පසුගිය 14 වෙනිදා පොලිසිය භාර ඇමති සරත් වීරසේකර කිව්වා ලන්කා හොස්පිටල්ස් බෝම්බය සහ පල්ලියේ බෝම්බය දෙකම තියලා තියෙන්නේ එක ම කෙනෙක්. ඒ මහමොළකරු අපි අල්ලා ගන්නවා කියලා. මේ ප්‍රකාශය කරන විට වෛද්‍යවරයාව අත් අඩංගුවට අරගෙනවත් තිබුණේ නෑ. එහෙම අත් අඩංගුවට අරගෙන ප්‍රකාශයක් සටහන් කරගන්නත් කලින් තමයි ඔහු මේ ප්‍රකාශය සිදු කළේ. ඊට ටික දවසකට පස්සේ පොලිසිය ඒ වෛද්‍යවරයාව අත්අඩංගුවට අරන් කියනවා මේ බෝම්බ සිදුවීම් දෙකම කරලා තියෙන්නේ මේ වෛද්‍යවරයා කියලා.

■ අමන්දිකා කුරේ

බොරැල්ල සියලු ශාන්තුවරයන්ගේ දේවස්ථානයේ බෝම්බ සිදු වීම සම්බන්ධයෙන් තොරතුරු ප්‍රමාණයක් පසුගිය සතියේ පුවත්පතින් අපි අනාවරණය කළෙමු. බෝම්බය තබන්නට උපදෙස් දුන් බවට සැකපිට ත්‍රස්තවාදය වැළැක්වීමේ පනත යටතේ රඳවාගෙන සිටින වෛද්‍යවරයාගේ පාපෝච්චාරණය සම්බන්ධයෙන් ද කතෝලික ප්‍රජාව තුළ මේ වන විට කතාබහක් මතුව තිබේ.
1974 දී තමා සිංහල බෞද්ධ කාන්තාවක සමග සියලු ශාන්තුවරයන්ගේ දේවස්ථානයේ දී විවාහ වීමේ දී ඇය බෞද්ධ කාන්තාවක වූ නිසා පල්ලියේ පියතුමන් උදෑසන දේව මෙහෙය ලබා නොදීම නිසා පල්ලියට බෝම්බය තැබූ බවත් සිය බිරිඳ කොවිඩ් ආසාදිතව ලංකා හොස්පිටල්ස්හි ප්‍රතිකාර ලැබූ අවස්ථාවේ ඇයට එම රෝහලෙන් හොඳට ප්‍රතිකාර ලබා දුන් නිසා එම රෝහලට ප්‍රසිද්ධියක් ලබා දීමට ලංකා හොස්පිටල්හි බෝම්බයක් තැබූ බවටත් එම වෛද්‍යවරයා පිළිගත් බවට පොලිසිය මුලින් ප්‍රකාශ කර තිබුණි.

කෙසේවුවත් පොලිසිය විසින් දිගින් දිගටම පල්ලියට පැමිණ බෝම්බය තැබූ පුද්ගලයා සහ වෛද්‍යවරයාට බෝම්බය ලබා දුන් පුද්ගලයා යැයි අත්අඩංගුවට ගනු ලැබූ පුද්ගලයා සම්බන්ධයෙන් කිසිදු තොරතුරු හෙළිකිරීමක් සිදු නොකරන අතර ඒ පිළිබඳව විමසීමේ දී පොලිස් මාධ්‍ය ප්‍රකාශකවරයා දිගින් දිගටම පවසන්නේ ඒ සම්බන්ධ තොරතුරු තවමත් තමා වෙත ලැබී නොමැති බවයි. අත්අඩංගුවට ගනු ලැබූ වෛද්‍යවරයාගේ ප්‍රකාශ පවා මාධ්‍යයට ලබා දී ඇති පොලිසිය එම බෝම්බය රැගෙන ආ පුද්ගලයා සහ බෝම්බය ලබා දුන් බව කියන පුද්ගලයා සමබන්ධයෙන් තොරතුරු හෙළි නොකරන්නේ මන්දැයි සැකයක් මතුවේ.

මෙම පුද්ගලයන්ට අමතර ව අත්අඩංගුවට ගනු ලැබූ දේවස්ථානයේ සේවය කළ ෆ්‍රැන්සිස් මුනීන්ද්‍රන්, උද්‍යාන පාලක ක්‍රිශ්නසාමි සිවසුන්දරම් සහ ඒ මොහොතේ සිය පෙම්වතිය හමුවීමේ බලාපොරොත්තුවෙන් පල්ලියේ රැඳී සිටි ප්‍රසාද් මිගෙල් යන අයද තවමත් නිදහස් කර නොමැත.
මෙම වෛද්‍යවරයා අත්අඩංගුවට ගැනීමට පෙර පොලිසිය භාර ඇමති සරත් වීරසේකර ප්‍රකාශ කළේ මෙම බෝම්බය අටවා ඇත්තේ පල්ලියේ සේවය කළ 14 හැවිරිදි මුනීන්ද්‍රන් බවත් ඔහු එය පිළිගත් බවත් ය. පසුව කාදිනල් හිමියන් විසින් පොලිසිය පරීක්ෂා කර තිබෙන්නේ සවස 3න් පසු සීසීටීවී දර්ශන පමණක් බව හා පිටස්තර පුද්ගලයෙකු පැමිණ බෝම්බයක් අටවා යන සීසීටීවී දර්ශන මාධ්‍ය හමුවකින් ඉදිරිපත් කළ පසුව එම මුනීන්ද්‍රන් අත් අඩංගුවේ තබාගෙන සිටින්නේ මන්දැයි මාධ්‍යවේදීහු සරත් වීරසේකර ඇමතිවරයාගෙන් විමසූහ. එහිදී ඔහු පැවසුවේ මුනීන්ද්‍රන්ගේ කාමරය තුළ සෙලෝටේප් සහ ගිනිපෙට්ටියක් තිබූ බැවින් ඔහු අත්අඩංගුවට ගනු ලැබූ බවයි.

මේ වන විට පුද්ගලයන් කී දෙනෙකු මෙම සිදුවීමට අදාළව සැකපිට අත්අඩංගුවට ගෙන තිබේ ද යන්න පොලිස් මාධ්‍ය ප්‍රකාශක නිහාල් තල්දූවගෙන් අප විමසූ විට ඔහු ඊට ද පිළිතුරු ලබා දීම ප්‍රතික්ෂේප කළේ තමා ඒ පිළිබඳව නොදන්නා බව පවසමිනි.

