පොදු දේපළ සාවද්‍ය පරිහරණය, මුදල් විශුද්ධිකරණය යටතේ හිටපු ජනාධිපති මහින්ද රාජපක්ෂගේ ජනාධිපති කාර්ය මණ්ඩල ප‍්‍රධානී ගාමිණී සෙනරත් ඇතුළු විත්තිකරුවන් තිදෙනෙකුට එරෙහිව ස්ථීර ත‍්‍රිපුද්ගල මහාධිකරණය හමුවේ පවරා තිබූ නඩුවෙන් ඔවුන් නිදහස්වීම රාජපක්ෂවරුන්ගේ අමන්දානන්දයට හේතුවී තිබුණි.
මූල්‍ය අපරාධ සම්බන්ධයෙන් රාජපක්ෂවරුන්ට එරෙහිව එල්ලවන චෝදනා බොරු චෝදනාය යන්න එම නිදහස්වීමත් සමඟ සමාජගත කරන්නට රාජපක්ෂ මතවාදය වෙනුවෙන් දිවිහිමියෙන් පෙනී සිටින පිරිස් පමණක් නොව රාජපක්ෂවරු පවා කියන්නට වූහ.
ස්ථීර ත‍්‍රිපුද්ගල මහාධිකරණයේ සභාපති සම්පත් අබේකෝන්, සම්පත් විජේරත්න හා චම්පා ජානකී රාජරත්න යන විනිසුරු මඬුල්ල ගාමිණී සෙනරත්, පියදාස කුඩාබාලගේ හා ලසන්ත බණ්ඩාර යන විත්තිකරුවන් එල්ලකරන ලද චෝදනාවලින් නිදහස් කරනු ලැබුයේ පසුගිය අගෝස්තු 8 වැනිදාය.
ඔවුන්ට එල්ලවූ චෝදනාව වූයේ ලිට්රෝ ගෑස් සමාගමට අයත් රුපියල් මිලියන 500ක මුදලක් සාවද්‍ය ලෙස පරිහරණය කිරීමය. එවක ගාමිණී සෙනරත් ජනාධිපති කාර්ය මණ්ඩාල ප‍්‍රධානියාට අමතරව ශ්රී ලංකා රක්ෂණ සංස්ථාවේ සභාපතිධුරයද දැරූ අතර පියදාස කුඩාබාලගේ ශ්රී ලංකා රක්ෂණ සංස්ථාවේ කළමනාකාර අධ්‍යක්ෂධුරය දැරීය.
ලසන්ත බණ්ඩාර යනු හෙලන්කෝ හොටෙල්ස් ඇන්ඞ් ස්පා සමාගමේ ප‍්‍රධාන මූල්‍ය නිලධාරියා වශයෙන් කටයුතු කළේය.
මේ හෙලන්කෝ හොටෙල්ස් ඇන්ඞ් ස්පා සමාගම යනු කැන්විල් හෝල්ඩින්ස් නමැති රාජ්‍ය සමාගමේ උප සමාගමක් වූ අතර ග‍්‍රෑන්ඞ් හයට් කලම්බු හෝටල් ව්‍යාපෘතිය ක‍්‍රියාත්මක කිරිම මෙම උප සමාගමේ කාර්යය විය. කලම්බු හයට් ව්‍යාපෘතිය සඳහා මුල් ආයෝජනය රුපියල් බිලියන 18ක් වූ අතර එම මුදල ශ්රී ලංකා රක්ෂණ සංස්ථාව, ලිට්රෝ ලංකා ගෑස් සමාගම හා සේවක අර්ථසාධක අරමුදල දරනු ලැබීය. එම මුදලින් රුපියල් බිලියන 9ක මුදලක් ශ්රී ලංකා රක්ෂණ සංස්ථාවද, ඉතිරිය රුපියල් බිලියන 4.5 බැගින් ලිට්රෝ ලංකා ගෑස් සමාගම හා සේවක අර්ථසාධක අරමුදල දරනු ලැබීය.
මේ හයට් කලම්බූ ව්‍යාපෘතිය යනු හෙලන්කෝ සමූහ ව්‍යාපාරය කොළඹ ගාලූපාරේ අංක 116හි ඉදිකරමින් පැවති සෙලින්කෝ සෙලිස්ටි‍්‍රයල් ව්‍යාපෘතියය. එය ‘ඌන වත්කම් පුනරුද පනත’ යටතේ රාජපක්ෂ පාලන කාලයේදී එනම් 2012 වර්ෂයේදී රජයට හෙවත් නාගරික සංවර්ධන අධිකාරියට පවරාගනු ලැබීය. නාගරික සංවර්ධන අධිකාරිය එවක ආරක්ෂක අමාත්‍යාංශය යටතේ පැවති අතර එහි අමාත්‍යාංශ ලේකම්වරයා වූයේ ගෝඨාභය රාජපක්ෂය.
