- x දෙරණ පාටි, හිරු පාටි, නෙත් පාටි
- වටලන්නේ නැත්තේ ඇයි?
- x රෝයල්-තෝමස් පාටි, ආනන්ද-නාලන්ද පාටි,
- ඞී.එස්.-මහානාම පාටි වැටලූවොත් මොනවා වේවිද?
‘ෆේස්බුක් පාටි’ යනු මෑත කාලයේ ලංකාවේ මාධ්‍ය ආයතන විසින් ප‍්‍රවර්ධනය කරනු ලැබූ යෙදුමකි. මාර්තු 08 වැනිදා පන්නිපිටියේ සාදයක් පොලීසිය වටලා තිබුණු අතර ඒ ගැන වාර්තා කරන්නටද ඒ යෙදුම පාවිච්චි කර තිබුණි. නිවසක පවතින සාදයකට ‘ෆේස්බුක්’ යන වචනය ගාවාගන්නේ එම සාදයට පැමිණෙන පිරිස්වලට ආරාධනා කිරීම හා ප‍්‍රචාරය කිරීම ‘ෆේස්බුක්’ වෙබ් අඩවියෙන් කරන නිසා විය යුතුය.
මේ සාදයෙන් පසුව එයට සහභාගි වූ අතිබහුතරය මත්ද්‍රව්‍ය හෝ වෙනත් කිසිදු නීති විරෝධී දෙයක් ළඟ තබාගත් බව හෙළි නොවීය. එහෙත් මාධ්‍ය ආයතනවලින් එම සිදුවීම මහත් අපරාධයක් ලෙස වාර්තා කර තිබුණු අතර එලෙස අත්අඩංගුවට ගනු ලැබූ අයගේ පවුල්වල සාමාජිකයන් අත්අඩංගුවට ගැනීමට විරෝධය දක්වන අවස්ථාවේ ඔවුන්ද වීඩියෝ කර ප‍්‍රචාරය කරමින් ඔවුන්ද අපහසුතාවට ලක් කර තිබුණි. ලංකාවේ ‘ෆේස්බුක් පාටි’ ලෙස හඳුන්වමින් කරන ලද වැටලීම්වල නිරුවත හෙළිවන අවස්ථාවක් ලෙස මෙය හැඳින්විය හැකිය. ඉහත කී සාදය ගැන කතාකරන්නට පෙර වෙනත් කාරණයක් සිහිපත් කළ යුතුය.
ලොකුම සාද
දෙරණ ටීවී සහ එෆ්.එම්. දෙරණ ආයතන තමන්ගේ මාධ්‍ය බලය පාවිච්චි කරමින් සංගීත කණ්ඩායම් ගෙන්වා දැවැන්ත සංගීත සංදර්ශන සංවිධානය කරයි. හිරු ටීවී සහ හිරු එෆ්.එම්. යන මාධ්‍ය ආයතනද සංගීත කණ්ඩායම් ගෙන්වමින් සාද සංවිධානය කරයි. මෙගා බ්ලාස්ට් ආදි නම්වලින් එම සංගීත සංදර්ශන සංවිධානය කරනු ලබයි. මීට අමතරව නෙත් එෆ්.එම්., ස්වර්ණවාහිනී හා ශ‍්‍රී එෆ්.එම්. ආදි නාලිකාද නිතර සංගීත සංදර්ශන සංවිධානය කරන අවස්ථා අප දැක ඇත.
මෙම සංදර්ශන සඳහා විශාල ක‍්‍රීඩාංගණයක් වෙන් කරගනී. සංගීත කණ්ඩායම් සංගීතය සපයයි. මේ සංදර්ශන සංවිධානය කරන්නේ පැමිණෙන අයට ඉඳගෙන භාවනා කිරීමට නොවේ. නර්තනයේ යෙදීමටය. මෙවැනි සාදවලදී මත්පැන් නොබී පිරිත් පැන් බොන්නැයි දෙරණ, හිරු, ස්වර්ණවාහිනී හෝ නෙත් ප‍්‍රවර්ධනය කරන්නේ නැත. මේ සංදර්ශනවලට කතා කරන්නේ විනෝද වන්නටය. ච්රඑහසබට කියා ඉංග‍්‍රීසියෙන් කියයි. සරලව එම නාලිකාවලින් සංගීත සපයමින් දැවැන්ත සාද සංවිධානය කරයි. වියදම, ප‍්‍රචාරණය, පැමිණෙන පිරිස, වෙන් කරගන්නා භූමි ප‍්‍රමාණය ලංකාවේ සංවිධානය කෙරෙන දැවැන්තම සාද වන්නේ මේ මාධ්‍ය ආයතන විසින් ප‍්‍රවර්ධනය කරනු ලබන සාද වේ. මත්පැන් සැපයුවේ නැතත් මෙවැනි දැවැන්ත සාදවල මත්පැන් පානය කළ තරුණ තරුණියන් සිටින බව දැකිය හැකිය. මෙවැනි තැනක තරුණ තරුණියන් නටමින් විනෝද වෙන අයුරු අන්තර්ජාලයේ ඕනෑ තරම් වීඩියෝ මගින් දැකිය හැකිය.