පසුගිය ජනාවාරි 24 දින අන්තර්ජාලය හරහා පැවති මාධ්‍ය සාකච්ඡාවක දී සිරිල් ගාමිණී පියතුමන් විසින්ද මේ සම්බන්ධයෙන් අදහස් පළ කරන ලදි.

“පසුගිය 14 වෙනිදා පොලිසිය භාර ඇමති සරත් වීරසේකර කිව්වා ලන්කා හොස්පිටල්ස් බෝම්බය සහ පල්ලියේ බෝම්බය දෙකම තියලා තියෙන්නේ එක ම කෙනෙක්. ඒ මහමොළකරු අපි අල්ලා ගන්නවා කියලා. මේ ප්‍රකාශය කරන විට වෛද්‍යවරයාව අත් අඩංගුවට අරගෙනවත් තිබුණේ නෑ. එහෙම අත් අඩංගුවට අරගෙන ප්‍රකාශයක් සටහන් කරගන්නත් කලින් තමයි ඔහු මේ ප්‍රකාශය සිදු කළේ. ඊට ටික දවසකට පස්සේ පොලිසිය ඒ වෛද්‍යවරයාව අත්අඩංගුවට අරන් කියනවා මේ බෝම්බ සිදුවීම් දෙකම කරලා තියෙන්නේ මේ වෛද්‍යවරයා කියලා. මේක මුල සිටම පිටපත් ලියලා කරන්න හදපු වැඩක් බව පැහැදිලියි. නමුත් කරගෙන යද්දි මේක දුර්වල පිටපතක් කියලා අපිට තේරෙනවා. මේක නාට්‍යයක්ම තමයි. එපමණක් නොවෙයි අපට ප්‍රශ්නය තිබෙන්නේ අධිකරණයේ ස්වාධීනත්වය සම්බන්ධයෙන් නෙවෙයි. ප්‍රශ්නය තියෙන්නේ නීතිපති, අපරාධ පරීක්ෂණ දෙපාර්තමේන්තුව, පොලිසිය, මහජන ආරක්ෂාව සම්බන්ධයෙන් ඉන්න නිලධාරීන් පිළිබඳව. කිසිම දවසක දේශපාලකයන් නායකත්වය දෙන අපරාධවලට ලෝකයේ සාධාරණයක් ලැබෙන්නේ නෑ.“
එමෙන් ම කතෝලික ගිහි සංවිධාන එකතුව විසින් කැඳවා තිබූ මාධ්‍ය හමුවක දී ශෙහාන් මාලක මහතාද මේ පිළිබඳව අනාවරණ කිහිපයක් සිදු කළේ ය.

“මේ බෝම්බ නාටකය පටන් ගත්තේ සැප්තැම්බර් මාසයේ දී. මාව සැප්තැම්බර් මාසයේ දී අපරාධ පරීක්ෂණ දෙපාර්තමෙම්න්තුවේ ප්‍රශ්න කිරීම්වලට ලක් කරලා අවසන් වුණාට පස්සේ මගේ ආරක්ෂාව සඳහා මම රැඳී සිටිය ස්ථානට එහා පැත්තෙන් තිබුණු කන්‍යාරාමයට බුද්ධි අංශ නිලධාරීන් ඇවිල්ලා නැවතුණා. ඉන්පසුව අපේ පියතුමන්ලා මගේ ආරක්ෂාව උදෙසා මාව බෝපිටිය ශාන්ත නිකොලා දේවස්ථානයේ රඳවා තැබුවා. සැප්තැම්බර් මාසයේ දී බෝම්බ ප්‍රහාරයක් එල්ල වෙනවා කියලා නාවික හමුදා නිලධාරීන් වගයක් ඇවිල්ලා කිව්වේ ඒ දේවස්ථානයටයි. ඒ වෙද්දිත් මම ඒ දේවස්ථානයේ සිටියේ. ඒ වෙනකොට පල්ලිවල දේව මෙහෙයන් නවත්වලා තිබුණේ. සෙනග ගැවසෙන්නේ නැති තැනකට කවුරු හරි බෝම්බයක් එල්ල කරනවා නම් එහෙම කරන්නේ ඇයි? මේ ගැන සරත් වීරසේකර ඇමතිවරයා කිවේ මේක පෙර පුහුණුවක් කියලා. ආරක්ෂක ලේකම් කමල් ගුණරත්න කිව්වේ ‘ඒ නිලධාරීන් පමණට වඩා බුද්ධි තොරතුරු හෙළිකරලා.’ කෝ මේ සිද්ධිය ගැන ගත්ත ක්‍රියාමාර්ග? මේ හැම සිදුවීමේම අධ්‍යක්ෂවරයා එක්කෙනෙක්.“

බොරැල්ලේ බෝම්බ සිදුවීමට අදාලව බෝම්බය ඇටවූ පුද්ගලයා මනා අවි පුහුණුව ලැබූ අයෙකු බවට සැක මතුවන බව ද ඔහු පෙන්වා දුන්නේ ය. “අත් බෝම්බයේ පින් එක ගලවලා හඳුන්කූරක් තියලා සවි කරලා. මෙහෙම කරන්න පුළුවන් කාට ද? මේ දේවල් එක්කම ඉන්න ඒවා ගැන හොඳට අත්දැකීම් තියෙන කෙනෙකුට තමයි කරන්න පුළුවන්.“

සමගි ජන බලවේගයේ පාර්ලිමේන්තු මන්ත්‍රී චමින්ද විජේසිරිද ජනවාරි 25 පැවති මාධ්‍ය හමුවක දී මේ පිළිබඳව අදහස් පළකළේ ය. “අත්බෝම්බ ගෙනල්ලා හඳුන්කූරු ගහලා ඒවා කරන්න දන්නේ ආමි එකේ ඉඳපු කට්ටිය. පහුගිය කාලයේ දැවැන්ත අවි ගබඩා පවත්වාගෙන ගිය ඇතැම් අයට විවිධ චෝදනා එල්ල වෙලා තිබුණා. ඒ අයත් එක්ක ආරක්ෂක අංශවලට සම්බන්ධයක් තිබුණා. බෝම්බෙ තියපු කෙනා බෝම්බ හොඳට හසුරුවන්න දන්න කෙනෙක් බව පේනවා. බෝම්බෙ තියපු කෙනා ගැනත් පොලිසිය ප්‍රශ්න කළ යුතුයි. මළමිනී මතින් දේශපාලනය කිරීමට පොලිසිය ඉඩ ලබා නොදිය යුතුයි.“

මෙවැනි පරීක්ෂණයක් සිදු කෙරෙන අවස්ථාවක දී සාමාන්‍යයෙන් එම අත් බෝම්බය නිෂ්ක්‍රිය කර නඩු භාණ්ඩයක් වශයෙන් තබනවා වුවත් මේ සිදුවීමේ දී බෝම්බය පුපුරවා තිබෙන බවට ද ශෙහාන් මාලක මහතා චෝදනා කරයි. “පොලිසිය මේ සිද්ධිය සම්බන්ධයෙන් අපක්ෂපාතී පරීක්ෂණයක් සිදු කරනවා කියලා අපට සිතන්න තිබුණා අවම වශයෙන් ඒ අත් බෝම්බයේ ඇඟිලි සලකුණු වාර්තාවක් හෝ රසපරීක්ෂක වාර්තාවක් හෝ අරගෙන තිබුණා නම්. බෝම්බය නිෂ්ක්‍රිය කරලා ඒවා සිදු කරනවා වෙනුවට බෝම්බය පුපුරුවා හැරලා. ඇඟිලි සලකුණු හෝ රසපරීක්ෂක වාර්තාවක් ගන්න විදිහක් නෑ දැන්. මේ බෝම්බය හැදුවේ කවදාද, කවුද ගෙනාවේ, මේ සියලු තොරතුරු සොයා ගන්න තිබුණ මාර්ගය බෝම්බය පුපුරුවලා අවසන් කරලා.“
පොලිස් අත් අඩංගුවේ සිටින පුද්ගලයන්ට පහර දීමට පොලිසියට අයිතියක් නැතිවුව ද එම පොලිස් භාරයේ සිටින මුනීන්ද්‍රන්ට පොලිසිය විසින් අමානුෂික ලෙස පහර දී ඇති බවට ද ශෙහාන් මාලක මහතා චෝදනා කරයි. වෛද්‍යවරයා අත්අඩංගුවට ගැනීමට පෙර බෝම්බය ඇටවූ බවට මේ පුද්ගලයා පිළිගත් බවට ඇමති සරත් වීරසේකර ද ප්‍රකාශ කළේ ය.
මහේස්ත්‍රාත් පරීක්ෂණයට අදාල නඩුව කොළඹ අතිරේක මහේස්ත්‍රාත් රජීන්ද්‍රා ජයසූරිය ඉදිරියේ පසුගිය ජනවාරි 25 වන දින කැඳවා තිබුණි. රැඳවුම් නියෝග යටතේ අත්අඩංගුවේ තබාගෙන සිටින පල්ලියේ සේවකයන් දෙදෙනා සහ පල්ලියේ රැඳී සිටි පුද්ගලයා වෙනුවෙන් පෙනීසිටි නීතිඥ රියෙන්සි අර්සකුලරත්න කරුණු ඉදිරිපත් අර තිබෙන්නේ මේ සම්බන්ධයෙන් පොලිසිය සිදු කරන පරීක්ෂණ පිළිබඳව එකඟ විය නොහැකි බවයි. කරුණු ඉදිරිපත් කරමින් එම නීතිඥවරයා පවසා තිබෙන්නේ ජනවාරි 11 වන දින සියලු ශාන්තුවරයන්ගේ දේවස්ථානයේ බෝම්බය ඇටවූ පුද්ගලයා ජනවාරි 10 වන දින පැමිණ පල්ලියේ සැරිසරා තිබෙන බවට ද සීසීටීවී සාක්ෂි තිබෙන බවයි. පොලිසිය මෙම සියලු සාක්ෂි පසෙකලා අහිංසක පුද්ගලයන් තිදෙනෙකු ත්‍රස්තවාදය වැළැක්වීමේ පනතෙන් රඳවා සිටින බවත් ඔවුන් තිදෙනා සහ රක්ෂිත බන්ධනාගාර ගත කර සිටින සැකකරු අධිකරණයට ඉදිරිපත් කරන ලෙස ඔහු එහිදී ඉල්ලා තිබේ. පාස්කු බෝම්බ ප්‍රහාරයට දින 1000ක් පිරීම නිසා රාගම තේවත්ත දේවස්ථානයේ සංවිධානය කර තිබූ දේව මෙහෙයට පැමිණීමට ජනතාව බියගැන්වීම සඳහා 11 වන දින මෙම බෝම්බය පිපිරවීමට සැලසුම් කළේදැයි සැකයක් පවතින බවට ද අර්සකුලරත්න මහතා කරුණු ඉදිරිපත් කර තිබේ.

එහිදී අත්අඩංගුවට පත් වී සිටින වෛද්‍ය ශර්ලි හේරත් වෙනුවෙන් පෙනීසිටි නීතිඥ චමින්ද අතුකෝරල පෙන්වා දී තිබෙන්නේ සිය සේවාදායකයා සහ 1974 දී සිදු වූ සිදුවීමක් ඈඳා පොලිසිය විසින් ලබා දී ඇති තොරතුරු මත මාධ්‍ය වාර්තා රැසක් පළ වී ඇති බවත් ඒවා අධිකරණයටවත් මේ වන තෙක් වාර්තා වී නොමැති බවත් ය. විමර්ශනවල තොරතුරු අධිකරණයට වාර්තා වී නොමැති වුවද ඒවා මාධ්‍ය හරහා ප්‍රචාරය වන්නේ කෙසේදැයි ඔහු එහිදී ප්‍රශ්න කළේ ය. එහිදී මහේස්ත්‍රාත්වරිය ද පවසා තිබෙන්නේ විමර්ශනවලට අදාළ කරුණු අධිකරණයට පැමිණීමට පෙර මාධ්‍ය හරහා ප්‍රචාරය වීම පිළිබඳව තමාටත් ගැටලුවක් පවතින බවයි.

කාදිනල්තුමා වෙනුවෙන් පෙනී සිටි නීතිඥ නෙවිල් අබේරත්නද පෙන්වා දී තිබෙන්නේ පොලිසියේ පරීක්ෂණවල විනිවිදභාවය සම්බන්ධයෙන් ගැටලුවක් පවතින බවයි. කාදිනල්තුමා බෝම්බය අටවන පුද්ගලයාගේ සීසීටීවී දර්ශන හෙළි නොකෙරුවා නම් පොලිසිය විසින් සවස තුනෙන් පසු සීසීටීවී දර්ශන පමණක් ගෙන කුමනාකාරයෙන් පරීක්ෂණ සිදු කරාවිදැයි ප්‍රශ්නයක් තිබෙන බව නීතිඥවරයා පවසා තිබේ. තම පාර්ශ්වයට ද මෙම සිදුවීම තේවත්ත පල්ලියේ පැවති දේවමෙහෙය කඩාකප්පල් කිරීමට සිදු කළ එකක් බවට සැක මතුවන බවට ද කරුණු ඉදිරිපත් කර තිබේ.

