ආසියානු ගුවන්විදුලි හා රූපවාහිනී සංගමයේ (ABU) සමුළුව කොළඹදී පැවැත්වීම සඳහා පෞද්ගලික රූපවාහිනී නාලිකාවකට රුපියල් මිලියන 101ක මුදලක් රජය විසින් ලබාදීම සම්බන්ධයෙන් නොවැම්බර් 04 දින පාර්ලිමේන්තුවේදී ප්‍රශ්න කළ අතර සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් මහතා මේ සම්බන්ධයෙන් ප්‍රශ්න කරමින් සඳහන් කළේ, සමුළුව සඳහා රජය රුපියල් මිලියන 101ක මුදලක් නිදහස් කර ඇති බවට තොරතුරු ලැබී ඇති බවයි. එහෙත් ජනමාධ්‍ය විෂය භාර අමාත්‍යවරයා රජයේ මුදල් සමුළුව සඳහා භාවිත කර නොමැති බව ප්‍රකාශ කර ඇතැයි ද ඔහු පැවසීය.
“සමුළුව සඳහා වියදම් කිරීමට රජය රුපියල් මිලියන 101ක් ලබාදී ඇති බවට අපට තොරතුරු තිබෙනවා. රජයේ මුදල් භාවිත කර නැත්නම් ජනාධිපති අනුර කුමාර දිසානායක මහතා ඒ සඳහා කැබිනට් අනුමැතිය ඉල්ලා සිටියේ ඇයි? කැබිනට් මාධ්‍ය හමුවේදී අමාත්‍යවරයා අසත්‍ය ප්‍රකාශයක් කළේ ඇයිද යන්න ප්‍රශ්නයක්” යැයි මුජිබර් රහුමාන් මහතා පැවසීය.
2014 වසරේදී හිටපු අමාත්‍ය බැසිල් රාජපක්ෂ මහතා සංචාරක ප්‍රවර්ධන කාර්යාංශයේ රුපියල් මිලියන 7.8ක මුදලක් සංචාරක ප්‍රවර්ධනයේ මුවාවෙන් ටී ෂර්ට් මුද්‍රණය කිරීම සඳහා යොදාගත් බවට චෝදනා එල්ල වී ඔහුට එරෙහිව නඩු පවරා තිබූ බව ද මන්ත්‍රීවරයා සිහිපත් කළේය.
“නීතිය ඉදිරියේ සියලු දෙනා සමාන නම් එම මූලධර්මය සියලු දෙනාටම අදාළ විය යුතුයි” යැයි ද ඔහු සඳහන් කළේය.
එම චෝදනාවලට පිළිතුරු දෙමින් සභානායක හා ප්‍රධාන ආණ්ඩු පක්ෂ සංවිධායක අමාත්‍ය නලින්ද ජයතිස්ස මහතා පැවසුවේ, බැසිල් රාජපක්ෂ මහතා අදාළ මුදල් සංචාරක ප්‍රවර්ධනය සඳහා නොව මැතිවරණ ප්‍රචාරක කටයුත්තක් සඳහා ටී ෂර්ට් මුද්‍රණය කිරීමට යොදාගෙන ඇති බවයි.
මුජිබර් රහුමාන් මන්ත්‍රීවරයා සඳහන් කළ රුපියල් මිලියන 101ක මුදල සංචාරක ප්‍රවර්ධන කාර්යාංශය විසින් සංචාරක ප්‍රවර්ධන කටයුතු සඳහා වැය කරන මුදලක් බව ද අමාත්‍යවරයා පැවසීය.
සංචාරක ප්‍රවර්ධන කාර්යාංශයට සංචාරක කර්මාන්තය ප්‍රවර්ධනය කිරීම සඳහා මුදල් වැය කිරීමට බලය ඇති බවත්, සරුංගල් උළෙලක්, කොළඹ මැරතන් තරගයක් සහ රග්බි තරගාවලියක් වැනි ක්‍රීඩා හා විනෝදාස්වාද වැඩසටහන් සඳහා ද එම කාර්යාංශය මුදල් වැය කර ඇති බවත් ඔහු සඳහන් කළේය.
කෙසේ වෙතත්, අමාත්‍ය නලින්ද ජයතිස්ස මහතා කැබිනට් මාධ්‍ය හමුවේදී කළ ප්‍රකාශ මගින් ජනතාව නොමඟ යවා ඇති බවට තමන්ගේ ස්ථාවරය වෙනස් නොවන බව මුජිබර් රහුමාන් මන්ත්‍රීවරයා අවධාරණය කළේය.
