ලසන්ත අලගියවන්න
රාජ්‍ය කළමනාකරණ හා ගිණුම් කටයුතු රාජ්‍ය අමාත්‍ය
රන්ජන් රාමනායකගේ හඬපට ගැන ශ‍්‍රීලනිප ස්ථාවරය මොකද්ද?
මේ සිද්ධිය අපි කොහෙත්ම අනුමත කරන්නේ නෑ. සම්පූර්ණයෙන්ම හෙළාදකිනවා. මේක සදාචාර විරෝධී ක්රියාවක්. අදාළ සියලූ දෙනාට විරුද්ධව නීතිය දැඩිව ක‍්‍රියාත්මක කරන්න ඕනෑ. අනික් පැත්තෙන් මම කියන්නේ දැන් මේක ඇති. රටක් විදිහට අපිට කතාකරන්න තව ප‍්‍රශ්න නැත්ද? දෙදෙනෙක් අතර සිද්ධවුණ ¥රකථන සංවාදයක් අල්ලගෙන මොකද්ද මේ නටන නාඩගම. මම හිතන්නේ අපිට රටක් විදිහට කතාකරලා බේරගන්න ඕනෑ ප‍්‍රශ්න එමටයි මේ වෙලාවේ.
ඒත් ඇමතිතුමා විරුද්ධ පක්ෂය කියන කතාවක් තමයි ආණ්ඩුව ඉහළ යන ජීවන වියදම හමුවේ ඒක ජනතාවගෙන් වසන් කරන්න සහ දුමින්ද සිල්වා නිදහස් කරලීම සඳහා මේ හඬපට සිද්ධිය කරළියට ගෙනත් තියෙනවා කියන කාරණය..
නැහැ. ඒක මම ප‍්‍රතික්ෂේප කරනවා. අපිට එහෙම ඔය කියන වර්ගයේ අවශ්‍යතාවක් නැහැ. මට තියෙන ප්රශ්නය, ප‍්‍රශ්න යටගැහීම පිළිබඳ ප‍්‍රශ්නයක් නෙවෙයි. අපි වෙනත් හොඳ දේවල් පිළිබඳව කතාකරන්නේ නෑ. එතැනයි අවුල තිබෙන්නේ. අපිට ජනතාවගෙන් හංගන්න දේවල් නෑ. මේ ආණ්ඩුව හොඳට යනවා. අපි ජනතා ප‍්‍රශ්නවලට ආමන්ත‍්‍රණය කරමින් ඉන්නවා. බලන්න ජනාධිපතිවරයා, ඔහු ඔය හඬ පටියක් අල්ලගෙන දුවන්නේ නෑ. ඔහු මේ රටේ මේ වෙලාවේ ඇත්තටම තිබෙන ප‍්‍රශ්න පිළිබඳව කටයුතු කරමින් ඉන්නවා.
මෙම සිද්ධිය ඉස්සරහට දාගෙන ආණ්ඩුවේ බොහෝ දෙනෙක් අද අධිකරණයේ සහ පොලිසියේ ස්වාධීනත්වය ගැන කතාකරනවා. ආණ්ඩුවත් එක්ක ඉන්න සමහර සංවිධාන අධිකරණ විනිසුරුවරියන්ට විරුද්ධව පෝස්ටර් පවා ගසමින් අධිකරණය විවේචනය කරමින් ඉන්නවා. මොකද්ද මේ වෙන්නේ..
මේ සිද්ධිය නිසා කවුරුහරි කියනවා නම් අධිකරණය පොලිසිය කඩාගෙන වැටිලා කියලා ඒක මම නම් පිළිගන්නේ නෑ. ඕනෑම ක්ෂේත‍්‍රයක මේ වගේ සුළු පිරිසක්, පුද්ගලයන් ඉන්නවා. ඔවුන් ඒ පද්ධතියේ පැවැත්මට අවැඩක් වෙන විදිහට කටයුතු කරලා තිබෙයි නම් ඒ සඳහා පියවර ගැනීම අදාළ අංශවල යුතුකම. දැන් ඒ කාරිය කරමින් තිබෙනවා. ජනතාවට හෝ සංවිධානවලට තිබෙන්නේ ඒ ක‍්‍රියාවලියට සහාය දීම මිසක් මැද්දට පැනලා සම්පූර්ණයෙන්ම එම පද්ධතීන් බිඳදමන්න කටයුතු කරන එක නෙවෙයි. රටක පැවැත්මට පොලිසිය අධිකරණය අවශ්‍යයි. ඒ නිසා අපි මෙතැනදි මීට වඩා වගකීමෙන් කටයුතු කළ යුතුයි.
