මුදල් විශුද්ධිකරණය වැළැක්වීමේ පනත යටතේ යෝෂිත රාජපක්ෂ මහතාට එරෙහිව නීතිපතිවරයා විසින් ගොනු කර ඇති නඩුවේ වැඩිදුර සාක්ෂි විභාගය කොළඹ මහාධිකරණය හමුවේ ආරම්භ වී තිබේ.
කොළඹ මහාධිකරණ විනිසුරු උදේශ් රණතුංග මහතා ඉදිරියේ මෙම නඩු විභාගය පැවැත්වෙන බව වාර්තා වේ. පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර මහතාගේ මෙහෙයවීම යටතේ සාක්ෂි සටහන් කරගැනීම ආරම්භ කර ඇත.
දෙහිවල සහ රත්මලාන ප්‍රදේශවල පිහිටි ඉඩම් කැබලි පහක් මිලදී ගැනීම සඳහා රුපියල් මිලියන 73කට අධික මුදලක් වැය කිරීම තුළින් යෝෂිත රාජපක්ෂ මහතා මුදල් විශුද්ධිකරණය වැළැක්වීමේ පනත යටතේ වරදක් සිදුකර ඇති බවට චෝදනා කරමින් නීතිපතිවරයා මෙම නඩුව ගොනු කර තිබේ. අදාළ චෝදනා සම්බන්ධයෙන් කොළඹ මහාධිකරණය හමුවේ නඩු විභාගය තවදුරටත් පැවැත්වේ.