මේ හෝටල් ව්‍යාපෘතිය සඳහා පිහිටවනු ලැබූ හෙලන්කෝ සමාගමේ සභාපතිත්වය ගාමිණී සෙනරත් දැරූ අතර පියදාස කුඩාබාලගේ එහි කළමනාකරණ අධ්‍යක්ෂ විය. කැන්විල් හෝල්ඩින්ස් සමාගමේද තනතුරු දැරුවේ මේ පිරිසය. ඔවුන් කලම්බු හයට් ව්‍යාපෘතියට ලැබුණ අරමුදල්වලින් හම්බන්තොට හයට් හෝටල් ව්‍යාපෘතියක් යැයි කියමින් ඉඩමක් මිලදී ගැනීම ඉහත කී මුදල් සාවද්‍ය පරිහරණ නඩුවට නිමිත්ත විය.
මෙම හෝටල් ව්‍යාපෘති ගනුදෙනුව ගැන පරීක්ෂණ සිදුකරනු ලැබූයේ පොලිස් මූල්‍ය අපරාධ විමර්ශන කොට්ඨාසය හෙවත් එෆ්සීඅයිඞීය විසින්ය. එම පරීක්ෂණවලදී මෙම හෙලන්කෝ හොටෙල්ස් ඇන්ඞ් ස්පා සමාගම සම්බන්ධයෙන් කළුසුදු ගනුදෙනුවක් පිළිබඳ විස්තරද එෆ්සීඅයිඞීයට ලැබී තිබුණි. ඒ ගැන එෆ්සීඅයිඞීය විමර්ශන සිදුකර සාක්ෂි සටහන් කරගෙනද තිබුණි. මෙම නඩුවේ මුල් අවස්ථාවේදී එම චෝදනා අධිකරණයට ඉදිරිපත් වුවද ස්ථීර ත‍්‍රිපුද්ගල මහාධිකරණය හමුවේ නඩු පැවරීමේදී එම චෝදනාව ඉවත් වී තිබුණි. එම කරුණ මඟහැරීම එෆ්සීඅයිඞීය පාර්ශ්වයෙන් සිදුවූවක්ද, නීතිපති දෙපාර්තමේන්තුව පාර්ශ්වයෙන් සිදුවූවක්ද යන්න දන්නේ එම දෙපාර්ශ්වය පමණි.
එම කළුසුදු ගනුදෙනුව සිදුවී තිබුණේ නුවරඑළියේ ‘ලිට්ල් ඉන්ග්ලන්ඞ් කොටේජස්‘ යනුවෙන් ගල්කිස්ස ගාලූපාරේ ජේසන්ස් රියල්ටි ප‍්‍රයිවට් ලිමිටඞ් සංවර්ධනය කරමින් පැවති නිවාස ව්‍යාපෘතියේ නිවසක් හා ඊට යාබද හිස් ඉඩමක් මිලදී ගැනීම වෙනුවෙන් අත්තිකාරම් වශයෙන් හෙලන්කෝ හොටෙල්ස් ඇන්ඞ් ස්පා සමාගමේ ගිණුම්වලින් රුපියල් මිලියන 48ක මුදලක් ගෙවීම මගින්ය.
හෙලන්කෝ සමාගමත්, නුවරඑළිය නිවාස ව්‍යාපෘතියේ සමාගම වන ජේසන්ස් සමාගමත් හෙලන්කෝ සමාගමට අයත් ගිණුම් පවත්වාගෙන ගිය ලංකා බැංකුවත් ඒ සම්බන්ධයෙන් හුවමාරු කරගත් ලිපිලේඛන අනුව මේ කරුණු තහවුරු වේ.
ඒ අනුව හෙලන්කෝ හොටෙල්ස් ඇන්ඞ් ස්පා සමාගම ගෙවීම් නියෝග 596763 යටතේ 2014 ඔක්තෝබර් 13 දින ලංකා බැංකුවේ කොළඹ ආයතනික ශාඛාවට දැනුම් දී ඇත්තේ රුපියල් මිලියන 8ක මුදලක් ජේසන්ස් රියල්ටි ප‍්‍රයිවට් ලිමිටඞ් සමාගමට බැරකරන ලෙසයි.
ඒ අංක 0072783912 දරන හෙලන්කෝ සමාගමේ ගිණුමෙන්ය. එමෙන්ම එදිනම තවත් ගෙවීම් නියෝගයක් 596762 යටතේ සිදුකර ඇති අතර ඉහත ගිණුමෙන්ම රුපියල් මිලියන 40ක මුදලක් එම සමාගමට ගෙවීමට නියෝග කර ඇත.
එම නියෝගය අනුව ලංකා බැංකුවේ කොළඹ ආයතනික ශාඛාව එම මුදල් ජේසන්ස් සමාගමට බැරකර තිබේ. එම මුදල් 2014 ඔක්තෝබර් 14 දින කොල්ලූපිටිය සෙලාන් බැංකු ශාඛාව හරහා ගනුදෙනු වී තිබේ.
එම ගෙවීම්වලට අදාල කථාව ලිඛිතවම මතුවන්නේ ජේසන්ස් රියලිටි ප‍්‍රයිවෙට් ලිමිටඞ් සමාගම 2018 ජුනි 28 දින සහිතව හෙලන්කෝ හොටෙල්ස් ඇන්ඞ් ස්පා සමාගමට එවන කරුණු පැහැදිලි කිරීම අනුවය. එම සමාගමේ ප‍්‍රධාන විධායක, කළමනාකාර අධ්‍යක්ෂ ජේ.වී.කේ. ජයසූරිය ඒ ගැන සඳහන් කරන්නේ මේ ආකාරයටය. පියදාස කුඩාබාලගේ 2014 සැප්තැම්බර් මාසයේදීම ඔහුට හමුවී ඇත. එහිදී කුඩාබාලගේ ඔහු හඳුන්වාගෙන ඇත්තේ ලිට්ට්‍රෝ ගෑස් ලංකා සමාගමේ ප‍්‍රධානියා ලෙසය. එහිදී කුඩාබාලගේ ලිට්ල් ඉංන්ග්ලන්ඞ් කොටේජස් ව්‍යාපෘතියෙන් නිවසක් මිලදී ගැනීමට කැමැත්ත පළකර ඇත. ඉන්පසු සැප්තැම්බර් අග හෝ ඔක්තෝබර් මුල (2014 වර්ෂයේ * නුවරඑළිය නිවාස ව්‍යාපෘතිය නැරඹීම සඳහා පැමිණ තිබේ. එහිදී ඔහු ලොට් අංක 22 තුළ හිමිවන නිවසක්, ඊට යාබද ලොට් අංක 21 දරන හිස් ඉඩමක් මිලදී ගැනීමට කැමැත්ත පළකර තිබේ. මේ නිවස සහිත කොටස හා හිස් ඉඩම් කොටස මිලදී ගැනීමට එකඟ වී ඇති මුදල රුපියල් මිලියන 88කි. ඊට අදාලව පියදාස කුඩාබාලගේ 2014 ඔක්තෝබර් 13 දින අවස්ථා දෙකක් ලෙස රුපියල් මිලියන 48ක මුදලක් අත්තිකාරම් වශයෙන් ගෙවා තිබේ. ඉන්පසු කුඩාබාලගේ තවත් රුපියල් මිලියන 32ක මුදලක් එච්එස්බීසී බැංකුවේ චෙක්පතකින් 2015 මාර්තු 10 දින ගෙවා ඇති අතර රුපියල් මිලියන 5ක මුදලක් 2016 අපේ‍්‍රල් 8 වැනිදා මුදලින් ගෙවා ඇත.
මෙම ගනුදෙනුවල පැහැදිලිි කරුණක් තිබේ. එනම්, හෙලන්කෝ සමාගමේ මුදල්වලින් රුපියල් මිලියන 48ක මුදලක් නුවරඑළියේ ලිට්ල් ඉන්ග්ලන්ඞ් කොටේජස් ව්‍යාපෘතියේ නිවසක් මිලදී ගැනීම සඳහා අත්තිකාරම් වශයෙන් ගෙවා ඇති බවයි. ඒ අනුව රාජ්‍ය සමාගමක මුදල් පෞද්ගලික නිවසක් මිලදී ගැනීම සඳහා ගෙවීමට නියෝග කරන ලද හෙලන්කෝ සමාගමේ නිලධාරීන් ඊට වගකිව යුතුය. එය බැහැර කළ නොහැක්කකි.
හෙලන්කෝ සමාගමේ මෙම මුදල් ගෙවීම්වලින් පසු තවත් අපූරු දෙයක් සිදුවී තිබේ. ඒ හෙලන්කෝ සමාගමේ කොමර්ෂල් බැංකුවේ ඇති 1030016407 දරන ගිණුමට එච්එස්බීසී බැංකුවේ 939948 අංක සහිත චෙක්පතක් මගින් රුපියල් මිලියන 40ක මුදලක් 2014.12.08 දින ලැබීමත් එම බැංකුවේම අංක 010235 දරන චෙක්පත මගින් රුපියල් මිලියන 8ක මුදලක් 2014.12.30 දින ලැබීමත්ය.
නුවරඑළියේ ලිට්ල් ඉන්ග්ලන්ඞ් කොටේජස් නිවස හා ඉඩම වෙනුවෙන් හෙලන්කෝ සමාගමෙන් ජේසන්ස් සමාගමට ගෙවූ මුදලට මෙසේ නොදන්නා ලෙස බැරවූ මුදල සමානය. එහෙත් මුදල් ගෙවූ පුද්ගලයෙකු දැනගන්නට නැත. දන්නා එකම කාරණය නම් ජේසන්ස් සමාගමට රුපියල් මිලියන 48ක් පුංචි එංගලන්තයේ නිවසක් හා ඉඩමක් මිලදී ගන්නට ගෙවූ බවය. මෙම සිද්ධිය මැදමුලන ඞී.ඒ. රාජපක්ෂ කෞතුකාගාරය ඉදිකිරීම සඳහා නාගරික සංවර්ධන අමාත්‍යාංශයේ හිටපු ලේකම් ගෝඨාභය රාජපක්ෂ ශ්රී ලංකා ඉඩම් ගොඩකිරීමේ හා සංවර්ධනය කිරීමේ සංස්ථාවේ මුදල් වැය කිරීමට සමානය. සිය පියාගේ ස්මාරකය ඉදිකිරීම හෙවත් ස්මාරකය ඉදිකිරීම හෙවත් පෞද්ගලික කටයුත්තක් සඳහා රාජ්‍ය මුදල් වැයකිරීම හෙළිදරව් වීමෙන් පසු ගෝඨාභය රාජපක්ෂ මුදල් පසුව ගෙව්වේය. ඉන් රාජ්‍ය මුදල් සාවද්‍ය පරිහරණය නැති කළ හැකි වන්නේ නැත. ස්ථීර ත‍්‍රිපුද්ගල මහාධිකරණය හමුවේ ගෝඨාභය රාජපක්ෂට එරෙහිව නඩු වැටී ඇත්තේ ඒ නිසාය. එම නඩුව මඟහැරීම සඳහා ගෝඨාභය රාජපක්ෂ නොගත් උත්සාහයක් නැත. තවමත් ඒ උත්සාහය අත්හැරද නැත. ඒ එම සිද්ධිය කළු සුදු යැයි ඔහු දන්නා නිසාය.
නුවරඑළියේ ලිට්ල් ඉන්ග්ලන්ඞ් කොටේජස් ව්‍යාපෘතියෙන් නිවසක් හා ඉඩමක් මිලදී ගැනීමට හෙලන්කෝ සමාගම අත්තිකාරම් ගෙවූ කථාවක් මැදමුලන සිද්ධිය වගේම කළු සුදුය. එහිද පාට බොඳවී යන අතරමැද තැනක් නැත. එෆ්සීඅයිඞීයට මෙන්ම නීතිපති දෙපාර්තමේතුවටත් ඕනෑ නම් දැන් වුවත් ඒ ගැන සොයාබැලිය හැක. මන්ද ඔවුන් මහත් බලාපොරොත්තුවෙන් ඉක්මනින් අසා දඬුවම් දීම සඳහා මේ ගනුදෙනුවලටම සම්බන්ධව පැවරූ නඩුවෙන් විත්තිකරුවන් නිදහස් වී එම ආයතන කැළලට පත්වී තිබෙන නිසාය.
අනෙක් මතු කළ යුතු කරුණ වන්නේ නුවරඑළියේ ලිට්ල් ඉන්ග්ලන්ඞ් කොටේජස් නිවස හා ඉඩම මිලදී ගත්තේ රාජපක්ෂ ව්‍යාපෘති වෙනුවෙන් කරගැසූ පියදාස කුඩාබාලගේටද නැතහොත් වෙන කාහටද යන්නය. ඒ සඳහා පියදාස කුඩාබාලගේට මුදල් ලැබුණේ කොතැනින්ද යන්නය.