අනික ඔබ කලින් මතුකළා ජීවන වියදම වගේ ප‍්‍රශ්න අමතක කරන්න අපි විසින්ම මේ තත්ත්වය නිර්මාණය කළා කියලා. දැන් මේ ඉහළ යන එළවළු මිල ගණන්, හාල් මිල ගණන් මේක හැමදාම මෙහෙම තමයි. මිල උච්චාවචනය වෙනවා. සමහර තත්ත්වයන් පාලනය කරන්න බෑ. දේශගුණය වගේ දේවල් නිසා එළවළු මිල ඉහළ යනකොට ඒක පාලනය කරන්න අමාරුයි. පාන් හදනවා වගේ එළවළු හදන්න බැහැ. හාලූත් එහෙමයි. කොහොම වුණත් මේ ජීවන වියදම් ගැටලූවට තිරසාර විසඳුමක් ඕනෑ. ඒක හැමදාම තිබුණ ප‍්‍රශ්නයක්.
ආණ්ඩුවට මේ අවුරුද්දේ අධික ණය පොලි වාරිකයක් ගෙවන්න තිබෙනවා. අපි දන්නවා දැන් තවත් විශාල ණය කන්දක් චීනයෙන් ගන්න යනවා. මේ දේවල් නිසා අපේ ආර්ථිකය තවතවත් අර්බුදයට ගමන් කරනවා නේද?
ණය මුදල කොච්චරද, මේ අවුරුද්දේ අපි ගෙවිය යුතු ණය පොලි වාරිකය කොච්චරද කියලා මහබැංකු වාර්තාවේ තිබෙනවා. කාටවත් බොරු කරන්න දෙයක් නෑ. අනික අපි දැනට අවුරුදු හයකට හතකට කලින් ඉඳලම දන්නවා 2020දී කොතරම් පොලියක් අපි ගෙවන්න ඕනෑද කියන එක. ඒ නිසා දැන් මේක ගෙවන්නේ කොහොමද කියලා කල්පනා කරලා වැඩක් නෑ. මේක ගෙවන්න ඕනෑ. ඒ සඳහා තවත් ණය ගන්න ඕනෑ. ඊට මෙහා විකල්පයක් අපේ වගේ රටකට නෑ. එනිසා මේ මුදල ණයක් විදිහට අනිවාර්යයෙන්ම ලබාගත යුතුයි. එජාපය හිටියා නම් දළ දේශීය නිෂ්පාදිතය ටක්ගාලා වැඩි කරලාද මේ මුදල හොයාගන්නේ? නෑ. ඔවුන් හිටියත් ඔවුන්ටත් මේ ණය ගන්නම වෙනවා. වෙන විකල්පයක් නෑ. නමුත් මේ ණය ගන්න ගමන් මේ ණය ගෙවීම සඳහා සහ ඉදිරියේදී ණය ගන්න ප‍්‍රමාණය ක‍්‍රමයෙන් අඩුකරගැනීම සඳහා රට තුළ නිෂ්පාදන ආර්ථිකය අපි ශක්තිමත් කරන්න ඕනෑ. වාර්ෂික අපනයන ප‍්‍රමාණය වැඩි කරන්න ඕනෑ. අපි දැන් බදු සහන රැුසක් දීලා තිබෙනවා. බැංකු ණය වැනි දේවල් කපාහැරලා තිබෙනවා. එහෙම තත්ත්වයක් තියෙනකොට ණය ගන්නේ නැතුව කොහොමද? ජනතාවට සහන දෙන්න වෙන්නේ ණය අරගෙන තමයි. ඒක තමයි යථාර්ථය.
එම්සීසී ගිවිසුම කියන්නේ ප‍්‍රදානයක්. නිකන්ම වගේ විශාල මුදලක් රටට ගලාගෙන එන අවස්ථාවක්. මෙහෙම මූල්‍ය අර්බුදයක් තියෙන වෙලාවක ඇයි වහාම මේ මුදල ගන්නේ නැත්තේ? ප‍්‍රමාදයට හේතුව මොකද්ද?
රටේ අනන්‍යතාව ස්වෛරීත්වය ආරක්ෂාවෙන විදිහට තමයි අපි ජනාධිපති ගෝඨාභය රාජපක්ෂගේ විදේශ ප‍්‍රතිපත්තියට අනුව කටයුතු කරන්නේ. මේ ගිවිසුමෙන් රටට යම් අහිතකර බලපෑමක් තිබෙනවා නම් එහි තිබෙන කොන්දේසි රටට ගැටලූවක් නම් අපි මේක ප‍්‍රදානයක් වුණත් ගන්න ලෑස්ති නෑ. නමුත් රටට මෙතුළින් මොකද්ද වෙන්න පුළුවන්, අපිට අහිතකර කොන්දේසි තිබෙනවාද, එහෙම තිබෙනවා නම් ඒවා ඉවත්කරගන්නේ කොහොමද වගේ දේවල් ගැන අපි මේ වෙනකොට සොයා බලමින්, අධ්‍යයනය කරමින් ඉන්නවා. මම හිතන්නේ ඉතා ඉක්මනින් මේ ගිවිසුමට මොකද වෙන්නේ කියන එක අපිට කියන්න පුළුවන් වෙයි.. මේක අතෑරලා කටයුතු කරනවාද නැතිනම් ඉක්මනින් අත්සන් කරලා මේ සල්ලි ගන්නවාද කියන දෙකම තාම තීරණය කරලා නෑ.
තව මාස දෙක තුනකින් පාර්ලිමේන්තු මැතිවරණය එනවා. මේ මැතිවරණයට ශ‍්‍රීලනිපය තරගකරන්නේ කොහොමද? පොහොට්ටුව සමග එකතුවෙලාද නැතිනම් තනිවමද?
මේ මැතිවරණයට ශ‍්‍රීලනිපය තරග කරන්නේ කොහොමද කියන එක ගැන අපිට තවත් සංවාද කරන්න දෙයක් නෑ. අපි පහුගිය ජනාධිපතිවරණයේදී ගෝඨාභය රාජපක්ෂ මහතාට සහාය දුන්නේ පුළුල් එකඟතාවක් මත ඉඳලා. ඒ එකඟතාව ක‍්‍රියාත්මක කරන්නයි දැන් තිබෙන්නේ. අපි 2015 ඉඳලා පහුගිය ආණ්ඩුව සමග එකට කටයුතු කළා එහෙම ඉඳලා තමයි අපි මහින්ද රාජපක්ෂ මහතා ඔක්තෝබර් 26 අගමැති පුටුවේ හිඳවන්නේ. මේ ගමනේ ආරම්භය තිබෙන්නේ එතැන. අපි ඒක අමතක කරන්න හොඳ නෑ. අපේ වර්තමාන නායකයා එවක ජනාධිපති මෛත‍්‍රීපාල සිරිසේන මහත්තයා විශාල කාර්යභාරයක් කළා එදා ඉඳලා මේ ප‍්‍රතිඵලය සඳහා. මහින්ද රාජපක්ෂ මහතා අග‍්‍රාමාත්‍යවරයා කළ එක අධිකරණය ප‍්‍රතික්ෂේප කළාට පසු අපි විපක්ෂයට ආවා, මහින්ද රාජපක්ෂ මහතාට විපක්ෂ නායකකම ලබාදුන්නා. ඊළඟට අපේ මන්ත‍්‍රීවරුන්ට පාර්ලිමේන්තුවේ ප‍්‍රශ්නයක් වෙනකොට අපි පක්ෂයක් විදිහට ඔවුන් වෙන පක්ෂයකට ගිහිං හිටියත් සහාය දුන්නා. ඉතිං අපි මේව ගැන හිතන්න ඕනෑ.
අනික තමයි අපි ශ‍්‍රීලනිප විදිහට නිහතමානීව හිතන්න ඕනෑ අපි එකට ඉන්න පක්ෂ අතර බහුතර ජනතාව ඉන්නේ කා එක්කද කියන එක ගැන. පොදුජන පෙරමුණ තමයි අපේ ප‍්‍රමුඛ පක්ෂය. අපි ඒක නිහතමානීව පිළිඅරගෙන් ගැටුමක් හදාගන්නේ නැතුව කටයුතු කරන්න ඕනෑ. එනිසා මේ සන්ධානය ඇතුළේ ඔවුන්ට ප‍්‍රමුඛතාව දීලා ශ‍්‍රිලනිපයේ අපි කටයුතු කළ යුතුයි.
ඔබ මෙහෙම කතාකළාට මේ සන්ධානයේ ලකුණ පොහොට්ටුවද පුටුවද කියන බරපතළ ප්රශ්නය තිබෙනවා නේද? පොදුජන පෙරමුණේ ප‍්‍රබලයෝ කියන්නේ පොහොට්ටු ලකුණ කිසිසේත් වෙනස් වෙන්නේ නෑ කියලා.
අපි ජනාධිපතිවරණයට කලින් සාකච්ඡුා කළා, එකඟතාවකට අත්සන් කළා. ඒ නිසා මේ ගැන නැවතත් සාකච්ඡුා කිරීමේ පලක් නෑ. එක එක්කෙනාගේ අදහස් ගැන අපි කලබල වෙන්න නරකයි. එහෙම අදහස් ඕනෑ පක්ෂයක සන්ධානයක තිබෙනවා. ජනාධිපතිවරයා හෝ අග‍්‍රාමාත්‍යවරයා තවම කියලා නෑනේ අපි කොහොමද ඉදිරි මැතිවරණයට තරග කරන්නේ කියන දේ. අපිට දැනට මේ සන්ධානයේ පක්ෂයක් කියන පිළිගැනීම තිබෙනවා. අපි පක්ෂ නායක රැුස්වීමට සහභාගි වෙනවා. අපේ අමාත්‍යවරු අමාත්‍ය මණ්ඩලයේ ඉන්නවා. ඉතිං මේ දෙවනපෙළ නායකයෝ හෝ ප‍්‍රදේශීය නායකයෝ කියන දේවල් අපිට වැඩක් නෑ. අපි පක්ෂයක් විදිහට ඒ ගැන කලබල වෙන්නෙත් නෑ. හරි වෙලාවට හරි දේ වෙයි.
ඔබ මොනවා කිව්වත් දැනටම නාමයෝජනා ලබාදීම ගැන ජනාධිපති ගෝඨාභය රාජපක්ෂගේ සමීපතයන් සිටින වියත් මග සංවිධානය සහ පොදුජන පෙරමුණ අතර විශාල ප‍්‍රශ්න ඇතිවෙමින් තිබෙනවා නේද? ඔවුන් දෙපිරිස එකිනෙකාට චෝදනා කරගනිමින් සිටිනවා. මේ තත්ත්වය තුළ දිස්ත‍්‍රික් නාමයෝජනා ලැයිස්තුව තුළ ඔබලාට ශ‍්‍රීලනිපයට නිසි තැන ලැබෙයි කියලා විශ්වාසයක් තිබෙනවාද?
නැවතත් කියන්නේ ජනාධිපතිවරණ එකඟතාවක් තිබෙනවා. ඒ එකඟතාව ජනාධිපතිවරයා ක‍්‍රියාත්මක කරයි කියන විශ්වාසය අපිට තිබෙනවා. අපි දන්නේ නෑ පොහොට්ටුව සහ වියත් මග අතර මොන වර්ගයේ මතභේද කතා තිබෙනවාද කියලා. ඔය කිසිම සංවිධානයක් සමග අපිට ගැටලූ නැහැ. අපි හිතනවා ඔවුන්ටත් එහෙම ගැටලූ අපි සම්බන්ධව නැතුව ඇති කියලා.
ඒත් පොදුජන පෙරමුණේ ඇතැමුන් සහ වියත් මගේ සමාජිකයන් ශ‍්‍රීලනිපයට ඡුන්ද නෑ, ඒ නිසා ඔවුන්ට විශාල කෝටාවක් දිය යුතු නෑ කියලා දැනටම කියනවා.
දෙවන පෙළ නායකයන් සහ ප්රාදේශීය නායකයන් කියන දේවල් පිළිබඳව අපි එතරම් කලබල වෙන්නේ නෑ. ඕනෑ කෙනෙක්ට ඕනෑම මතයක් දරන්න ස්ථාවරයක් ප‍්‍රකාශ කරන්න අයිතිය තිබෙනවා. බලමු ඉතිං මොකද වෙන්නේ කියලා. තාම මැතිවරණය පවත්වන දිනයක් හෝ ආණ්ඩුව විසුරවාහරින දිනයක් නෑ.
ගෝඨාභය රාජපක්ෂ මහතා මීළඟ පාර්ලිමේන්තුවේ තමන්ට තුනෙන් දෙකක බලයක් අවශ්‍යයි කියනවා 19 වැනි සංශෝධනය සංශෝධනය කරන්න. මේ ව්‍යවස්ථා සංශෝධනය ගේන්න ශ‍්‍රීලනිපයේ නායකයා විදිහට හිටපු ජනාධිපති සිරිසේන මහතා විශාල වැඩ කොටසක් කළා. මේ තත්ත්වය තුළ ශ‍්‍රීලනිපයත් හිතනවාද 19 අහෝසි කරලා නැවත අපි 18වැනි ව්‍යවස්ථා සංශෝධනයට යන්න ඕනෑ කියලා.
අපි පක්ෂයක් විදිහට සහ අපේ නායකයා විදිහට මෛත‍්‍රිපාල සිරිසේන මහතා මේ ව්‍යවස්ථා සංශෝධනය ගේන්න ලොකු වැඩ කොටසක් කළා, ඒක ඇත්ත. හැබැයි මේක සම්මත වෙලා ප‍්‍රායෝගිකව ක‍්‍රියාත්මක වෙනකොට එතුමා සහ අපේ පක්ෂය පක්ෂයක් විදිහට මේකේ දුර්වලතා දැක්කා. අපි ඒවා රටට කිව්වා. එතුමා ඊට පස්සේ නිතරම කිව්වා මේ ව්‍යවස්ථාව සංශෝධනය වෙන්න ඕනෑ කියලා. ඒවා ලිඛිතවත් එතුමා ඉදිරිපත් කළා. ඒ අනුව අපිත් පක්ෂයක් විදිහට පැහැදිලි ස්ථාවරයක ඉන්නවා මේක සංශෝධනය වෙන්න ඕනෑ කියලා. ඒ අනුව අපි කියනවා අපිට එළැඹෙන ඡුන්දයේදී තුනෙන් දෙකක බලයක් දෙන්න කියලා. හැබැයි සංශෝධනය කරන්න ඕනෑ කියන්නේ නැවත 18වැනි සංශෝධනයට යන්න ඕනෑ කියන එක නෙවෙයි. අපි කියන්නේ ජනතාවගේ පැත්තෙන් සහ රටේ ආණ්ඩුකරණයේ ස්ථාවරත්වය පැත්තෙන් බලලා මේක සංශෝධනය විය යුතුයි කියලයි. අමතක කරන්න එපා 2030 වෙනකම් ජනාධිපති ගෝඨාභය රාජපක්ෂ මහතාම තමයි. එතකොට එතුමාගේ මේ රට හදන දස අවුරුදු වැඩපිළිවෙළ ක‍්‍රියාත්මක කරන්න පුළුවන් බාධාවක් නැති ආණ්ඩුකරණයකුයි අපිට මේ වෙලාවෙ අවශ්‍ය.
ඔබලා තුනෙන් දෙකක ජනවරමක් ඉල්ලූවත් උතුරු නැගෙනහිර ජනතාව ඔබලාගේ දේශපාලන අභිලාෂයන් සමග නැහැ. මේ තත්ත්වය වෙනස් කරගන්න කාලයක් තිබෙනවාද?
මට හිතෙන්නේ මේ ඡුන්දයේදී දෙමළ මුස්ලිම් මිනිස්සු නිවැරදි වෙයි. ඔවුන්ට නිවැරදි වෙන්න අවස්ථාව මේ මැතිවරණයේදී ලැබෙනවා. ඔවුන් දැනටමත් තේරුම් අරං ඉන්නේ ගෝඨාභය රාජපක්ෂ මහතා සමග එකට ඉන්න ඕනෑ කියන දේ. ගෝඨාභය රාජපක්ෂ කියන පුද්ගලයා මෙන්න මේ වගේ කියලා වැරදි මතයක් තමයි රට තුළ පහුගිය කාලේ හැදුවේ. ඒකත් එක්ක තමයි දෙමළ මුස්ලිම් ජනතාව අපෙන් ඈත්වුණේ. දැන් අපි සංවර්ධනය, සුරක්ෂිතාවය උතුරට නැගෙනහිරට අරගෙන ගිහිං තිබෙනවා. බුදු දහමට ප‍්‍රමුඛස්ථානය ලබාදෙමින් මේ සුළු ජාතීන්ගේ ආගම් ඇදහීමේ අයිතිය අපි තහවුරු කරලා තිබෙනවා. ඒ තත්ත්වය අස්සේ අපිට අමුතුවෙන් යමක් කරන්න ඕනෑ වෙන එකක් නෑ. ඒ නිසා උතුරේ බොරුවට රැුස්වීම් තියලා එකකුයි දකුණට තව එකකුයි කියන්න වෙන එකක් නෑ.
