No menu items!
24.5 C
Sri Lanka
18 November,2026

රාජාංගණයේ හිමි අත්අඩංගුවට නොගත්තේ ඇයි? උසාවියට පැමිණ කරුණු දක්වන ලෙස පොලිස් ලොක්කාට නියෝගයක්

Must read

  • තිවංක සපරමාදු

අනුරාධපුර රුවන්වැලි සෑය ආසන්න දන්සැල් කලාපයේදී බලන්ගොඩ කස්සප හිමි ඇතුළු කිහිප දෙනකු පවත්වාගෙන ආ සත්‍යග්‍රහයේදී ඇති වූ ගැටුමට මුල් වූ බව කියන රාජාංගණයේ සද්ධාරතන හිමි ඇතුළු සෙසු සැකකරුවන් අත්අඩංගුවට ගෙන අධිකරණයට ඉදිරිපත් නොකරන්නේ ඇයිදැයි, නොවැම්බර් 26දා විවෘත අධිකරණය හමුවේ පෞද්ගලිකවම පෙනීසිට කරුණු දක්වන ලෙස අනුරාධපුර ප්‍රධාන මහේස්ත්‍රාත් සසිඳු වික්‍රමරත්න අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී ප්‍රසන්න බ්‍රාහ්මණගේට නොවැම්බර් 17දා නියෝග කළේය.

ප්‍රධාන මහේස්ත්‍රාත්වරයා මෙසේ නියෝග කළේ, එම ගැටුමේදී රාජාංගණයේ සද්ධාතිස්ස හිමියන්ට පහරදී තුවාල සිදුකිරීම හා පොලිස් නිලධාරීන්ගේ රාජකාරියට බාධාකිරීම යන චෝදනා යටතේ දැනට රිමාන්ඩ් බන්ධනාගාර ගතකොට සිටින බලන්ගොඩ කස්සප හිමි සමග රිමාන්ඩ් කර ඇති භික්ෂූන් සිව්දෙනා හා කාන්තාවක ඇතුළු පුද්ගලයන් තිදෙනාට ඇප ඉල්ලමින් ඔවුනගේ නීතිඥවරුන් මෝසමක් ඉදිරිපත් කරමින් දැක්වූ කරුණු සැලකිල්ලට ගනිමිනි. කස්සප හිමි ඇතුළු පිරිස නොවැම්බර් 26දා නැවත අධිකරණයට ඉදිරිපත් කිරීමට නියමිතය.

ඔවුන් වෙනුවෙන් පෙනීසිටි නීතිඥවරුන් අධිකරණයට කියාසිටියේ, තම සේවාදායක භික්ෂූන් සහ අනෙක් පිරිස සමඟ ගැටුමකට මුල පුරමින් කලහකාරී තත්ත්වයක් ඇතිකළ රාජාංගණයේ සද්ධාරතන හිමි ඇතුළු පුද්ගලයන් 25කට අධික පිරිසක් වහාම අත්අඩංගුවට ගෙන අධිකරණයට ඉදිරිපත් කළ යුතු වුණත්, අනුරාධපුර පොලිසිය හිතාමතාම ඔවුන් අත්අඩංගුවට නොගෙන සිටින බවයි.

නීතිඥවරුන් තවදුරටත් පැවසුවේ, ගැටුමට මූලිකවම වගකිව යුත්තේ අනුරාධපුර මූලස්ථාන ප්‍රධාන පොලිස් පරීක්ෂකවරයා ඇතුළු එම ස්ථානයේ රාජකාරියේ යොදවා සිටි පොලිස් නිලධාරීන් බවයි. ගැටුමක් ඇති නොවීමට වග බලාගැනීමට පොලිසියට හැකියාවක් තිබියදී, සද්ධාරතන හිමි ඇතුළු මැර කණ්ඩායම්වලට නීතිය අතට ගෙන, නොතිබූ ගැටුමක් ඇතිකිරීමට පොලිසිය ඉඩ දුන් බවද ඔවුහු අධිකරණයට කීහ.

තම සේවාදායක භික්ෂූන් ඇතුළු අනෙකුත් සැකකරුවන්ට ඇප ලබා දීමට ඇප පනත අනුව මහේස්ත්‍රාත් අධිකරණයට බලය තිබෙන බවත්, ඔවුන් තවදුරටත් බන්ධනාගාරගත කර තැබීමේ අවශ්‍යතාවක් නැති බවත් නීතිඥවරු වැඩිදුරටත් සඳහන් කළහ.
අනුරාධපුර ප්‍රධාන මහේස්ත්‍රාත් සසිඳු වික්‍රමරත්න, සැකකරුවන්ට ඇප ලබාදීම ප්‍රතික්ෂේප කළේය.

​

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි