‘මම සම්පත් නුවර ෂෙඩ් එකේ ඉදලා මහවැලි ගොවිපළ පැත්තෙන් දාලා පරාක්‍රමපුර පැත්තට යන්න බයික් එකේ යනකොට පරාක්‍රමපුර පැත්තෙන් කළුපාට ලෑන්ඩ් කෲෂර් වර්ගයේ ජීප් එකක් වේගයෙන් ආවා. ආපු වේගෙට වංගුව ගත්තේ මම ගිය පැත්තෙන්මයි. මම පාරෙන් වාහනය අයින් කරගත්තත් බේරගන්න බැරිවුණා. වැදිලා වැටුණා. ටික දුරක් ගිහිං නතර කරලා ඒ වාහනේ ආපු හතර දෙනාම මම ළඟට බැහැලා ආවා. මම කිව්වා කකුල කැඩිලා කියලා. අපි එනකම් ඉන්න කියලා ආයි වාහනේට නැඟලා යන්න ගියා. ඊට පස්සේ විනාඩි 10කින් විතර පොලීසියෙන් ආවා. පස්සේ ඇම්බියුලන්ස් එක ඇවිත් මාව සම්පත්නුවර ඉස්පිරිතාලෙට අරගෙන ගියා ඊට පස්සේ එතනින් මුලතිව් රෝහලට මරු කළා. ඊට පස්සේ මුලතිව්වලින් යාපනේ යැව්වා.
යාපනේදි ඔපරේෂන් එකක් කරලා ප්ලේට් එකක් දැම්මා. දනිස්සට උඩින් සහ පහළින් දකුණු කකුල කැඩිලා තියෙන්නේ. දැන් මාස තුනක් රස්සාවක් මොකවත් නෑ ගෙදරට වෙලා ඉන්නවා. යාපනේ ඉස්පිරිතාලේ දවස් හයක් හිටියා. මුලතිව් ඉස්පිරිතාලේ දවස් 14ක් හිටියා. කිසිම කෙනෙක් බලන්නවත් ආවේ නෑ. ප්ලේට් එකට විතරක් රුපියල් 65000ක් ගියා. බයික් එක ගන්නම දෙයක් නෑ. ඒ හප්පපු වාහනේ එළවපු ඩ්‍රයිවර්ට නොවැම්බර් මාසේ 13 හවස කැබිතිගොල්ලෑව උසාවියෙන් ඇප දුන්නා කියලා දැනගන්න ලැබුණා. නොවැම්බර් 14 වෙනකොට වැලිඔය පොලීසියේ තිබුණ වාහනයත් එයාලට නිදහස් කරලා තිබුණා. මම ගෙදර ආවාට පස්සේ ආයෙත් නඩුව තියෙන්නේ කවද්ද කියලා ඇහුවාම පොලීසියෙන් නඩුව තියෙන්නේ ජනවාරි 19 කිව්වා. ඒත් එදා නඩුවක් තිබුණේ නෑ. තවම මගේ බයික් එක දුන්නෙත් නෑ. මුලින් මම බයික් එක ඉල්ලුවා. හප්පපු වාහනෙත් රිලීස් කළා නම් මගේ බයික් එකත් දෙන්න කියලා මම කිව්වා. නඩු දවස එනකම් ඉන්න කිව්වා, පස්සේ දැන් කියනවා අරගෙන යන්න කියලා’
මේ කතාව වැලිඔය එම්.පී.ජී. කුමාරතුංගගේය. කුමාරතුංග අවුරුදු 33ක රියැදුරු රැකියාවක් කරමින් ජීවිතය ගැටගසා ගන්නා තරුණයෙක් ය. ඔහු බිය පළ කරන්නේ පොලීසිය හැසිරෙන ආකාරයට නඩුවක් හෝ නැතිව තමන්ව අනතුරට ලක්කළ පුද්ගලයන් නිදහස් කරන්නට කටයුතු කරන්නට ඇති කියා ය. ඔහුට එසේ හිතන්නට සාධාරණ හේතුවක් ඇත. පසුගිය 2023 නොවැම්බර් මස 12 වෙනි දින කුමාරතුංග අනතුරට ලක්කර ඔහු රෝහලට හෝ රැගෙන නොයා මහපාරේ අතහැර ගොස් තිබුණේ වෙන කිසිවෙක් නොව රාජ්‍ය අමාත්‍යවරයෙකු වන සිසිර ජයකොඩි සහ ඔහුගේ රියැදුරා ය. රාජ්‍ය අමාත්‍යවරයා කඨින පිංකමක් වෙනුවෙන් එදින වැලිඔය ප්‍රදේශයේ සිට ඇත. ඔහු සහ තවත් තිදෙනෙක් තමන්ගේ ණඋ – 5357 අංකය සහිත ලෑන්ඩ් කෲෂර් වර්ගයේ ජීප් රථයෙන් ගයාන් කුමාරතුංග කියන ප්‍රදේශය පසුකරමින් සිට ඇත. ඒ උදෑසන 8.30ට පමණය.
මෙම ලියුම්කරු මෙම රිය අනතුර පිළිබඳව සහ එම අනතුරට පසුව සිදුවුණ දේවල් පිළිබඳව වැලිඔය පොලීසියේ රථ වාහන අංශයේ ස්ථානාධිපති වීරතුංගගෙන් කරුණු විමසූ අතර ඔහු ප්‍රකාශ කළේ නීතිය අනුව සියල්ල සිදුකළ බවය. ඒ අනුව ඉදිරි දිනයකදී නඩුව නැවත කැඳවෙනු ඇති බවය. මෙම ලියුම්කරු එම නඩු දිනය කවදා දැයි ඔහුගෙන් කරුණු විමසූ අතර ඊට ඔහුගේ පිළිතුර වූයේ දන්නේ නෑ, බලලා කියන්නම් යන්නයි.
මෙම සිදුවීම පිළිබඳව ලියුම්කරු රාජ්‍ය අමාත්‍ය සිසිර ජයකොඩි මහතාගෙන් කරුණු විමසූ අතර එහිදී ඔහු මෙවැනි අනතුරක් සිදුවුණ බව සනාථ කළේය. ඔහු එහිදී ප්‍රකාශ කළේ මාර්ගයක ගමන් කරමින් සිටින විට ඔබට අපිට කාටත් මෙවැනි අනතුරුවලට ලක්වෙන්නට සිදුවීම සාමාන්‍ය දෙයක් බවය. මෙම සිදුවීම පිළිබඳව නීති මගින් නිවැරදි ලෙස කටයුතු සිදුවුණ බවත් ඉදිරි දිනයකදී නැවත නඩුව කැඳවෙනු ඇති බවත් ඔහු පැවසීය. තුවාලකරුවා මහපාර අයිනේ බිම වැටී සිටියදී ඔහු තමන්ගේ වාහනයේ දමාගෙන ළඟම පිහිටි රෝහල වෙත රැගෙන යන්නට කටයුතු නොකළේ ඇයිද යන්න රාජ්‍ය අමාත්‍යවරයාගෙන් කරුණු විමසූ විට ‘මේවා සාමාන්‍ය රිය අනතුරු. මම ඇමති කෙනෙක් නිසා ඔයාලා මඩ ගහන්න මේ හදන්නේ‘ යැයි කියමින් දූරකථනය විසන්ධි කරන්නට කටයුතු කළේය.
මෙම සිදුවීම සිදුවෙන අවස්ථාවේ වැලිඔය පොලීසිය අසල සිටි පුද්ගලයෙකු මෙම ලියුම්කරු සමග ප්‍රකාශ කළේ රිය අනතුර සිදුවූ පසුව අමාත්‍යවරයාගේ ජීප් රථය වැලිඔය මහවැලි නිවාඩු නිකේතනය වෙත කඩිනමින් ගිය බවත් ඊට පසු අමාත්‍යවරයා එහි බස්සවා අනෙකුත් පිරිස වැලිඔය පොලීසියට පැමිණි බවත් ය.
අමාත්‍ය සිසිර ජයකොඩිගේ වාහනයේ ගැටුණු තරුණයා අහිංසක ගම්බද දුප්පතෙක් ය. නීතිය ගැන එතරම් දැනුමක් ඔහුට නැත. එවැනි පුද්ගලයන්ට මෙවැනි අනතුරක් සිදුවූ විට නීතියේ සරණ නැතිද? අපගේ ප්‍රශ්නය එයයි. මෙම තරුණයා දැනට මාස තුනක සිට රැකියාවක් නැතිව ඇඳටම වී කාලය ගෙවන්නේ මේ රිය අනතුර නිසා ය. අනෙක් පැත්තෙන් මේ රිය අනතුර නිසා ඔහු දැන් ආබාධිත පුද්ගලයෙක් ය. වෙනදා වැඩ කළ ආකාරයට ඔහුට දැන් සාමාන්‍ය ජීවිතයක් ගෙවන්නට පුළුවන් වෙයිද? එය අනාගතය විසින් තීරණය කරනු ඇත.
එහෙත් අවම මෙම පුද්ගලයාට වන්දියක් හෝ ලැබිය යුතුය. අනෙක් පැත්තෙන් ආමාත්‍යවරයෙකු හෝ වෙනයම් තරාතිරමක පුද්ගලයෙක් හෝ මෙවැනි රිය අනතුරක දී මානුෂීය ලෙස හැසිරිය යුතුය. මෙවැනි රිය අනතුරක් සිදුවූ විට එම අනතුරට භාජනය වෙන පුද්ගලයා රෝහලකට ඇතුල් කරන්නට විනාඩියක් හෝ ප්‍රමාද වෙන තත්ත්වය තුළ මරණයට හෝ පත් වෙන්නට පුළුවන් ය. එනිසා අඩුම තමන්ගේ ජීප් රථයෙන් මේ පුද්ගලයා සම්පත් නුවර රෝහල වෙත ගෙනියන්නට හෝ මේ අමාත්‍යවරයාට නොසිතුණේ ඇයි? ප්‍රශ්නය එයයි.