දැවැන්තබවින් ඒවා දෙවැනි වනු ඇත්තේ වසරේ මුල පවත්වන මහා ක‍්‍රිකට් තරගවලටය. මහා ක‍්‍රිකට් තරගයක අරමුණද විනෝද වීම බව පැහැදිලිය. ක‍්‍රිකට් තරගයේ සිදුවන දේවල් ගැන බොහෝ අයට තරගය අදාළ නැත. රෝයල්-තෝමස්, ආනන්ද-නාලන්ද, ඞී.එස්-මහානාම ආදී ක‍්‍රිකට් තරගවලදීද සංගීතය සැපයේ. ඒ ක‍්‍රිකට් තරගවල ආදි සිසුන් සහභාගි වන පේ‍්‍රක්ෂකාගාරවලට මත්පැන්ද සැපයේ. එමගින්ද බලාපොරොත්තු වන්නේ විනෝද වීමය. සාදයකට එක්වීමය.
ඉහත කී දැවැන්ත සාද වර්ග දෙකට පොලීසිය කඩා වැදුණොත් මොනවා වේවිද? කිසිදු මත්ද්‍රව්‍යයක් හෝ මත් පෙත්තක් හමු නොවනු ඇතිද? මේ දැවැන්ත සාදවල සංවිධායකයන් වන මාධ්‍ය ආයතන එවැනි කිසිවක් හමු නොවනු ඇතැයි සහතික කොට කීවත් අපට එය විශ්වාස කළ හැකිද? එම මාධ්‍ය ආයතනවල තර්කණයට අනුව ‘හිරු පාටි’, ‘දෙරණ පාටි’ ආදි ලෙස නම් කළ හැකි සාදවල මත්ද්‍රව්‍ය ඇති බව පොලීසියට ඇමතුමක් දුන්නොත් පොලීසිය වටලනු ඇතිද? (කෙනෙකුට ඕනෑ නම් එවැනි සාදයක් පවතින මොහොතක පොලීසියට ඇමතුමක් දී එය අත්හදා බැලිය හැකිය.*
පන්නිපිටියේ සාදය
අපේ මේ සටහන මුල්වෙන සිදුවීම පන්නිපිටියේ දෙපානම අරලිය උයන නම් ප‍්‍රදේශයේ ස්ථානයකට කඩා වැදී එහි සිටි 77 දෙනෙකු පොලීසිය බලහත්කාරයෙන් අත්අඩංගුවට ගැනීමේ සිදුවීමකි. එය සිදුව තිබුණේ මාර්තු 08 වැනිදාය. කැමරා රැුගත් මාධ්‍යවේදීන් යැයි කියාගත් පිරිසක්ද එතැනට කඩා වැදී එම නිවැසියන්ගේ මුහුණු බලහත්කාරයෙන් වීඩියෝ කර තිබුණි.
මෙලෙස පෞද්ගලික අවකාශයකට කඩා වැදීම, බලහත්කාරයෙන් ඔවුන්ගේ පෞද්ගලිකත්වයට බාධා කරමින් මාධ්‍යවලින් ප‍්‍රසිද්ධ කිරීම ආදි වැරදි පොලීසිය හා මාධ්‍ය ආයතන පාර්ශ්වයෙන් කර තිබුණි. මෙලෙස මුහුණු පෙන්වූ තරුණ කාන්තාවන් ඇතුළු පිරිස මත්පෙති හා මත්ද්‍රව්‍ය පාවිච්චි කළ බවද මාධ්‍යවලින් ප‍්‍රසිද්ධ කර තිබුණි.
මෙලෙස කැමරාවලින් වීඩියෝ කරමින් හිංසාවට ලක්වූ පිරිස අතර තරුණියෝ 17 දෙනෙක්ද වූහ. ඒ කාන්තා දිනය වුණත් කැමරාවලින් නැවත නැවත පෙන්වමින් වැඩිම හිංසාවකට ලක් වුණේ මේ තරුණියන්ය.
