ප්‍රමිතියෙන් තොර ඖෂධ ආනයනය කිරීමේ සිද්ධියට අදාළව නියම කළ සම්පූර්ණ වන්දි මුදල් ගෙවා නොමැති හිටපු අමාත්‍ය කෙහෙළිය රඹුක්වැල්ල මහතා ඇතුළු වගඋත්තරකරුවන් සිව්දෙනකු බැඳුම්කර මත මුදාහැරීමට ශ්‍රේෂ්ඨාධිකරණය නියෝග කර තිබේ. එමෙන්ම විදේශගත වීම ද තහනම් කර ඇත.
ප්‍රමිතියෙන් තොර ඖෂධ ආනයනය කිරීමේ ක්‍රියාවලියෙන් මූලික අයිතිවාසිකම් උල්ලංඝනය වී ඇති බවට මේ වසරේ මාර්තු මාසයේදී තීන්දු කළ ශ්‍රේෂ්ඨාධිකරණය, කෙහෙළිය රඹුක්වැල්ල මහතා ඇතුළු වගඋත්තරකරුවන් පස්දෙනකුට වන්දි ගෙවන ලෙස නියෝග කර තිබිණි. ඒ අනුව රඹුක්වැල්ල මහතාට රුපියල් මිලියන 75ක වන්දියක් ගෙවීමට නියම වූ නමුත්, ඔහු ගෙවා ඇත්තේ රුපියල් මිලියන 20ක් පමණක් බව ඔහුගේ නීතිඥවරයා අධිකරණයට දැනුම් දී ඇත.
නියම කළ සම්පූර්ණ වන්දි මුදල නොගෙවීම හේතුවෙන් අධිකරණයට අපහාසයක් සිදුකර ඇති බවට ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය ගොනු කළ මෝසමක් සලකා බැලීමෙන් අනතුරුව මෙම නියෝගය නිකුත් කර තිබේ. අගවිනිසුරු ප්‍රීති පද්මන් සූරසේන මහතාගේ සභාපතිත්වයෙන් යුත් ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල මෙම නියෝගය ලබා දී ඇත.