පැමිණිල්ල වෙනුවෙන් පෙනී සිටි කොළඹ අපරාධ කොට්ඨාසයේ සහකාර පොලිස් අධිකාරී නෙවිල් ද සිල්වා විත්තිකාර පාර්ශ්වවල නීතිඥවරුන් ඉදිරිපත් කර තිබෙන කරුණු සම්බන්ධයෙන් සිය කනගාටුව ප්‍රකාශ කර තිබෙන අතර පොලිසිය කිසිවක් සැඟවීමට උත්සහ නොගන්නා බවටද ප්‍රකාශ කර තිබේ.

මෙම කරුණු සැලකිල්ලට ගනිමින් පෙබරවාරි 02 දා අධිකරණයට මේ පිළිබඳ සංක්ෂිප්ත වාර්තාවක් ඉදිරිපත් කරන ලෙස මහේස්ත්‍රාත්වරිය විසින් කොළඹ අපරාධ කොට්ඨාසයට නියෝග කර තිබේ.

කොළඹ අපරාධ කොට්ඨාසය මෝසමක් ගොනු කරමින් මෙම නඩුව ජනවාරි 26 නැවත කැඳවූ අවස්ථාවේ දී රක්ෂිත බන්ධනාගාරගත කර සිටින වෛද්‍යවරයා මහේස්ත්‍රාත්වරිය ඉදිරියේ රහසිගත ප්‍රකාශයක් ලබා දීමට කැමැත්තෙන් පසුවන බවට කොළඹ අපරාධ කොට්ඨාසයේ පොලිස් පරීක්ෂක වසන්ත කුමාර අධිකරණයට දන්වා තිබේ. ඒ අනුව එම වෛද්‍යවරයා කොළඹ අතිරේක මහේස්ත්‍රාත් රජින්ද්‍රා ජයසූරිය හමුවේ පැය දෙකකට ආසන්න කාලයක් රහසිගත ප්‍රකාශයක් ලබා දී තිබේ.

මෙම සිදුවීම පිළිබඳව පරීක්ෂණ ආරම්භ වූ දා පටන් ම වගකිවයුත්තන් විසින් සිදු කළ ප්‍රකාශ හා යථාර්ථය අතර විවිධ පරස්පරතා පැහැදිලිව හඳුනාගත හැකිය. මේ වන විට අනාවරණය වී ඇති කරුණු අනුව වුවත් බෝම්බය සවි කළ පුද්ගලයා සම්බන්ධයෙන් පොලිසියේ සිදු කරන පරීක්ෂණවල පැහැදිලි ව්‍යාකුලභාවයක් දැකිය හැකිය. කතෝලික සභාවේ ද අදහස වන්නේ මෙම සිදුවීම සම්පූර්ණයෙන් ම සැලසුම්සහගතව තේවත්ත පල්ලියේ පැවති දේව මෙහෙය අඩාල කිරීමේ අරමුණින් සිදු කරන්නට උත්සහ කරන ලද්දක් බවයි. පල්ලියේ සීසීටීවී දර්ශන මෙන් ම ඒ අවට සවි කර ඇති සීසීටීවී දර්ශන හරහා පහසුවෙන් ම බෝම්බය තැබූ පුද්ගලයා පිළිබඳ තොරතුරු අනාවරණය කරගැනීමට හැකිවුවද තවමත් පොලිසිය සම්පූර්ණයෙන් පල්ලියේ සීසීටීවී දර්ශනවත් නරඹා නොමැති බවට පල්ලියේ සේවකයන් වෙනුවෙන් පෙනීසිටි නීතිඥවරයාගේ කරුණු දැකීමෙන් පැහැදිලි වේ.

පසුගිය කාලයේ සීසීටීවී දර්ශන හරහා කෝරෝනා ආසාදිතයන් හා ඔවුන් ආ ගිය තැන් පවා පහසුවෙන් සොයාගෙන ඒවා මාධ්‍ය වෙතත් නිකුත් කළ පොලිසියට බෝම්බ සැකකරුවෙකු සීසීටීවී දර්ශන මගින් පරීක්ෂණ සිදු කර නිශ්චිතව සොයාගැනීමට නොහැකිවීම ඉතා හාස්‍යජනක කාරණයකි.■

ජcolombotelegraph.com වෙබ් අඩවියෙන්
උපුටාගන්නා ලද ලිපියකි.

පසුගිය සතියේදී ෆිච් රේටින්ග්ස් ආයතනය ශ්‍රී ලංකාවේ දිගු කාලීන ණය ලබා ගැනීම් සඳහා වන ශ්‍රේණිගත මට්ටම පහළ දැමීම මගින් අපගේ මූල්‍ය පද්ධතිය තිගැස්මකට ලක් කළා, මෙහි තේරුම කුමක්ද?

මෙය ඇත්තටම හදිසියේ ඇතිවූ තත්වයක් නොවෙයි. කාලාන්තරයක් තිස්සේ සිදු කරන ලද අනිටු ක්‍රියාවන්හි ප්‍රතිඵලයක් තමයි මෙලෙස විද්‍යමාන වී ඇත්තේ. ශ්‍රේණිගත මට්ටම පහළ දැමීමක් සිදු කරන බවට ෆිච් ආයතනය ශ්‍රී ලංකා මහා බැංකුවටත් මුදල් අමාත්‍යාංශයටත් සෑහෙන තරම් කල් තබා දැනුම්දීම් කර තිබුණා. ආර්ථිකයේ දරුණු කඩා වැටීම හමුවේ ආයෝජකයන්ට පිළිගත හැකි විසඳුම් ඉහත ආයතන ලබා නොදෙන වටපිටාවක විශේෂයෙන්ම ශ්‍රී ලංකාවෙන් පිටත වෙළඳපල බලවේග මෙම පහළ දැමීම අපේක්ෂා කරනු ලැබුවා.
දිගින් දිගටම අන්තර්ජාතික ණය ශ්‍රේණිගත කිරීමේ ආයතන ලබාදුන් අනතුරු ඇඟවීම් මුදල් අමාත්‍යාංශය හා මහා බැංකුව තැකීමක් කළේ නැහැ. එහි ප්‍රතිඵලයක් ලෙස රටේ ආර්ථිකය මාස් පතා කඩා වැටෙන්නට වුණා. මෙම ණය ශ්‍රේණිගත මට්ටම පහළ දැමීම තිගැස්මක් නොව දිගුකාලීනව වැරදි ආර්ථික ප්‍රතිපත්ති අනුගමනය කිරීම එරෙහිව ලබා දුන් දඬුවමක් බඳුයි. ෆිච් ආයතනයට අමතරව ස්ටෑන්ඩර්ඩ් ඇන්ඩ් පුවර්ස් හා මූඩීස් යන ආයතනත් මෙලෙස ශ්‍රී ලංකාවට දඬුවම් කළා.

ණය ශ්‍රේණිගත කිරීමේ ක්‍රියාවලිය සිදුවන්නේ කෙසේද?

අන්තර්ජාතික මූල්‍ය වෙළඳපළෙන් ණය පහසුකම් ලබා ගැනීමට බලාපොරොත්තු වන ඕනෑම අයෙක් අඩුම තරමින් ණය ශ්‍රේණිගත කිරීමේ ආයතන 2කින් සිය ණය ලබාගැනීම් ශ්‍රේණිගත කර ගත යුතුයි. ණය ශ්‍රේණිගත කිරීමේ ආයතනය ලබා දෙන මිනුම මගින් ණයගැතියා නියමිත කාල සිමාවේදී හෝ නියමිත දිනයේදී පොලිය හා මුල් මුදල ගෙවීම පැහැර හැරීමට ඇති හැකියාව පිළිබඳ ඔවුන්ගේ නිගමනය ලබා දෙනවා.

මෙලෙස ඔවුන්ගේ නිගමන ප්‍රකාශ කිරීමට පෙර ණය ශ්‍රේණිගත කිරීමේ ආයතන ණයගැතියාගේ ආර්ථික තත්වය පිළිබඳ ස්වාධීන විගණනයක් කරනවා. එහිදී, ණයගැතියාගේ දේශපාලන ස්ථාවරත්වය, සාර්ව ආර්ථික ස්ථාවරත්වය, රාජ්‍ය ආදායම් ප්‍රතිපත්තිය, රාජ්‍ය මූල්‍ය ප්‍රතිපත්තිය, රජයේ පසුගිය කාලයේ වැඩපිළිවෙළ යන ප්‍රධාන කරුණු අධ්‍යයනය කරනු ලබනවා.

ඔවුන් මහා බැංකුවේ හා මුදල් අමාත්‍යංශයේ ඉහළ නිලධාරීන්, ඉහළ පෙළේ අමාත්‍යවරුන් සහ පෞද්ගලික අංශයේ පාර්ශ්වකරුවන් සමග දීර්ඝ සාකච්ජාවන්හි නිරතවනවා. ඔවුන්ගේ සොයාගැනීම් ඉන්පසු මුදල් අමාත්‍යාංශයේ හා මහා බැංකුවේ නිලධාරීන්ගේ ප්‍රතිචාර සඳහා ඉදිරිපත් කරන අතර අවසන් නිවේදනය සිදු කරන්නේ මෙම ප්‍රතිචාරයන්ට සවන්දීමෙන් පසුවයි.
වර්තමාන ණය ශ්‍රේණිගත කිරීමේ මට්ටම පහළ දැමුවේ රජයට නොසලකා හැරිය නොහැකි කරුණු 3ක් මුල් කරගෙනයි. පළමුවැන්න, ශ්‍රී ලංකාවේ බාහිර ද්‍රවශීලතා මට්ටම මාසිකව නරක අතර හැරෙමින් පැවතීමයි. දෙවැන්න, කඩා වැටෙන විදේශ විනිමය සංචිත හා වඩාත්ම පීඩාකාරී හේතුව වන තෙවැන්න, විදේශ විනිමය බැඳීම් හෙවත් ණය හා අනෙකුත් ගෙවීම් සඳහා පිටස්තර මාධ්‍යයන් මගින් ප්‍රමාණවත් තරම් ණය පහසුකම් ලබා ගැනීමට නොහැකිවීමයි.

අප රට මුහුණ පා ඇති තත්වය සරල උදාහරණයකින් කියතොත්, ‘මිනිසෙකුට පිටස්තර පුද්ගලයන්ට මුදල් ගෙවීමට සිදුව ඇත, නමුත් ඒ සඳහා එම මිනිසාට මුදල් නැත, එමෙන්ම වෙනත් පුද්ගලයින්ගෙන් ණයට ගෙන ගෙවීමටද නොහැකි තත්වයක් උදාවී ඇත.’

ෆිච් ආයතනයට ප්‍රථම මූඩීස් ඉන්වෙස්ටර් සර්විසස් ආයතනයද ඔක්තෝබරයේදී ශ්‍රී ලංකාවේ දිගුකාලීන විදෙස් ණය ගැනීම් ශ්‍රේණි මට්ටම Caa2 සිට Caa1 දක්වා පහතට හෙළුවා. එයද අපගේ වැරදි ආර්ථික ප්‍රතිපත්ති සඳහා දෙන ලද දඬුවමක් ලෙස දක්විය හැකියි.

ඉතිහාසයේ හෝ ශ්‍රී ලංකාව ඉහළ ණය ශ්‍රේණිගත කිරීමේ මට්ටම් අත්පත් කරගෙන තිබුණාද?

නැහැ, ශ්‍රී ලංකාව ණය ශ්‍රේණිගත කිරීමේ ක්‍රියාවලිය ආරම්භ කළේ 2005 වසරේදී ෆිච් සහ ස්ටෑන්ඩර්ඩ් ඇන්ඩ් පුවර් (S&P ආයතන සමගයි. ඒ 2007 වසරේදී නිකුත් කළ ඇමරිකානු ඩොලර් (ඇ.ඩො.) මිලියන 500ක අන්තර්ජාතික ස්වෛරී බැඳුම්කර නිකුතුව සඳහායි.

ෆිච් ආයතනය BB- ලෙසදS&P විසින් B- ස්ථාවර ආර්ථික දැක්මක් (stable economic outlook) සහිත ශ්‍රේණිගත කිරීම් මට්ටමක් ශ්‍රී ලංකාවට ලබා දුන්නා. සාපේක්ෂව බලන කල ෆිච් ආයතනය ලංකාවට එක කට්ටයක් වැඩි ශ්‍රේණිගත මට්ටමක් ලබාදී තිබුණා. නමුත් මෙම වර්ගීකරණ මට්ටම් ආයෝජනය සඳහා නිර්දේශිත මට්ටම වන BBB- මට්ටමට වඩා පහළ තලයක් වුණා. ශ්‍රී ලංකාවට ලබා දී තිබුණු ශ්‍රේණිගත මට්ටම සමපේක්ෂණ හෙවත් ආයෝජන සඳහා සුදුසු නොවන බැඳුම්කර ලෙස හඳුන්වනවා. මේවා වෙළඳපළේ හඳුන්වන්නේ සුන්වූ බැඳුම්කර ලෙසයි. ඒ කාලයේදී පවා ණය ශ්‍රේණිගත කිරීමේ ආයතන අපගේ අසමතුලිත අයවැය සහ දුර්වල බාහිර අංශය (විදේශ රටවල් සමග ගනුදෙනු කරන අංශ) ඉස්මතු කර තිබුණා. මෙලෙස දුර්වලතා පෙන්වා දීමේ අපේක්ෂාව වූයේ එමගින් ආර්ථිකයේ පැනනගින ඌනතා සමනය කිරීමත් ණය ශ්‍රේණිගත කිරීමේ මට්ටම ඉහළ නංවා ගැනීමත් යන කරුණුයි. නමුත් රට ගමන් කළේ ප්‍රතිවිරුද්ධ දිශාවටයි. ස්ථාවර ආර්ථික දැක්ම ඉන්පසු ඍණාත්මක බවට පත්වුණා. ඉන්පසු B- ලෙස ෆිච් ආයතනයත් B ලෙස S&P ආයතනයත් වර්ගීකරණය කළා. ශ්‍රී ලංකාවේ බැඳුම්කර තවදුරටත් ආයෝජන සඳහා නුසුදුසු බවට පත්වුණා. මෙය සිදුවුණේ 2008දීයි.

එතැන් පටන් ශ්‍රී ලංකාව ගමන් කළේ එක් දිශාවකටයි, සමහර අවුරුදුවල ශ්‍රේණිගත කිරීමෙහි හා ආර්ථික දැක්මෙහි (economic outlook) යම් වර්ධනයක් වාර්තා කිරිමට අප සමත්වුණා.

තුන්වන ශ්‍රේණිගත කිරීමේ ආයතනය වන මූඩීස්, ශ්‍රී ලංකාව ඒ වන විටත් නිලනොවන මට්ටමින් අනෙක් ආයතන දෙක ශ්‍රේණිගත කරන ලද මට්ටමින්ම ශ්‍රේණිගත කර තිබුණා. 2018 නොවැම්බරයේදී එවකට රජය විසින් ශ්‍රේණිගත කිරීමේ කටයුතු සඳහා නිල වශයෙන් ඔවුන්ව සම්බන්ධ කර ගත්තා. වර්තමානයේදී මෙම ආයතන 3 විසින්ම ශ්‍රී ලංකාව CCC හෝ CC මට්ටම දක්වා පහළ දමා තිබෙනවා. මෙමගින් සිදුව තිබෙන්නේ අප බංකොලොත්භාවයට තවත් ළඟා වීමයි. මේ තත්වය ඉතාමත් අසතුටුදායකයි.

ශ්‍රේණිගත මට්ටම පහළට දැමීමෙන් ශ්‍රී ලංකාවට ඇතිවිය හැකි බලපෑම් මොනවාද?

පෙර සඳහන් කළ ආකාරයටම ශ්‍රේණිගත කිරීමෙන් සිදුකරන්නේ ණයගැතියෙකුහට කලට වේලාවට ණය මුදල හා පොලිය ගෙවීමට ඇති හැකියාව පිළිබඳ නිගමනය ඉදිරිපත් කිරීමයි. රටක ශ්‍රේණිගත මට්ටම පහළට ගමන් කිරීම මගින් දැනට සිටින ආයෝජකයන් හා ඉදිරියේදී එම රටේ ආයෝජනයට මුදල් ලබා දීමට අපේක්ෂා කරන ආයෝජකයන් වෙත අනතුරු ඇඟවීමක් නිකුත් කරනවා. මෙමගින් අදහස් කරන්නේ ආයෝජකයන් එම රටේ ආයෝජනය සිදු නොකළ යුතුයි යන්න නොවේ. මේ අවදානම් තත්වය ගණනය කර මුදල් දීමට ඔවුන්ට හැකියි. අවදානම් තත්වයට ගැළපෙන පොලී අනුපාතයක් ණයගැතියා කෙරෙන් ඔවුන් බලාපොරොත්තු වෙනවා.

එය හඳුන්වන්නේ අවදානම් වාරිකය කියායි (Risk Premium). ණය ශ්‍රේණිගත මට්ටම පහළ යෑමේදී ආයෝජකයා ගනු ලබන අවදානම වැඩි බැවින් ණයගැතියා කෙරෙන් වැඩි ප්‍රතිලාභයන් බලාපොරොත්තු වෙනවා. එමෙන්ම ශ්‍රේණිගත මට්ටම පහළ යාම නිසා ණයගැතියාගෙන් වන අවදානම වැඩිවෙනවා. එවිට අන්තර්ජාතික මූල්‍ය වෙළඳපළෙන් ණය ගැනීමේදී වැඩි පොලියක් ගෙවීමට සිදුවෙනවා. ණය ගැනීමේදී එම වියදම දැරීමට රටකට සිදුවෙනවා.

වඩාත්ම අවධාරණය කළ යුතු කරුණ නම් ශ්‍රේණිගත කිරීමේ ආයතන පෙන්වා දෙන අඩුපාඩු හඳුනාගෙන ඒවාට පිළියම් ලබාදීම ණය ලබා ගන්නා රටවල වගකීම බවයි. එවිට නැවත ශ්‍රේණිගත කිරීම්වල ඉහළට යාමට එම රටවලට හැකිවෙනවා. ණය ගැනීමේදී වන වියදම අවම කරගැනීමටද එමගින් හැකිවෙනවා.

