No menu items!
25.1 C
Sri Lanka
19 November,2026

බලංගොඩට එක නීතියක්! රාජාංගණේට එක නීතියක් ..ඒත් නීතිය හැමෝටම සමානයිලු

Must read

රාජාංගණේ සද්ධාරතන හිමි අනුරාධපුර පොලිසිය විසින් අත්අඩංගුවට ගැනෙන්නේ නොවැම්බර් 18 වැනිදා ය. පොලිසිය එසේ කරන්නේ තමන්ගේ කැමැත්තෙන් නොවේ. අනුරාධපුර ප්‍රධාන මහේස්ත්‍රාත්වරයා, රාජාංගණේ හිමි අත්අඩංගුවට ගෙන උසාවියට ඉදිරිපත් නොකරන්නේ ඇයිදැයි, නොවැම්බර් 26 වැනි දා පෞද්ගලිකව ම උසාවියේ පෙනීසිට පැහැදිලි කරන්නැයි අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරීට නියම කළ දිනට පසුදා ය.

බලන්ගොඩ කස්සප හිමි සහ පිරිස රුවන්වැලි සෑය අසළ සත්‍යග්‍රහයක් පටන්ගැනීම බොහෝ දෙනාගේ විරෝධයටත් සමච්චලයටත් හේතුවිය. ඔහු ගැන බොහෝ දෙනකුගේ සිත්වල තිබෙන්නේ ඉතා ම අප්‍රසන්න සිතුවිලි ය. ඔහු හැසිරෙන කතාබහ කරන ආකාරය එම අප්‍රසන්නතාව තවත් දියුණු තියුණු කරයි. එහෙත්, ඔවුන් කුමන අරමුණකින් වුව ද ඇරඹූ සත්‍යග්‍රහය සාමකාමී එකක් විය.

රාජාංගණේ සද්ධාරතන හිමි හෙල්මට් අතින් ගත් මැරයන් ද පිරිවරාගෙන එතැනට කඩාපනින්නේ ගැටුමක් ඇතිකර ගැනීමේ එක ම අරමුණෙන් බව සාමාන්‍ය සිහිබුද්ධියක් තිබෙන ඕනෑ ම කෙනෙකුට දැනේ. පෙනේ. එහෙත් අනුරාධපුර පොලිසියටත් එහි ලොකු ලොක්කන්ටත් එය නොපෙනුණේ ය. ඒ, එවැන්නක් සිදුවන්නට යන බව ඔවුන් හොඳින් ම දැනසිටි නිසා මිස වෙන කාරණයක් නිසා නොවේ. ‘බලාගෙන සිටින්නට’ කවුරුන් හෝ ඔවුන්ට නියම කර නොතිබුණා නම්, ගැටුම වළක්වාගන්නට හැකියාව ඔවුන් වෙත නොඅඩුව තිබිණ.

රාජාංගණේ සද්ධාරතන ඇතුළු මැරයන් පිරිස කඩාපැන මුලින් ම පහර දෙන්නට ගත්විට බලන්ගොඩ පාර්ශ්වයේ සිවුරු හැඳි සහ නොහැඳි සියලු දෙනා ද සටනට වන්හ. මුලින් ආත්මාරක්ෂාව පිණිස ද, පසුව පහර දී එළවා දැමීම පිණිස ද ඔවුහු අතින් පයින් හා පොලුවලින් සටන් කළහ.

එහෙත්, ගැටුමෙන් පසු පොලිසිය අත්අඩංගුවට ගත්තේ බලන්ගොඩ පාර්ශ්වයේ පිරිස පමණි. ඔවුහු රිමාන්ඩ් කැරුණාහ. රාජාංගණේ හිමි තුවාල ලබා පිටව ගොස් නිරුපද්‍රැතව කල්ගෙවමින් සිටියේ ය.

පැහැදිලි කාරණාව නම්, රාජාංගණේ හිමි ප්‍රමුඛ පිරිස කරන්නට යන වැඩේ ගැන පොලිසිය දැනුවත්ව සිටි බවත්, ඒ වැඩේ වනාහි ආණ්ඩුවට අවශ්‍යව තිබෙන දෙය බවත් ය. සත්‍යග්‍රහයට කඩාපැනීම, බලන්ගොඩ පාර්ශ්වයට ප්‍රහාර එල්ල කිරීම මෙන් ම පොලිස් අත්අඩංගුවට පත්වීමෙන් තොරව එතැනින් පිටව යාමට හැකිවීම කියන සියලු ජවනිකා පොලිසිය දැනුවත්ව සිදු වූ බවට සැකයක් නැත. පොලිසිය දැනුවත්ව සිටියා ය කියන්නේ, ආණ්ඩුව ද එය දැනසිටි බව ය. ආණ්ඩුව දැනසිටියා ය කියන්නේ, එය ආණ්ඩුවේ වුවමනාවට සිදුවූවක් බව ය.

කවුරුන් කැමති අකමැති වුණත්, බලන්ගොඩ කස්සප යනු පසුගිය දවස්වල ආණ්ඩුවට හිසරදයක් බවට පත්ව තිබුණු චරිතයකි. කොළඹ දී ආණ්ඩුවට කරදර කළ හෙතෙම, ඉන්පසු අනුරාධපුරයට ගොස් කරදර කරන්නට පටන් ගත්තේ ය. කොළඹ දී ආණ්ඩුව නීතියට මුවා වී කස්සප හිමි ඇතුළු පිරිස පලවාහරින්නට සමත්විය.

එහෙත්, අනුරාධපුරයේ දී එය ම කරගන්නට ආණ්ඩුවට නොහැකි විය. ඒ නිසා ආණ්ඩුව කළේ රාජාංගණේ හිමි ඇතුළු මැරයන් පිරිසට ‘රා පොවා’ වැඩේට බස්සවා එක ගලෙන් කුරුල්ලන් දෙදෙනකු එලා ගැනීම ය. එක, බලන්ගොඩ කස්සප හිරේට යැවීම ය. දෙක, හාමුදුරු-හාමුදුරු ගැටුමක් අවුළුවා, එයට පුළුල් ප්‍රචාරයක් ලබා දී, භික්ෂූන් අතර සිටින මෙවැනි කරදරකාරී චරිතවලට එරෙහිව සමාජ මතයක් හැදීම ය.

තමන් නොගෑවී, තමන්ට වුවමනා ප්‍රජාතන්ත්‍ර විරෝධී ජඩ වැඩ කරගැනීමට හැමදාම ලංකාවේ ආණ්ඩු පසුබැස්සේ නැත. මහාචාර්ය එදිරිවීර සරච්චන්ද්‍රට ජේආර් ජයවර්ධන පහරදුන්නේ ආණ්ඩුවේ යැ’යි නොපෙනෙන මැරයන් යොදාගෙන ය. චන්ද්‍රිකා ජනාධිපතිනියගේ කාලයේ දී ඒ සඳහා බැද්දගානේ සංජීව ඇතුළු කණ්ඩායමක් පත්කර තිබිණි. මහින්ද රාජපක්ෂ මහතා මේ කාර්යයෙහි ලා මහා සමතෙකි. ෂිරාණි බණ්ඩාරනායක අගවිනිසුරුවරිය ධුරයෙන් ඉවත්කිරීමට විරුද්ධව නීතිඥවරුන් ඇතුළු පොදුජනතාව මහමඟ විරෝධය පාද්දී මහින්ද රාජපක්ෂගේ බැලයන් හා මැරයන් ‘රා පොවා’ පාරට බස්සවා තිබුණේ, පොලු මුගුරු අතැතිව ය. අලුත්කඩේ උසාවි සාවියේ පොලු රැගත් මැරයන් බය නැතිව සැරිසරන හැටි ඒ දවස්වල පත්තරවලට හොඳ ඡායාරූප විය. රනිල් වික්‍රමසිංහ ජනාධිපති වූ විගස, ගොල්ෆේස් අරගල භූමියට මැරයන් යොදා මහ රෑ පහර දුන්නේ ය. මේ හැම අවස්ථාවක දී ම, ‘කළේ ආණ්ඩුවයැ’යි හැමෝ ම දන්නා නමුත්, හරියටම වැඩේ කළේ කා ලවා දැයි දැනගන්නට ලැබුණේ නැත. ඒ නිසා ආණ්ඩුවට සාන්ත දාන්තව සිටිය හැකිවිය.

ජාජබ ආණ්ඩුව ද, අනුරාධපුරයේදී කළේ පරණ ආණ්ඩුවල මේ වැඩේ ම ය. තමන් එළිපිට නොපැටලී, කස්සප හිමිටත් වඩා පාරාජිකා වූවකු යොදාගෙන ප්‍රහාරයක් එල්ල කොට, සත්‍යග්‍රහය කඩාකප්පල් කිරීමට ආණ්ඩුවට හැකිවිය.

පොලිසිය, කස්සප හිමි පමණක් අත්අඩංගුවට ගන්නටත්, රාජාංගණේ හිමි දෙස නොබලා ඉන්නටත් එක ම හේතුව එය ය. අන්තිමේ දී කස්සප හිමියන්ගේ නීතිඥයන්ගේ ඉල්ලීම නිසා, රාජාංගණේ හිමි අත්අඩංගුවට ගන්නේ නැත්තේ ඇයිදැයි පොලිසියෙන් අසන්නට මහේස්ත්‍රාත්වරයාට සිදුවිය.

හරියට බැලුවොත්, කස්සප හිමිට විරුද්ධව නීතිය ක්‍රියාත්මක විය. රාජාංගණේ හිමිට විරුද්ධව නීතිය ක්‍රියාත්මක වුණේ අසමානව ය. හේතුව පැහැදිලි ය. රාජාංගණෙන් සිදුවුණේ ආණ්ඩුවට වුවමනා, ආණ්ඩුව අණ කළ කාර්යය නිසා ය. එහෙත් ආණ්ඩුව තවමත් කියන්නේ, නීතිය හැමෝට ම සමානව ක්‍රියාවේ යොදවන බවයි.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි