පාර්ලිමේන්තුවට ඉදිරිපත් කර ඇති සංවිධානාත්මක අපරාධ වැළැක්වීමේ පනත් කෙටුම්පතේ ඇතැම් වගන්ති ආණ්ඩුක්‍රම ව්‍යවස්ථාවට පටහැනි බව පවසමින් ගොනු කර ඇති පෙත්සම් සම්බන්ධ විභාගය අද (9) ශ්‍රේෂ්ඨාධිකරණය හමුවේ යළි ආරම්භ කිරීමට නියමිතය.
අගවිනිසුරු ප්‍රීති පද්මන් සූරසේන මහතාගේ සභාපතිත්වයෙන් යුත් අචල වෙංගප්පුලි සහ සම්පත් අබේකෝන් යන විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ලක් හමුවේ මෙම පෙත්සම් විභාගය පැවැත්වීමට නියමිත බවය.
මීට පෙර පෙත්සම් සලකා බැලූ අවස්ථාවේදී පනත් කෙටුම්පතට සිදු කළ යුතු බවට යෝජනා කරන සංශෝධන ඇත්නම් ඒවා ලිඛිතව අධිකරණයට ඉදිරිපත් කරන ලෙස ශ්‍රේෂ්ඨාධිකරණය පෙත්සම්කරුවන්ට නියෝග කර තිබිණි. ඒ අනුව පෙත්සම්කරුවන් වෙනුවෙන් පෙනී සිටින නීතිඥවරු පසුගිය බ්‍රහස්පතින්දා (5) සිය ලිඛිත කරුණු දැක්වීම් අධිකරණයට ඉදිරිපත් කළහ.
ඒ අනුව අදාළ පනත් කෙටුම්පතට එරෙහිව ගොනු කර ඇති පෙත්සම් විභාගය අද දෙවැනි දිනයටත් පැවැත්වීමට නියමිතය. සංවිධානාත්මක අපරාධ වැළැක්වීමේ පනත් කෙටුම්පතට එරෙහිව මේ වන විට ශ්‍රේෂ්ඨාධිකරණය හමුවේ පෙත්සම් 26ක් ගොනු කර තිබේ.
