ආර් සම්බන්ධන් මහතාගෙන් පසු දෙමළ ජාතික සන්ධානයේ ඊළඟ නායකත්වය සම්බන්ධයෙන් සටනක් නිර්මාණය වී ඇතැයි වාර්තා වේ. ඒ පාර්ලිමේන්තු මන්ත්‍රී එම්ඒ සුමන්තිරන් හා පාර්ලිමේන්තු මන්ත්‍රී එස් ශ්‍රීධරන් අතරය.

ජනවාරි 20 වැනිදා දෙමළ ජාතික සන්ධානයේ හා එහි මූලික පක්ෂය වන තමිල් අරසු කච්චි පක්ෂයේ මීළඟ නායකත්වය පත්කර ගැනීමේ සම්මේලනය පැවැත්වීමට නියමිතව ඇත.

එහිදී දෙමළ ජාතික සන්ධානයේ නායකත්වය සඳහා දෙමළ ඩයස්පෝරාවේ වැඩි කැමැත්ත ඇත්තේ එස් ශ්‍රීධරන් මහතාට බව වාර්තා වේ. වයස්ගතභාවය හා ශාරීරික දුර්වලතාව හේතුවෙන් ආර් සම්බන්ධන් මහතා දේශපාලන කටයුතුවලට සහභාගි නොවන අතර පාර්ලිමේන්තුවට පැමිණීමද නොකරයි. මේ නිසා ඔහුට එම පක්ෂයේ නායකත්වයෙන් ඉවත් වන ලෙස දැඩි ඉල්ලීමක් පක්ෂ ප්‍රබලයන්ගෙන් පසුගිය කාලයේ ඉදිරිපත් විය.

-ඉඳුවර බණ්ඩාර-

එළඹෙන ජනාධිපතිවරණයේදී රනිල් වික්‍රමසිංහ මහතාගේ ජයග්‍රහණය තහවුරු කිරීම සඳහා පාර්ලිමේන්තු මන්ත්‍රී අනුර ප්‍රියදර්ශන යාපාගේ නායකත්වයෙන් ‘නව සන්ධානය’ සිය සංවිධාන කටයුතු පසුගිය ජනවාරි 01 දා රාජගිරිය එම සන්ධාන කාර්යාලයෙන් ආරම්භ කර ඇත.

අනුර යාපාගේ නායකත්වයෙන් ක්‍රියාත්මක වෙන මෙම සන්ධානයේ පාර්ලිමේන්තු මන්ත්‍රීවරුන් වන නිමල් ලාන්සා, නලීන් ප්‍රනාන්දු, ප්‍රියංකර ජයරත්න ප්‍රමුඛව පොහොට්ටුව ලකුණින් පාර්ලිමේන්තුවට තේරීපත්වූ මන්ත්‍රීවරුන් විශාල පිරිසක් සිටින බවත් දැනට එම පක්ෂයෙන් ස්වාධීන වී කටයුතු කරන පාර්ලිමේන්තු මන්ත්‍රීවරුන් 71 දෙනාගෙන් බහුතරය මෙම සන්ධානය සමග බවත් දැනගන්නට ඇත.

ඒ අනුව ඉදිරියේදී පොහොට්ටුවෙන් පාර්ලිමේන්තුවට තේරීපත්වුණ මන්ත්‍රීවරුන් කොටසක් සජබ සමගද තවත් කොටසක් ධම්මික පෙරේරා සමග ද තවත් කොටසක් මෙම ‘නව සන්ධානය’ නම් රනිල් වික්‍රමසිංහ ජනාධිපති ධුරයට පත් කිරීම වෙනුවෙන් ද කොටස් තුනකට කැඩී යනු ඇතැයි වාර්තා වෙයි.

ආණ්ඩුක්‍රම ව්‍යවස්ථා සභාව විසින් එම සභාවේ කර්තව්‍ය හා වෙනත් කරුණු සම්බන්ධයෙන් රීති අති විශේෂ ගැසට් පත්‍රයක් මගින් ප්‍රකාශයට පත්කර ඇත. ඒ එම සභාවේ සභාපතිවරයා විසින් පසුගිය දෙසැම්බර් 31 වැනිදාය.
ඒ අනුව ආණ්ඩුක්‍රම ව්‍යවස්ථාවේ සඳහන් කර ඇති කොමිෂන් සභාවලට නිසි සුදුසුකම් ඇති සාමාජිකයන් හා සභාපතිවරුන් පත් කිරීම යටතේ සඳහන් කර ඇත්තේ කොමිෂන් සභා සභාපතිවරයා වශයෙන් තුන්දෙනෙකුගේ නම් ජනාධිපතිවරයාට නිර්දේශ කරන බවයි.

එසේම ආණ්ඩුක්‍රම ව්‍යවස්ථාවේ නිශ්චිතවම සඳහන් යම් ධුරයක් සඳහා පත්කරනු ලැබිය යුතු තැනැත්තන් සම්බන්ධයෙන් ජනාධිපතිවරයා විසින් කරන ලද නිර්දේශ සලකා බැලීම සහ එම නිර්දේශ අනුමත කිරීම හෝ අනුමත නොකිරීම කරනු ලැබිය යුතුය යන්නය.

තවද ආණ්ඩුක්‍රම ව්‍යවස්ථාව හෝ වෙනත් යම් ලිඛිත නීතියක් මගින් කලින් කලට එම සභාව වෙත පනවනු ලබන හෝ පවරනු ලබන වෙනත් යම් කාර්ය හෝ කර්තව්‍ය ඉටුකරනු ලැබිය යුතුය යන්නය.

තමන් ජාතික ජන බලවේගය සමග එකතුවීම පිළිබඳව තවමත් නිශ්චිත යමක් කිව නොහැකි බවත්, සිය කණ්ඩායම සමග ඉදිරියේදී ඒ ගැන සාකච්ඡා කළ යුතු බවත් නිදහස ජනතා සභාවේ නායක පාර්ලිමේන්තු මන්ත්‍රී ඩලස් අලහප්පෙරුම පැවසීය.

ජාතික ජන බලවේගය සමග ඔහු සම්බන්ධ වීමට නියමිතව ඇද්ද යන්න පිළිබඳව ජනවාරි 04 දින අප කළ විමසීමකදී ඔහු ඒ බව පැවසීය.
එමෙන්ම ඉදිරියේ දී සමගි ජන බලවේගය සමග සන්ධානගත නොවූ විපක්ෂයේ කණ්ඩායම් කිහිපයක් සමග සාකච්ඡා කිරීමට බලාපොරොත්තු වන බවද ඔහු කීය.

රනිල් වික්‍රමසිංහ ජනාධිපතිවරයාගේ දේශපාලන ව්‍යාපෘතියට එරෙහිව විකල්ප දේශපාලන ව්‍යාපෘතියක් වෙනුවෙන් ඉදිරියේ දී ඒකරාශී වන බවත්, ආර්ථික වැඩපිළිවෙළ, දේශපාලන වැඩපිළිවෙළ, ජාතික සම්පත් විකිණීමට එරෙහි වැඩපිළිවෙළ ආදි මූලික කරුණුවලට එකඟ වන බවත් ඔහු පැවසීය.
පුද්ගලයන් සමග එකතුවීම ඉතිහාසය පුරාම තනතුරු කේන්ද්‍රකරගෙන මැතිවරණයක් ආසන්නයේ සිදු වූ දේශපාලනික අසරණයන්ගේ ක්‍රියාවලියක් බව ඔහු වැඩිදුරටත් පැවසුවේය.

ඩලස් අලහප්පෙරුම මහතා සමග නිදහස ජාතික සභාවේ කටයුතු කරමින් සිට සජිත් ප්‍රේමදාස මහතාගේ සමගි ජන බලවේගය සමග සන්ධානගත වීමට නියමිත ඩිලාන් පෙරේරා සම්මුඛ සාකච්ඡාවකදී ඇසූ ප්‍රශ්නයකට කියා තිබුණේ ඩලස් අලහප්පෙරුම මහතා ජාතික ජන බලවේගයට එක්වන්නේ නම් එයට සුබ පතන බවයි.

මේ සම්බන්ධයෙන් ඩිලාන් පෙරේරා මන්ත්‍රීවරයාගෙන් විමසීමේදී කීවේ විපක්ෂයේ පුළුල් සන්ධානයක් සෑදීම සම්බන්ධයෙන් තම කණ්ඩායම සාකච්ඡා කළ බවත්, එහිදී ජනතා විමුක්ති පෙරමුණ ඔවුන් සාකච්ඡා සඳහා පිළිගත්තද, දේශපාලන සන්ධානයක් යන කාරණයට එකඟත්වය පළ නොකළ බවත්, එහෙත් සජිත් ප්‍රේමදාස මහතා සමග කළ සාකච්ඡා ඉදිරියට ගිය බවත්ය.

එහිදී සමගි ජන බලවේගය යන නම වෙනස් කිරීම එහි ලාංඡනය වෙනස් කිරීම ආදියට එකඟ වූ බවත්, සන්ධානයේ තනතුරු සම්බන්ධ කාරණයේදී සජිත් ප්‍රේමදාසගේ නායකත්වයෙන් හා සභාපති මණ්ඩලයකින් එය සිදු කිරීමට යෝජනා වූවත්, සිය කණ්ඩායමේ නායකයා වන ඩලස් අලහප්පෙරුමට විශේෂත්වයක් කරන ලෙස ඉල්ලූ බවත්, ඒ අනුව කැඳවුම්කරු තනතුර ලබාදීමට එකඟ වූ බවත්, එහෙත් නියෝජ්‍ය නායක වැනි තනතුරක් බලාපොරොත්තු වීම නිසා එම සාකච්ඡා කල් ගිය බවත්ය. එසේ වුවද සමගි ජන බලවේගය සමග අවබෝධතා ගිවිසුමකට අත්සන් කිරීම ජනවාරි මාසයේදී සිදුකරන බව ඔහු පැවසීය.

සිය කණ්ඩායමේ සමහරුන් සමගි ජන බලවේගයේ සෘජු සාමාජිකයන් වශයෙන් එයට එක්විය යුතු බව කියන බවද, සමහරුන් සන්ධානයේ කණ්ඩායමක් ලෙස එයට එක්විය යුතුයැයි පවසන බවද ඔහු පැවසීය.
තමා, ජීඑල් පීරිස් හා නාලක ගොඩහේවා ජනවාරි 01 වැනිදා සජිත් ප්‍රේමදාස හමුවූයේ වසරේ පළමු දිනය වෙනුවෙන් ඔහු කළ ආරාධනයක් නිසා බවද පෙරේරා මහතා කීය.

නිදහස ජනතා සභාව නියෝජනය කරන මන්ත්‍රීවරුන් 14 දෙනෙකු මේ වනවිට සිටින අතර එය නියෝජනය කළ චන්දිම වීරක්කොඩි හා පියංකර ජයරත්න මේ වනවිට සමගි ජන බලවේගයට එක්වී තිබේ.
නිදහස ජනතා සභාවේ වත්මන් සාමාජිකයන් වශයෙන් ඩලස් අලහප්පෙරුම, මහචාර්ය ජීඑල් පීරිස්, ඩිලාන් පෙරේරා, ආචාර්ය නාලක ගොඩහේවා, මහාචාර්ය චරිත හේරත්, මහාචාර්ය චන්න ජයසුමන, කේපීඑස් කුමාරසිරි, ලලිත් එල්ලාවල, වසන්ත යාපා බණ්ඩාර, උදයන කිරිඳියගොඩ, වෛද්‍ය උපුල් ගලප්පත්ති, බීවයිජී රත්නසේකර, වෛද්‍ය තිලක් රාජපක්ෂ හා තවත් එක් අයෙක් කටයුතු කරති.

ඇන්තනී වෙරංග පුෂ්පික/ලසන්ත රුහුණගේ

පසුගියදා පොලිසියේ මැදිහත්වීමෙන් කඩාදැමුණු දෙහිවල පිහිටි සෝල් බීච් අවන්හල ආසන්නයේම පිහිටි හිටපු යුද්ධ හමුදාපති ශවේන්ද්‍ර සිල්වාට සම්බන්ධතා පවතීයැයි කියන ද ස්ටේෂන් සහ බරකුඩා යන අවන්හල් දෙක කඩාදමන්නේ කවදාදැයි එම ප්‍රදේශයේ ජනතාව ප්‍රශ්න කරති.

රාජ්‍ය අමාත්‍ය අරුන්දික ප්‍රනාන්දුගේ සහාය මත වෙරළ සංරක්ෂණ දෙපාර්තමේන්තුවේ නීත්‍යනුකූල අවසරය ලබා ඉදිකිරීම් සිදුකර දෙහිවල සහ වැල්ලවත්ත අතර මුහුදු වෙරළේ පවත්වාගෙන යමින් තිබුණ සෝල් බීච් හෝටලය ප්‍රධාන මත්ද්‍රව්‍ය ජාවාරම්කරුවකු වන ශිරාන් බාසික්ට අයත් බවට සැකකෙරෙන අවන්හලක් බව මාධ්‍ය හරහා ප්‍රකාශ කරමින්, යුක්තිය මෙහෙයුම මගින් එම කඩා දැමීම සිදුකරන බව හඟවමිනි.

ජනවාරි 01 වෙනිදා උදෑසන පොලීසියේ මැදිහත්වීමෙන් එම හෝටලය කඩා දමනු ලැබූ අතර එහිදී නැඟුණ ප්‍රශ්න හමුවේ පොලීසිය ප්‍රකාශ කළේ අනවසර ඉදිකිරීමක් නිසා වෙරළ සංරක්ෂණ දෙපාර්තමේන්තුව එම අවන්හල ඉවත් කරන්නට කටයුතු කළ බවත් පොලීසිය සිදුකළේ ඒ සඳහා ආරක්ෂාව ලබාදීම පමණක් බවත්ය.

එම අවන්හල අනවසර එකක් වනවා නම් ඊට සමානම ආකාරයට ඉදිකර තිබෙන හිටපු හමුදාපති ශවේන්ද්‍ර සිල්වා හට සම්බන්ධතා තිබෙන ද ස්ටේෂන් සහ බරකුඩා යන අවන්හල් දෙක ද එම වෙරළ තීරයේ පිහිටි අනෙකුත් අවන්හල් ද කඩාබිඳ දැමිය යුතු බව ප්‍රදේශවාසීන්ගේ මතයයි.

කඩාදමන ලද අවන්හලේ හිමිකරුවන් පසුගිය දා එම අවන්හල් භූමියේ මාධ්‍ය හමුවක් තබමින් මේ පිළිබඳව අදහස් දැක්වූ අතර එහිදී මෙහි එක් හිමිකරුවෙකු වන සම්පත් අත්තටගේ ප්‍රකාශ කළේ තම අවන්හලට ආසන්නයේ තිබෙන උසස් හමුදා නිලධාරියෙකුට අයත් අවන්හල් දෙකකට තම අවන්හල නිසා පාඩු සිදුවී ඇති බවය. එනිසා ඔහු තම බලය භාවිත කර පොලීසිය සහ වෙරළ ආරක්ෂක දෙපාර්තමේන්තුව මේ සඳහා මෙහෙයවා ඇති බවය.

තමන් 31දා රාත්‍රියේ විශාල සංගීත ප්‍රසංගයක් තම අවන්හල් භූමියේ සංවිධානය කළ බවද විශාල පොලිස් හා හමුදා සේනාවක් දමා එය නතර කළත් අනෙකුත් අවන්හල් සියල්ලේ පැවති සංගීත ප්‍රසංගවලට කිසිදු බාධාවක් පොලීසිය නොකළ බවද එහිදී ඔහු වැඩිදුරටත් ප්‍රකාශ කළේය. නීත්‍යනුකූලව විදුලිය, ජලය සහ දූරකථන පහසුකම් මෙන්ම දෙහිවල ගල්කිස්ස නගර සභාවෙන් වෙළඳ බලපත්‍රයද රැගෙන තම ව්‍යාපාරය කරගෙන ගිය බවත් අනවසර ඉදිකිරීමක් නම් ඒවා ලබාදුන්නේ කෙසේදැයි ඔහු මෙහිදී ප්‍රශ්න කළේය.

