රුපියල් මිලියන 1.74ක නඩත්තු මුදල් නොගෙවීම හේතුවෙන් මාස 29ක සිරදඬුවමක් නියම වී සිටියදී, හිටපු ජනාධිපති රනිල් වික්‍රමසිංහ මහතා විසින් ලබාදුන් ජනාධිපති සමාව යටතේ නිදහස් කළ පුද්ගලයකුගේ සමාව ශ්‍රේෂ්ඨාධිකරණය බලරහිත කර තිබේ.
මොහොමඩ් අමීන් මොහොමඩ් නසීම් නමැති මෙම පුද්ගලයාගේ නිදහස් කිරීමෙන් මූලික අයිතිවාසිකම් උල්ලංඝනය වී ඇති බවට තීන්දු කළ ශ්‍රේෂ්ඨාධිකරණය, ඔහුගේ මුල් සිරදඬුවම යළි බලාත්මක කරමින් වහාම නීතිය ක්‍රියාත්මක කරන බලධාරීන්ට භාරවන ලෙස නියෝග කර ඇත.
ඔහුගේ හිටපු බිරිඳ වන අහමඩ් ජලීල් ෆර්මිලා බීගම් විසින් ගොනු කළ මූලික අයිතිවාසිකම් පෙත්සමක් සලකා බැලීමෙන් අනතුරුව ඔක්තෝබර් 23 වැනිදා මෙම තීන්දුව ලබා දී තිබේ. ක්වාසි අධිකරණයේ නඩත්තු නියෝගයක් ක්‍රියාත්මක නොකිරීම හේතුවෙන් 2024 ජූලි මාසයේදී නසීම්ට මාස 29ක සිරදඬුවමක් නියම වී තිබිණි. එහෙත් 2024 සැප්තැම්බර් 12 වැනිදා සිරකරුවන්ගේ දිනය නිමිත්තෙන් ලබාදුන් පොදු සමාව යටතේ ඔහු නිදහස් කර තිබුණේ දඬුවමෙන් මාස දෙකකටත් අඩු කාලයක් ගත කිරීමෙන් පසුවය.
විනිසුරු ජනක් ද සිල්වා මහතා ප්‍රකාශයට පත් කළ තීන්දුවෙන්, නසීම්ගේ නිදහස් කිරීම ආණ්ඩුක්‍රම ව්‍යවස්ථාවේ 12(1) වගන්තියෙන් සහතික කර ඇති නීතිය ඉදිරියේ සමානාත්මතාව සහ නීතියේ සමාන රැකවරණය ලැබීමේ මූලික අයිතිවාසිකම උල්ලංඝනය කිරීමක් බව සඳහන් කර තිබේ. විනිසුරුවරුන් වන ආචාර්ය සෝභිත රාජකරුණා සහ සම්පත් කේ.බී. විජේරත්න යන මහත්වරු එම තීන්දුවට එකඟ වී ඇත.
නසීම්ට මෙම පොදු සමාව හිමිව තිබුණේ ඔහුගේ සිරගත කිරීමේ වරෙන්තුවේ දඬුවම “දඩයක්” නොගෙවීමක් ලෙස සඳහන් වී තිබීම හේතුවෙන් බව අධිකරණය නිරීක්ෂණය කර තිබේ. එහෙත් නඩත්තු මුදල් නොගෙවීම හේතුවෙන් සිරගතව සිටි තවත් පුද්ගලයකුට එම පොදු සමාව යටතේ හිමිව තිබුණේ සිරදඬුවමෙන් සතියක කාලයක් අඩු කිරීමක් පමණක් බව ද තීන්දුවේ සඳහන් වේ. වරෙන්තුවල වචන භාවිතයේ වෙනසක් මත පමණක් මෙවැනි අසමාන සැලකීමක් සාධාරණීකරණය කළ නොහැකි බව ශ්‍රේෂ්ඨාධිකරණය අවධාරණය කර ඇත.
ඒ අනුව, හිටපු ජනාධිපති රනිල් වික්‍රමසිංහ මහතා, අධිකරණ අමාත්‍යාංශයේ ලේකම්වරයා සහ බන්ධනාගාර කොමසාරිස් ජනරාල්වරයා විසින් පෙත්සම්කාරියගේ මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය තීන්දු කළේය. නසීම් රඳවා තබාගෙන සිරදඬුවම ක්‍රියාත්මක කිරීමට මීගමුව මහේස්ත්‍රාත් අධිකරණය නිකුත් කළ මුල් වරෙන්තුව තවදුරටත් වලංගු බව ද අධිකරණය පෙන්වා දී තිබේ.
කෙසේ වෙතත්, අදාළ කරුණු සලකා බලා නීත්‍යනුකූලව නව සමාවක් ලබාදීමට ජනාධිපතිවරයාට ඇති බලයට මෙම තීන්දුවෙන් බාධාවක් නොවන බව ද ශ්‍රේෂ්ඨාධිකරණය පැහැදිලි කර ඇත.