අන්තිමේ බලහත්කාරයෙන් අත්අඩංගුවට ගත් පිරිස මාර්තු 09 වැනිදා ගංගොඩවිල මහේස්ත‍්‍රාත් අධිකරණයට ඉදිරිපත් කර තිබුණි. එලෙස අත්අඩංගුවට ගත් අය අතරින් රක්ෂිත බන්ධනාගාරගත කරන ලෙස නියෝග කර තිබුණේ සිව්දෙනෙකු පමණි. මත්පෙති ළඟ තබාගත් බවට කරුණු ඉදිරිපත් කර තිබුණේ එක් අයෙකු පිළිබඳවය. ගංජා ළඟ තබාගත් බවට කරුණු ඉදිරිපත් කර තිබුණේ දෙදෙනෙකු පිළිබඳව පමණි. අනෙක් පුද්ගලයා සාදය සංවිධානය කළ කෙනා ලෙස අත්අඩංගුවට ගෙන තිබුණි. ඒ හැරුණාම අනෙක් අය ගංජා හෝ මත්පෙති ළඟ තබාගත් බවට පොලීසිය කරුණු ඉදිරිපත් කර නැත.
එයින් අදහස් වෙන්නේ 73 දෙනෙකු නිකරුණේ අත්අඩංගුවට ගැනීමක් සහ මාධ්‍යවලින් හිංසාවට ලක් කිරිමක් වූ බවය.
‘77 දෙනෙකු පොලිස් භාරයට ගත් අතර ඔවුන් සන්තකයේ තිබී මත්පෙති ඇතුළු විවිධ වර්ගයේ මත්ද්‍රව්‍ය සොයාගත්තා.’ මේ සිදුවීම පිළිබඳ වාර්තාකරණයේදී ස්වර්ණවාහිනියේ ප‍්‍රවෘත්ති නිවේදකයා එසේ කියා තිබුණි. අනෙක් මාධ්‍ය ආයතනද අඩු වැඩි වශයෙන් එම සාදයේ සිටි සියලූදෙනා අත මත්ද්‍රව්‍ය තිබුණු බව හඟවා තිබුණි. එහෙත් එම ප‍්‍රකාශය සම්පූර්ණ ව්‍යාජයක් බව අධිකරණයට ඉදිරිපත් කිරීමෙන් පසුව පැහැදිලි විය.
ඇත්තෙන්ම අධිකරණයට ඉදිරිපත් කිරීමට පෙර එම සිදුවීම ගැන ප‍්‍රවෘත්ති වාර්තා නරඹන විටම 77 දෙනාටම එල්ලකළ මත්ද්‍රව්‍ය චෝදනාව ව්‍යාජයක් බව පෙනේ. වැටලීමෙන් පසු හමුවූ ‘භාණ්ඩ’ මේසයක් මත තබාගෙන වීරයන් මෙන් පොලිස් නිලධාරීන් සිටින අන්දම වීඩියෝවලින් පෙන්වා තිබුණි. මත්පැන් බෝතල් දෙකක්, බියර් කෑන් දෙකක් හා වතුර බෝතලයක් ඇතුළු නීති විරෝධී නොවන භාණ්ඩවලට අමතරව එහි පෙන්වුවේ කුඩා කොළයක එතූ පෙති දෙකක් හා කුඩා ප‍්‍රමාණයේ ගංජා පැකට් තුනක් පමණි. එම වීඩියෝවේ සටහන්ව තිබුණු පොලිස් නිලධාරීන් පවා කලකිරීමෙන් මෙන් එම ‘නඩු භාණ්ඩ’ දෙස බලාසිටින අන්දම වීඩියෝවල සටහන් වී තිබුණි. එය කන්දක් විළි ලා මී පැටියෙකු වැදීමක් විය.
සමාජ මාධ්‍ය පාවිච්චිය වැඩි නූතනම යුගයේ ‘සයිබර් බුලි කිරීම්’ හෙවත් අන්තර්ජාලය පාවිච්චි කරමින් පුද්ගලයන් හිංසාවට ලක් කිරීම් පිළිබඳව අපි නිතර කතා කරන්නෙමු. මාධ්‍ය ආයතන හා පොලීසිය එක්ව කරමින් ඉන්නේද මාධ්‍ය හා පොලිස් බලය පාවිච්චි කරමින් පුද්ගලයන්ට හිංසා කිරීමකි.
කාන්තාවන් භාණ්ඩ වීම
කාන්තා දිනයේ බලහත්කාරයෙන් කඩා වැදී අත්අඩංගුවට ගැනීමෙන් පසුව එම ප‍්‍රවෘත්ති විකාශය කළ මාධ්‍ය ආයතනවලින් එම සාදයේ තිබුණු ‘නරක දේවල්’ හඳුන්වන වාක්‍යය කිහිපයක් විය. ෆේස්බුක් මගින් සංවිධානය කිරීම, ගංජා තිබීම, මත්පෙති තිබීම, මත්පැන් තිබීම හා ‘කාන්තාවන් සිටීම’ යන්න එම ‘නරක දේවල්’ ලැයිස්තුවේ තිබුණි. නෙත් වෙබ් අඩවියේ එම වැටලීම ගැන සඳහන් ප‍්‍රවෘත්තියේ ගංජා සහ මත්පෙති ගැන සඳහන් කරන්නටත් කලින් සඳහන් කර තිබුණේ කාන්තාවන් සිටීම ගැනය. හිරු ටීවී ආයතනය මෙම සාදය ගැන තමන්ගේ ප‍්‍රවෘත්ති වාර්තාවේ සිරස්තලයට ‘තරුණියන් 17 දෙනෙකු ඇතුළු’ යනුවෙන් යොදා තිබුණි.
මේ සාදයේ කාන්තාවන් සිටීම විශේෂයෙන් ඉස්මතු කරන්නේ ඇයි? මේ සාදය ගැන කිසිදු වාර්තාවක පිරිමින් 60ක් සිටි බව සඳහන් කර නැත්තේ ඇයි?
පිරිමින් සිටීමට වඩා විශේෂ වරදක් ලෙස ‘කාන්තාවන් සිටීම’ සලකනවාද? නැතිනම් මේ සාදයේ තිබුණු, එහෙත් නොතිබිය යුතු බව ඔවුන් සිතන ‘භාණ්ඩ’ ලැයිස්තුවේ තවත් දිගුවක් ලෙස කාන්තාවන් සිටීම සලකන බව ඒ ගැන කල්පනා කිරිමේදී පැහැදිලිවම පෙනේ.
මේ මාධ්‍ය සදාචාර ‘වරදක්’ බව විශ්වාස කරන ‘භාණ්ඩ’ ලැයිස්තුවක තවත් දිගුවක් ලෙස ‘කාන්තාවන්’ යන්නද එකතු කර ඇති බව එම ප‍්‍රවෘත්ති කියවන විට පෙනේ. මේ මාධ්‍ය ආයතන ජීවත් වෙන්නේ කෙබඳු යුගයකද යන්න එයින්ම වැටහේ.
මත්ද්‍රව්‍ය
මෙවැනි සාදයකට කාන්තාවන් සහභාගි වූ නිසා එවැනි සාදයක් විශේෂයෙන් ‘නීති විරෝධී’ නොවේ. මත්පැන් තිබූ නිසාද නීති විරෝධී නොවේ. නීති විරෝධී යැයි කිව හැක්කේ පුද්ගලයන් සිව්දෙනෙකු අත තිබුණායැයි කියන නීතිවිරෝධී මත්ද්‍රව්‍ය සුළු ප‍්‍රමාණය නිසා පමණි. මේ සාදයෙන් මත්ද්‍රව්‍ය ළඟ තබාගත් නිසා බන්ධනාගාරගත කරන්නට හැකිව ඇත්තේ සිව්දෙනෙකු පමණක් වීම මෙම වැටලීම කෙතරම් අකාර්යක්ෂම සහ අසාධාරණ එකක්ද යන්න තහවුරු කරන කාරණයකි.
මත්ද්‍රව්‍ය නවත්වන්නට පොලීසියට ඇති වඩා කාර්යක්ෂම ක‍්‍රමය වන්නේ කිහිපදෙනෙකු අතේ හෝ මත්ද්‍රව්‍ය තිබෙනු ඇතැයි අනුමාන කරමින් සාදවලට කැමරා කණ්ඩායම් රැගෙන කඩාවැදීම නොවේ. සාමාන්‍යයෙන් ලංකාවේ තරුණ පිරිස් නිතර පාවිච්චි කරන ගංජා වර්ගය ඉන්දියාවෙන් ගෙන්වන කේරළ ගංජා නම් ගංජා වර්ගය වේ. නැතිනම් ලංකාවේම කොහේ හෝ වවන ගංජාය. මේ සාදයේ ඇතැයි කියන මත්පෙති වර්ග විදෙස් රටවලින් ගෙන්වූ ඒවා විය යුතුය.