පාස්කු ප‍්‍රහාරයත් සමග මුස්ලිම් රැුඩිකල්කරණය ගැන ඔබලා විශාල වශයෙන් කතාකළා. දැන් නිහඬයි. මොකද්ද මේකට හේතුව?
නිහඬ නැහැ. ඒ නීති ප‍්‍රතිසංස්කරණ සිදුවෙමින් තිබෙනවා. පාර්ලිමේන්තුවේ විශේෂ කාරක සභාවක් මලිත් ජයතිලක මන්ත‍්‍රීවරයාගේ නායකත්වයෙන් ක‍්‍රියාත්මක වෙමින් තිබෙනවා, ඒ නීතිමය ප‍්‍රතිසංස්කරණයන් සඳහා. මම හිතන්නේ හෙට අනිද්දා ඔහු ඒ පිළිබඳව ප‍්‍රකාශයක් කරයි. එනිසා ශ‍්‍රීලනිපය විදිහට අපි කියන්නේ මේ රටට එක නීතියක් අවශ්‍යයි කියන දේ. මම හිතන්නේ ඒ දේවල් ඉදිරි කාලයේ නියමිත විදිහට ක‍්‍රියාත්මක වෙයි.
රණසිංහ පේ‍්‍රමදාස හිටපු ජනාධිපතිවරයා අනුගමනය කරමින් වර්තමාන ජනාධිපතිවරයා රාජ්‍ය ආයතනවලට කඩවල්වලට හදිස්සියේ කඩාපැනලා නිරීක්ෂණය කරමින් ඉන්නවා. විපක්ෂය කියන්නේ මේක නිකං ෂෝ එකක් විතරයි කියලා.
නැහැ රාජ්‍ය නායකයා විදිහට ඔහු ගන්න මේ ක‍්‍රියාමාර්ගය නිසා අද රාජ්‍ය අංශය පිබිදිලා ඉන්නවා. මේ ගිය බොහෝ ආයතන ඒ පොරොන්දු වුණ විදිහට ඉක්මනින් ජනතා සේවයට කැපවෙලා තිබෙනවා. ඒ වගේ දේවල් අනෙකුත් රාජ්‍ය ආයතනත් අනුගමනය කරමින් ඉන්නවා. මම හිතන්නේ මේ නිරීක්ෂණ චාරිකාවන් නිසා ජනතාව තුළ විශාල ලෙස අප‍්‍රසාදයට පත්වෙලා තිබෙන ආයතන නඟාසිටුවන්න හැකිවෙයි. රාජ්‍ය ආයතන තියෙන්නේ ජනතා සේවයට. ඔවුන් එයට කැපවිය යුතුයි.
වතුකම්කරුවන්ගේ දෛනික වැටුප රුපියල් 1000ක් කරන්න කියලා ජනාධිපතිවරයා කියලා තිබෙනවා. නමුත් හාම්පුතුන් බෑ කියනවා. මේ තත්ත්වය තුළ ජනාධිපතිවරයා විහිළුවක් වෙනවා නේද?
ජනාධිපතිවරයා රාජ්‍ය නායකයා විදිහට, එතුමා මැතිවරණයේදී දුන්න පොරොන්දුවක් ඉටුකරලා තිබෙනවා. ඔහු කියලා තිබෙනවා මේ වැටුප රුපියල් දාහ කරන්න කියලා. දැන් අදාළ අමාත්‍යාංශ සතුව තමයි වැඬේ තිබෙන්නේ. අමාත්‍යාංශ තියෙන්නේ ඒකට. ඔවුන් වහාම ක‍්‍රියාත්මක වෙලා මොන ක‍්‍රමයෙන් හරි ජනාධිපතිවරයාගේ තීන්දුව ක‍්‍රියාත්මක කළ යුතුයි. පුද්ගලික අංශය මොනා කිව්වත් ඔවුන් රාජ්‍ය නියාමනයට යටත් කියන එක ඔවුන් දැනගන්න ඕනෑ. ඒ නිසා ඒ අවශ්‍ය පියවර ඒ ඒ අමාත්‍යාංශ වහාම ගන්න ඕනෑ.