මෙම මාධ්‍ය හමුවේදී අදහස් දැක්වූ එම අවන්හලේ අධ්‍යක්ෂවරයකු සහ ආයෝජකයකු වන මොහොමඩ් රිෆා මෙසේ ප්‍රකාශ කළේය.
‘දේශබන්දු මහත්තයා, වව්නියාවේ ඉන්නකොට මගේ මස්සිනා ඔයාට කොච්චර උදව් කළාද? ඒ ඉඳලා ඔයා පෑලියගොඩට ආවම ඔයා දානෙ දෙන ගෙවල්වලට මම කොච්චර බත් පාර්සල් දීලා ඇතිද? කොරෝනා කාලේ පළවෙනි කොරෝනා දවසේ ඉඳලා නිරෝධායනය වුණ ඔයාලගේ 205 දෙනෙක්ට මම මාසෙකට බඩු ඔක්කොම දෙනකොට සර්ට පෙනුණේ නැද්ද? ඒ අවුරුද්දෙම ජනවාරි මාසේම ඔයාගේ නිලධාරීන්ට මගේ එෆ්ඩී දාල තිබුණ එකෙන් එන පොලී සල්ලි තමයි මම දීලා තිබුණේ. ඔයාගේ කඳුළ කියන වැඩසටහනට අපි ලක්ෂ 25ක් වියදම් කළේ නැද්ද? මගේ නම, අපේ පවුල, ඔක්කොම කැත කළේ ඔයා. මේ කරපු වැඩේ හරිද? ඔයගොල්ලන්ට සන්තෝසයිද? මේ වගේ කරලා අපිව නැති කරපු එක සන්තෝසයිද?’

මෙහිදී ඔවුන් ප්‍රකාශ කළේ කරුණු 8කට අදාළව නිසි අවසරය ගෙන ඉදිකළ මෙම අවන්හල කඩාබිඳ දැමූ අයට විරුද්ධව නීතිය ක්‍රියාත්මක විය යුතු බවය. එම විනාශයට අදාළව සහ කුඩු බිස්නස් කරනවා යැයි ප්‍රචාරය කර තමන්ගේ නම කැත කිරීමට අදාළවද වන්දි ලැබිය යුතු බව ඔවුන් එහිදී අවධාරණය කළේය.

හිටපු ඇමති මහින්දානන්ද අලුත්ගමගේගේ සහෝදරියගේ පුත්‍රයා පොලිස් පරීක්ෂාවකට ලක් කිරීම සම්බන්ධයෙන් පොලීසියට එල්ල වූ බලපෑම් හමුවේ බියගුළු ආකාරයෙන් කටයුතු කළ නව කුරුඳුවත්ත පොලිස්ස්ථානාධිපතිවරයා එම තනතුරෙන් ඉවත් කරන ලෙස මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායක වැඩ බලන පොලිස්පතිට දන්වා තිබේ.

ඔහු එහි සඳහන් කර ඇත්තේ එවැනි සිද්ධියක් නොවූ බව ගම්පොල ප්‍රදේශය භාර ජ්‍යෙෂ්ඨ පොලිස් අධිකාරිවරයා විමසීමේදී ස්ථානාධිපතිවරයා කියා ඇති බවත්, ඒ සම්බන්ධයෙන් වැඩ බලන පොලිස්පතිවරයාට හා පොලීසිය භාර ඇමතිවරයා දැනුවත් කිරීමේදී එවැනි සිදුවීමක් නොවූ බව ස්ථානාධිපතිවරයාගෙන් විමසීමේදී ඔවුන් දෙදෙනාට කියූ බව දැනුම් දුන් බවත්, එහෙත් ඔහු ඒ සම්බන්ධයෙන් විමර්ශනයක් සිදුකළ බවත්, එහි වාර්තාව අනුව එවැනි සිදුවීමක් සිදුවී ඇති බව තහවුරු වූ බවත්ය.

එම වාර්තාවට අනුව පරීක්ෂාව සිදුකළ නිලධාරීන්ට පරික්ෂාවට ලක්වූ පවුලෙන් සමාව ගන්නා ලෙස බලකර ඇති අතර ස්ථානාධිපතිවරයාගේ නියමය අනුව එසේ පරික්ෂා කිරීම් කළ නිලධාරීන් එය ප්‍රතික්ෂේප කර ඇත. සිද්ධිය වූ පසුගිය දෙසැම්බර් 29 දින හා 30 යන දිනවල මහින්දානන්ද අලුත්ගමගේගේ මස්සිනා හා තවත් කණ්ඩායමක් පොලීසියට පැමිණ බැණ තර්ජනය කර තිබේ.