ස්වාධීන රාජ්‍යයක් ශ්‍රේණිගත කිරීම්වල පහළට යෑම නිසා ඇතිවන අනෙක් බලපෑම නම් එහි සියලුම රාජ්‍ය ආයතන එකී පහළ දැමීම සමග ඊට අනුරූපීව ශ්‍රේණිගත මට්ටම්වල පහත යාමයි. ශ්‍රී ලංකාවේ රාජ්‍ය බැංකුවල බාහිර ණය සඳහා වන ශ්‍රේණිගත මට්ටමට මෙය බලපෑමක් එල්ල කරනවා. උදාහරණයක් ලෙස ලංකා බැංකුව සැලකුවහොත් ශ්‍රී ලංකාවට ලැබී ඇති ශ්‍රේණිගත මට්ටම CC නිසා ඊට වඩා ඉහළ ශ්‍රේණිගත මට්ටමක් ඔවුන්ට හිමි වන්නේ නැහැ. එය ඔවුන්ගේ ප්‍රාග්ධන පිරිවැය ඉහළ යෑමට හේතුවනවා. ණය ශ්‍රේණිගත කිරීමේ ක්‍රියාවලියේදී රටක රාජ්‍ය ආයතන එම රාජ්‍යය සමග නැගී සිටිනවා මෙන්ම රාජ්‍යයේ ශ්‍රේණිගත මට්ටම පහත යෑම සමග පහත වැටෙනවා.

වෙළඳපළ ආරංචි මාර්ගයන්ට අනුව ශ්‍රී ලංකාවේ ගෙවීමේ කාලය සම්පූර්ණ වීමට නියමිත ස්වෛරී බැඳුම්කර ද්වීතියක වෙළඳපළේ ගනුදෙනු වන්නේ ඉතා ඉහළ වට්ටමකටයි. එම තත්වයට හේතුව ශ්‍රේණිගත මට්ටම පහළ යෑමද?

තාක්ෂණික කරුණු අධ්‍යයනයට අනුව නම්, ඔව්. ශ්‍රේණිගත මට්ටම පහළ යෑම නිසා අවදානම් වාරිකයන් සහ ප්‍රතිලාභ අනුපාතිකයන් ඉහළ යනවා. එවිට මිල පහළ වැටෙනවා. මෙම වෙළඳපළ ක්‍රියාත්මක වන්නේ මෙලෙසයි.

නමුත් වර්තමානයේ ජාත්‍යන්තර ස්වෛරී බැඳුම්කර වෙළඳාම් වන්නේ වට්ටමකටයි. මෙම තත්වය ශ්‍රේණිගත කිරීම් පහළ දැමීම නිසා ඇති වූවක් නොවෙයි. මෙම බැඳුම්කරවල මිල පහත වැටීම පටන් ගත්තේ 2020 පෙබරවාරි පමණ සිටයි. එම කාලයේදී ශ්‍රේණිගත කිරීම්හි කිසිදු වෙනසක්ව තිබුණේද නැහැ. ඊට පෙර මෙම බැඳුම්කර ගනුදෙනු වූයේ අධි මිලකටයි. එනම් මේවායේ වෙළඳපළ මිල, ඒවායේ මුහුණත වටිනාකමට වඩා වැඩිව පැවතුණා. නමුත් නව රජය බලයට පත්වීමත් සමග ඔවුන් අගය මත බදු (VAT) ගෙවන්නන්ට හා අදායම් බදු ගෙවන්නන්ට ආකර්ෂණීය බදු ප්‍රතිසංස්කරණ වැඩසටහනක් හඳුන්වා දුන්නා. මෙමගින් කෙටි හා මාධ්‍ය කාලීනව රජයේ බදු ආදායම අඩුවන බව බොහෝ දෙනා පෙන්වා දුන්නා. මෙනිසා රජයේ අදායම 3%කින් පහත වැටුණා. දළ දේශීය නිෂ්පාදිතය සමග සන්සන්දනය කළහොත් 12% සිට 9% දක්වා අඩුවීමක්.

ස්වාධීන ආර්ථික විශ්ලේෂකයන් 2019 දෙසැම්බර් මාසයේදී රජයට අනතුරු අඟවමින් පවසා සිටියේ බදු සහනය නිසා රජයට රුපියල් බිලියන 500ක් පමණ මුදලක් අහිමි වනු ඇති බවයි. මෙම දූරදර්ශී අවවාදයන් රජය ගණනකට ගත්තේ නැහැ. තත්වය දරුණුවන බව තේරුම් ගත් ශ්‍රී ලංකා රජයේ ස්වෛරී බැඳුම්කරවල ආයෝජනය කර සිටි ආයෝජකයන් සිය බැඳුම්කර වෙළඳපළේ විකුණා දැමීමට පටන් ගත්තා. එහි ප්‍රතිඵලය වශයෙන් මෙම අන්තර්ජාතික ස්වෛරී බැඳුම්කරවල මිල ද්වීතියක වෙළඳපළේ පහත වැටීමට පටන් ගත්තා, මුලදී පැවති අධිමිල තත්වය වට්ටම් සහිත තත්වයක් බවට පත්වුණා.

ශ්‍රේණිගත කරනා ආයතනවලට වඩා ආයෝජකයින් ඉක්මන්වුණා. 2020 මුල් කාලයේදී පමණ අයවැය සහ ආර්ථිකයේ බාහිර අංශය ව්‍යසනකාරී ලක්ෂණ පෙන්නුම් කළත් ශ්‍රේණිගත කිරීමේ ආයතන ශ්‍රී ලංකාව ශ්‍රේණිගත ඇති මට්ටම පහළ දැමීම අත්‍යවශ්‍ය නොවන බව ඔවුන් නිගමනය කළා. බැඳුම්කරයන්හි ද්වීතියක වෙළඳපළේ මිල සැප්තැම්බරයේදී පහළ වැටීමෙන් පසුවත් ඔවුන් එම නිගමනයේ සිටියා. වර්තමානයේ එම බැඳුම්කර ඉතා ඉහළ වට්ටමකට මෙන්ම අධික ප්‍රතිලාභ ප්‍රතිශතයකට ගනුදෙනු වෙනවා. එහි ප්‍රතිඵලයක් ලෙස 2030දී කාලය සම්පූර්ණ වීමට නියමිත බැඳුම්කර වෙළඳාම් වන්නේ ඇ.ඩො. 55 සිට 60 දක්වා සහ ප්‍රතිලාභ අනුපාතිකය 20%ක් වන අවස්ථාවකයි. 2022 ජනවාරි මාසයේ කල් පිරෙන බැඳුම්කරය සැලකුවහොත් එහි මිල ඇ.ඩො. 88ක් දක්වා තරම් පහළ වැටී ඇත්තේ 300%කට අධික ප්‍රතිලාභ අනුපාතිකයක් දක්වමින්.

