හෙළිදරව් කර ඇති බැවින් විස්තරාත්මක කරුණු නැවත අවශ්‍ය නොවේ.
අනෙක් පැත්තෙන් පරිසර හිතකාමී බලශක්ති ජනනය යැයි කියා ඔහු විසින් හඳුන්වාදුන් කොරියානු සමාගමක ස්වේච්ඡා යෝජනාවකට පාවෙන ගෑස් බලාගාරයක් ඉදිකිරීමේ කොන්ත්‍රාත්තුව ලබාදීමට සියළු කටයුතු සූදානම් කර අවසානය. එය එසේ මෙසේ යෝජනාවක් නොවේ. ඇමරිකානු ඩොලර් බිලියන 7 ක් හෙවත් ව්‍යාපෘතියක් සඳහා ශ්‍රී ලංකා රජය ඉතිහාසය පුරාම වැය කරන්නට යන ඉහළම මිලය. කරුණු තේරුම් ගැනීම සඳහා පහසුවට කිවහොත් ඇමරිකානු ජනාධිපති ඩොනල්ඞ් ට්‍රම්ප් ඇමරිකානු මෙක්සිකෝ දේශසීමාවේ ඉදිකරන්නට යන දේශසීමා තාප්පයට වැය කරන්නට යන මුදලටත් වඩා වැඩි මුදලකි. එම තාප්පය සඳශා වැයකරන්නට බලාපොරොත්තු වන මිල ඇමරිකානු ඩොලර් බිලියන 45 කි. මෙම ගෑස් ව්‍යාපෘතිය පිළිබඳවත් වැඩිදුර විස්තර නොකරන්නේ ඒ පිළිබඳවද අප පුවත්පත අවස්ථා ගණනාවකදී වාර්තා කර ඇති නිසාය.
ඉහත කරුණු දෙක පිළිබඳව පමණක් අවධානය යොමු කළත් පෙනෙන්නේ ආරක්ෂාවේ නාමයෙන් හමුදා අපරාධකරුවන්ටත්,පරිසරයේ නාමයෙන් ස්වාභාවික ගෑස් බලාගාරවලටත් ජනාධිපතිවරයා කැමැත්තක් දක්වන බවය. එවැනි කාරණාවලට ඔහුට විශේෂ ලැඳියාවක් තිබෙන බවය.
හිටපු ජනාධිපති මහින්ද රාජපක්‍ෂට ශ්‍රී ලංකාවේ අවශ්‍යතාවයන් පිළිබඳ පරචිත්ත විඥානීය ස්වෙඡා යෝජනා ආවේ චීන සමාගම්වලින්ය. ඒවාට ණය ගත්තේ චීන බැංකුවලින් හෝ චීන රජයෙන්ය. ඒ නිසාම ශ්‍රී ලංකාව චීන ව්‍යාපෘතිවලින් පිරුණු චීන කොළනියක තත්ත්වයට පත්විය. පෙර සඳහන් කළ ස්වාභාවික ගෑස් බලාගාර ව්‍යාපෘති පරචිත්ත විඥාණීය ස්වෙච්ඡා යෝජනාව ජනාධිපති මෛත්‍රීපාල සිරිසේනට ආවේ කොරියාවෙන්ය.
මහින්ද රාජපක්ෂගේ චීන ආලය වාගේ මෛත්‍රීපාල සිරිසේනගේ කොරියානු ආලය ඉදිරියට යන බවක් පෙන්නුම් කරේ ඊට හේතුව ජනාධිපතිවරයාගේ මහවැලි සංවර්ධන හා පරිසර අමාත්‍යාංශය යටතේ ටෙන්ඩර් කැඳවා ඇති ඝන අපද්‍රව්‍ය බැහැර කිරීමේ ව්‍යාපෘතියක් සම්බන්ධයෙන් කොරියානු සමාගමක් පිළිබඳව කරුණු අනාවරණය වෙමින් පවතින නිසාය.
ඉවතලන ඝන අපද්‍රව්‍ය රටේ දිස්ත්‍රික්ක හතරක ස්ථාන හතරකදී ඉඩම්වලට බැහැර කර පිරවීම සඳහා මහවැලි සංවර්ධන හා පරිසර අමාත්‍යාංශය ටෙන්ඩරයක් කැඳවා ඇත. ඒ ගාල්ලේ මොන්රෝපියා වත්ත, අනුරාධාපුර කීරික්කුලම, යාපනයේ කීරිමලෙයි හා පොළොන්නරුවේ මීගස් වැව යන ස්ථානවලට ඝන අපද්‍රව්‍ය බැහැර කර ඉඩම් පිරවීම සඳහාය.