මෙම සාදයේ හෙරෝයින් වැනි බරපතළ ගණයේ මත්ද්‍රව්‍ය තිබී නැත. එවැනි මත්ද්‍රව්‍ය මැඬලීම පවා මෙවැනි සාද වැටලීමෙන් කළ නොහැක. මේ මත්ද්‍රව්‍ය හා මත්පෙති නීතියට යටින් කර්මාන්තයක් ලෙස පවතී. කර්මාන්තය නවත්වන්නට අවංක වුවමනාවක් තිබේ නම් තැනින් තැන පාරිභෝගිකයන් ඇල්ලීමෙන් පමණක් තේරුමක් නැත. මහා පරිමාණ ව්‍යාපාරිකයන් අල්ලාගත යුතුය. ඒ කටයුත්ත කරන්නට ‘කොන්දක්’ පොලීසියට තබා, සදාචාරය ගැන කතාකරන මාධ්‍ය ආයතනවලට පවා නැත.
අධිකරණයේදී
වඩා ඛේදජනක සිදුවීම වන්නේ වැටලීම අවසන්ව, වැටලීමෙන් අත්අඩංගුවට ගනු ලැබූ බහුතර පිරිසක් නීතිවිරෝධී මත්ද්‍රව්‍ය ළඟ තබාගෙන නැති බව තහවුරු වීමෙන් පසුවද අත්අඩංගුවට ගත් අය හා ඔවුන්ගේ පවුල්වල අය අපහසුතාවට ලක් කිරීමය. තමන්ගේ පවුල්වල අය කිසිදු වරදක් කර නැති බව පෙනී යෑමෙන් පසුව අධිකරණය ඉදිරිපිට එක්රැස් වූ එම පවුල්වල සාමාජිකයන්ද මාධ්‍යවලින් බලහත්කාරයෙන් වීඩියෝ සහ ඡුායාරූපවලට හසු කරගෙන තිබුණි. එහෙත් ඔවුන්ගේ අදහස්වලට මාධ්‍ය ඉඩක් ලබාදී තිබුණේ නැත. ඒ වෙනුවට ස්වර්ණවාහිනී ආයතනය මහපාරේ සිටින සාමාන්‍ය පුද්ගලයන්ගේ අදහස් මෙම ප‍්‍රවෘත්ති විකාශයේ අගට එකතු කර තිබුණි. ‘දෙමාපියන් වගකියන්නට ඕනෑ’ ආදි සාමාන්‍ය ජනතාවගේ අදහස් ප‍්‍රවෘත්තියේ අගට එල්ලමින්, මෙම සාදය මහා ඛේදවාචකයක් ලෙස හුවා දක්වන්නට උත්සාහ කර තිබුණි. එහෙත් සැබෑ ඛේදවාචකය වන්නේ තරුණ තරුණියන් සාදයකදී විනෝද වීම නොව ඒවා කඩාකප්පල් කොට විනෝදයක් ලබන මෙවැනි මාධ්‍ය ආයතනය.
මේ ආකාරයෙන් බාලවයස්කාර ළමයින් පිරිසක් අත්අඩංගුවට ගැනීම නීති විරෝධි බව පවසමින් හා එම අත්අඩංගුවට ගැනීම් කරන අවස්ථාවේදී කැමරා රැුගත් මාධ්‍යවේදීන් කියාගන්නා පිරිසක් අදාළ වැටලීම්වලට එකතු කරගනිමින් එම ළමයින්ගේ පෞද්ගලිකත්වයට හානිවන පරිදි මාධ්‍ය හරහා පෙන්වීමෙන් එම පිරිසගේ මූලික අයිතිවාසිකම් කඩවන බවය. මෙසේ මාධ්‍ය සම්බන්ධ කරගනිමින් වැටලීම් සිදු කිරීමෙන් අනතුරුව කිසිදු වැරැුද්දක් නොකර ඇති බවට අධිකරණයේදී දරුවන් නිවැරදිකරුවන් වුවද මාධ්‍ය හරහා පෞද්්ගලිකත්වය ආනාවරණය කිරීමෙන් අනතුරුව ඔවුන් සමාජය හමුවේ අපහසුතාවට පත් වන බවත් මෙසේ කිරීම නීති විරෝධි බවත් පවසමින් මාර්තු 10 වන දින ලංකා ගුරු සංගමය ජාතික ළමාරක්ෂක අධිකාරියට හා පොලිස් කොමිසමට පැමිණිල්ලක් කර ඇත.x