මේ මහා විපතට හේතුව ශ්‍රේණිගත කිරීමේ ආයතන නොවෙයි. වෙළඳපළ, මෙම ආයතනවලට වඩා ඉදිරියෙන් හිටියා. ඔවුන් කළේ වෙළඳපළ අනුගමනය කිරීමයි. ඇතිව තිබෙන අවාසි සහගත තත්වය ගැන රජය ඔවුන් වෙතම දෝෂාරෝපණය කර ගත යුතුයි. ප්‍රතිලාභ අනුපාතිකයන් 300% සිට 20% දක්වා වන අධික පරාසයක පැවතීම නිසා අන්තර්ජාතික ස්වෛරී බැඳුම්කර වෙළඳපළ සම්පූර්ණයෙන්ම රජයට වැසී තිබෙනවා. එනිසා වෙළඳ ශේෂය පියවා ගැනීමට අන්තර්ජාතික ස්වෛරී බැඳුම්කර වෙළඳපළේ සේවාව ලබා ගැනීමට රජයට නොහැකියි. මිත්‍ර රටවලින් කෙටි කාලීන මූල්‍ය පහසුකම් ලබා ගැනීමට ශ්‍රී ලංකාව උත්සාහ කරන්නේ මෙනිසායි. මෙම උත්සාහයන් තාවකාලික පැලැස්තර පමණයි. උද්ගතව ඇති ආර්ථික ව්‍යසනයෙන් අප රට මුදවා ගැනීමට අවශ්‍ය වන්නේ ස්ථිරසාර දුරදර්ශී ප්‍රතිසංස්කරණයි.

ණය ශ්‍රේණිගත කිරීම්වලින් ඉහළට යාමට ශ්‍රී ලංකාවට හැකිද?

ඔව්, ශ්‍රේණිගත කිරීම්වල ඉහළට යාමට නම් ශ්‍රී ලංකාව අනුගමනය කළ යුතු ක්‍රියාමාර්ග 3ක් පිළිබඳ ෆිච් ආයතනය සඳහන් කරනවා.

පළමුවැන්න නම් ශ්‍රී ලංකාව රටේ බාහිර ආර්ථිකය යළි ගොඩනගා ගත යුතුයි. ෆිච් ආයතනය පවසන පරිදි ශ්‍රී ලංකාව සිය බාහිර ආර්ථිකයේ ද්‍රවශීලතාව නංවා ගත යුත්තේ මුදල් ණයට ගැනීමෙන් නොව ණයට ගැනීමෙන් තොරවයි. මෙමගින් අදහස් කරන්නේ දැන් මහා බැංකුව කරන පරිදි මුදල් ඒකක හුවමාරු පහසුකම් හෝ මිත්‍ර රටවලින් මුදල් ණයට ගැනීමෙන් විදේශ සංචිත වර්ධනය කර ගැනීම තුළින් ෆිච් ආයතනය අපගේ ශ්‍රේණිගත මට්ටම ඉහළ නොදමන බවයි. උදාහරණයක් ලෙස විදේශ ශ්‍රමික ප්‍රජාව වෙතින් ලැබෙන ප්‍රේෂණ, ඍජු විදේශ ආයෝජන හෝ වත්කම් විදේශිකයන්ට විකිණීම මගින් ලැබෙන විදේශ මුදල් භාවිත කර අපගේ විදේශ සංචිත ගොඩනගා ගත යුතු බව ඔවුන් පෙන්වා දෙනවා.

දෙවැන්න නම්, රජයේ අයවැය වැඩිදියුණු කර ගැනීමයි. එනම් අයවැය තුළින් රාජ්‍ය අදායම වැඩි කර ගැනීම, නාස්තිකාර වියදම් කපා හැරීම, අයවැය පරතරය පිළිගත හැකි අවම මට්ටමකට ගෙන ඒම සහ දළ දේශීය නිෂ්පාදිතයට සාපේක්ෂව ණය අනුපාතය පහළ ගෙන ඒමට තිරසර වැඩසටහනක් ඉදිරිපත් කිරීම යන ක්‍රියාවන් මගින් අයවැය ශක්තිමක් කළ යුතුයි. ඔවුන් බලාපොරොත්තු වන්නේ රජය වඩා තිරසර මූල්‍ය පහසුකම්හි සේවාව ලබා ගැනීම මගින් ණය ගෙවීම පැහැර හැරීමේ මට්ටමට ළඟා නොවනු ඇති බවයි.

තෙවනුව ෆිච් ආයතනය සඳහන් කරන්නේ, රජය සිය ප්‍රතිපත්තිවල විශ්වසනීයත්වය හා තාර්කිකභාවය තහවුරු කිරීම පිණිස ව්‍යුහාත්මක ප්‍රතිසංස්කරණ හඳුන්වා දිය යුතු බව.
මෙවැනි ප්‍රතිසංස්කරණ පැකේජයක් මගින් ගුණාත්මයෙන් ඉහළ රාජ්‍ය හා බාහිර මූල්‍ය පද්ධතියක් බිහි කර ගත හැකියි. එමගින් ආයෝජකයන් වඩාත් සැලකිල්ලට ලක් කරන ණය ගෙවීම පැහැර හැරීම’ යන අවදානම අවම කර ගැනීමට හැකි වනු ඇති.

ණය ශ්‍රේණිගත කිරීමේ ආයතන සමග වාද විවාද කිරීම තුළින් විසඳුමකට ළඟා විය හැකිද?

නැහැ, මෙම ශ්‍රේණිගත කිරීමේ ආයතනවල සහ එම ක්‍රමවේදයන්ගේ වැරදි සෙවීම නොව ඔවුන් පෙන්වා දී ඇති වැරදි අඩුපාඩු මගහරවා ගෙන ඉදිරියට යෑම සඳහා ශ්‍රී ලංකා මහා බැංකුව රජයට උපදෙස් ලබා දිය යුතුයි. මහා බැංකුව මෙම ශ්‍රේණිගත ආයතන වැරදි බවට ගොඩ නගන තර්ක පිටස්තරව විමර්ශනය කරන්නෙකුට පෙනෙන්නේ ඉතාමත් නිෂ්ඵල ක්‍රියාවක් ලෙසයි.■

(ශ්‍රී ලංකා මහා බැංකුවේ හිටපු නියෝජ්‍ය අධිපති ආචාර්ය ඩබ්ලිව්.ඒ. විජේවර්ධන විසින් රචිත A Child’s Guide To Fitch Shock: Rationale, Impact, Challenges ලිපියෙහි සිංහල අනුවාදයයි. සැකසුම මිලින්ද පීරිස් සහ සුනිල් චන්ද්‍රසිරි.)