මේ ව්‍යාපෘතිය පිළිබඳව ටෙන්ඩර් කැඳවීමෙන් පසු ටෙන්ඩර් ඉදිරිපත් කිරීමට ලියවිලි සමාගම් 8ක් විසින් ලබාගෙන ඇත. ඉන්පසු ලංසු ඉදිරිපත් කිරීමේ පූර්ව සාකච්ඡාවක් 2017 ඔක්තෝබර් 17 දින බත්තරමුල්ලේ පිහිටි මාධ්‍යම පරිසර අධිකාරියේදී පවත්වා ඇත. එහිදී එම සමාගම් 8ටම පූර්ව රැස්වීමේ සටහන හා අවශ්‍ය පැහැදිලි කිරීම් ලබාදි ඇත. ඉන්පසු ඒ පිළිබඳ දැන්වීමක් 2017 නොවැම්බර් 15 දින ඬේලිනිව්ස් පුවත්පතේද පලකර ඇත. ලංසු ලබාගැනීම 2017 නොවැම්බර් 30 දින දහවල් අවසන් කර ඇති අතර ටෙන්ඩර් ලියකියවිලි ලබාගත් සමාගම් 8න් සමාගම් තුනක් ලංසු ඉදිරිපත් කර ඇත.ඒ Hanshin – HallaJV, Han Sol – KECC JV හා Kolon Global Corporation යන සමාගම්ය.
ලංසු විවෘත කළ අවස්ථාවේදී Hanshin – HallaJVසමාගමට එරෙහිව අනෙක් සමාගම් දෙකම විරෝධතාවයක් ඉදිරිපත් කළ බව මෙම ටෙන්ඩරයේ තාක්ෂණික ඇගැයීම් කමිටුව වාර්තා කර ඇත. ඒ හංසින් සමාගම නිසියාකාරව ලංසු ඉදිරිපත් කර නොමැති බවටය. එහි මුලිකම චෝදනාව වන්නේ එම හංසින් සමාගම දේශීය බැංකුවකින් ලංසු ඇපකරයක් ඉදිරිපත් කර නොමැති බවය. අනෙක් සමාගම් දෙක කොමර්ෂල් බැංකුවේ හා ලංකා බැංකුවේ බැංකු ඇපකර ඉදිරිපත් කර ඇති අතර ප්‍රශ්නගත සමාගම බැංකු ඇපකර ඉදිරිපත් කර ඇත්තේ කොරියානු එක්සිම් බැංකුවෙනි.
කොරියානු ආර්ථික සංවර්ධන සහයෝගිතා අරමුදලෙන් කොරියානු එක්සිම් බැංකුව මඟින් මෙම ව්‍යාපෘතිය සඳහා ශ්‍රී ලංකාව ණය ලබා ගන්නා නිසා වැඩි වාසිය සඳහා එම සමාගම ටෙන්ඩර් උපදෙස්වලට පටහැනිව කොරියානු එක්සිම් බැංකුවෙන් බැංකු ඇපකර ඉදිරිපත් කළා විය හැකිය. එහෙත් හංසින් නැමැති එම කොරියානු සමාගමේ ලංසු ඉදිරිපත් කිරීම ටෙන්ඩර් කොන්දේසිවලට පටහැනිය. එම නිසාම තාක්ෂණික ඇගැයිම් කමිටුව ඔවුන්ගේ අවසන් නිගමනය වශයෙන් සඳහන් කර ඇත්තේ අනෙක් සමාගම් දෙකෙහි මිල යෝජනා විවෘත කරන ලෙසය.
නමුත් මහවැලි සංවර්ධන හා පරිසර අමාත්‍යාංශයේ අපගේ ආරංචි මාර්ග සඳහන් කරන්නේ තාක්ෂණික ඇගැයිම් කමිටුවේ එම උපදෙස්වලට පටහැනිව යමින් හංසින් සමාගමද ඇතුළත් කරගනිමින් සමාගම් තුනේම මිල ලංසු විවෘත කර ඇති බවයි. ඊට හේතුව වී ඇත්තේ මෙම ව්‍යාපෘතිය කොරියානු හංසින් සමාගමට ලබාදීමටම සැකසු එකක් බවට නැඟෙන චෝදනාවය. ව්‍යාපෘතියේ කොරියානු උපදේශක සමාගම ව්‍යාපෘතිය සකස්කර ඇත්තේ එම සමාගම අරමුණු කරගනිමින් යන්න එහි සරළ අදහසය. එහෙත් විවෘත ලංසු කැඳවීමේදී තවත් කොරියානු සමාගම් දෙකක් ඉදිරිපත්වීම ව්‍යාපෘති සැලසුම්කරුවන් හෙවත් මෙම ව්‍යාපෘතියේ නොපෙනෙන සැබෑ දේශීය නියෝජිතයන් අන්දමන්ද කිරීමට හේතු වී ඇත.
මෙම ව්‍යාපෘතිය සඳහා විවෘත ලංසු කැඳවීමක් සිදුකළද මුළු ව්‍යාපෘතියම සැළසුම් කර ඇත්තේ එක් සැපයුම්කරුවකුට හා කොන්ත්‍රාත්කරුවකුට ගැළපෙන පරිදි බවත්, අනෙක් ඉල්ලුම්කරුවන්ට ඉල්ලා ඇති උපකරණවලට ගැලපෙන ලෙස සැපයුම් කළ නොහැකි බවත් නැඟෙන එක් මුලික චෝදනාවක්ය.
එමෙන්ම යෝජනා කර ඇති එම උපකරණ හා යන්ත්‍රසූත්‍රද මෙම ව්‍යාපෘතියට ගැළපෙන්නේ නැති බවට තවත් චෝදනාවක් වේ. එමෙන්ම මෙම ව්‍යාපෘති තාක්ෂණය යල්පැනගිය තාක්ෂණයක් බවත් ඊට වඩා දියුණු ඝන අපද්‍රව්‍ය බැහැර කිරීමේ තාක්ෂණයක් කොරියාව තුළ පවතින බවත්, එම තාක්ෂණය මෙම ව්‍යාපෘතිය සඳහා වැය කිරීමට අපේක්ෂිත මුදලට වඩා අඩු මුදලකින් ලබාගත හැකි බවත් මෙම ව්‍යාපෘතිය සම්බන්ධයෙන් ඇති වුණ කථා බහේදී මතුවී ඇත.
කරුණු එසේ වෙද්දී වසරකට අධික කාලයක් තිස්සේ මෙම ව්‍යාපෘතිය ආරම්භ කිරීම පාමා වී ඇත. ඒ අප පෙර සඳහන් කළ තමන් කැමති සමාගමට මෙම ව්‍යාපෘතිය ලබාදීමට නෛතිකව පැන නැඟි ඇති බාධාව නිසාය. රටට ආදරේ නම් පරිසරයට ආදරේ නම් සංවර්ධනය කාර්යක්‍ෂමව සිදුකළ යුතු නම් මේ ආකාරයේ පමාවන් ඇතිවිය නොහැකිය. ජනාධිපතිවරයා නිල්වලා ගඟ ව්‍යාපෘතිය පිළිබඳ මුළු රටම ඇහෙන්නට කී පරිදි මේ ආකාරයේ පමාවන් ඇතිවන්නේ ඒ යට දූෂිත අරමුණු තිබෙනවා නම් පමණය.
මෙම ව්‍යාපෘතිය ජනාධිපතිවරයාගේ මහවැලි සංවර්ධන හා පරිසර අමාත්‍යාංශය යටතේ ඇති ව්‍යාපෘතියක් නිසා වෙනත් දූෂිතයන්ට එහි සෙල්ලම් දමන්නට බැරිබව සත්තය. ජනාධිපතිවරයාගේ ආනුභාවයෙන් එහි නිල නොවන මට්ටමින් වැජඹෙන්නේ ඔහුගේ පවුලේ සාමාජිකයෝය. කොරියානු හංසින් සමාගමට ලැඳියාවක් ඇත්තේ එවන් කෙනෙකුගෙන්ද? ජනාධිපතිතුමනි මේ පමාවේ ඇත්ත ගැන රටට ඇහෙන්නට කියනවා නම් හොඳය. එවිට අපට රාජපක්‍ෂලාගේ චීන ලැඳියාවට ප්‍රතිපක්ෂව සිරිසේනලාගේ කොරියානු ලැඳියාව ගැන සිතා ගැනීමට හැකිය.■